Ikalakalu ya Jipoxolo 13:1-52
13 Mu kilunga kya Andiyokiya mwakexile jipolofeta ni jimesene. Enyá: Balanabé, Ximinyá amwixanene we Níjele* ni Lúsyu mukwa Silene, ni Manahene a mulongele kumoxi ni Helode o nguvulu ya mbanza, ni Sawúlu.
2 Kyoso ene kyexile mubheza Jihova ni kujejuwala,* o nzumbi ikôla yambe: “Tungulenu Balanabé ni Sawúlu, phala kubhanga o ikalakalu i nga atumu.”
3 Kyoso ene kyazubha kujejuwala ni kusamba, atula o maku mâ kuthandu dya Balanabé ni Sawulu, ya a asula.
4 Kyenyiki, bhukaxi ka nzumbi ikôla o mayala yá akulumuka ku Selewuxa, kwenyóko adilôngo mu ulungu ayi katé ku Xipele.
5 Kyoso kyabhixila ku Salamina, amateka kuboka o mak’â Nzambi mu malombe* a Jijudé. Nzwá* wakexile we kumoxi ni ene mu kwa kwatekesa.
6 Kyazubha kunyunga o kikôlo* kyoso, abhixila ku Pafu, kwenyóko asange-ku Judé amwixana Bale-Jezú, wexile muloji ni polofeta ya makutu.
7 Mwene wexile kumoxi ni nguvulu Seluju dya Phawulu, diyala dya kilunji. Kuma o nguvulu wamesenene kyavulu kwívwa o mak’â Nzambi, wexana Balanabé ni Sawúlu.
8 Maji Elimase, o muloji (kyene kilombolola o dijina dyê), wamateka kwa fidisa ni kufunyisa o nguvulu phala kakale ni kixikanu kwa Ngana.
9 Sawúlu amwixana we Phawulu, wezala ni nzumbi ikôla wa mutale swí
10 wambe: “Eye u diyala wezala ni mangonya ni kuyibha kwoso, u mona wa Dyabhu, eye u nguma ya ima yoso yayuka! Mukonda dyahi wa musota kubhengalesa o jinjila ja yuka ja Jihova?
11 Ívwa! O lukwaku lwa Jihova lwala ku thandu dyé, wa-nda kala u kifofo, wa-nda bhita kithangana sé kumona o mwanya.” Mu kithangana kyenyókyo, ku mesu mê ku mu vunda, mwene wamateka kujingujuka ni kubabajala, mu kusota muthu phala ku mu kwata ku maku ni ku mwendesa.
12 Mu kumona o ima yabhiti, o nguvulu waxikana Ngana, mukonda wadiwana ni milongi ya Jihova.
13 Kyenyiki, Phawulu ni akwâ adilôngo mu ulungu ku Pafu, ya ayi ku Peleje mu Panfídya. Maji Nzwá* wa axisa, yu wavutuka ku Jeluzaleme.
14 Tundé ku Peleje ene asuluka mu kwenda o njila, anga abhixila ku Andiyokiya mu Pizidya. Mu kizuwa kya Sábhalu abokona mu dilombe,* ya axikama.
15 Kyazubha kutanga o Kijila kya Mozé ni madivulu a Jipolofeta, o atwameni a dilombe* a tumu kwa tangela, exi: “Enu akwetu jiphange, se mwala ni kizwelu kya kuswinisa o mundu, zwelenu.”
16 Phawulu wemana, waleka o lukwaku bhulu, yu wambe, wixi:
“Enu akwetu mu akwa Izalayele ni enu oso mwene muxila Nzambi, ivwenu!
17 O Nzambi ya kifuxi kiki, o Nzambi ya Izalayele, wasolo o jikuku jetu; yu wa zangeleka o mundu kyoso ene kya tungile ku ixi ya Ijitu kala asonyi. Mwene wa akatula-ku ni lukwaku lwa swína.
18 Mu makwinyi awana a mivu wa akwatela mwanyu mu kikangalakata.
19 Wa bwikisa sambwadi dya ifuxi mu ixi ya Kanana, yu wabhana o ixi yâ, kala undundu.
20 O ima yoso yiyi, yabhiti mu hâma jiwana ni makwinyi atanu a mivu.
“Anga wa abhana afundixi, katé mu thembu ya polofeta Samuwele.
21 Maji ene abhingi sobha. Nzambi wa abhana Sawúlu mon’a Kiji, diyala dya tokalele ku mwiji wa Bejamí. Mwene watumina mu makwinyi awana a mivu.
22 Kyoso kya mu katula-ku, Nzambi wate Davidi ku usobha, kala kyambele mwene, wixi: ‘Ngasange Davidi mon’a Jesé, diyala dya sangulukisa o muxima wami; mwene wanda bhanga yoso i nga mesena.’
23 Kala kya kanene, bhukaxi ka mwiji* wa diyala didi, Nzambi wabheka mubhuludi ku Izalayele, mwéne Jezú.
24 Ande dya mwene kubhixila, Nzwá wabokela o mundu woso wa Izalayele yalungu ni batizu ya kudyela o ituxi.
25 Maji kyoso Nzwá kyakexile muzubha o kikalakalu kyê, mwene wambe: ‘Mwa fika kwila, éme nanyi? O muthu u mwa mu mu kinga k’eme, kana. Maji talesenu! O muthu wa mu kwiza kudima dyami, eme ki ngi fwama ku mu jitwina o mikolo ya jihayi jê.’
