Kala Kyasoneka Luka 12:1-59
-
O felemendu ya Jifalizewu (1-3)
-
Wôma wa Nzambi, kana o wôma wa athu (4-7)
-
Woso ufisala kwila waxikina Kidistu (8-12)
-
Kifika kya mvwama wakambe kilunji (13-21)
-
Ki mu tandanganye kyavulu (22-34)
-
Ka kilunga kofele (32)
-
-
Dilangyenu (35-40)
-
O kimbadi kya fiyele, ni kimbadi kyayibha (41-48)
-
Ki ngeza mubheka paze, maji kudimwanga (49-53)
-
Kutongolola o ijimbwete ya thembu (54-56)
-
Kubatula maka (57-59)
12 Kyenyiki, kwa dyongeka kifuxi kya jimidi ja athu, katé kyakala mu di dyota-dyota mudyâ. Jezú anga udyanga kutangela o maxibulu mê, wixi: “Dilangyenu ni felemendu ya Jifalizewu, o mangonya mâ.
2 Maji sé-ku kima kyófute kyambote, kikamba kutukuluka, kana-ku we kima kyósweke, akamba ku k’ijiya.
3 Mu kyenyiki, yoso i muzwela mwavundu, anda ku ivwa mu mwanya. Yoso i mu difwetela mu maxilu menu, anda ku ibokela mu matala a jinzo.
4 Ngi myambela dingi, enu mu makamba mami: Ki mukale ni wôma wa yó ajibha ngó o mukutu, kyazubha ku ujibha, katena kubhanga dingi kima.
5 Maji nganda mitangela woso u mwatokala ku mukala ni wôma: Kalenu ni wôma wa Yó, kyazubha kujibha muthu, utena we ku mu takula mu Njena.* Kyene, ngi myambela kwila, Mwenyó mwéne mwatokala ku mu kwatela wôma.
6 O athu kene mu sumbisa tudyédye tutanu mu iphaka iyadi* yakambe valolo yavulu? Né kamoxi ngó, Nzambi katena ku kajimba.
7 Maji katé mwene ni ndemba ya mítwe yenu yo kondale. Ki mukale ni wôma, mukonda enu mwa betakota, tudyédye twavulu ndenge.
8 “Ngi mi tangela kwila, woso ufisala bhu pholo ya athu kwila wa ngixikina, o Mon’a muthu we wanda fisala bhu pholo ya jianju ja Nzambi kwila, wa muxikina.
9 Maji woso ukamba ku ngixikina bhu pholo ya athu, kanda muxikina we bhu pholo ya jianju ja Nzambi.
10 Woso uzwela ima yayibha yalungu ni Mon’a muthu, anda mu loloka, maji woso uxongwena o nzumbi ikôla, kanda mu loloka kana.
11 Kyoso kya myambata mu ididi mwene mu dyongeka athu avulu,* akalakadi a jinguvulu, ni jingana, ki mu tandanganye ni ima i mwanda zwela, mba kyebhi ki mwanda zwela,
12 mukonda mu kithangana kyenyókyo, o nzumbi ikôla yanda milonga o ima i mwatokala o kuzwela.”
13 Mu kusuluka, sayi muthu mw’axaxi ka kifuxi, wa mwambela: “Mesene, tangela phang’yami phala awane o undundu n’eme.”
14 Jezú wa mu tambwijila: “Kamba dyami, nanyi wa ngisolo kála ngi mufundixi mba ngi muthu wa ku mi wanena o undundu?”
15 Mu kyenyiki, wa atangela: “Alukenu, dilangyenu ku lwimbi lwoso, mukonda o muthu né mwene wala ni ima yavulu, o mwenyu wê ki utundu mu umvwama wê.”
16 Mwene wa atela kifika, wixi: “Sayi mvwama wakexile ni dibhya dya mu bhana idima yavulu.
17 Mwene anga umateka kuxinganeka ku muxima wê: ‘Ngi bhanga kyebhi? Mukonda ki ngala ni kididi kyasoko phala kubhaka o idima yami.’
18 Mwene wambe: ‘Nganda bula o jinzo jami ja kubhaka o idima, anga ngitunga ja makota. Mwenyomo, mwéne mu nganda bhaka o idima yoso ni jimbote jingala naju.
