1. Iebhi o sabhi i zediuisa o muiji?

JIHOVA NZAMBI ua mesena kuila o muiji u zediua. O Maka mê, o Bibidia, a bhana milongi phala athu oso ku muiji, ijimbulula ihi ia mesena Nzambi, ia tokala ku bhanga kala muthu ku muiji. Kioso athu ku muiji kia kumbidila o kikalakalu kiâ, kia lungu ni milongi ia Nzambi, ki bhekesa kisangusangu. Jezú uambe: ‘A beta o ku zediua oso évua o Maka ma Nzambi anga a a bhaka!’—Luka 11:28.

2. Phala o muiji ku zediua kua bhingi kuijiia ihi?

² Phala o muiji ku zediua, kua bhingi kuijiia kuma, Jihova muéne ua bhange o muiji, ió a mu tange kuala Jezú kála, “Tata Ietu.” (Matesu 6:9) O muiji uoso mu ngongo, a u bhange kuala Tata ietu ia diulu—muéne ngó uejiia ihi i zediuisa o muiji. (Efezo 3:14, 15) Maji-phe, ihi i longa o Bibidia ia lungu ni kikalakalu kia athu oso ku muiji?

3. Ihi izuela o Bibidia ia lungu ni dimatekenu dia muiji, ni kiebhi ki tuejiia kuma kiki kidi?

³ Jihova ua dianga ku bhanga Adá ni Eva, iu ua a kazalesa. Muéne ua a tula mu palaízu—mu jaludim ia Edene —Kienhiki, Jihova ua ambela, “Vualenu, mu sokoloke, mu izalese ixi ioso.” (Dimatekenu 1:26-28; 2:18, 21-24) Iii, ki misabhu kana, Jezú, uedikisa kuma o musoso ua lungu ni dimatekenu dia muiji, uala mu divulu dia Dimatekenu, kidi muene. (Matesu 19:4, 5) Sumbala, tuene mu bhita ni maka avulu, o muenhu lelu ki uala kála, kia mesenene Nzambi, ndoko tuejiie kiebhi o muiji u tena ku zediua.

4. (a) Kiebhi kala muthu u tena ku kuatekesa ku zediuisa o muiji uê? (b) Mukonda diahi ku di longa ia lungu ni Jezú, ku kuatekesa o ku zediuisa o muiji?

⁴ O muthu u tena ku kuatekesa o muiji ku zediua, mu ku londekesa o henda, kála Nzambi. (Efezo 5:1, 2) Kiebhi ki tu tena ku londekesa o henda kála Nzambi, se nuka tua mu muene? Tu tena ku di longa kiebhi ki kalakala Jihova, mukonda muéne ua tumikisa Mon’ê ua dianga mu ixi. (Nzuá 1:14, 18) Kioso kia kexile mu Ixi, o Mona iú, Jezú Kristu, ua kaiele kiambote o phangu ia Tat’ê ia diulu, o ku mona ni kuívua Jezú, kia kexile kála ku mona Jihova ni ku Mu ívua. (Nzuá 14:9) Mu kidi, mu ku di longa ia lungu ni henda iedikisa Jezú, ni ku kaiela o phangu iê, tu tena ku kuatekesa ku zediuisa o muiji uetu.

5, 6. (a) Kiebhi kia dibhana Jezú ni kilunga kiê ni phangu iahi ia xisa ku anumi? (b) Ihi ia bhingi phala ku tambula o muloloki ua ituxi?

⁵ O Bibidia izuela kuma o anumi a tokala ku di bhana kiambote ni ahatu, kála kia di bhanene Jezú ni maxibulu mê. Xinganeka o milongi íii ia Bibidia: “Enu ue mu mala, zolenu ahatu enu kala Kristu kia zola o [Kilunga], iú ua di bhakula bhu kididi kiê . . . Kiene ue o jingana ja tokala kuzola o jindona jâ, kala mikutu iâ ene. Diiala uoso ua zolo o muhatu’ê, muenié ua di zolo. Mukonda muthu kene mù zemba o mukutu ué-muène. Maji u u dikila, u u tambula  konda, kala ki bhanga Kristu ku [kilunga].”—Efezo 5:23, 25-29.

