Jihova * Nzambi, muéne ua bhange o dikaza dia dianga. O Bibidia i tu tangela kuila, muéne ua bhange o muhatu ua dianga, iu ua “mu bheka ku diiala.” Adá ua sangulukile kiavulu katé kia suku mu kuzuela: “Kiki kifuba kia tundu mu ifuba iami, xitu ia tundu mu xitu iami.” (Dimatekenu 2:22, 23) Jihova ua mesena hanji kuila o athu a zediue mu ukaza.

Mu ku kazala, o muthu u fika kuila ima ioso ia-nda tunda kiambote. Maji né muene o makaza a di zolo kiavulu mudiâ, a kala uá ni maka. (1 Kolindo 7:28) Mu kadivulu kaka, ua-nda sanga-mu ijila ia Bibidia, se u i belesela, i tena ku zediuisa o ukaza ni muiji uê.—Jisálamu 19:8-11.

IHI I ZUELA O BIBIDIA: O diiala muéne o mutuameni ua muiji.—Efezo 5:23.

Eie se u diiala, Jihova ua mesena kuila eie u zola kiavulu uhatu’ê. (1 Phetele 3:7) Nzambi ua bhange o muhatu phala n’a kale múkuatekexi uê, mukonda dia kiki, muéne ua mesena kuila eie u bhana kijingu kua muhatu’ê ni ku mu zola. (Dimatekenu 2:18) Eie ua tokala ku zola kiavulu muhatu’ê, ni ku ta ku pholo o ibhindamu iê.—Efezo 5:25-29.

Eie se u muhatu, Jihova ua mesena kuila eie u xila ni muxima uoso muadi uê ni ku mu kuatekesa ku kumbidila o kikalakalu kiê. (1 Kolindo 11:3; Efezo 5:33) Mu kuatekese ni muxima uoso kioso muéne kia batula maka ku muiji. (Kolose 3:18) Mu ku bhanga kiki, o muadi uê ni Jihova a-nda ku zola kiavulu.—1 Phetele 3:1-6.

IHI I U TENA O KU BHANGA:

• Ibhuidisa kaza diê, kiebhi ki u tena ku kala diiala mba muhatu uambote. Muivue kiambote kioso kia-nda zuela ni ku bhanga ioso phala ku lungulula o ukexilu uê

• Kala ni muanhu. Ku bhinga thembu iavulu phala kala muthu ku sangulukisa mukuá

IHI I ZUELA O BIBIDIA: Ua tokala ku ta ku pholo o ibhindamu ia mukuenu. (Filipe 2:3, 4) Bhana kijingu kua kaza diê mukonda Jihova ua mesena kuila, o jiselevende jê “a lendukila athu oso.” (2 Timote 2:24) ‘Saí athu uzuelelu uâ u toma ku mixima kala jiphondo ja xibhata; maji dimi-phe dia ji hete ja kuzuela, di bheka ku disanza.’ Mu kiki-phe, sola kiambote o izuelu iê. (Jisabhu 12:18) O nzumbi ia Jihova ia-nda ku kuatekesa kuzuela kiambote ni kaza diê ni henda ioso.—Ngalásia 5:22, 23; Kolose 4:6.

IHI I U TENA O KU BHANGA:

• Samba kua Nzambi phala ku ku tululukisa ande dia ku dikunda ni kaza diê maka a dikota alungu ni muiji

• Xinganeka kiambote ioso i ua-nda zuela ni kiebhi ki ua-nda zuela

IHI I ZUELA O BIBIDIA: Mu ku kazala, eie ni kaza diê mu kituka “xitu imoxi.” (Matesu 19:5) Maji mu athu a iiadi hanji, kala muthu ni ibanzelu iê. Mukonda dia kiki, mua tokala ku di longa o ku kala ni ibanzelu imoxi. (Filipe 2:2) Mu ku batula maka a moneka ku muiji, kima kiambote o makaza ku kala ni ibanzelu imoxi. O Bibidia i zuela: “Kaiula, kene ka fikidila kioso muthu kia kana ku bhanga.” (Jisabhu 20:18) Ehelenu o ijila ia Bibidia ku mi endesa kioso ki mu sota ku batula maka kumoxi ku muiji.—Jisabhu 8:32, 33.

IHI I U TENA O KU BHANGA:

• Di kunde ni kaza diê kana ngó maka oso-oso kana, maji mu tangele ué o ibanzelu iê, ni kiebhi ki ua mu divua

• Di kunde hanji ni kaza diê ande dia ku xikina ku bhanga kima