Kala Kyasoneka Máluku 9:1-50
-
Jezú ukituluka (1-13)
-
Munzangala wexile ni dimonyo a musaka (14-29)
-
Ima yoso itena kubhita phala yó wala ni kixikanu (23)
-
-
Jezú uzwela dingi yalungu ni kufwa kwê (30-32)
-
O maxibulu a zoka se nanyi wa betakota mudyâ (33-37)
-
Woso ka tu zembe, wala ku mbandu yetu (38-41)
-
Ima ibhangesa kuta kituxi (42-48)
-
“Kalenu ni môngwa moxi dyenu” (49, 50)
9 Mwene wa ambela dingi, wixi: “Ngi mi tangela o kidi kwila, amoxi ala bhabha, kanda fwa ande dya kumona o Utuminu wa Nzambi kutumina.”
2 Kyabhiti izuwa isamanu, Jezú wexana Phetele, Tiyaku, ni Nzwá, yu wa ambata ubheka wâ, ku mulundu wa dileka. Mwene anga ulunguluka bhu pholo yâ,
3 o izwatu yê ikala mu bhenya, anga i betakota mu kuzela, kana musukudi mu ngongo utena ku izelesa kiki.
4 Kwenyóko kwa a tukulukila Elija ni Mozé, ene anga akala mu zwela ni Jezú.
5 Kyenyiki, Phetele wambela Jezú, wixi: “Mesene,* kima kyambote etu kukala bhabha. Tutunge balaka* jitatu, imoxi phala eye, imoxi phala Mozé, o ya mukwá phala Elija.”
6 Mu kiki, Phetele kejidile se ihi yeji zwela, mukonda ene oso akexile ni wôma wavulu.
7 Mu kithangana kyenyókyo kumoneka dituta, anga dya avungina, mu dituta anga mu tunda dízwi, dixi: “Yú mwéne o Mon’ami wakazola. Mu ivwidilyenu.”
8 Mu kithangana kyenyókyo atale mu jimbandu, ka mono-mu dingi muthu wengi, maji Jezú ngó.
9 Kyoso kyakexile mu kulumuka ku mulundu, Jezú wa atendelesa phala katangele muthu o ima ya mono, katé kyeji fukununa o Mon’a muthu mw’alunga.
10 Ene abelesela o izwelu yê,* maji akexile mu dibhwidisa mudyâ se ihi ilombolola o ku mu fukununa mw’alunga.
11 Ene a mwibhwidisa, exi: “Mukonda dyahi o jimesene ja kulonga o Kitumu amba kwila, Elija mwéne wanda dyanga o kwiza?”
12 Mwene wa atambwijila: “Kidi mwene, Elija mwéne udyanga o kwiza ni kuyukisa o ima yoso. Maji ihi yosoneke mu Mikanda Ikôla yalungu ni Mon’a muthu kwila, watokala kutala hadi yavulu ni ku mu sebhulula?
13 Maji ngi mi tangela kwila, mu kidi, Elija weza kyá, ya a mu bhange yoso ya mesenene, kala kyosoneke yalungu ni mwene.”
14 Kyoso kyabhixila bhwa kexile o maxibulu amukwá, a mono mundu wavulu wa akondoloka, ni jimesene ja kulonga o Kitumu jakexile mu zoka ni ene.
15 Maji kyoso o kifuxi kya mono Jezú, adiwana, ya ayi ni lusolo lwoso phala ku mu menekena.
16 Mwene wa ebhwidisa: “Maka-hi u mwa mu zoka ni ene?”
17 Sayi muthu mu kifuxi, wa mu tambwijila, wixi: “Mesene, nga ku bhekela mon’ami, mukonda mwene wala ni nzumbi i mu fidisa o kuzwela.
18 Bhwoso bhu mu kwatela o nzumbi, i mu vunda bhoxi, anga utunda kifulu mu kanu, udikokota ku mazo, o nguzu mu mukutu i mu bhwa. Eme nga bhingi ku maxibulu mé, phala kukaya o nzumbi yiyi, maji ene katena ku ikaya.”
19 Jezú wa atambwijila, wixi: “Enu mu mwiji mwakambe o kixikanu, katé bhebhi bhu nganda kala ni enu? Katé bhebhi bhu nganda mi lendukila? Ngi bhekelyenu n’ê.”
20 Anga a mu bhekela n’ê, maji kyoso kyamono Jezú, o nzumbi yamateka kusanyesa o mona. Kyoso kyabu bhoxi, u mbolomoka anga umateka kutunda kifulu mu kanu.
21 Mu kiki, Jezú webhwidisa o tata ya mona, wixi: “O uhaxi yú wamateka thembu kuxi?” Mwene wa mu tambwijila, wixi: “Tundé mu undenge,
22 mu veji javulu o nzumbi yiyi yene mu mu takula mu túbhya ni mu menya, phala ku mu jibha. Maji se utena kubhanga kima, tu kwatele henda, tu kwatekese.”
23 Jezú wa mwambela, wixi: “Mukonda dyahi wa mu zwela ‘Se utena’? Ngi kwambela kwila, ima yoso itena kubhita phala yó wala ni kixikanu.”
24 Mu kithangana kyenyókyo, o tata wavu o mona wadikola, wixi: “Eme ngala ni kixikanu! Ngi kwatekese bhwoso bhu nga kambe o kixikanu!”