⁶ O henda ia Jezú ku kilunga kia maxibulu mê, phangu ia iuka phala o anumi. Jezú “ua a zolo muene katé ku dizubhilu,” ua bhana o muenhu uê, bhu kididi kiâ, sumbala ene exile akua ituxi. (Nzuá 13:1; 15:13) Kiene kimoxi ué, o mala a a tendelela: “Zolenu ahatu enu, kana ku a thathamena jinga.” (Kolose 3:19) Ihi ia-nda kuatekesa o diiala ku kumbidila o milongi íii, bhenge-bhenge se o muhatu mu ithangana ia mukuá, u lueza mu bhanga ima iambote? Muéne ua tokala ku lembalala o itondalu iê, ni ihi ia tokala ku bhanga phala Nzambi ku mu loloka. Muéne ua tokala-phe ku bhanga ihi? Muéne ua tokala ku loloka uoso u mu ta kituxi, katé ué ni muhatu uê. O muhatu, ua tokala ué ku bhanga kiki. (Tanga Matesu 6:12, 14, 15.) Eie uejiia se mukonda diahi athu a zuela kuila o ku zediua kua ukaza, o ku dilungika kua mbote kua aloloki aiiadi?

7. Ihi iejidile Jezú, ni phangu iahi ia xisa phala o mala?

⁷ O mala a tokala kuijiia kuila, Jezú mu ithangana ioso ua xila o maxibulu mê. Muéne uejidile kuila ene, a kambele kuiuka, uejidile ué o ibhindamu iâ. Mu kifika, kioso kia bhuila muéne ua ambela: “Zenu: Tuienu k’ubheka uetu ku mukáu, tu nhohe-ku bhuófele.” (Marku 6:30-32) O ahatu, a tokala ué ku a xila. O Bibidia iamba kuma o muhatu “kitutu kia tolo nguzu” o mala a a tendelela ku a bhana “ujitu.” Mukonda diahi? Mukonda, ki kala o diiala, mba o muhatu, ene a sokela mu “kulundula o muenhu.” (1 Phetele 3:7) O mala a tokala ku di lembalala kuma o ku kala fiiele kua beta-kota, ku bhangesa o muthu ku kala ni valolo ku pholo ia Nzambi ki kale diiala mba muhatu.—Jisálamu 101:6.

8. (a) Kiebhi o diiala “u zola muhatu’ê, muenié ua di zolo”? (b) Ku kala “xitu imoxi kiá” kilombolola ihi ku diiala ni ku muhatu?

⁸ O Bibidia izuela kuma o diiala “u zola muhatu’ê, muenié ua di zolo.” Kiki kidi, mukonda, kála kiambe Jezú, o  diiala ni muhatu, “kala dingi kiiadi, maji xitu imoxi kiá.” (Matesu 19:6) Kienhiki, o ku dizeka kua tokala ngó o dikaza. (Jisabhu 5:15-21; Jihebeleu 13:4) Kiki a ki bhanga, se kala muthu u sota ku bhanga o vondadi ia mukuá mu ibhindamu iâ. (1 Kolindo 7:3-5) Kála kia kitendelela: “Muthu kene mù zemba o mukutu ué-muène. Maji u u dikila, u u tambula konda.” O mala a tokala ku zola o ahatu’â, kála kia di zolo mudiâ, a tokala ku di lembalala kuma Jezú Kristu, muéne ua a kala ku pholo.—Efezo 5:29; 1 Kolindo 11:3.

9. Kídifua kiahi kia Jezú kia tange mu divulu dia Filipe 1:8, ni mukonda diahi o mala a tokala ku londekesa o kídifua kiki ku ahatu’â?

⁹ O poxolo Phaulu ua zuela ia lungu ni ‘henda ia Kristu Jezú.’ (Filipe 1:8) O henda ia Jezú iexile kídifua kia kisangusangu, kia bhangesa ahatu ku kala maxibulu mê. (Nzuá 20:1, 11-13, 16) O ahatu a tokala ué o henda ia anumi’â.

