Divulu Dya Kayadi Dya Samuwele 23:1-39
23 Yiyi o izwelu yasukina ya Davidi:
“Izwelu ya Davidi mon’â Jesé,Izwelu ya muthu a muzangeleka,A mu undu kwa Nzambi ya Jakobo,O ngimbidi yambote ya mimbu ya Izalayele.
2 O nzumbi ya Jihova ya ngikwatekesa kuzwela;O maka mê ma ngitula bhu dimi dyami.
3 O Nzambi ya Izalayele wazwela;O Ditadi dya Izalayele wa ngambela, wixi:
‘Kyoso o yó wa mutumina o mundu muthu wayukaAnga utumina ni wôma wa Nzambi,
4 Utuminu wê wedi kala o mukengeji, kyoso o mwanya ki umwika,Mu kamene kakambe o matuta.
Wedi kala o mwanya kyoso kibhita o mvula,Ubhangesa o yangu kusabhuka mu mavu.
5 Ki kyene kyala o inzo yami ku pholo ya Nzambi?
Kuma mwene wabhange n’eme kikutu kinangenena kate ku hádya ni hádya,Kya jimbuluka mu ima yoso, kyokondeke.
Kiki kilombolola o kubhuluka kwami ni kusanguluka kwami,Mukonda dya ima yiyi, mwene wanda bhangesa o mwiji wami kuzediwa.
6 Maji o athu ayibha asoko ni muxi wa minya a utexi,Mukonda o minya katena ku ivuza ni maku ahatu.
7 O muthu ukwata-ku,Wabhingi ku ikwata ni felu ni mubhinyi wa sosa,Yene atokala ku yoha mu túbhya, kabasa kididi bhu ikala.”
8 Yá ene o majina a mazonda a Davidi: Josebe-Basebete mukwa Hakimone, o mutwameni wa kitatu kya masoladi. Sayi kizuwa mwene wajibha hama nake a masoladi ni sosa yê.
9 Mukukayela, kwexile Eliyazale mon’â Dodo, mulawula wa Ahohi. Mwene wexile mwaxaxi ka mazonda atatu exile kumoxi ni Davidi kyoso mwene kyalwu o ita ni akwa Fidíxa. O akwa Fidíxa adibhongolola phala kubhanga o ita, o mayala akwa Izalayele alenge.
10 Maji mwene waxala kwenyoko yu watolola o akwa Fidíxa, kate o lukwaku lwé ki lwabhwila anga lukola mwene mukonda dya kukwata kyavulu o xibhata. Kyenyiki mu kizuwa kyenyokyo Jihova wa abhana kikowe* kyadikota. Kyoso Eliyazale kyatundu, o masoladi avutuka* phala kubhongolola o imbamba ya yó a ajibha.
11 Mukusuluka, kwexile Xama mon’â Haje, mukwa Halale. Kyoso akwa Fidíxa kya dibhongolola ku Leyí mwakexile o dibhya dya fejá,* o masoladi a Izalayele alenge* mukonda dya akwa Fidíxa.
12 Maji mwene wemana mu kaxi ka dibhya, yu walange o dibhya mu kujibha o akwa Fidíxa. Mukonda dya kiki, Jihova wa abhana kikowe kyadikota.*
13 Kitatu ku makwinyi atatu a atwameni a masoladi ayi mudisanga ni Davidi mu dibanda dya Adulamu mu kithangana kya kubhongolola, kyoso o masoladi akwa Fidíxa* kyakexile mu honga ya Lafayime.
14 Mu kithangana kyenyokyo Davidi wakexile mu kididi kyê kya kudisweka, akwa Fidíxa atele we masoladi ku Beleme.
15 Davidi anga wamba, wixi: “Ngeji sanguluka kyavulu se nginwa o menya a kixima kyazukama ni mwelu wa mbanza ya Beleme.”
16 Kyenyiki, o kitatu kya mazonda abokona mwakexile akwa Fidíxa, akatula menya mu kixima kyakexile bhwa zukama ni mwelu wa mbanza ya Beleme, ya abheka o menya kwa Davidi. Maji Davidi ka xikina ku anwa. Wa alundulwila bhoxi mu kwabhakula kwa Jihova.
