Kisumwa Kyalondekesa Kwa Nzwá 16:1-21
16 Anga ngivwa dízwi dya swina dya tundu mu kalatódyu, dyambe ku sambwadi dya jianju: “Ndenu mu lundulule mu ngongo o sambwadi dya matijela a njinda ya Nzambi.”
2 O anju yadyanga anga iya, ilundulula o ditijela dyê mu ngongo. O athu akexile ni kidimbu kya kyama kya muxitu, abhezele o kiteka kyê, akala ni jifidila ji xixima ku mukutu.
3 O anju ya kayadi ya lundulula o ditijela dyê mu musanza wa kalunga. O musanza wa kalunga wakituka manyinga kala a muthu a mujibha, anga kufwa o yama yoso ya mwenyu yakexile mu musanza wa kalunga.
4 O anju ya katatu ya lundulula o ditijela dyê mu jingiji ni mu jihotho* ja menya. Jene anga jibhiluka manyinga.
5 Eme ngevu o anju yala ni ungana wa kutumina o menya yambe: “Eye u Nzambi ya Fiyele, Yó weneku, wa kexileku, Eye Wayuka mukonda waxindile o kifundisu kiki.
6 Kuma ene a zunzumuna manyinga a athu a asolo ni jipolofeta, eye anga wa abhana kunwa o manyinga, kiki kyene kya a fwamena.
7 Anga ngivwa dízwi dya tundu bhu kalatódyu, dyexi: “Kyene, Jihova Nzambi, o Muteni wa Yoso, o kufundisa kwê kwa yuka, kwa kidi.”
8 O anju ya kawana ya lundulula o ditijela dyê ku dikumbi, anga o dikumbi adibhana o kutena kwa kujokotesa o athu ni túbhya.
9 O athu akexile mu jokota mukonda dya kutema kwavulu. Maji ene ka dyela o ituxi yâ, anga axongwena o dijina dya Nzambi. Ene kabhana kijingu kwa Nzambi, yó wala ni kutena kwa kubheka o mabhebhu.
10 O anju ya katanu ya lundulula o ditijela dyê ku kyandu kya kyama kya muxitu, o utuminu wa kyama kya muxitu anga ukala mwavundu. O athu amateka kudinumata o madimi mukonda dya jindolo.
11 Anga axongwena o Nzambi ya dyulu, mukonda dya jindolo ni dya jifidila jâ. Ene kadyela o ibhangelu yâ yayibha.
12 O anju ya kasamanu ya lundulula o ditijela dyê mu ngiji ya dikota ya Ewufalate, anga o menya akukuta phala kuyudika o njila ya jisobha jijila kutundila o dikumbi.
13 Ngevu jinjimbu* jitatu jayibha ja tundu mu kanu dya kidikixi, mu kanu dya kyama kya muxitu ni mu kanu dya polofeta ya makutu. O jinjimbu jiji jedile kala mazote.
14 O jinjimbu jiji ja madimonyo jibhanga madiwanu. Jene jiya katé ku jisobha ja tungu mu ngongo yoso phala kwabhongolola mu ita ya kizuwa kya dikota kya Nzambi Muteni wa Yoso.
15 “Ivwenu! Nga mukwiza kala ngi mwiyi, wazediwa yó udilanga, uzwata o izwatu yê, phala k’ende ni thuxi, n’a mu kwatese jisonyi bhu pholo ya athu.”
16 O jisobha ja ngongo anga a jibhongolola bhu kididi, mu dimi dya Hebalayiku akixana Alumajedone.*
17 O anju ya kasambwadi ya lundulula o ditijela dyê ku dibinza, anga ngivwa dízwi dya swina dyatundu ku kyandu mu tembulu, dyexi: “Yoso yo tenese kyá!”
18 Anga kukala jinzaji, mázwi ni inuminu, kukala we kitungutu kyadikota. Tundé kyabhange o athu, mu ixi kiluwa mubhita kitungutu kala kiki, kyene kya swina kyavulu, kyadikota.
19 O mbanza yadikota ya di mwangununa mu jimbandu jitatu, o jimbanza ja jixi jengi ja bwika. Nzambi anga ulembalala o Babilonya yadikota, phala ku mubhana o kopho ya vinyu ya njinda yê.
20 O ikolo yoso ya mwangana, o milundu yoso ya jimuka.
21 Anga ku dyulu kusonoka mvula ya matadi, ditadi dimoxi dya kexile mu nema talendu imoxi.* O matadi a lawukila o athu, o athu anga akala muxinga Nzambi mukonda dya dibhebhu dya mvula ya matadi, kuma o dibhebhu didi dyexile dyonene.
Footnotes
^ Mba, “jifixi.”
^ Mba, “jinzumbi jayibha.”
^ O kizwelu Har Magedón mu dimi dya Ngeleku, kya tundu mu kizwelu mu dimi dya Hebalayiku kilombolola “Mulundu wa Mejidu.”
^ Phala akwa Ngelexa, talendu imoxi ya sokele ni 20,4 ya jikilu.