10. Phangu iahi ia xisa Jezú phala ahatu?

¹⁰ O muiji ua difuangana kála kisangela, phala ku kalakala kiambote ua bhingi mutuameni. Katé ué Jezú Uala ni Mutuameni, “O Kristu, ua mu kala ku pholo Nzambi,” kála “o muhatu ua mu kala ku pholo o diiala.” (1 Kolindo 11:3) O phangu ia xisa Jezú ia ku belesela Nzambi kála mutuameni uê, kima kiambote phala ku kaiela, mukonda tuala ué ni atuameni, u tua tokala ku a belesela.

11. Ukexilu uahi o muhatu ua tokala ku kala nau ua lungu ni muadi uê, o kífua kiki kia uabha ki bhekesa ihi?

¹¹ Athu a ituxi, saí bhabha a lueza mu kuendesa kiambote o muiji. Kienhiki, ihi ia tokala ku bhanga o muhatu? Muéne ka tokala ku xibhaka ku ima i bhanga o muadi uê, mba ku tumina bhu kididi kiê. O muhatu ua tokala ku di lembalala kuma o ku lenduka kua muxima, kuene kuala ni valolo ku pholo ia Nzambi. (1 Phetele 3:4) Se u londekesa o ku lenduka kuku, ki kia-nda mu bhonza ku belesela, né muene mu ima ia bhonzo. Lua mukuá, o Bibidia izuela: “O  muhatu ue a xile munumi’ê.” (Efezo 5:33) Maji se muéne ka xikina Kristu kála Mutuameni uê? O Bibidia itendelesa o ahatu, “Kiene ue enu ahatu beleselenu anume enu, phala né-mbe bhu kala ni iá a kamba kutumaka o maka ma Nzambi, ki bhekela ku a nganhala mu uendelu ua mbote ua ahatu’â. Ene ki kua-ndù bhinga ngó ku a zuelela kima, kioso kia mi mona o uendelu uenu ua ujitu ni uoma.”—1 Phetele 3:1-2.

12. Mukonda diahi o muhatu ka londekesa o ku kamba ku xila, se muéne uzuela mu kilunji kiê ni ku lenduka?

¹² Ki kala o diiala uala mu kixikinu kimoxi mba kana, se o muhatu u bhana ndunge ki ia difu ni ia munumi’ê, kambe kuila ua kambe ku mu xila. Mukonda se muéne ua lungu, o muiji uê uoso u katula mbote, se o munumi’ê u i xikana. Sumbala Mbalahamu, ka xikinine kioso muhatu uê Sala, ua mu bhana o ndunge phala ku batula o maka ku muiji, Nzambi ua mu ambela: “Xikana-iu.” (Tanga Dimatekenu 21:9-12.) Mu ukexilu uoso, kioso o diiala kia-ndala ku bhanga kima, se kiki ki kituxi mu itumu ia Nzambi, o muhatu u londekesa o ku belesela mu ku mu kuatekesa.—Ikalakalu 5:29; Efezo 5:24.

13. (a) O divulu dia Tito 2:4, 5, di tendelesa ihi, ku muhatu ua kazala? (b) O Bibidia izuela ihi ia lungu ni ku di xisa ni ku di senga?

¹³ Mu ku kumbidila o kikalakalu kiê, o muhatu u tena ku bhanga ima ia vulu phala ku kuatekesa o muiji uê. Mu kifika, o Bibidia idikisa kuila o ahatu a kazala, a tokala “kuzola jinga anume’â, ni kuzola an’â. Mbé a di longe ue kukuata kilunji, ni ku di bhaka ni kuzela. A kale ahatu ambote, akalakadi ku mabhata, alenduka, ni ku di tuma kiambote ni anume’â.” (Tito 2:4, 5) O muhatu, mba o mama u bhanga kiki, a-nda mu zola ni ku mu xila, ku muiji uê. (Tanga Jisabhu 31:10, 28.) Kuma o ukaza, ku dilungika kua athu aiiadi akua ituxi, mu ukaza muene mu moneka maka a dikota, ki bhekesa o ku di xisa, mba ku di senga. Saí maka kia moneka mu ukaza, o Bibidia itumina ku di xisa. Né kiki o ku di xisa ki  kua tokala ku u mona mu kima kioso—kioso, mukonda o mulongi ua Bibidia iú: “O muhatu ua [kazala], ka di ambudise ni muadi uê. . . . o diiala ue kiòmuene, ka di ambudise ni muhatu’ê.” (1 Kolindo 7:10, 11) O ku zeka ni ió ki kaza diê, iene o ngunji imoxi ngó ia Mikanda ikôla phala ku di senga.—Matesu 19:9.

