Kala Kyasoneka Matesu 16:1-28
16 Mu kididi kyenyókyo o Jifalizewu ni Jisadusewu a mu zukama phala ku mu tendala, n’a edikise kijimbwete kya dyulu.
2 Mwene wa atangela, wixi: “Mu ngoloxi, enu mu zwela, mwixi: ‘Ki kwanda noka mvula, mukonda dyulu dya kusuka,’
3 o mu kamene, mwixi: ‘Kuma lelu kwanda kala mbambi ni mvula, mukonda kwa lômbo.’ Enu mwejiya kutongolola o ijimbwete ya dyulu, maji ki mutena kutongolola o ijimbwete ya izulukutu ya mu bhita kindala.
4 Mwiji yú wayibha, akwa jiphánda,* amesena kijimbwete, maji kanda mona né ngó kijimbwete kimoxi, kikale ngó o kijimbwete kya Jona.” Mwene anga utunda, u axisa kwenyóko.
5 O maxibulu-phe aya ku sambwa, maji ajimbi kwambata jimbolo.
6 Jezú anga wa atangela, wixi: “Dilangyenu ni felemendu ya Jifalizewu ni Jisadusewu.”
7 Ene anga amateka kudifwetela mudyâ, exi: “Kitwezetu ni jimbolo.”
8 Mu kwijiya o maka yá, Jezú wa a ebhwidisa: “Enu mwatolo o kixikanu, phala-hi mwa mu difwetela mukonda dya kukamba o jimbolo?
9 Ki mwa tendela luwa i nga zwela? O kwila ki mu lembalala kingadisa midi jitanu ja mala ni mbolo jitanu, ni inda i mwa bhongolola-ku?
10 Mba kingadisa midi jiwana ja mala ni sambwadi dya jimbolo, ni inda yavulu yamakota i mwa bhongolola?
11 Kyebhi-phe ki mwakambe kutendela kwila, ki nga muzwela ya lungu ni jimbolo? Nga mu mi tangela phala mu dilange ku felemendu ya Jifalizewu ni Jisadusewu.”
12 O maxibulu-phe a tendela kwila, Jezú kakexile mwa tangela yalungu ni felemendu ya jimbolo, maji phala kudilanga ku ulongelu wa Jifalizewu ni Jisadusewu.
13 Kyoso kyabhixila mu jisanzala ja Sezaleya ya Filipe, Jezú webhwidisa o maxibulu mê, wixi: “O athu azwela kwila o Mon’a muthu nanyi?”
14 A mu tambwijila, exi: “Sayi yá amba kwila Nzwá dya Batizu, amoxi exi Elija, a kamukwá azwela kwila, Jelemiya mba polofeta yoso-yoso.”
15 Mwene anga wa ebhwidisa, wixi: “Abha enu, mwene mu zwela kwila éme nanyi?”
16 Ximá Phetele wa tambwijila, wixi: “Eye u Kidistu, o Mon’a Nzambi ya mwenyu.”
17 Jezú wa mu vutwila, wixi: “Ximá mon’â Jona, eye wazediwa mukonda o kidi kiki, ki wa kijiya ni kikwatekesu kya muthu mu xitu, maji wa kijiya bhukaxi ka Tata yami wene ku dyulu.
18 Ngi ku tangela dingi, kwila: Eye u Phetele, bhu ndanji yiyi bhene bhu nganda tunga o kilunga kyami, o mabhitu a Kalunga* kanda ki tolola.
19 Nganda kubhana o jisabhi ja Utuminu wa dyulu, kima kyoso-kyoso ki ukuta mu ngongo, ku dyulu a kikutu kyá, kima kyoso-kyoso ki ujituna mu ngongo, ku dyulu a kijituna kyá.”
20 Kyenyiki, mwene watendelesa o maxibulu mê, phala katangele muthu kwila mwéne Kidistu.
21 Tundé mu kithangana kyenyókyo, Jezú wamateka kutangela o maxibulu mê kwila, mwene watokalele kuya mu Jeluzaleme ni ku mu talesa hadi ku atwameni a Jijudé, ku akunji a makota ni ku jimesene ja kulonga o Kitumu, ni kwila atokalele ku mu jibha ni ku mu fukununa mu kizuwa kya katatu.
22 Mu kiki, Phetele u mwambata ku mbandu, yu wamateka ku mu bazela: “Dikwatele henda Ngana! Kiki, ki kyanda bhita n’eye.”
23 Jezú-phe usakuka kudima, anga u mu tangela, wixi: “Tunda bhabha* Satanaji! Eye wadibhange uditadi dya ku dibhukana, mukonda o ima i uxinganeka ki ya Nzambi kana, maji ya athu.”
24 Jezú wambela o maxibulu mê, wixi: “Se muthu wamesena ku ngi kayela, aditune mwene mudyê, azangule o taka* yê, n’a ngi kayele jinga.
25 Kuma woso wamesena kubhulula o mwenyu wê, wanda ku utexi, maji woso utexi o mwenyu wê mukonda dyami, wanda ku usanga.
26 Mu kidi, mbote yahi i mona o muthu se unganyala o ngongo yoso, maji utexi o mwenyu wê? Mba ihi yanda bhana o muthu phala kubhulula o mwenyu wê?
27 Mukonda o Mon’a muthu wakeza mu fuma ya Tat’ê kumoxi ni jianju jê, phala kufundisa o athu oso mu ikalakalu yâ.
28 Ngi mi tangela o kidi kwila, sayi yá ala bhabha, kanda fwa ande dya kumona o Mon’a muthu kwiza mu Utuminu wê.”
Footnotes
^ Mba, “a kambe ufiyele.”
^ Mba, “Hades.” Tala o Dilombolwelu.
^ Mu Ngel.: “bhita ku dima dyami.”
^ Tala o Dilombolwelu.
