1, 2. Kiebhi o mundu kia lungulukile tundé mu izuua ia Noué, ni kiebhi kia divu Mbalamu?

 MBALAMU u tala ku tembulu ku mbanza ia Uli. a Kuenhoko kua mu tunda jibuia javulu ni dixi. O akunji a nzambi dieji, a mu bhana jisata. Xinganeka Mbalamu ku bhuka o mutué ni njinda. Mu ku vutuka kubhata diê mu ikoka iezala ni athu avulu, muéne ua kexile mu banza o ubhezelu ua iteka ia kexile mu bhanga mu mbanza ia Uli. O dixidilu dia ubhezelu ua makutu, dia di muangene ku mundu tundé mu izuua ia Noué!

² Noué uafú mivu jiiadi ku dima ande dia Mbalamu ku mu vuala. Kioso Noué ni muiji uê kia tubhuka ku álaka kioso kia bhu o Dilúvio dionene, muéne ua bhana sata kua Jihova, Nzambi anga u bhangesa ku moneka hongolo. (Dim. 8:20; 9:12-14) Mu thembu iná, o ubhezelu ua kidi uene ngó ua kexile ku mundu. Maji kioso o muiji ua Noué kia kexile mu di sanzumuna mu ixi, saí athu ka kexile dingi mu bheza Jihova. O athu mu ididi ioso akexile mu bheza jinzambi ja makutu. Katé muene ni tata ia Mbalamu, Tela, ua kexile ué mu bhanga o ubhezelu ua iteka, nange ua kexile mu umba iteka.​—Josu. 24:2.

3. Kídifua kiebhi kia kexile na-kiu Mbalamu, ni ihi i tu tena o ku di longa kua muene?

³ Mbalamu ua kexile ni ukexilu uéngi. Mukonda dia kixikanu kiê kua Nzambi. Kienhiki, o poxolo Phaulu ua mu tumbula kala, ‘o tata ia oso ala ni kixikanu!’ (Tanga Loma 4:11.) Tua-nda di longa ihi ia bhangesa Mbalamu ku kala diiala dia kidi. Kienhiki tu tena ku di longa kiebhi ki tu tena ku kala ni kixikanu kia kolo.

4, 5. Nanhi ua longo Mbalamu ia lungu ni Jihova, ni mukonda diahi tu zuela kiki?

⁴ Kiebhi Mbalamu kia di longo ia lungu ni jihova Nzambi? Tuejiia kuila mu izuua ienioió, Jihova ua kexile ni jiselevende ja fiiele mu ixi. Mu kifika, Seme uexile selevende ia fiiele. Sumbala ki muene uexile o mona ua dianga bhu kaxi ka ana kitatu a Noué, saí ithangana o Bibidia i dianga ku mu tumbula muéne. Nange mukonda Seme uexile diiala dia kixikanu kia kolo. b Kioso kia bhiti o Dilúvio, Noué ua tumbula Jihova kala, o “Nzambi ia Seme.” (Dim. 9:26) Seme ua kexile mu xila Jihova ni ku xila ué o ubhezelu ua kidi.

⁵ O kuila Mbalamu uejidile muene Seme? Nange uejidile. Xinganeka Mbalamu mu undenge. Nange ua sangulukile kiavulu mu kuijiia kuila ua kexile ni ndandu iê ua kexile hanji ku muenhu mu 400 a mivu ndenge! Seme ua monene o kuiibha ku mundu ande dia ku bhita o Dilúvio, ua mono o Dilúvio dionene dia zelesa o ixi, ua mono o ku sanzumuka kua athu a dianga mu ixi kioso kia bhiti o dilúvio, iu ua mono ué o ku bhukumuka kua Nimilodi mu mbanza ia Babele. Maji Seme ka di tele mu kavuanza ka kexile mu bhanga o athu mba mu ku tunga o sabhalalu ia Babele, kienhiki kioso Jihova kia lungulula o dimi dia athu, Seme ni muiji uê a suluka mu kuzuela o dimi dia dianga, o dimi dia Noué. Mbalamu ua tokalele ué ku muiji iú ua Seme. Kienhiki, Mbalamu ua kulu ni ku xila kiavulu Seme. Seme ua kexile ku muenhu mu thembu ia Mbalamu. Mbalamu nange ua di longo kiavulu ia lungu ni Jihova bhu kaxi ka Seme.