14. Kiebhi Jezú kia di bhana ni tuana, ni ihi o tuana a bhingi ku tambula ku jitata?

¹⁴ Jezú ua xisa phangu ku jitata ia ku di bhana kiambote ni ana. Saí athu kioso kia fikisa ku fidisa ana-ndenge ku zukama kua Jezú, muéne uambe: “Ehelenu o tuana ku ngi bhixila! Kana ku tu kaia.” O Bibidia izuela-phe kuila muéne, “u tu tambula bhu jihata jê, u ta maku mê ku thandu diâ, hé u tu benzela.” (Marku 10:13-16) Tuejiia kuma Jezú ua kexile ni kithangana phala ku kala ni ana-ndenge, eie ué ki ua tokala ku bhanga kiki ni tuana tuê? Ene a bhingi kithangana kia vulu. Eie ua tokala ku kala ni kithangana phala ku a longa, íii iene ia mesena Jihova kuila o jitata a ki bhanga.—Tanga Matendelelu 6:4-9.

15. Ihi i tena ku bhanga o jitata phala ku langa o tuana?

 ¹⁵ Mukonda o mundu uene mu kala dingi kia iibha, o tuana a bhingi o kilangelu kia jitata, ku athu a ndala ku a bhanga kia iibha, kála o jingombidi. Xinganeka kiebhi kia lange Jezú o maxibulu mê, ua exana ni henda “tuana tuami.” Kioso kia mu koko phala ku mu jibha, Jezú ua a kuatekesa ku lenga. (Nzuá 13:33; 18:7-9) Eie u tata, mba u mama ua tokala u dimuka, mukonda Diabhu, u tena ku bhanga kia iibha ku an’ê. Eie ua tokala ku bhana milongi ni itendelesu. * (1 Phetele 5:8) O thembu  íii ia ku langa o tuana mu ukexilu ua xitu, ua nzumbi ni ua kilunji.

16. Kiebhi o jitata kia tena ku di longa ku phangu ia Jezú, ia ku di bhana ni ku kamba o kuiuka kua maxibulu mê?

¹⁶ Mu usuku ande dia ufuilu ua Jezú, o maxibulu mê a zokele, se mu kaxi kâ, nanhi ua betele o kota. Maji Jezú ka dizangalele, ni henda ua kolokotele kua tendelesa ni ku a bhana phangu. (Luka 22:24-27; Nzuá 13:3-8) Se eie u tata, mba u mama, u tena ku mona kiebhi ki u tena ku kaiela o phangu ia Jezú mu bazela o an’ê? Kidi muene, ene a tokala ku a bazela, maji kiki kia tokala ku ki bhanga “mu kizongelu kia fuama” sé ku thathamana kia vulu. Eie ki ua tokala kuzuela sé ku xinganeka, “kala jiphondo ja xibhata.” (Jelemiia 30:11; Jisabhu 12:18) O kibazelu kia tokala ku ki bhana mu ukexilu, u bhangesa o mon’ê ku katula-ku o mbote.—Efezo 6:4; Jihebeleu 12:9-11.

17. Mu ukexilu uahi, Jezú ua xisa phangu iambote ku ana?

¹⁷ O kuila o ana a tena ku di longa o phangu ia Jezú? Ene, a tena! Mu phangu iê, Jezú uedikisa se kiebhi o ana a tokala ku belesela o jitata jâ. Muéne uambe, “Nga zuela kala kia ngi longo Tata.” Muéne ua bandekesa: “Eme ngi bhanga jinga ioso ia mu uabhela muène.” (Nzuá 8:28, 29) Jezú ua kexile mu belesela Tat’ê ia diulu, kienhiki o Bibidia i tumina o ana ku belesela o jitata jâ. (Tanga Efezo 6:1-3.) Sumbala Jezú uexile mona uaiuka, muéne ua kexile mu belesela o jitata jê, Zuze ni Madiia, a kambele o kuiuka. Kiki, kia bandekesa o ku zediua kua muiji ua Jezú!—Luka 2:4, 5, 51, 52.

