Divulu Dya Kayadi Dya Samuwele 2:1-32
2 Kyabhiti o ima yiyi Davidi webhwidisa Jihova, wixi: “O kwila ngatokala kuya mu jimbanza ja Judá?” Jihova wa mutambwijila: “Ndé.” Davidi webhwidisa dingi: “Ngiya mbanza yebhi?” Mwene watambwijila: “Ndé mu mbanza ya Hebolone.”
2 Kyenyiki, Davidi wayi mu mbanza yenyoyo ni ahat’wê ayadi, Ahinowa mukwa Jezelele ni Abingayíle mukwa Kalumelu, o mutudi wa Nabale.
3 Davidi wambata we o mayala mê ni miji yâ. Ene atungu mu jimbanza ja zukamene ni Hebolone.
4 Mukusuluka, o mayala akwa Judá eza kwenyoko anga a undu Davidi kala sobha ya mwiji woso wa Judá.
Ene ambela Davidi, exi: “O akwa Jabezi ya Ngiliyade éne afundu Sawulu.”
5 Kyenyiki Davidi watumikisa akunji ku mayala akwa Jabezi ya Ngiliyade phala kwatangela: “Jihova a mibesowale mukonda mwa londekesa henda kwa Sawulu ngana yenu, mu ku mufunda.
6 Jihova amikwatele henda, amikale we fiyele. Eme we nganda mibhanga mbote mukonda dya kima ki mwabhange.
7 Kindala swinenu, kolokotenu, mukonda o ngana yenu Sawulu wafu, o mwiji wa Judá wangisolo kala sobha.”
8 Maji, Abinele mon’â Nele o mutwameni wa kifuxi kya masoladi a Sawulu, wambata Ixibozete mon’â Sawulu ku Manayime yala ku sambwa dya ngiji,
9 anga umubhanga sobha phala kutumina akwa Ngiliyade, akwa Axudi, akwa Jezelele, akwa Efalayime, akwa Bejamí ni Izalayele yoso.
10 Kyoso Ixibozete mon’â Sawulu kya kituka sobha mu Izalayele, mwene wakexile ni makwinyi awana amivu. Mwene watumina mivu iyadi, maji o akwa Judá exile ku mbandu ya Davidi.
11 Davidi watumina o akwa Judá ku Hebolone mu sambwadi dya mivu ni mbeji jisamanu.
12 Mukubhita thembu, Abinele mon’â Nele ni jiselevende ja Ixibozete mon’â Sawulu atundu ku Manayime ya ayi ku Ngibiyone.
13 Jowabe mon’â Zeluya ni masoladi a Davidi atundu we anga adisanga mu kizanga kya menya kyala ku Ngibiyone. Kibuka kimoxi kikala ku mbandu ya kizanga kya menya, o kibuka kya mukwa kikala ku sambwa.
14 Mukusuluka, Abinele wambela Jowabe, wixi: “O mayala adisokejeke phala kubhânga n’etu.” Jowabe wa mutambwijila: “Kyene, adisokejeke.”
15 Kyenyiki, ene adibhakula ya azawuka phala kubhânga. Asolo dikwinyi ni kiyadi kya mayala akwa Bejamí ku kibuka kya Ixibozete mon’â Sawulu ni dikwinyi ni kiyadi kya jiselevende ja Davidi.
16 Ene adikwata ku mítwe, kala muthu anga ukuba mukwá ni xibhata yê, enyoso anga afwa mu kithangana kimoxi. Mukonda dya kiki, o kididi kyenyokyo akiluku o dijina dya Helekate-Hazudime. Kyene kyala ku Ngibiyone.
17 O ita yakayela mu kizuwa kyenyokyo kwafu athu avulu. Mukusuka-ku, Abinele ni masoladi a Izalayele a atolola ku masoladi a Davidi.
18 O ana atatu a Zeluya, Jowabe, Abizayi ni Azayele bhwene we bhwakexile. Azayele walengulukile mu kulenga, mwene wexile mulenga kala mbambi mu mukáwu.
19 Azayele wamateka kukayela Abinele. Mwene wexile mulenga mu kukayela Abinele, sé kubhambuka ku kyasu mba ku kadilu.
20 Kyoso Abinele kyatale kudima, mwene webhwidisa: “Eye Azayele?” Mwene watambwijila: “Xé! Eme mwene.”
21 Abinele wa mwambela, wixi: “Bhambuka ku kadilu mba ku kyasu, kwata diyala dimoxi ni uxale ni imbamba yê.” Maji Azayele ka xikina, wasuluka mwene ni ku mu kaya.
22 Abinele wambela dingi Azayele, wixi: “Kana kungikayela, wanda ngibhangesa ngo ku kujibha. Se kiki ngikibhanga, kyebhi kingeji tala o pholo ya kota dyé Jowabe?”
23 Maji Azayele ka xikina, wasuluka mwene mu kumukayela. Kyenyiki Abinele u mu kuba ni sosa mu mala, yene anga imutundila ku dikunda, yu wafwila bhenyobho. Athu oso exile mubhita mu kididi kyenyokyo exile mu kwimana phala kumutala.
24 Ku pholo dya kwenda, Jowabe ni Abizayi ayi musota Abinele. Kyoso o dikumbi ki dyexile kya muboba, ene abhixila mu kamulundu ka Ama, kala ku pholo dya Jiya, mu njila iya kate mu kikangalakata kya Ngibiyone.
25 Kwenyoko o akwa Bejamí adibundu kumoxi ni Abinele. Ene anga akala kibuka kimoxi ngo kya masoladi, ya emana ku thandu dya kamulundu.
26 Kyenyiki, Abinele wa handekela Jowabe, wixi: “Kate bhebhi o xibhata yandaya ni kujibha? Ku kijiya kwila kiki kyanda bhekela divuwa dya dikota? Kithangana kyahi kiwanda tuma o mayala* mé kwimana phala kajibhe dingi o jiphange jâ?”
27 Jowabe watambwijila, wixi: “Kala kyene ku mwenyu o Nzambi ya kidi, se ki wazwelele, o mayala eji suka ngo kukayela o jiphange jâ mu kamene.”
28 Mukusuluka Jowabe waxiki o koloneta, o mayala anga eha kukaya akwa Izalayele. Bhenyobho o ita yasuku.
29 Mu usuku wenyó, Abinele ni mayala mê abhitila ku Halabá ni ku Njolodá ya azawuka o honga yoso kate kyabhixila ku Manayime.
30 Kyeha kukayela Abinele, Jowabe wongeka o mundu woso. Kwakambele Azayele ni dikwinyi ni divwa dya masoladi a Davidi.
31 Maji o masoladi a Davidi atolola akwa Bejamí ni mayala a Abinele. Kwafu hama jitatu ni makwinyi asamanu a mayala.
32 Ene akwata o kimbi kya Azayele, ya akyambata, anga amufunda mu mbila ya tat’ê ku Beleme. Mukusuluka, Jowabe ni mayala mê ende usuku woso, anga abhixila ku Hebolone ku makolombolo.
Footnotes
^ Mba, “o mundu.”
