Ku Akwa Filipe 3:1-21
3 Kyenyiki, jiphange jami kolokotenu mu kusanguluka mwa Ngana, eme ki ngi bhwila mu ku mi sonekena o ima i nga mi sonekena kyá phala mu dilange.
2 Alukenu ni athu ayibha* ni yó abhekela ngó maka, ni yó amesena kwila atokala ku misaya.*
3 Mukonda o kusaya kwetu kwa kidi, etu twa mu sidivila Nzambi ni kikwatekesu kya nzumbi yê ikôla, etu tu dizangeleka mwa Kidistu Jezú, ki twa mudyelela mu ukexilu wetu wa xitu kana.
4 Sumbala eme ngatokala dingi kudyelela mu ukexilu wa xitu o athu amukwa ndenge.
Se bhukala muthu uxinganeka kwila watokala kudyelela mu ukexilu wa xitu, eme ngala dingi ni ima yavulu i ngi bhangesa kudyelela mu ukexilu wa xitu.
5 Angisaye mu kizuwa kya kanake, ngi mukwa Izalayele, ngatundu ku mwiji wa Bejamí, eme ngi Hebelewu, o jitata jami exile we Jihebelewu, yalungu ni kijila, eme ngi Falizewu.
6 Kuma ngaswinine kyavulu, eme ngakexile muzukutisa o kilunga, yalungu ni kubelesela o ima yayuka bhukaxi ka Kijila, eme nga ikumbidila mwene.
7 O ima yakexile ni valolo yavulu, kindala ngi imona kala ki yala ni valolo* mukonda dya Kidistu.
8 Eme ngimona dingi kwila o ima yoso ki yala ni valolo, mukonda o kwijiya kwalungu ni Ngana yami Kidistu Jezú ngi kumona kala kwa betakota. Mukonda dya mwene ima yoso i ngakexile nayu yadiboto, nga imono kala ixete phala kunganyala Kidistu,
9 ni kudisanga-nê, ki mukonda dya kuyuka kwami mu kutumaka o Kijila, maji mukonda dya kuyuka kwijila bhukaxi ka kixikanu kwa Kidistu, o kuyuka kutunda kwa Nzambi kwijila mu kixikanu.
10 Eme nga mesena ku mwijiya ni kwijiya o kutena kwa kufukunuka kwê, ngamesena we kutala hadi kala kyatale mwene ni kufwa kala kyafwile mwene.
11 Phala kumona se atena ku ngi fukununa mwaxaxi ka madifundu ku difukunukinu dya dyanga.
12 Kana kwila ngatambula kyá o kikôwe mba ngala kyá ngi muthu wayuka. Maji ngibhanga yoso phala kumona se ngi tambula o kikôwe, mukonda ngejiya kwila Kidistu Jezú wa ngisolo phala kutambula o kikôwe.
13 Jiphange jami, ki ngafika kwila o kikôwe nga kitambula kyá, maji ngejiya o kidi kiki: Ngijimba o ima i nga bwazeka kyá, ngidisungila phala kutambula o ima ya mu kwiza ku pholo.
14 Ngibhanga yoso phala kubhixila bhu mbambe, ni ngitambule o kikôwe kya twixanena Nzambi, kya kuya ku dyulu, bhukaxi ka Kidistu Jezú.
15 Kyenyiki etu enyoso twala ni kixikanu kyakolo twatokala kukala ni kixinganeku kiki, maji se mumesena kukala ni kixinganeku kyengi Nzambi wanda mi kwatekesa kukala ni kixinganeku kyatokala.
16 Kuma twala kyá ni kixikanu kyakolo, twatokala kusuluka mu kwenda mu ukexilu yú.
17 Enu akwetu jiphange jami, kayelenu o phangu yami, kayelenu we o phangu ya athu a mukayela o phangu itwa mibhana.
18 Kwala athu avulu a mu sebhulula o kufwa kwa Kidistu ku taka,* eme ngakexile mu mitangela yalungu ni ene, maji kindala ngi mitangela yalungu ni ene ni kudila.
19 O disukilu dyâ o kubwika, o nzambi yâ o jihânji jâ ja xitu, ene adizangeleka ni ima ya abhekela jisonyi, axinganeka o ima ya mundu yú.
20 Maji etu o dibhata dyetu dyala ku dyulu, ku twa mukinga ni hânji yoso o mubhuludi Ngana Yetu Jezú Kidistu.
21 Mwene bhukaxi kakutena kwê kwadikota, wanda kitula o mukutu wetu ubola phala udifwangane ni mukutu we mwene wala ni fuma, bhukaxi kakutena kwê kwadikota wanda tolola o ima yoso phala i mutumake mwene.
Footnotes
^ Mu Ngel.: “jimbwa.”
^ Mba, “yó adixuka jiphoko ku mikutu.”
^ Mba nange, “nga i xisa mu vondadi yami.”
^ Tala o Dilombolwelu.
