Dya Kayadi Dya Malunda 9:1-31
9 Kyoso o mvwale ya Sabá kyevu o fuma ya Solomá, weza mu Jeluzaleme phala kulola Solomá ni ibhwidisu yabhonzo. Mwene wayi ni akalakadi avulu ni jikamelu jambatele máji a mazumba ni ulu yavulu ni matadi afwama. Mwene weza kwa Solomá yu wa mutangela yoso yexile ku muxima wê.
2 Solomá wa mutambwijila o ibhwidisu yê yoso. Kikwexile kima kyabhonzele kyavulu phala Solomá ku mu jimbulula-kyu.
3 Kyoso o mvwale ya Sabá kyamono o unjimu woso wa Solomá ni inzo yatungile,
4 ni makúdya ku meza mê ni kyebhi kyexile muxikama o ilamba yê ni kikalakalu kya yó exile musidivila o kudya ni izwatu yâ ni kikalakalu kya yó exile musidivila o uholwa ni izwatu yâ ni jisata ja kwoha jexile mubhakula mu inzo ya Jihova, mwene katena kuzwela kima.
5 Bhenyobho, mwene wambela o sobha, wixi: “Mbe, o ima yoso i ngevu mu ixi yami yalungu ni ibhangelu yé* ni unjimu wé, kidi mwene!
6 Maji ngaxikina ngo mu yoso ya ngitangela kyoso ki ngeza, eme ngamono ni mesu mami. Mukidi, kangitangela yoso yalungu ni unjimu wé. O ima i ngamono, yatúndu yoso i ngevu.
7 Azediwa o mayala mé ni jiselevende jé, ene mukala ku pholo yé mu kwivwa o unjimu wé!
8 Jihova Nzambi yé a muximane, yó wa kuzolo, yu wa kutumbika ku ungana wê kala sobha mu dijina dya Jihova Nzambi yé. Mukonda o Nzambi yé wazolo Izalayele, mwene wamesena kwila o mundu yú unangenena kate ku hádya ni hádya. Mwene wa kusolo eye ngana, phala kutumina Izalayele ni kuyuka ni kubatula o madimanda ni kidi.”
9 Mukusuluka, o muhatu wabhana kwa sobha, hama ni makwinyi ayadi a jitalendu* ja ulu ni máji a nzungule a mazumba ni matadi afwama. Kikwexile dingi muthu wengi wabhana máji avulu a mazumba kala abhanene o mvwale ya Sabá kwa sobha Solomá.
10 O jiselevende ja Hilamu ni ja Solomá ejile ni ulu ku ixi ya Ofile, a bheka we mabaya avulu a muxi wa sandalu ni matadi afwama.
11 Sobha wabhange maxikata ni mabaya a sandalu phala o inzo ya Jihova ni inzo* ya sobha. Wabhange we tumbánza ni tungoji phala o jingimbidi. Mu mbanza ya Judá nuka mwakexile mabaya avulu kala yâ.
12 Sobha Solomá wabhana we kwa mvwale ya Sabá yoso yamesenene ni yoso yabhingi. O ima ya mubhana yavudile dingi, o yabheka mwene phala o sobha ndenge. Mukusuluka, o mvwale ya Sabá wavutuka ku ixi yê kumoxi ni jiselevende jê.
13 O ulu yexile mutambula Solomá ku muvu, yexile munema hama samanu ni makwinyi asamanu ni samanu a jitalendu.
14 Ku thandu dya ulu yoso yiyi, kwadite dingi o ulu ni phalata yexile mutunda ku jingenji ni ku asumbixi ni ku jisobha ja Alábya ni ku jinguvulu ja ixi.
15 Sobha Solomá wabhange hama jiyadi ja jingubu ja ulu. (ngubu imoxi yexile ni hama jisamanu ja jixikulu* ja ulu.)
16 Wabhange we hama jitatu ja jingubu jofele ja ulu (kala ngubu yofele yexile ni mina* jitatu ja ulu.) O sobha wa jitula mu Inzo ya Muxitu wa Libanu.