25 Mu kumona kwila mundu wavulu wakexile mu kwiza bhwa kexile ene, Jezú wabazela o nzumbi yayibha, mu kuzwela, wixi: “Eye u nzumbi ya dibubu ni muxilu, nga kutumu: Tunda mu mukutu wa mona, kana kubokona-mu dingi!”
26 Kyoso o nzumbi kyazubha o kudikola ni kusanyesa o kamona, yatundu, anga o kamona kedile kala kafu, mukonda dya kiki-phe, athu avulu akexile mu zwela, exi: “Mwene wafu!”
27 Maji Jezú wa mu kwata mu lukwaku, yu wa mu balumuna, mwene anga wimana.
28 Kyoso kya bokona m’onzo, o maxibulu mê a mu ebhwidisa ubheka, exi: “Mukonda dyahi ki twatena kukaya o nzumbi?”
29 Mwene wa atambwijila: “O jinzumbi jiji jitunda ngó ni musambu.”
30 Kyatundu bhenyobho, ayi mu Ngalileya, maji mwene ka mesenene kwila bhukala muthu wijiya bhwa kexile mwene,
31 mukonda wakexile mu longa o maxibulu mê ni kwa tangela, wixi: “O Mon’a muthu anda mu bhakula bhu maku a athu, ene anda mu jibha, maji né mwene ni ku mu jibha, anda mu fukununa mu kubhita izuwa itatu.”
32 Maji ene kakexile mu tendela yakexile mwa tangela, akexile ni wôma wa ku mu ibhwidisa.
33 Anga abhixila mu Kafalanawú. Kyoso kyabokona m’onzo, mwene wa a ebhwidisa, wixi: “Maka-hi u mwakexile mu zoka mu njila?”
34 Ene adixibha, mukonda mu njila akexile mu zoka se nanyi wa betelekota mudyâ.
35 Jezú anga uxikama, wexana o kwinyi ni kiyadi kya jipoxolo, yu wa atangela, wixi. “Woso wamesena kukala ku pholo, akale o ndenge ni mubhika wa akwâ.”
36 Mwene wakwata kamona, yu wa mutula mw’axaxi kâ, wate o maku mê mu isuxi ya kamona, anga utangela o maxibulu mê, wixi:
37 “Woso utambulula umoxi ku twana tutu mu dijina dyami, u ngi tambulula we eme, woso u ngi tambulula, ka ngi tambulula ngó eme, maji ni Yó wa ngi tumu.”
38 Nzwá watangela Jezú, wixi: “Mesene, twamono muthu kukaya madimonyo mu dijina dyé, etu twa fikisa ku mu fidisa, mukonda mwene kakexile mu kwenda n’etu.”
39 Maji Jezú wambe, wixi: “Kanenu ku mu fidisa, mukonda sé-ku muthu ubhanga madiwanu mu dijina dyami, mu kusuluka u ngi zwela kyayibha.
40 Mukonda woso ka tu zembe, wala ku mbandu yetu.
41 Ngi mi tangela o kidi kwila, woso u mi bhana kopho ya menya phala kúnwa, mukonda mwatokala kwa Kidistu, mwene kanda texi o futu yê.
42 Maji woso ubhangesa umoxi ku twana tutu twala ni kixikanu, kuta kituxi,* kyeji kala kota se muthu mwenyú a mu kutile mu xingu ditadi dya kuhuhila nadyu, kala dyódyo dyene mu nyungisa o jumendu, ni ku mu takula mu musanza wa kalunga.
43 “Se lukwaku lwé lu kubhangesa kuta kituxi,* u lubatula. Mukonda kota se utambula o mwenyu ni unema, muveji dya kuya ni maku ayadi mu Njena,* mu túbhya ki tutena kujima.
44 ——
45 Se o kinama kyé ki kubhangesa kuta kituxi,* batula-kyu. Mukonda kota se utambula o mwenyu ni unema, muveji dya ku kutakula ni inama iyadi mu Njena.*
46 ——
47 Se dyesu dyé di kubhangesa kuta kituxi,* u ditakula dikanga. Kota se ubokona mu Utuminu wa Nzambi ni dyesu dimoxi, muveji dya ku kutakula mu Njena* ni mesu ayadi,
48 mu bhinga kwila o mawindu* kafu, o túbhya ki tu jimi.
49 “Mukonda athu oso anda kwa lundulwila o túbhya, kala kyene mu lundulula o môngwa mu kudya.
50 O môngwa wa wabha. Maji se o môngwa ubhwa o nguzu yê, ihi yanda bhanga o athu phala ku vutukisa o kutowala kwê? Mu kiki, kalenu ni môngwa moxi dyenu, sotenu kukala ni paze mudyenu.”
Footnotes
^ Mu Ngel.: “Labi.”
^ Mba, “fundu.”
^ Mba nange, “a bhake o izwelu ku mixima.”
^ Mu Ngel.: “kudibhukana.”
^ Mu Ngel.: “ku di bhukana.”
^ Tala o Dilombolwelu.
^ Mu Ngel.: “ki kubhalesa.”
^ Tala o Dilombolwelu.
^ Mu Ngel.: “ku di bhukana.”
^ Tala o Dilombolwelu.
^ Mba, “mabhuka.”