19 Anga ngi dyambela:* “Eye wabhake nzungule dya jimbote phala mivu yavulu. Nyohe kyá, udye, unwe, usanguluke!”’
20 Maji Nzambi wa mwambela: ‘Kyôwa! Usuku walelu, wanda fwa.* Nanyi-phe wanda xala ni jimbote ji wabhake?’
21 Kiki kyene kibhita ni muthu ulunda jimbote phala mwene mudyê, maji bhu pholo ya Nzambi, mwene ngadyama.
22 Jezú anga wambela o maxibulu mê, wixi: “Mukonda dya kiki, ngi myambela kwila, ki mu tandanganye kyavulu ni mwenyu wenu se mudya ihi, mba ni mukutu wenu se mu zwata ihi.
23 Mukonda o mwenyu wabeta dingi kota, o kúdya ndenge. O mukutu we wabeta dingi kota, o izwatu ndenge.
24 Xinganekenu o ilombelombe: Ki yene mu kuna jimbutu, ki yene mu bhongolola, ki yala ni kididi kya kubhaka o idima, maji né kiki, Nzambi u idikila. O kwila enu ki mwa betakota, o jinjila ndenge?
25 Nanyi we mudyenu mu kukala ni hele, utena kubandekesa kakithangana ku mwenyu wê?
26 Se ki mutena kubhanga kama kófele-fele, mukonda dyahi-phe mu tandanganya ni ima ya mukwá?
27 Talesenu o ithulu ya mukáwu, kyoso ki ikula: Ki yene mu kalakala, ki yene mutunga izwatu, maji ngi mitangela kwila, né mwene Solomá mu unéne wê woso, kazwatele kála kakithulu kamoxi.
28 Kyenyiki, se Nzambi uzwika kiki, o ithulu ya mukáwu, yene mu kwila lelu ya bwingita, mungu a itakula mu túya, mwene kanda betakota ku mi zwika enu, mu athu mwatolo o kixikanu?
29 Mu kiki, ki mu tandanganye kyavulu mu kusota o ima i mwanda dya mba i mwanda nwa,
30 mukonda ima yoso yiyi, yene isota o athu k’ejiya Nzambi. Maji Tat’enu wejiya kwila, mwa bhindamena o ima yiyi.
31 Kyenyiki, kolokotenu mu kusota o Utuminu wê, o ima yoso yiyi, anda mi bandekesa-yu.
32 “Ki mukale ni wôma, kakilunga kófele, mukonda Tat’enu kya mu wabhela ku mibhana o Utuminu.
33 Sumbisenu o ima imwala nayu, o kitadi mu kibhane ku jingadyama.* Yudikenu jimbwenga ja kitadi jikamba kukuka, ni jimbongo ki jibhu, ku dyulu. Mukonda koko o miyi katena kubhixila-ku, o kabamba ki katena kujikinisa.
34 Kuma bhwoso bhukala o jimbote jé, bhene we bhukala o muxima wé.
35 “Diyudikenu, ni mukale polondo,* wikenu o tundeya twenu,
36 mu difwangana ni jiselevende ja mu kingila ngana yâ, kuvutuka kufesa ya ukaza. Kyoso mwene kyanda bhixila, ni kuphupha o dibhitu, mu tene ku mu jikwila ni lusolo.
37 Azediwa o jiselevende jojo, kyoso o ngana yâ kyanda bhixila u asanga atono! Ngi myambela o kidi kwila, mwene wanda diyudika,* anga wa axikamesa ku meza, ni kwa sidivila kúdya.
38 Se mwene wiza mu kilangidilu kya kayadi* mba kya katatu,* anga wa asanga, atono, ene azediwa!
39 Ijiyenu-kyu kwila, se o ngana ya inzo wejidile o kithangana kyeji kwiza o mwiyi, keji kwehela kubula o inzo yê.
40 Enu wenu, kalenu polondo, mukonda o Mon’a muthu wanda kwiza mu kithangana ki mu kifikile.”
41 Phetele webhwidisa: “Ngana, o kwila o kifika kiki, wa mu tutelakyu ngó etu, inga athu oso we?”
42 Ngana wambe: “Nanyi o kimbadi kya fiyele, kya dimuka,* ngana yê wa musolo phala kutambula o konda ya akalakadi yê ni kwabhana o kúdya kwasoko mu kithangana kyatokala?
