Dya Kayadi Dya Jisobha 2:1-25
2 Kyoso Jihova kyexile phala kwambata Elija ku dyulu mu kitembwe, Elija watundu ku Jidingale kumoxi ni Elizewu.
2 Elija wambela Elizewu, wixi: “Ngakudyondo xala bhabha, mukonda Jihova wa ngitumu kuya ku Betele.” Elizewu wa mutambwijila, wixi: “Kikôla ngana! Kala Jihova kyene ku mwenyu, n’eye we u ngana yami, kinganda kweha, kana. Kyenyiki, ene a kulumuka ku Betele.
3 Ku Betele, o an’a jipolofeta* ayi kwa Elizewu ya a mwibhwidisa: “Eye wejiya kwila, lelu Jihova wanda kwambata ngana yé, yó wa kukala ku pholo?” Mwene watambwijila: “Eme ngakijiya kya. Maka ya ki mu azwele dingi.”
4 Elija wambela Elizewu, wixi: “Elizewu ngakudyondo, xala bhabha, mukonda Jihova wa ngitumu kuya ku Jedikó.” Maji Elizewu wambe: Kikôla ngana! Kala Jihova kyene ku mwenyu, n’eye we u ngana yami, kinganda kweha, kana.” Kyenyiki, kiyadi kyâ ayi ku Jedikó.
5 O an’a jipolofeta exile ku Jedikó azukama kwa Elizewu ya a mwibhwidisa: “Eye wejiya kwila, lelu Jihova wanda kwambata ngana yé, yó wa kukala ku pholo?” Mwene watambwijila: “Eme ngakijiya kya. Maka ya ki mu azwele dingi.”
6 Elija wa mwambela dingi: “Ngakudyondo xala bhabha, mukonda Jihova wa ngitumu kuya ku Njolodá.” Maji mwene wa mutangela: “Kikôla ngana! Kala Jihova kyene ku mwenyu, n’eye we ngana yami, kinganda kweha, kana.” Kyenyiki, kiyadi kya asuluka ni kwenda.
7 O makwinyi atanu a an’a jipolofeta a akayela, ya emana dikanga, kyoso kiyadi kya kyemana bhwa zukama o ngiji ya Njolodá.
8 Elija ukwata o divunga dyê, u dinyinga anga udivunda mu menya. O menya anga adiwanuna mu mbandu jiyadi, mu mbandu ya kadilu ni mu mbandu ya kyasu. Kyenyiki, kiyadi kya azawuka o ngiji mu mavu a kukuta.
9 Kyoso kyazawuka o ngiji, Elija wambela Elizewu, wixi: “Ngitangele, wamesena ngi kubhanga ihi ande dya ku ng’ambata?” Elizewu wa mwambela, wixi: “Ngakudyondo, o kwila utena ku ngibhana mu luyadi* o nzumbi yakubhana Nzambi?”
10 Mwene wa mutambwijila: “O kima ki wabhingi kyabhonzo. Se u ngimona kyoso kyanda ng’ambata, wanda tambula o kima ki wabhingi, se ku ngimono, kwanda kitambula.”
11 Kyoso kyexile mukwenda ni ku dizwelesa, atukumuka ngo dikalu dya túbhya dyamoneka ni jikabalu ja túbhya anga ja asandula kiyadi kya. Elija a muzangula bhulu ku kitembu kya nguzu.
12 Kyamono o ima yiyi Elizewu wadikola, wixi: “Tat’etu, tat’etu! O dikalu dya Izalayele ni mayala endesa o jikabalu!” Kyoso mwene katenene dingi ku mumona, wakwata o izwatu yê, wa itandula mu mbandu jiyadi.
13 Mukusuluka, wakwata o divunga dya Elija dyabwile ku thandu dyê, wavutuka kudima, yu wemana bhu mbandu ya ngiji ya Njolodá.
14 Ni divunga dya Elija dyabwile ku thandu dyê, Elizewu wabeta mu menya yu wambe: “Kwebhi kwala Jihova o Nzambi ya Elija?” Kyoso kyabeta o divunga mu menya, o menya adiwanuna mu mbandu jiyadi, ku kyasu ni ku kadilu. Elizewu anga uzawuka o ngiji.
15 Kyoso o an’a jipolofeta atungile ku Jedikó, kya mumono ambe, exi: “O nzumbi ikôla yexile kwa Elija, yeza ku thandu dya Elizewu.” Kyenyiki, ayi kwa mwene anga a mufukamena ni pholo bhoxi.
16 Ene a mwambela, exi: “Etu tu jiselevende jé, twala ni makwinyi atanu a mayala a nguzu bhabha. Twakudyondo, ehela-wu aye musota ngana yê. Nange o nzumbi* ya Jihova, ya mwambata, i ya mutakula ku milundu mba mu honga.” Maji mwene wambe: “Kanenu ku atumikisa.”
17 Kyenyiki, a mujijidika kate ki kya mukumu, yu wambe: “Kyambote, mu atumikisyenu.” Kyenyiki, atumikisa o makwinyi atanu a mayala, ene asoto mu izuwa itatu, maji kamusange.
18 Kyoso kyavutuka kwa Elizewu mu mbanza ya Jedikó, mwene wa ambela, wixi: “Eme ki ngimyambela kwila kimuye ngo?”
19 Mukubhita kithangana, o mayala a mbanza ambela Elizewu, exi: “Ngana yami, kala ki wa mumona, o mbanza yala mu kididi kyambote. Maji o menya kawabha, o mavu kamubhana idima.”*
20 Mukiki-phe mwene wambe: “Tenu môngwa mu kaditijela ka ubhe, mu ngibhekele na-ku.” Kyenyiki, a mubhekela o kaditijela.
21 Mukusuluka, mwene wayi bhu hoto ya ngiji, watakula-mu môngwa, yu wambe, wixi: “Jihova wambe kiki: ‘Menya yá awabhe. Kanda jibha dingi muthu mba kubhangesa muthu kukala mbaku.”*
22 O menya anga asuluka ni kuwabha kate mu izuwa ya lelu, kala kyambele Elizewu.
23 Kyatundu koko, Elizewu wabande ku Betele. Kyoso kyexile mu njila, sayi tumbonga twatundu mu mbanza, twamateka ku muxongwena mu kwamba: “Banda kadibhala, banda kadibhala!”
24 Mukusuka-ku, mwene wasakuka kudima, wa atale yu wa abhubhidila mu dijina dya Jihova. Kyenyiki, mu muxitu mwatundu úlusu jiyadi, jajibha makwinyi awana ni kiyadi kya tumbonga.
25 Kyatundu kwenyoko, wayi ku mulundu wa Kalumelu, mu kusuluka wavutuka ku Samadiya.
Footnotes
^ “Twana twa jipolofeta” nange kyalungu ni xikola mwexile mulonga o jipolofeta mba kyexile kisangela kya jiipolofeta.
^ Mu Heba.: “ngibhane mbandu jiyadi.”
^ Mba, “kithembu kya.”
^ Mba, nange: “ibhangesa o athu mu ixi kuseluka.”
^ Mba nange, kubhangesa muthu kuseluka.
