Dya Kayadi Dya Malunda 28:1-27
28 Akaji wexile ni makwinyi ayadi a mivu kyoso kyakituka sobha, watumina mu dikwinyi ni samanu dya mivu mu Jeluzaleme. Mwene kabhange ima yambote bhu pholo ya Jihova, kala yabhangele kukwê Davidi.
2 Mwene wende mu jinjila ja jisobha ja Izalayele, kate mwene, wabhange iteka ya Bahale.
3 Akaji wabhakula jisata mu honga ya Mon’a Hinome,* yu woha an’ê mu túbhya mu kukayela o kifwa kyayibha kya ifuxi yakaye Jihova bhu pholo ya akwa Izalayele.
4 Akaji wexile mubhakula jisata ni kubandesa o dixi dya jisata mu ididi yadileka ni ku milundu ni bhoxi dya mixi yoso yamakota.
5 Mukonda dya kiki, Jihova Nzambi yê wa mubhakula bhu maku a sobha ya Sídya anga a mutolola. O jinguma akutu athu avulu, a ambata kala abhika ku Damasku. Akaji a mubhakula we bhu maku a sobha ya Izalayele. Sobha ya Izalayele anga ujibha masoladi avulu atokala kwa Akaji.
6 Peka mon’a Lemadiya wajibha hama ni makwinyi ayadi a midi a mayala mu Judá, mu kizuwa kimoxi ngo. Enyoso exile mazonda, a ajibha mukonda ene abhana dikunda kwa Jihova, o Nzambi ya jikuku jâ.
7 Zikidi o disoladi mukwa Efalayíme, wajibha Mahaseya mon’a sobha ni Azedikame, o kilamba kya inzo ya sobha ni Elikana, o diyala dya kayadi mu utuminu.
8 Akwa Izalayele ambata we hama jiyadi ja midi ja athu. Mwaxaxi ka athu yá, mwexile ahatu, an’a mala ni an’a ahatu. Akatula we imbamba yavulu, a yambata ku Samadiya.
9 Kyenyiki, o polofeta ya Jihova amwixana Odede, wexile ku Samadiya. Mwene wayi mudisanga ni kifuxi kya masoladi kyakexile muvutuka ku Samadiya yu wa ambela, wixi: “Talenu! Jihova, o Nzambi ya jikuku jenu wexile ni njinda ya akwa Judá, mukonda dya kiki wa abhakula bhu maku menu. Maji enu mwa ajibha ni njinda yavulu, o njinda yiyi yabhixila kate ku dyulu.
10 Mukiki-phe, enu mwamesena kwila o mundu wa Judá ni wa Jeluzaleme ukala abhik’enu. O kwila enu kimwala we ni kikuma kwa Jihova Nzambi yenu?
11 Kindala ngivwenu! O jiphange jenu ji mwabheka, mu atuma kuvutuka mu ixi yâ, mukonda Jihova wa mikwatela njinda yavulu.”
12 Bhenyobho, Azadiya mon’a Jowanane, Belekiya mon’a Mesilemote, Jezikiya mon’a Salume ni Amasa mon’a Hadilayi, exile atwameni akwa Efalayíme, afidisa o masoladi exile mutunda mu ita,
13 ene a ambela: Kanenu kubheka kuku o athu u mwakutu, mukonda kiki kyanda tubhekela kikuma bhu pholo ya Jihova. “O kikuma ki twala-nakyu kyadikota kya, o njinda ya Nzambi yala ku thandu dya Izalayele. O kima ki mwamesena kubhanga kyanda bandekesa dingi ku ituxi ni ku kikuma kyetu.”
14 Kyenyiki, o masoladi avutula o imbamba ni athu a ambatele, ku ilamba ni ku mundu.
15 Mukusuluka, asolo mayala. Ku imbamba yambatele o mayala yá, ene akatula-ko izwatu a ibhana kwa yó exile ni tuxi. A abhana izwatu, jihayi, kudya ni kya kunwa ni máji a kudiwaya mu mukutu. O yó kexile ni nguzu, a ambatela ku jijumendu kate ku jiphange jâ ku Jedikó, o mbanza ya maye. Mukusuluka, ene avutuka ku Samadiya.
16 Mu thembu yenyoyo, o sobha Akaji wabhingi kikwatekesu ku jisobha ja Asídya.
17 Akwa Idomo eza dingi mubhânga ni akwa Judá, ya ambata-ku athu.
18 O akwa Fidíxa eza we mubhânga ni akwa jimbanza ja Sefelá, Nengebe ya Judá, ya atambula Beteseme, Ajalone, Ngedelote, Soko ni jisanzala jê. Timinate ni jisanzala jê, Nginzo ni jisanzala jê. Ya atungile mwenyomo.
19 Jihova wabheka o divuwa didi ku akwa Judá mukonda dya Akaji sobha ya Izalayele, wabhangesa o mundu wa Judá kubhanga ima yayibha. Kiki kya abhangesa kubhana dikunda kwa Jihova.
20 Tilikate-Pilinezele sobha ya Asídya, muveji dya kukwatekesa Akaji, weza ni masoladi mê phala ku mubhinjika dingi.
21 Akaji wakatula ima mu inzo ya Jihova, mu inzo ya sobha ni mu inzo ya ilamba, wa ibhana kwa sobha ya Asídya, maji mwene ka mukwatekesa.
22 Mu kithangana kiki kya ibhidi, sobha Akaji wate dingi ituxi kwa Jihova, mu ukulu ndenge.
23 Kuma akwa Damasku a mutolola, mwene wamateka kubhakula jisata ku jinzambi jâ. Mwene wambe: “Kuma o jinzambi ja jisobha ja Sídya ja mu akwatekesa, eme nganda ku abhakula jisata n’a ngikwatekese we. Kiki kyatondalesa o mundu wa Izalayele.
24 Akaji wabhongolola we o ima yoso yexile mu inzo ya Nzambi yakidi, wa ibatujula yu wajika o mabhitu a inzo ya Jihova. Mwene wabhange we jikalatódyu phala mwene, mu jiphambu joso ja mbanza ya Jeluzaleme.
25 Mu jimbanza joso ja Judá, wabhange-mu ididi ya kubhezela phala kubhakula jisata ku jinzambi jengi. Mu kubhanga kiki, waxingi Jihova, o Nzambi ya jikuku jê.
26 O ima yamukwa ya musoso wa Akaji, yoso yabhange tunde ku dimatekenu ndu kudisukilu, a isoneka mu Divulu dya Jisobha ja Judá ni ja Izalayele.
27 Mukusukaku, Akaji wafu ya a mufundu mu mbanza ya Jeluzaleme. Mwene ka mufundu mu jimbila ja jisobha ja Izalayele. Mon’ê Ezekiya, mwéne wakituka sobha bhu kididi kyê.
Footnotes
^ Tala o Dilombolwelu. “Njena.”