6. (a) Kiebhi Mbalamu kia londekesa kuila ua di longo disá dia dikota ku musoso ua Dilúvio? (b) Kiebhi kia kexile o muenhu ua Mbalamu ni Salai?

⁶ Mbalamu ua di longo disá dia dikota ku musoso ua Dilúvio. Muéne ua bhange ioso phala kuenda ni Nzambi kala kia bhangele Noué. Mukonda dia kiki, Mbalamu ua ditunu o ubhezelu ua makutu, iu ua di tungula ku mbanza ia Uli, katé muene ni bhu kaxi ka muiji uê. Maji muéne ua kazala ni muhatu uambote. Ua kazala  ni Salai, ki mukonda ngó dia ku iuka kuê, maji mu ku kala ni kixikanu kia kolo kua Jihova. c Né muene sé ku kala ni ana, o dikaza didi, dia sangulukile kiavulu ku muenhu mu ku sidivila Jihova kumoxi. Mbalamu ni Salai a sase Lote, mon’a phang’iê ua diiala.

7. Kiebhi o akaiedi a Jezú a tena ku kaiela o phangu ia Mbalamu?

⁷ Mbalamu ka xisa Jihova phala ku bheza iteka ku mbanza ia Uli. Mbalamu ni Salai a bhange ioso phala ku di tungula bhu kaxi ka athu abhezi a iteka mu mbanza iâ. Se tua mesena ku kala ni kixikanu kia kolo, tua tokala ku kaiela o phangu ia dikaza didi. Tua tokala ué ku di tungula bhu kaxi ka athu a tu kondoloka. Jezú uambe kuila akaiedi’ê keji ‘bhanga mbandu ia mundu,’ mukonda dia kiki eji kua zemba ku mundu. (Tanga Nzuá 15:19.) Se ua divuile kiá o ndolo ia ku u zemba ku muiji uê mba ku athu, mukonda dia ku sidivila Jihova, ijiia kuila kuala u bheka uê kana. Eie ué ua mu kuenda ni Nzambi kala kia bhange Mbalamu ni Salai.

8, 9. (a) Ihi ia bhiti ku muenhu ua Mbalamu? (b) Iebhi o njimbu ia tumikisa Jihova kua Mbalamu?

⁸ Saí kizuua kua bhiti kima ku muenhu ua Mbalamu. Muéne ua tambula njimbu ia tundile kua Jihova Nzambi! O Bibidia ki i zuela kiavulu se kiebhi Mbalamu kia tambuile o njimbu, maji iene i zuela kuila “o Nzambi ia fuma” ua tukulukile Mbalamu, diiala dia fiiele. (Tanga Ikalakalu 7:2, 3.) Nange bhu kaxi ka anju a mu tumine kua Nzambi, Mbalamu ua mono kijimbuete kia tundile kua Suke-ku ua Ngongo. Tu tena ku xinganeka kiebhi kia sangulukile Mbalamu mu ku mona kuila o Nzambi ia muenhu ka difuile ni iteka ia kexile mu bheza akua diembu diê.

⁹ Iebhi o njimbu ia tumikisa Jihova kua Mbalamu? Jihova uambela Mbalamu, uixi: ‘Tunda mu ixi iê, ni mu jindandu jê, uíze mu ixi i nga ka ku idikisa. Jihova ka zuela o ixi ia tokalele kuia Mbalamu​—Muéne ueji kuidikisa kua Mbalamu. Kia dianga, Mbalamu ua tokalele ku xisa o inzo iê ni ndandu jê. Mu kijila kia athu a tungile mu Tundila-Kumbi, o miji akexile ni valolo iavulu. O diiala u xisa o ndandu jê, ni kuia ku ixi ia dikanga, kia kexile mu lombolola hadi phala o diiala didi ku hádia; saí iá amba kuila hadi iavulu, o kufuá ndenge!