17 Sobha wabhange we kyandu kyadikota kya mazu a nzamba, yu wa kifwamesa ni ulu yambote.
18 Phala kubhixila ku kyandu, kwexile maxikata asamanu ni kibaka kya ulu kyanaminine ku kyandu phala kutula-ku o inama. O kyalu kyakexile ni ixamenenu iyadi ku mbandu jiyadi ja kyalu, kala mbandu kwexile kiteka kya hoji.
19 O ku maxikata asamanu kwexile dikwinyi ni kiyadi kya jihoji. Mbandu imoxi hoji jisamanu, o mbandu yamukwa, hoji jisamanu. Séku sobha yengi wexile ni kyandu kyadifwile ni kyokyo.
20 O jikopho ja sobha Solomá ajibhangele ni ulu, o imbamba yoso ya inzo a ixana Muxitu wa Libanu, yexile ya ulu yambote. Kibhwexile kima akibhangele ni phalata, mukonda mu izuwa ya Solomá o phalata kiyexile ni valolo.
21 O jiselevende ja Hilamu exile muya ku Talxixi ni jinaviyu ja sobha. Mu kubhita mivu itatu, o jinaviyu jiji jakexile mukwiza veji imoxi mu kutunda ku Talxixi. Jene jexile mubheka ulu, phalata, mazu a jinzamba, ni jihima ni jinjila ajixana jipavá.
22 Kyenyiki, sobha Solomá mwéne wabetele-kota mu kukala mvwama ni kukala njimu, o jisobha joso mu ixi ndenge.
23 O jisobha ja jixi joso ja mesenene kuzwela ni Solomá phala kwivwa o unjimu wa mubhana o Nzambi yakidi.
24 Ene oso exile mu mubhekela maujitu kala, ima ya phalata, ima ya ulu, izwatu, mauta, máji a mazumba, jikabalu ni jimula. Exile mu mubhekela o ima yiyi, muvu ni muvu.
25 Solomá wakexile ni midi jiwana ja ididi phala o jikabalu jê ni makalu mê a ita. Wakexile we ni dikwinyi ni kiyadi kya midi a jikabalu.* O jikabalu jiji, jexile mu jimbanza ja kubhakela o makalu a ita ni mu Jeluzaleme bhwa zukama ni inzo ya sobha.
26 Solomá wakexile mutumina o jisobha joso jiji, tunde ku ngiji ya Ewufalate kate ku ixi ya akwa Fidíxa ndu ku mbambe ya akwa Ijitu.
27 Sobha Solomá wabhangesa kwila o phalata ni ulu ivula kala matadi mu Jeluzaleme. Wabhangesa we o mabaya a muxi wa misedulu kuvula kala o mixi ya mufiku wa Sefelá.
28 O jikabalu ja sobha Solomá, jexile mutunda ku ixi ya Ijitu ni ku jixi jengi.
29 O ima yamukwa ya musoso wa Solomá, tunde ku dimatekenu ndu ku disukilu, a isoneka mu divulu dya polofeta Natane, mu ikanenu ya Ahiya mukwa Silo ni mu divulu dya Idu, wamonene o isumwa yalungu ni Jelobowamu mon’a Nebate.
30 Solomá watumina mu Jeluzaleme ni mu Izalayele yoso, mu makwinyi awana a mivu.
31 Mukusuka-ku, Solomá wafu, a mufundu mu Mbanza ya tat’ê Davidi. Mon’ê Lobowamu, mwene wa mubhingana mu ungana.
Footnotes
^ Mba, “yalungu ni ima i uzwela.”
^ Talendu imoxi yasokele ni 34,2 ya jikilu. Tala o Kiba. B14.
^ Mba, “mbonge.”
^ Xikulu imoxi yasokele ni 11,4 ya jigrama. Tala o Kiba. B14.
^ Mu mikanda ya Hebalayiku, mina imoxi yasokele ni 570 ya jigrama. Tala o Kiba. B14.
^ Mba, “akwa kwendela ku jikabalu.”
