Divulu Dya Dyanga Dya Jisobha 13:1-34
13 Jihova anga utumikisa o selevende yê tunde ku Judá kate ku Betele. Mwene wabhixila mu kithangana kyoso Jelobowamu kyexile bhu mbandu ya kalatódyu phala kubhakula jisata.*
2 Kyenyiki, kala kya mutumu Jihova, o diyala wamateka kulokela o kalatódyu mu kwamba: “Eye u kalatódyu, kalatódyu, Jihova wambe kiki: ‘Mu inzo ya Davidi anda vwala-mu mon’a diyala anda muluka o dijina dya Joziya, ku thandu dyé mwene wanda bhakula-ku o akunji a ididi ya kubheza ni yó ene mubhakula jisata ku thandu dyé ni kujokotesa ifuba ya athu ku thandu dyé.”’
3 Mu kizuwa kyenyokyo, o diyala dya Nzambi wabhana kijimbwete, mu kwamba: “Kiki kyene o kijimbwete kya Jihova kyoso kyambe: ‘O kalatódyu kanda budika, o uthôkwa* wala ku thandu dyé, wanda bwa bhoxi.’”
4 Kyoso o sobha Jelobowamu kyevu o ima yazwelele o diyala dya Nzambi ku kalatódyu ku Betele, mwene wakatula o lukwaku lwê ku kalatódyu yu wa lulungila ku diyala dya Nzambi, mu kwamba: “Mukwatyenu!” Mu kithangana kyenyokyo o lukwaku lwalungile ku diyala dya Nzambi lwanaminina,* mwene katenene ku lutulula.
5 Mukusuluka, o kalatódyu kabudika, o uthôkwa wabu bhoxi kala kyakanene Jihova bhukaxi ka diyala dya Nzambi.
6 Mukiki, o sobha wambela o diyala dya Nzambi yakidi, wixi: “Ngakudyondo, dyondela kwa Jihova Nzambi yé, samba kwa mwene phala o lukwaku lwami ludisanze.” Kyenyiki, o diyala dya Nzambi yakidi wadyondela Jihova, o lukwaku lwa sobha anga ludisanza, kala kilwexile.
7 Mukusuluka, o sobha wambela o diyala dya Nzambi yakidi, wixi: “Zá n’eme kubhata dyami, udye kama koso-koso ni ngikubhane ujitu.”
8 Maji o diyala dya Nzambi yakidi, wambela o sobha, wixi: “Né se wa ngibhanene kaxaxi ka jimbote jé, eme kingejiya n’eye, kinganda dya mbolo né kunwa menya mu kididi kiki.
9 Kuma ngatambula o njimbu yiyi kwa Jihova: ‘Kana kudya mbolo né kunwa menya, né kuvutuka mu njila iwejila.’”
10 Kyenyiki, mwene wavutukila mu njila yengi. Kavutukila mu njila yoyo yendele kyoso kyeza ku Betele.
11 Kwexile polofeta wakukile kya, watungile ku Betele. O twana twê tuyadi twayi kubhata, ya a mutangela yoso yabhangele o diyala dya Nzambi yakidi mu kizuwa kyenyokyo ku Betele ni yoso yazwelele kwa sobha. Kyazubha kutangela yoso kwa tata yâ,
12 o tata wa ebhwidisa, wixi: “Mwene waditela njila yebhi?” O twana a mwidikisa o njila yaditele o diyala dya Nzambi wa tundile ku Judá.
13 Mwene wambela o twana twê, wixi: “Sokejekenu o jumendu.” Ene a sokejeka o jumendu, mwene anga u sambela ku jumendu.
14 Mwene wakayela o diyala dya Nzambi yakidi, yu wa musange waxikama bhoxi dya muxi wadikota. Kyenyiki, wa mwibhwidisa: “Éye o diyala dya Nzambi yakidi watundu ku Judá?” Mwene watambwijila: “Xé, eme mwene.”
15 O polofeta wakukile kya, wa mwambela, wixi: “Zá n’eme kubhata dyami, udye mbolo.”
16 Maji mwene wa mutambwijila: “Kingitena kuvutuka n’eye, né kuxikina o kixanu kyé, kingitena we kudya mbolo né kunwa menya bhu kididi kiki.
17 Mukonda Jihova wa ngambela, wixi: ‘Kana kudya mbolo né kunwa menya mu kididi kyenyokyo. Kana kuvutukila mu njila mu wejila.’”