10. Mukonda diahi kia bhonzele kiavulu Mbalamu ni Salai ku xisa o dibhata diâ ku Uli?

¹⁰ Nange kua bhonzele kiavulu Mbalamu ku xisa o umvuama mu ixi ia Uli. Uli uexile mbanza ia umvuama. (Tala o kaxa:  “ O Mbanza ia xi ku Dima Mbalamu ni Salai.”) O akua ku tokuesa ima koxi a mavu, amba kuila kua kexile jinzo ja uabha mu mbanza iokulu ia Uli; saí jinzo ja kexile ni maxilu avulu, phala o muiji ni abhika, ni ithadi io iudike kiambote moxi. Phala ku iukisa o mbanza, kua kexile menha avulu, ididi ia ku sukula, ni ididi ia ku tula o ixete. Lembalala ué kuila, Mbalamu ni Salai, kexile dingi minzangala, nange Mbalamu ua kexile kiá mu kitala kia 70, o Salai mu kitala kia 60. Nange muéne ua mesenene kuila, Salai u kala ni muenhu uambote ni ku mu langa ué kiambote kala ki mesena diiala dioso ku bhanga ku muhatu uê. Xinganeka kiebhi kia kexile mu zuela ia lungu ni kikalakalu kia tambuile, ni ibhuidisu ia kexile mu di bhanga. Nange Mbalamu ua sangulukile kiavulu kioso muhatu’ê Salai, kia xikina o kikalakalu kia a bhanene Nzambi! Kala kia bhangele Mbalamu, Salai ua kexile polondo phala ku xisa ku dima o umvuama uoso mu ixi ia Uli.

11, 12. (a) Ihi ia tokalele ku bhanga Mbalamu ande dia ku xisa o mbanza ia Uli? (b) Kiebhi ki tu tena ku jimbulula ia bhiti ande dia ku mateka o kuenda?

¹¹ Mu ku xikina, Mbalamu ni Salai akexile ni ikalakalu iavulu phala ku i bhanga. Ku longela ni kuongeka o ima ioso. Ihi ieji kuambata mu njila íii ia lebha, ni ihi ieji xisa ku dima? Maji o kima kia betele kota ku muenhu uâ o jindandu jâ. Ihi ieji bhanga Mbalamu ni Tat’ê, Tela? Ene a solo kuia nê, ni ku mu langa mu njila. Nange Tela ua xikina muene ni muxima, mukonda o musoso u londekesa kuila Tela muéne ua katula o muiji uê ku mbanza ia Uli. Kiki kilondekesa kuila muéne ua xile kiá o ubhezelu ua iteka. O mon’a phange ua Mbalamu, Lote, ueji kuia-nâ kumoxi mu njila ia lebha.​—Dim. 11:31.

¹² Mu kusuka-ku, o kizuua kia ku kuata o njila kia zukamene kiá. Xinganeka o kibuka kia athu bhu kanga dia mbanza ia Uli. O jikamelu ni jibulu a ji longele ni imbamba iavulu, o ibhaku, o muiji ni abhika, ni ku kala polondo phala ku mateka o kuenda. d Nange athu oso akexile mu di tala mesu ni ku kingila o ngolokela phala ku mateka o kuenda. Mu kusuka-ku, o kithangana kia bhixila, ia a mateka o kuenda, ni ku xisa o mbanza ia Uli.

13. Kiebhi lelu jiselevende javulu ja Jihova ene mu kaiela o phangu ia Mbalamu?

¹³ Lelu, jiselevende javulu ja Jihova a sola uá kuia mu kalakala bhu ididi mua bhindamena aboki a Utuminu phala ku boka. A mukuá a sola ku di longa dimi diéngi phala ku sanzumuna o ukunji  uâ. Saí iá a sola maukexilu engi a ku boka. Phala ku bhanga kiki, ku bhinga nguzu​—katé muene ni ku xisa ku dima o jimbote. O ukexilu iú ua ku kaiela Mbalamu ni Salai, a u ximana kiavulu! Se tu kaiela ué o kixikanu kiâ, tu tena ku xikina kuila Jihova ua-nda tu besoala kiavulu. Muéne u bhandulula oso a mu kala fiiele. (Jihe. 6:10; 11:6) O kuila kiene kia bhange ni Mbalamu?

