Kisumwa Kyalondekesa Kwa Nzwá 1:1-20
1 Dijingunwinu dya Jezú Kidistu dya mubhana Nzambi phala kulondekesa ku abhik’ê o ima yanda bhita ku hádya. Jezú watumikisa anju yê, anga bhukaxi ka anju yiyi, walondekesa o dijingunwinu kwa Nzwá mukaxi ka ijimbwete.
2 O Nzwá mwéne wabhana o umbangi wa mak’â Nzambi, ni umbangi wa maka a Jezú Kidistu, wa ima yoso yamono.
3 Wazediwa yó utanga ni dízwi dya swina o izwelu ya kikanenu kiki, azediwa we yó evwa, anga abelesela o ima yósoneke-mu, mukonda o kithangana kyoxinde kyazukama kyá.
4 Eme ngi Nzwá, nga mu sonekena o sambwadi dya ilunga yala mu kibatu kya Azya:
Mukale ni ngalasa ya Nzambi ni kutululuka kutunda kwa “Nzambi, yó wene-ku, wala-ku, wanda kwiza,” ni kutululuka kutunda ku sambwadi dya jinzumbi jene bhu kyandu kyê,
5 ni kwa Jezú Kidistu o “Mbangi ya Fiyele,” yó “wa dyanga kufukunuka mw’alunga,” “o Nguvulu ya jisobha ja ngongo.”
Mwene watuzolo yu wa tubhulula ku ituxi yetu bhukaxi ka manyinga mê.
6 Wa tubhange tu jisobha ni akunji phala Nzambi, Tat’ê, mwene atambule o fuma ni kutena katé ku hádya ni hádya. Kyene!*
7 Talesenu! Mwene yu wiza ku matuta, athu oso anda mumona, katé mwene ni athu a mu tubwile ni sosa, miji yoso mu ngongo anda dikwata mukôndo mukonda dya mwene. Kyene!*
8 “Eme ngi Dimatekenu ni Disukilu”* kyene kyambe Jihova Nzambi, “Yó wene-ku, wakexile-ku, ni wakezaku, o Muteni-a-Yoso.”
9 Eme Nzwá, phang’yenu, ngi mukwenu mu jihadi, ni mu utuminu, mu ku kolokota kumoxi ni Jezú. Eme ng’exile mu kikôlo kya Pátamu, mukonda dya kuzwela yalungu ni Nzambi ni kubhana o umbangi wa Jezú.
10 Bhukaxi ka nzumbi ikôla ngevu dízwi kudima dyami dya difwanganene ni mbimbi ya koloneta,
11 dya ngambela, dixi: “Yoso iwanda mona, soneka-yu mu mukanda, ni ku itumikisa mu sambwadi dya ilunga yiyi: Efezu, Esmina, Pelengamu, Tiyatila, Salade, Filadélfya ni Lawudiseya.”
12 Eme ngasakuka* phala kumona se nanyi wexile muzwela n’eme, kyoso ki ngasakuka,* ngamono sambwadi dya tundeya twa ulu,
13 o wakexile bhukaxi ka tundeya, wa difwanganene ni mon’a muthu, mwene watele izwatu yamutula katé bhu inama, yu wadikutu ni phonda ya ulu ku phetu.
14 O ndemba ya mútwe wê yazelele kala mujinya, kala neve, o mesu mê edile kala mulengu wa túbhya wa mulekujuka,
15 o inama yê yedile kala ngondo yakatunda kyoso kya izunza mu túbhya, o dízwi dyê dyedile kala jibuya ja menya avulu.
16 Bhu lukwaku lwê lwa kadilu bhwakexile sambwadi dya jithéthembwa, mu dikanu dyê mwatundile xibhata yalebha yatu kyavulu yakexile ni mazu ayadi, o pholo yê yedile kala o dikumbi dya mubhenya mu mwanya watu kyavulu.
17 Kyoso ki nga mumono, ngabu bhu inama yê kala ngafu.
Mwene wa ngikwata ni lukwaku lwê lwa kadilu, yu wa ngambela, wixi: “Kana kukala ni wôma. Éme nga Dyanga, éme nga Sukidila-ku,
18 ngene ku mwenyu. Nga fwile, maji kindala ngala ku mwenyu katé ku hádya ni hádya, éme ngala ni jisabhi ja mbila ni ja Kalunga.*
19 Kyenyiki, soneka o ima i wamono, o ima ya mubhita kindala, ni ima yanda bhita ku hádya.
20 Didi dyene o dilombolwelu dya kikutu kikôla ki wamono kya sambwadi dya jithéthembwa bhu lukwaku lwami lwa kadilu, ni sambwadi dya tundeya twa ulu: O sambwadi dya jithéthembwa jilombolola o jianju ja sambwadi dya ilunga, o sambwadi dya tundeya tu lombolola o sambwadi dya ilunga.
Footnotes
^ Mba, “Amen, mu dimi dya Ngeleku.”
^ Mba, “Amen, mu dimi dya Ngeleku.”
^ Mu Ngel.: “ngi Álafa ni Omeka.” Mba, “ngi A ni Z.” O Álafa yene o kisoneku kyadyanga mu alfabetu ya dimi dya Ngeleku, Omeka yene o kisoneku kyasukina.
^ Mba, “ngabhiluka kudima.”
^ Mba, “ngabhiluka kudima.”
^ Mba, “Hades.” Tala o Dilombolwelu.
