Xinganeka mu kifika kiki: Karen uala mu fesa, mu kubhita kuinhi dia ithangana, muéne uivua dizuí kudima diê, dia muthu ua muijiia.

Karen u mona kamba diê Jessica, ua kuata ngalafa jiiadi. Muéne uejiia kuila muala uhôlua. Jessica u bhana imoxi kua Karen, muéne uambe: “Eie ku mona ndenge dingi, tambula ngó o sele íii.”

Karen u mesena kudituna, maji Jessica kamba diê dia kazola. Karen ka mesena kulualesa kamba diê. Ku mbandu iamukuá, Jessica kilumba kiambote. Se muéne ua mu nùa, nange ki kima kiaiibha. Karen uambe ku muxima ué: ‘Sele imoxi ngó. Ki ku difu ni kunua jidroga.’

Se ua kexile bhu kididi kia Karen, ihi i ueji bhanga?

Phala ku sola kiambote i ua-nda bhanga mu maka enhá, eie ua tokala kudijiia. O Kudijiia kulombolola kuijia se eie nanhi ni kuijiia ué o ijila ié. O kuijia o kidi kiki, kua-nda ku kuatekesa kusola kiambote o ima ku muenhu uê, mu veji dia kuehela akuenu ku kusolela bhu kididi.—1 Kolindo 9:26, 27.

Kuebhi ku u tena kusanga nguzu phala kudibhana ni maka enhá? Kutambuijila o ibhuidisu ia kaiela, ndunge iambote.

Kuijiia o uhete ni ifuá iambote i uala na-iu, ku kubhana dingi nguzu.

PHANGU IA BIBIDIA: O Poxolo Phaulu ua soneka: ‘Né mbe ki ngi muzuedi uambote, ki ngi kambe kuijiia.’ (2 Kolindo 11:6) O kuijiia o Mikanda Ikola kua kuatekesa Phaulu kukolokota kioso kia kexile mu mu xomba. Muéne kexile mu kuehela kuila o ixinganeku iaiibha ia akuá i mu zozesa.—2 Kolindo 10:10; 11:5.

TONGININA O IFUÁ I UALA NA-IU: Soneka ku luiji o kifuá ni uhete u uala nau.

Zuela o kifuá kiambote ki uala na-kiu. (Mu kifika, o kuila u mukuâ henda? U mukuâ kidi? U mukuâ kubhixila selu?)

Se uehela o ibhindamu ié kulanga o muenhu ué, iene i tena kuzanga o muenhu ué uoso. Kia difuangana ni fuluja, se i kuata, i tena kuzanga o kima kioso.

PHANGU IA BIBIDIA: Phaulu uejidile kiambote o itondalu iê. Muéne ua soneka: ‘Ngejiia kuma moxi diami nga sangulukila o Kitumu kia Nzambi. Maji nga mono kuila Kitumu kiéngi kia mu tumina mu idiandu iami, kia mu lua ni kitumu kia ngi kala mu kilunji kiami, kiene kiala ku ngi kutila mu ubhika ua kitumu kia ituxi.’—Loma 7:22, 23.

TONGININA O IFUÁ I UALA NA-IU: Ibhindamu iebhi i ua la na-iu ni kiebhi ki ua tokala kudibhana na-iu?

O kuila ueji kuixana táxi, hé u tangela o muendexi kuila, tu nhunge hanji o kithádi kiki katé ki bhua o kazolina? Kiki kieji londekesa kukamba kilunji—kudibotesa kitadi!

Ihi i tu dilonga mu kifika kiki? O kuijiia o ima i tua mesena o kubhanga i tu fidisa kunhunga-nhunga ngó kididi kimoxi. Eie ua-nda kuijiia ku ua múia ni kiebhi ki u bhixila-ku.

PHANGU IA BIBIDIA: Phaulu ua soneka: “kiene ué ki ngi lenga katé bhu mbambe, phala ki ngiie ni kubelajaka.” (1 Kolindo 9:26) Mu veji dia kubelajaka Phaulu uejidile o jimbambe jexile mu suua, iú uexile mu ji kaiela.—Filipe 3:12-14.

TONGININA O IFUÀ I UALA NA-IU: Soneka ku luiji ima itatu i ua mesena kubhanga ku muvu uizaku.

Se kualé ni kixikanu ku ima i ua mu dilonga, ki ua-nda kuijiia ia kubhanga. Kála o dinonguena, ithangana ioso ua-nda lungulula o ukexilu ué phala ngó kumesena kusangulukisa o jikoleka jé.

Se u kala ni kixikanu kia kolo ku ima i ua dilongo, eie kua-nda lungulula o ukexilu ué kala u dinonguena—né muene se akuenu a kufunhisa.

PHANGU IA BIBIDIA: O polofeta Daniiele “ua solo ni muxima uoso” kubelesela o itumu ia Nzambi, mu unzangala uê sumbala ka kexile dingi kumoxi ni muiji uê. (Daniiele 1:8) Mukonda dia kiki, Daniiele uejidile ia kubhanga ni muenhu uê. Daniiele ua bhangele ioso kala kia dilongele.

TONGININA O IFUÁ I UALA NA-IU: Milongi iebhi i u xikina? Mu kifika: Eie u xikina Nzambi? Se kiene, mukonda diahi? Ihi i ku bhangesa kuxikina kuma kuene Nzambi?

Mudié, o kuila u xikina o itumu ia Nzambi ia lungu ni kuzela? Se kiene mukonda diahi?

Ihi i ua mesena—kukala kála u difué di lauka ku muxi a mu di takujula ku kitembu, inga muxi u nangenena ku kitembu kia dikota? Se u kolesa o kixikinu kié ua-nda kala kála o muxi iú. Kiki kia-nda ku kuatekesa kutambuijila o kibhuidisu: Eme nanhi?