14, 15. Jimbulula o njila ia Uli katé Halane, ni mukonda diahi Mbalamu uemana ku Halane ni ku tunga-ku jibalaka?

¹⁴ O kibuka kia athu, bhofele-bhofele, akexile mu uabhela o njila. Tu tena ku xinganeka Mbalamu ni Salai ku di bhingana mu kuenda ni kamelu, ni ku di zuelesa kiambote! Katé muene ió kejidile o kuenda, akexile mu kuatekesa o Tata ia Mbalamu ua kukile kiá, ku xikama kiambote ku kamelu mba ku bulu. Ene a kuata o njila iia ku mbandu ia Nordeste ni ku zaúka o Honga ia Ufalate. A bhitile izuua ni jisemana mu njila.

¹⁵ Kienhiki kia zubha kuenda 960 a ji kilómetulu mu njila, a bhixila ku jibalaka ja Halane, mbanza ia umvuama ku mbandu ia musanza ni ku Tundila- Kumbi. O muiji uemana kuenhoko ia a tungu-ku o jibalaka jâ. Nange Tela ka tenene dingi kuenda.

16, 17. (a) Mbalamu ua sangulukile ni kikutu kiebhi? (b) Kiebhi Jihova kia zediuisa Mbalamu kioso kia kexile mu Halane?

 ¹⁶ Mu ku bhita thembu, Tela uafú mu 205 a mivu. (Dim. 11:32) Mbalamu a mu kuatekesa kiavulu, Jihova anga u mu ambela dingi. Muéne ua mu bhana dingi o kitendelesu kia mu bhanene kiá, kioso kia kexile mu ixi ia Uli, iu ua mu bhange kikanenu. Mbalamu ueji kala ‘kifuxi kionene,’ miji ioso ieji zediua mukonda dia muéne. (Tanga Dimatekenu 12:2, 3.) Mu ku sanguluka ni kikutu kia tele Nzambi ni muéne, Mbalamu ua kexile ni nguzu phala ku suluka ni kuenda o njila.

¹⁷ Mu veji íii, o imbamba ia dimendala dingi, mukonda Jihova ua zediuile Mbalamu mu izuua ia kexile ku Halane. O musoso u zuela kuila Mbalamu anga u katula o “jimbongo jâ joso ja bhongolola, ni athu a muenhu a di bande nâ bhu Halane.” (Dim. 12:5) Phala ku kala kifuxi, Mbalamu ua tokalele ku kala ni jimbote ni jiselevende​—ni dibhata dionene. Jihova kene mu bhana umvuama ku jiselevende jê ithangana ioso, maji muéne u bhana o ima ia bhindamena phala ku tena ku bhanga o vondadi iê. Mukonda dia ku mu suínisa, Mbalamu ua suluka ni kuenda o njila ia lebha.

18. (a) Muvu uebhi ua mateka o ukamba ua Nzambi ni mundu Uê bhu kaxi ka Mbalamu? (b) Izulukutu iebhi ia beta-kota ia bhiti mu kizuua kia 14 kia mbeji ia Nizá mivu ku pholo? (Tala o kaxa: “ Mbeji ia Beta o Kota mu Muoso ua Bibidia.”)