43 O kimbadi kiki kyanda zediwa, se o ngana yê kyoso kyanda kwiza u musanga wa mubhanga kiki!
44 Ngi myambela o kidi kwila, mwene wanda musola phala kutambula o konda ya jimbote jê joso.
45 Maji se o kimbadi kiki, kixinganeka ku muxima wê kwila: ‘Ngana yami wa mu laleka kwiza,’ anga umateka kubeta o jiselevende, ja mala ni ja ahatu, ni kukala mudya, ni kunwa ni kukodiwa,
46 o ngana ya kimbadi kiki, wanda kwiza mu kizuwa ni mu kithangana ka kifikile. Mwene anga wanda mubhana kibetu, ni ku mubhana kididi mw’axaxi ka athu akambe ufiyele.
47 Mu kyenyiki, o kimbadi wejidile o vondadi ya ngana yê, maji ka diyudika, né ngó kubhanga o kima kya mubhingi ngana yê, anda ku mubeta kyavulu.
48 Maji o yó wabhange o ima yatokala ku mubeta, anda mubeta ngó bhofele mukonda kejidile o vondadi ya ngana yê. Kyenyiki, yó woso a mubhana kyavulu anda mubhinga we kyavulu, o yó a mutumu kutambula konda ya ima yavulu, anda betakota mu ku mubhinga.
49 “Eme ngeza mubheka túya mu ngongo. Ihi dingi i nganda bhanga se twene twa wama kyá?
50 Sayi-phe, batizu yabhingi ku ngi batizala nayu. Nganda kala ni kikote, katé ki ngi ikumbidila!
51 Mwa mufika kwila ngeza mubheka paze mu ngongo? Ngi myambela kwila, kana! Ngeza mubheka kudimwanga.
52 Mukonda tundé lelu, mu inzo imoxi mwanda kala kitanu kya athu anda diwanuna mudyâ. Kitatu kizoka ni kiyadi, o kiyadi kizoka ni kitatu.
53 Ene anda diwanuna kiki: O tata uzoka ni mon’a diyala, o mon’a diyala uzoka ni tata, o mama uzoka ni mon’a muhatu, o mon’a muhatu uzoka ni mama. O ukowakimi wa muhatu uzoka ni mbalakaji yê, o mbalakaji uzoka ni ukowakimi.”
54 Jezú watangela dingi o kifuxi, wixi: “Kyoso ki mu mona o dituta dya mu tundila ku mbandu kufwila o dikumbi, mu kithangana kyenyókyo muzwela, mwixi: ‘Kwanda noka mvula ni kitembu,’ yene-phe inoka mwene.
55 Kyoso ki mu mona kitembu kya mu tundila ku mbandu ya lwiji, muzwela, mwixi: ‘Kwanda kala mwanya wavulu,’ anga kukala mwene.
56 Mu akwa mangonya! Enu mwejiya kutongolola o ijimbwete ya dyulu ni ixi, kyebhi-phe, ki mwalembwa kutongolola o ijimbwete ya thembu yiyi?
57 Mukonda dyahi enu wenu ki mu tongololola we o ima yayuka?
58 Mu kifika, se eye ni nguma yé mwa muya ku mufundixi, lenguluka kubatula o maka ni nguma yé mu njila, phala mwene ka kubhakule ku mufundixi, o mufundixi ku kabhitangu, o kabhitangu anga ukuta mu kaleya.
59 Ngi kutangela kwila, eye kiwanda tunda mwenyomo katé kiwanda zubha o kufuta o kakitadi ké kasuku-ko.*
Footnotes
^ Tala o Dilombolwelu.
^ Mu Ngel.: “asádyu jiyadi.”
^ Mba, “mu malombe.”
^ Mba, “mwenyu wami.”
^ Mba, “a-nda ku bhinga o mwenyu wé.”
^ Mba, “ujitu wa henda.” Tala o Dilombolwelu.
^ Mu Ngel.: “Kutyenu o phonda mu mbunda.”
^ Mba, “wa-nda di kuta o phonda.”
^ Kiki kilombolola o kithangana kiya tundé ku 21 a ola katé mu kaxi ka usuku.
^ Kiki kilombolola o kithangana kiya tundé mu kaxi ka usuku katé ku ola ya 3.
^ Mba, “njimu.”
^ Mu Ngel.: “o lépton ya suku-ko.”
