Jozafate, o sobha ia Judá, ua bulu o jikalatódio ja Bahale, ni iteka mu ixi. Muéne ua mesenene kuila, o athu ejiia o itumu ia Jihova. Mu kiki, muéne ua tumikisa ilamba ni Jilevita mu ixi ioso ia Judá, phala kulonga o itumu ia Jihova ku athu oso.

O jixi ja mukuá, a kexile ni uôma ua kubhânga ni akua Judá, mukonda ejidile kuila, Jihova ua kexile mu zokela o mundu uê. Ene ambatele ué maujitu kua Sobha Jozafate. Maji mu kubhita kithangana, akua Mouabhe, akua Amone, ni akua Seíle, endele phala kubhânga ni akua Judá. Jozafate uejidile kuila, muéne ua bhingile o kikuatekesu kia Jihova. Muéne ua tumu kuila, mala oso, ahatu, ni ana ndenge aia mu mbanza ia Jeluzaleme. Kupholo dia mundu uoso, muéne ua sambe: ‘Jihova, sé eie, ki tua-nda tena kunganhala o ita. Tua ku dióndo, tu tangele o ima i tua tokala kubhanga.’

Jihova ua tambuijila o musambu uixi: ‘Ki mu kale ni uôma. Nga-nda ku mi kuatekesa. Imanenu ngó, mu mone kiebhi ki nga-nda mi bhulula.’ Kiebhi Jihova kia a bhulula?

Mu kimenemene, Jozafate ua bhongolola o jingimbidi, iu ua a tangela phala kukala kupholo dia kifuxi. Ene endele tundé mu Jeluzaleme katé bhu kididi kia ita a ki xanene Tekoua.

Kioso o jingimbidi kiai ni kuximana Jihova ni kusanguluka kuoso, ni dizui dia suina, Jihova ua kuatekesa o mundu uê. Muéne ua te akua Amone ni akua Mouabhe mu jimvunda, anga a di bilukila mudiâ, sé-ku muthu ua bhulukile. Maji Jihova ua lange o mundu ua Judá, o masoladi ni akunji. Mundu uoso mu jixi ja mukuá, evuile o kima kia bhangele Jihova, ejidile ué kuila, Jihova ua kexile hanji mu zokela o mundu uê. Kiebhi Jihova kiene mu bhulula o mundu uê? Mu maukexilu avulu. Muéne ka bhingi o kikuatekesu kia athu phala kubhulula o mundu uê.