¹⁸ Mu kuenda izuua iavulu mu njila ia Halane, a bhixila ku Kakemiji, kua kexile mu bhixila jingenji javulu phala ku zaúka o honga ia Ufalate. Nange bhu kididi kiki, bhuene bhua mateka o ukamba ua Nzambi ni mundu Uê bhu kaxi ka Mbalamu. Nange kiexile mu kizuua 14 kia mbeji ia Nizá ku muvu ua 1943 A.K.K., kua kuatekesa Mbalamu o mundu ku zaúka o honga. (Mak. 12:40-43) Ku mbandu ia Sulu kuene kuexile o ixi ia kanene Jihova kua Mbalamu. Kienhiki, o kikutu kia tele Nzambi ni Mbalamu, kia mateka o ku dikumbidila.

19. Iebhi iexile o kikanenu kia Jihova kua Mbalamu, ni ihi ia banzele Mbalamu?

¹⁹ Kioso Mbalamu kia kexile múia ku  mbandu ia Sulu, ene emana bhua zukamene ku Xikeme bhu mbandu ia mixi itatu ia makota ia Molé. Kuenhoko, Nzambi ua tukulukila dingi Mbalamu. Mu veji íii, o njimbu ia lungile ni mbutu ia Mbalamu, ieji lundula o ixi. O kuila Mbalamu ua banzele mu kikanenu kia bhangele Jihova mu Edene ia lungile ni “mbutu” ieji bhulula o mundu? (Dim. 3:15; 12:7) Nange kiene. Muéne nange ua kexile mu tendela kuila o kikanenu kieji di kumbidila bhu kaxi kê.

20. Kiebhi Mbalamu kia londekesa o kisakidilu kiê ku ujitu ua mu bhanene Jihova?

²⁰ Mbalamu ua uabhele kiavulu o ujitu ua mu bhanene Jihova. Muéne ua kexile mu kuenda mu ixi​—ni ku dilanga, mukonda mu ixi mua kexile-mu hanji o athu akua Kanana​—Mbalamu anga u tunga-bhu kalatódio phala Jihova, o kalatódio ka dianga ku Molé, ni ku Betele. O kididi kiki u ki luka o dijina dia Jihova, nange mu kulondekesa o kisakidilu kiê kia muxima kua Nzambi iê kioso kia kexile mu xinganeka ihi ieji bhita ni mbutu iê ku hádia. Muéne nange ua bokela o jivizinhu jê akua Kanana. (Tanga Dimatekenu 12:7, 8.) Maji kueji moneka ibhidi iavulu ku pholo ieji polovala o kixikanu kia Mbalamu. Ni unjimu uoso, Mbalamu ka kexile mu tala ku dima mu ku banza o jimbote ja xile mu mbanza ia Uli. Muéne ua kexile mu tala ku pholo. O divulu dia Jihebeleu 11:10, dizuela ia lungu ni Mbalamu: ‘Ua kingile o mbanza di kala ni madisesa a kidi, o mesene iê ni mutungi, Nzambi.’

21. O kuila o kuijiia kuetu kua lungu ni Utuminu ua Nzambi, a tena ku ki sokesa ni kuijiia kua Mbalamu, ni ihi i ku suínisa o ku bhanga?

²¹ Etu tuene mu sidivila Jihova, tuejiia o mbanza ioio ia kifika, Mbalamu ndenge​—o Utuminu ua Nzambi. Tuejiia kuila o Utuminu ua mu tumina ku diulu, kua kambe ngó bhofele, ua-nda buikisa o mundu iú ua iibha, ni kuila o mbutu ia Mbalamu io kanene ukulu, Jezú Kristu, ua mu Tumina kiá ku Utuminu iú ku diulu. Ujitu ua dikota phala etu, ku mona o thembu kioso Mbalahamu kia-nda vutuka ku muenhu, ni kuijiia kiebhi Jihova kia-nda kumbidila o vondadi iê! Ua mesena ku mona o ki kumbidilu kia ikanenu ia Jihova? Se kiene, kolokota o ku kaiela o phangu ia Mbalamu. Londekesa kuila uala ni ukexilu ua ku di bhakula, ku belesela ni ku uabhela o ujitu ua ku bhana Jihova ua ku samba. Kioso ki uia ni ku kaiela o kixikanu kia Mbalamu, ‘o tata ia oso ala ni kixikanu’ ni ku kituka ué o tata iê!