17 Mwene wambe: “Kikola, Jihova! Eme nuka ngeji xikina kubhanga o kima kiki. Kyebhi kingeji nwa o manyinga a mayala ate o myenyu yâ mu kilwezu?” Mukonda dyakiki, mwene waditunu o kunwa. Yiyi, yene o ima yabhangele o mazonda atatu a Davidi.
18 Abizayi phange ya Jowabe mon’â Zeluya, mwéne wexile o kabhitangu ka kibuka kyamukwa kya mazonda atatu. Mwene wajibha hama jitatu ja mayala ni sosa yê, wafumanene kyavulu kala o mazonda atatu adyanga.
19 Sumbala mwene wafumanene dingi mu kibuka kyê kya kitatu kya mazonda, ni kwila mwene wakexile ku pholo dya kibuka, maji kasokele ni mazonda atatu adyanga.
20 Benaya mon’â Joyada wexile diyala dyaswina,* mwene wabhange ima yavulu ya undanda ku Kabiziyele. Mwene wajibha o ana ayadi a Adiyele mukwa Mowabe. Watuluka mu kixima mu kizuwa kyexile mubwa mbundu* yavulu yu wajibha o hoji.
21 Mwene wajibha we diyala mukwa Ijitu wexile dizonda dyonene. Sumbala o mukwa Ijitu wexile ni sosa bhu maku, Benaya wayi mubhânga-nê ni mbangala. Mwene watambula o sosa bhu maku a mukwa Ijitu, yu wa mujibha ni sosa yê mwene.
22 Yiyi o ima yabhangele Benaya mon’â Joyada. Mwene wafumanene kyavulu kala o mazonda atatu.
23 Sumbala wafumanene kyavulu o makwinyi atatu a masoladi ndenge, maji kasokele ni mazonda atatu. Maji Davidi wa musolo phala kukala mulangidi wê.
24 Azayele phange ya Jowabe, wexile mukaxi ka makwinyi atatu a masoladi. Ni Ele-Hanane mon’â Dodo mukwa Beleme,
25 Xama, mukwa Halodi ni Elika mukwa Halodi,
26 ni Heleji mukwa Palete ni Ila mon’â Ikexi mukwa Tekowa,
27 ni Abiyezele, mukwa Anatote ni Mebunayi, mukwa Huzata,
28 ni Zalamone, mukwa Ahohi ni Mahalayi, mukwa Notofa,
29 ni Helebe, mon’â Bahana mukwa Notofa ni Itayi, mon’â Dibayi mukwa Ngibeya ya Bejamí;
30 ni Benaya, mukwa Pilatone ni Hidayi, watokala ku honga ya Ngahaxi.
31 Ni Abiyalibone, mukwa Halaba ni Azemavete, mukwa Bahudimi.
32 Eliyahaba, mukwa Salabimu ni an’â Jasene ni Jonata;
33 Ni Xama, mukwa Halale ni Ahiyamu mon’â Salale, o mukwa Halale,
34 ni Elifelete, mon’â Ahaxibayi mon’â a mukwa Makata ni Eliyamu, mon’â Ahitofele o mukwa Ngilo,
35 ni Hezulo, mukwa Kalumelu ni Pahadi, mukwa Alábya,
36 ni Ingale, mon’â Natane mukwa Zoba ni Bani, mukwa Ngade,
37 ni Zeleke, mukwa Amone ni Nahalayi, mukwa Behelote, o mukwatekexi wa Jowabe mon’â Zeluya,
38 ni Ila mukwa Itedite ni Ngalebe, mukwa Itedite,
39 ni Udiya, mukwa Hiti. Enyoso atenesa makwinyi atatu ni sambwadi a masoladi.
Footnotes
^ Mba, “kubhuluka.”
^ Mba, “o mundu wavutuka.”
^ Mu Heba.: “lentilha.”
^ Mba, “o mundu walenge.”
^ Mba, “kubhuluka.”
^ Mba, “sanzala ya jibalaka ya akwa Fidíxa.”
^ Mu Heba.: “mona wa diyala dyala ni valolo.”
^ Mba, “neve.”