26 “Enu akwetu jiphange, mu mwiji wa Mbalahamu ni athu oso mwaxaxi kenu, ene muxila Nzambi, o njimbu yiyi ya kubhuluka a tu tudila nayu etu,
27 mukonda o akwa Jeluzaleme ni atwameny’â kaxikina Jezú kala mubhuludi, maji mu ku mu fundisa, ene akumbidila o maka asonekene o Jipolofeta, ene mwatanga ni dízwi dya swina mu jisábhalu joso.
28 Sumbala kasange kikuma kya ku mujibha, ene ajijidika Pilatu phala atume ku mujibha.
29 Kya zubha kubhanga o ima yoso yosoneke yalungu ni mwene, a mu katula ku taka,* anga a mu tula mu mbila.
30 Maji Nzambi wa mu fukununa bhukaxi ka madifundu.
31 Mu izuwa yavulu, mwene wa tukulukila ku athu abandele kumoxi ni mwene tundé ku Ngalileya ndu mu Jeluzaleme. Kindala athu yá a mubhana umbangi walungu ni mwene ku mundu woso.
32 “Kyenyiki, etu twa mu mi bokela o njimbu yambote yalungu ni kikanenu kya bhangele ku jikuku jetu.
33 O kikanenu kiki Nzambi wa ki kumbidila kokwetu, etu tu twana twâ, mu kufukununa Jezú, kala kyosoneke mu sálamu ya kayadi: ‘Éye u mon’ami, lelu nga kituka ngi tat’é.’
34 Nzambi wa mu fukununa ku madifundu, phala kakale dingi ni mukutu ubola. Mwene walondekesa kwila kiki kidi, kyoso kyambele: ‘Ni ufiyele woso nganda mi londekesa o henda i nga kanena kwa Davidi.’
35 Mukonda dya kiki, o sálamu ya mukwá yambe: ‘Eye ki wanda kwehela kwila, o muthu wa kukala fiyele ubola.’*
36 Davidi wasidivila Nzambi* mwaxaxi ka mwiji wê, yu wafu. A mu fundu bhwa fundile o jikuku jê, maji o mukutu wê wabolele.*
37 Maji o yó a mu fukununa kwa Nzambi, o mukutu wê ki wabolele.
38 “Kyenyiki jiphange, ejiyenu-kyu kwila, bhukaxi ka diyala didi, twa mu mi bokela o njimbu yalungu ni muloloki wa ituxi yenu.
39 Bhukaxi ka mwene, woso uxikana kakala dingi ni kikuma ku ima yoso yeji ku mutatela mu Kijila kya Mozé.
40 Kyenyiki, alukenu phala o ima yazwelele o Jipolofeta ki ize kuthandu dyenu:
41 ‘Ivwenu, enu mu akwa kutobhesa, mwanda diwana, mwanda fwa. Mukonda nga mubhanga kikalakalu mu izuwa yenu ki mwanda kixikina, né mwene se a mi tangela kyambote yalungu ni kikalakalu kiki.’”
42 Kyoso Phawulu ni Balanabé kyakexile mutunda mu dilombe,* o athu a a dyondela phala avutuke mu Sábhalu ya kayela.
43 Kyoso kyabhu o kyônge mu dilombe,* Jijudé javulu ni yó axikinine o milongi ya Jijudé exile mubheza Nzambi, akayela Phawulu ni Balanabé. Phawulu ni Balanabé aswinisa o athu enyá kukolokota kukala mu henda ya Nzambi.*
44 Mu Sábhalu ya mukwá athu avulu mu mbanza a dibhongolola phala kwívwa o maka a Jihova.
45 Kyoso o Jijudé kyamono mundu wavulu, difuba dya akwata, anga amateka kuzwela ima yavulu ya makutu yalungu ni yoso yakexile muzwela Phawulu.
46 Ni kuswina kwoso Phawulu ni Balanabé atangela o Jijudé, exi: “Kya dyanga abhingile ku mi bokela o mak’â Nzambi. Kuma mwa ditunu o maka enyá, mwa mono we kwila, ki mwa fwama kutambula o mwenyu wakalelaku, kindala twandaya mubokela o athu akwa jixi jengi.
47 Mukonda Jihova watubhana o kitumu, kyambe: ‘Nga kusolo phala ukale u mukengeji wa akwa jixi jengi, phala kwambata o njimbu ya kubhuluka katé ku maxokololo a jixi.’”
48 O akwa jixi jengi kyevu o maka enyá, asanguluka, ya amateka kuximana o mak’â Jihova. Oso a fwamena kutambula o mwenyu wakalelaku, axikana Ngana.
49 O mak’â Jihova akexile mwa bokela mu ididi yoso.
50 Maji o Jijudé afunyisa o ahatu afuma akexile mubheza Nzambi ni mayala afuma a mbanza. Ene aswinisa we o athu phala kuzukutisa Phawulu ni Balanabé, anga a akaya mu mbanza yâ.
51 Ene a kukumuna o fufuta ya inama yâ, ya ayi ku Ikônyu.
52 O maxibulu asangulukile kyavulu, ezalele we ni nzumbi ikôla.
Footnotes
^ Mba, “mumbundu.”
^ Mba, “kujila.”
^ Mba, “ididi ya ubhezelu.”
^ Yú Nzwá dya Máluku.
^ Mba, “ilya.”
^ Yú Nzwá dya Máluku.
^ Mba, “kididi kya ubhezelu.”
^ Mba, “kididi kya ubhezelu.”
^ Mu Ngel.: “mbutu.”
^ Mba, “muxi.”
^ Mba, “u sekumuka.”
^ Mba, “wa bhange o vondadi ya Nzambi.”
^ Mba, “wa sekumukine.”
^ Mba, “kididi kya ubhezelu.”
^ Mba, “kididi kya ubhezelu.”
^ Mba, “kukolokota mu kutambula o ngalasa ya Nzambi.”