18 Kyenyiki, o polofeta wakukile kya wa mwambela wixi: “Eme wami ngi polofeta kala eye, bhukaxi ka anju Jihova wa ngambela wixi: ‘Mubhangese kuvutuka, mwambate kubhata dyé phala adye mbolo ni kunwa menya.’” (Mwene wa mu nganala.)
19 Kyenyiki-phe, mwene wavutuka-nê phala kudya o mbolo ni kunwa menya kubhata dyê.
20 Kyoso kyaxikama ku meza, o kizwelu kya Jihova kyeza kwa polofeta wabhangesa mukwa kuvutuka.
21 Mwene anga wambela o diyala dya Nzambi yakidi mukwa Judá, wixi: “Jihova wambe kiki: ‘Kuma wabhukumukina o kitendelesu kya Jihova, eye wakambe kubelesela o kitumu kya kubhana Jihova Nzambi yé,
22 maji wavutuka phala kudya mbolo ni kunwa menya bhu kididi kya kwambela kwila: “Kana kudya mbolo né kunwa menya kwenyoko,” kyenyiki-phe, o kimbi kyé kanda kifunda mu mbila ya jikuku jé.’”
23 Kyoso o diyala dya Nzambi yakidi kyazubha o kudya ni kunwa, o polofeta wakukile kya, wasokejeka o jumendu phala o polofeta wa mubhingile phala kuvutuka-nê.
24 Kyenyiki, o diyala wayi anga utakana ni hoji mu njila, o hoji anga i mujibha. O kimbi kyê anga kikala mu njila. O jumendu yemana bhu mbandu yê, o hoji we yemana bhu mbandu ya kimbi.
25 Sayi mayala abhitila kwenyoko, amono o kimbi kyexile mu kikoka ni hoji yakexile bhu mbandu ya kimbi. Ene abokona mu mbanza mwakexile o polofeta wakukile kya, ya a mutangela yoso yamono.
26 Kyoso o polofeta ya mubhangesele kuvutuka mu njila kyevu o ima yabhiti, mwene wambe: “Dyodyo o diyala dya Nzambi yakidi, wabhukumukina o kitumu kya Jihova, mukonda dyakiki, Jihova wa mubhakula ku hoji phala ku musasujula ni ku mujibha, kala kyazwelele Jihova.”
27 Mukusuluka, mwene wambela o twana twê, wixi: “Sokejekenu o jumendu yami.” Ene a isokejeka.
28 Mwene wayi yu wasange o kimbi mu kikoka ni jumendu ni hoji yemanene bhu mbandu ya kimbi. Maji o hoji ki yadi o kimbi, ki yadi we o jumendu.
29 Bhenyobho, o polofeta wazangula o kimbi kya diyala dya Nzambi yakidi, wakitula ku jumendu yu wa kyambata mu mbanza yê phala ku mudila ni ku mufunda.
30 Mwene wate o kimbi mu mbila yê, anga adila mu kuzwela: “Wawé, phang’yami!”
31 Kyazubha o kufunda, mwene wambela o twana twê, wixi: “Kyoso ki nganda fwa, mu ngifunda mwafundila o diyala dya Nzambi yakidi, o ifuba yami mu ita bhu mbandu ya ifuba yê.
32 Yoso yakanena mwene kala kya mutumu Jihova yalungu ni kalatódyu ku Betele ni ididi ya kubhezela yala mu mbanza ya Samadiya, yanda dikumbidila mwene.”
33 Ne mwene ni ima yoso yiyi yabhiti, Jelobowamu wasuluka mu kubhanga ima yayibha, mwene wasuluka ni kusola mayala mwaxaxi ka mundu phala kukala akunji mu ididi ya kubhezela. Kabasa muthu wandalele kukala mukunji,* mwene wexile mu musola, mu kwamba: “Mwene akale mukunji mu ididi ya kubhezela.”
34 O kituxi kiki kya mwiji wa Jelobowamu, kyabhangesa ku abwika ni kujima o mbutu yâ mu ngongo.
Footnotes
^ Mba, “phala kuhabesa o dixi dya jisata.”
^ Mba, “o uthôkwa wezala ni banya.” Kifwa, o utokwa wezala ni banya ya jisata.
^ Mba, “lwakukuta.”
^ Mu Heba.: “wexile mu mwizalesa o maku.”