18. Mukonda diahi Jezú ua belesele Tat’ê ia diulu mu ithangana ioso, ni nanhi u sanguluka kioso o ana, a belesela o jitata jâ, lelu?

¹⁸ O kuila o ana a tena ku kaiela o phangu ia Jezú, ni ku sangulukisa o jitata jâ? Mu kidi, o mizangala nange kia a bhonza ku belesela o jitata jâ, maji Nzambi ua mesena kuila o ana a bhanga kiki. (Jisabhu 1:8; 6:20) Jezú ua belesele  Tat’ê ia diulu mu ithangana ioso, katé ué mu ithangana ia bhonzo. Saí kizuua kioso Nzambi kia mesenene kuila Jezú u bhanga kima kia bhonzo, Jezú uambe: “Dikàu dia phaxi dienhidi, ngi katule-diu.” Maji né kiki, Jezú ua bhange muene ia mu bhingi Nzambi, mukonda muéne uejidile kuma Tat’ê uejiia ia beta-kota. (Luka 22:42) Mu ku di longa o ku belesela, o ana a-nda sangulukisa o jitata jâ, ni Tata iâ, ia diulu. *—Jisabhu 23:22-25.

19. (a) Kiebhi Satanaji kia tendala o ana? (b) Kiebhi ki divua o jitata se o ana a bhanga ima ia iibha?

¹⁹ O Diabhu ua tendala Jezú, tu tena ku xikina kuila muéne ua-nda tendala ué o mizangala phala ku bhanga ima ia iibha. (Matesu 4:1-10) Satanaji o Diabhu u bhangesa o makamba a xikola, phala ku ku tendala, kiki ki tena ku bhonza ku dituna. Kima kiambote ku mona o tuana kioso kia xisa o makamba a iibha! (1 Kolindo 15:33) O mon’a Jakobo, Dinah, ua kexile ni makamba kexile abhezi a Jihova, kiki kia bheka maka avulu. (Dimatekenu 34:1, 2) Xinganeka ngó, kiebhi kieji kala o muiji, se muthu ku muiji u bhanga undumbu!—Jisabhu 17:21, 25.

20. Phala ku zediuisa o muiji, kala muthu ua tokala ku bhanga ihi?

²⁰ O muiji u tena ku di bhana kiambote ni maka, mu ku kumbidila o milongi ia Bibidia. Mu kidi, o ku kumbidila o milongi íii, iene i bhekesa o ku zediua ku muiji. Enu mu anumi, zolenu ahatu’enu, di bhanenu nâ kiambote, kála kia di bhana Jezú ni kilunga kiê. Enu mu ahatu, beleselenu o anumi’enu, kaielenu o phangu ia muhatu ua kilunji, a mu tange mu divulu dia Jisabhu 31:10-31. Enu mu jitata, longenu o tuana tuenu. (Jisabhu 22:6) Anumi, ‘tumine-nu kiambote o muiji uenu.’ (1 Timote 3:4, 5; 5:8; Kolose 3:20) Enu mu ana, beleselenu o jitata jenu. Ki bhuala muthu ku muiji u kamba ku ta kituxi. Kienhiki, mua tokala ku lenduka, ni ku di loloka mu dienu.

21. Muenhu uahi uambote u tua kingila, ni kiebhi ki tu tena ku kala ni muiji u zediua lelu?

²¹ Mu kidi, mu Bibidia muala milongi ia valolo ia lungu ni muiji. I longa ué, ia lungu ni mundu uobhe ua Nzambi, o palaízu mua-nda kala athu a zediua, abhezi a Jihova. (Dijingunuinu 21:3, 4) O muenhu uambote u tua kingila! Né muene lelu, tu tena ku kala ni muiji ua zediua, mu ku kumbidila o milongi ia Nzambi, i tu sanga mu Maka mê, o Bibidia.