Kisumwa Kyalondekesa Kwa Nzwá 13:1-18
13 O kidikixi kyemana ku museke wa musanza wa kalunga.
Kyenyiki ngamono kyama kya muxitu kya mutunda mu musanza wa kalunga kyala ni dikwinyi dya jingela ni sambwadi dya mítwe. Ku jingela jê kwala dikwinyi dya itundu maji ku mítwe kwala majina axidi a kuxongwena nawu Nzambi.
2 O kyama ki ngamono kyedile kala ingo, maji o inama yê yedile kala ya úlusu, o dikanu dyê dyedile kala dikanu dya hoji. O kidikixi kyabhana o kutena kwê, o kyandu kyê, ni ungana wadikota ku kyama kya muxitu.
3 Ngamono kwila o mútwe umoxi wa kyama wedile kala a ukwamene kyavulu, maji o fidila yeji mubhangesa o kufwa, yeluka. Anga o ngongo yoso ya kexile mu kayela o kyama ni kudiwana.
4 Ene akexile mubheza o kidikixi mukonda wabhele ungana ku kyama. Akexile we mubheza o kyama ni ku kyambela, exi: “Nanyi wasokela ni kyama mu nguzu? Nanyi utena kulwa nê ita?”
5 O kyama a mubhana dikanu phala kudizangeleka ni kuzwela ima ya kuxongwena Nzambi. A mubhana we ungana phala kubhanga yoso ya mesenene mu makwinyi awana ni kiyadi kya jimbeji.
6 Mwene wajikula o dikanu mu kuxongwena Nzambi, anga uxongwena o dijina ni kididi kya Nzambi, katé mwene ni yó atungu ku dyulu.
7 Anga a mwehela kulwa ita ni yó a asolo ni kwatolola. A mubhana o ungana wa kutumina o miji yoso, o madyembu, o madimi ni ifuxi.
8 Oso atungu mu ngongo anda mubheza. Tundé ku dimatekenu dya ngongo, sé-ku muthu mudyâ a mu soneka o dijina dyê mu mukanda wa mwenyu wa Kambudi a mujibhile.
9 Woso wala ni mátwi, évwe.
10 Woso wala phala ku mwambata mu kaleya, anda mwambata mwene. Se muthu ujibha mukwa ni xibhata, anda mu jibha we ni xibhata. Mukonda dya kiki, o athu osole* abhingi kukolokota ni kulondekesa kixikanu.
11 Anga ngimona kyama kya mukwá kya muxitu kya mutunda mu ixi. Kyene kyala ni jingela jiyadi ja difwangana ni jingela ja kambudi. Maji kyene kya mateka o kuzwela kala kidikixi.
12 Kyene kya mutumina ni ungana wa kyama kya dyanga bhu pholo yê. Kyene kibhangesa kwila, o ixi ni athu oso atungu-mu abheze o kyama kya dyanga mukonda o fidila ibhangesa o kufwa, yeluka.
13 O kyama kya kayadi kya mubhanga madiwanu avulu katé kibhangesa kwila túbhya tulawuka ku dyulu katé bhoxi, bhu pholo ya athu oso.
14 Kyene kya mu nganala o athu mu ngongo, mukonda dya madiwanu a mwehela kubhanga bhu pholo ya kyama kya muxitu. Kyene kitangela o athu atungu mu ngongo kwila abhange kidifwanganu kya kyama a kijibhile ni xibhata, maji kyavutuka ku mwenyu.
15 Anga a mwehela kubhana muha wa mwenyu ku kiteka kya kyama, phala o kiteka kya kyama kizwele ni kubhangesa kwila, athu oso adituna kubheza o kiteka kya kyama, a ajibhe.
16 O kyama kyene mu jijidika o athu oso, ni jindenge ni makota, jimvwama ni jingadyama, athu ala ni ufolo ni abhika, phala kutambula o kidimbu bhu lukwaku lwa kadilu mba bhu dibhômo.
17 Phala kibhukale muthu usumba, mba usumbisa kikale ngó yó wala ni kidimbu, mba o dijina dya kyama mba wala ni dyalwilu dya dijina dyê.
18 Yó wala ni unjimu mwéne ngó wanda tendela o maka enyá. Woso wala ni unjimu a tetuluke o dyalwilu dya kyama, mukonda o dyalwilu didi adijiya ku athu. Dyene, hama jisamanu ni makwinyi a samanu ni kisamanu.
Footnotes
^ Mu Ngel.: “athu akôla.”
