Ikalakalu ya Jipoxolo 25:1-27
25 Mu kubhita izuwa itatu, Festu wabhixila mu mbanza ya Judeya, yu wa mateka o kutumina. Mwene watundu ku Sezaleya, yu wayi mu Jeluzaleme.
2 O akunji amakota ni adyakime a Jijudé alongolola Phawulu bhu pholo ya Festu. Anga amateka ku mu dyondela,
3 phala kwa bhanga favolo ya kutumikisa Phawulu mu Jeluzaleme, mukonda amesenene ku mu batamena phala ku mu jibha mu njila.
4 Maji Festu wa ambela kwila, Phawulu weji kala hanji mu kaleya mu Sezaleya ni kwila, mwene weji vutuka kwenyóko sé kulaleka.
5 Festu wa ambela dingi, wixi: “Se mwene wabhange kima kyayibha, o atwameni enu a kulumuke kumoxi n’eme, phala ku mutatela.”
6 Kyoso kyabhiti dinake mba dikwinyi dya izuwa mwaxaxi kâ, mwene wa kulumuka ku Sezaleya. Mu kizuwa kya kayela, waxikama bhu kyandu kya kufundisa, yu watumu ku mu bhekela Phawulu.
7 Kyoso Phawulu kya bokona, o Jijudé atundile mu Jeluzaleme a mu kondoloka, ya amateka ku mu tatela ima yavulu, maji o ima yiyi katenene ku ilondekesa kwila ya kidi.
8 Maji Phawulu mu kudizokela, wambe: “Eme ki nga bhukumukina o Kijila kya Jijudé, ki nga kambe kuxila o tembulu, mba kubhukumukina Sézalu.”
9 Kuma Festu wamesenene kudibhomba ku Jijudé, webhwidisa Phawulu, wixi: “O kwila wamesena kuya mu Jeluzaleme n’a ku fundise bhu pholo yami yalungu ni maka enyá?”
10 Maji Phawulu watambwijila: “Eme ngala bhu pholo ya kyandu kya Sézalu, bhwa tokala ku ngi fundisa. Ngana, kala ki wamono, eme ki nga bhange kima kyayibha ku Jijudé.
11 Se nga bhange kima kyayibha, mba ngate kituxi kya tokala ku ngi jibha, eme ki ngi ditunu kufwa. Maji se o ima ya mu ngi tatela o mayala yá, ya makutu, sé-ku muthu watokala ku ngi bhakula kwa ene, kala wa mwa bhangela favolo. Kyenyiki, ngi bhinga kwila o maka enyá a bhixile kwa Sézalu.”
12 Kyoso Festu kyazubha kuzwela ni akwa kubhana jindunge, wa mwambela, wixi: “Kuma wabhingi kuya kwa Sézalu, wandaya mwene kwa Sézalu.”
13 Mu kubhita izuwa sobha Ngilipa ni Mbelenise, ayi ku Sezaleya phala kukunda Festu.
14 Kuma ene eji bhita izuwa yavulu kwenyóko, Festu watangela kwa sobha o maka alungu ni Phawulu, wixi:
“Fele waxisa diyala mu kaleya;
15 kyoso ki nga kexile mu Jeluzaleme, o akunji a makota ni adyakime a Jijudé a ngi tangela o maka alungu ni mwene, ya a ngi bhingi phala ku mu fundisa.
16 Maji mu kitumu kya akwa Loma, ki kifwama kubhakula muthu a mu mutatela, ande dya kudisanga ni jinguma jê phala mwene kudizokela mu ima ya mutatela.
17 Mu kizuwa kya kayela, kyoso ene kyabhixila, nga xikama bhu kyandu kya kufundisa, éme nga tumu kubheka o diyala.
18 Kyoso o jinguma jê kyemana phala kuzwela, ka mutatela né ngó kima kimoxi kyayibha ki nga fikile.
19 Ene akexile mu zoka-n’ê yalungu ni ubhezelu wâ,* ni maka alungu ni diyala wafu kyá amwixana Jezú, maji Phawulu wakexile muzwela kwila wala hanji ku mwenyu.
20 Kuma ki ngejidile kyebhi ki ngeji batula o maka enyá, nga mwibhwidisa se wamesenene kuya mu Jeluzaleme phala ku mu fundisila kwenyóko.
21 Kyoso Phawulu kya bhingi phala kukala mu kaleya ni ku kingila o kitambwijilu kya Nguxi,* ngatumu phala ku mwambata dingi mu kaleya katé ki ngeji ku mu tumikisa kwa Sézalu.”
22 Kyenyiki Ngilipa watangela Festu, wixi: “Eme nga mesena kwívwa o diyala didi.” Festu wa mwambela: “Mungu wanda ku mwivwa mwene.”
23 Mu kizuwa kya kayela Ngilipa ni Mbelenise abhixila ni kijingu kyonene, ya abokona mu kididi kya kufundisa, kumoxi ni kabhitangu ka kibuka kya masoladi ni mayala afuma a mbanza. Anga Festu utuma o masoladi kubheka Phawulu.
24 Festu wambe: “Sobha Ngilipa ni enu oso mwala bhabha, talenu o diyala didi. O Jijudé joso kikale mu Jeluzaleme mba mu mbanza yiyi, a ngi bhingi ya adikola, exi: ‘O diyala didi watokala kufwa.’
25 Maji ngamono kwila mwene kabhangele kima kyeji mu bhangesa ku mujibha. Kyoso mwene kya bhingi kwila o maka abhixile kwa Nguxi,* eme ngabanze ku mu tumikisa.
26 Maji ki ngala ni kima phala kusonekena Ngana yami yalungu ni mwene. Kyenyiki, nga mubheka bhu pholo yenu benge-benge kokwé sobha Ngilipa, phala kyoso ki wanda zubha ku mwibhwidisa, ngi kale ni kima phala kusoneka.
27 Mukonda ngi mona kwila, ki kya fwama kutumikisa pelezu mu Loma, sé kusoneka o ima ya mutatela.”
Footnotes
^ Mba, “ubhezelu wa jinzambi.”
^ Dijina dya ujitu dya mwenexi mukwa Loma.
^ Dijina dya ujitu dya mwenexi mukwa Loma.
