Jihova Nzambi wamesena kwila athu amaukexilu oso, adilonga yalungu ni mwene ni Utuminu wê wa dyulu. (1 Timote 2:3, 4) Mukonda dya kiki o Jimbangi ja Jihova ene mulungululula o Jibibidya ni madivulu phala athu avulu, katé mwene o maxilu. Mukidi o kilunga kyetu kyene mubhanga mazunda ajividyu a muhama a madimi a ijimbwete ndenge! Kyebhi kitutena kujibhanga ni kujiwanena? Ima yahi itwabhange mu mivu yoso yiyi yabhiti?

 O jividyu mudimi dya ijimbwete ene mujibhanga mu ibuka ya alunguludi kumundu woso. Kala kibuka kitonginina kyambote o milongi yabhindamena phala ku ilungulula mba phala ku ingalavala. Mukusuluka, ene asota kumona kyebhi kyandabhitisa o milongi yiyi mudimi dya ijimbwete. Kyoso kyazubha o kumona kyebhi kyandabhanga, ene abhitisa o milongi yiyi m’ukexilu wa vidyu. Lelu kwala 60 a ibuka ya alunguludi alungulula o milongi ya Bibidya mudimi dya ijimbwete ithangana yoso, ni 40 a ibuka ene mulungulula mu ithangana ni ithangana.

 M’ukulu kyatele kitadi kyavulu kungalavala jividyu mudimi dya ijimbwete. O jikamera jakungalavala ni iselekete yakamukwa jatele dingi kitadi lelu ndenge. O kyakamukwa we, o jividyu exile mujingalavala mu ididi itwexile mutunga, sayi ithangana kwabhingi kuyudika ididi yengi yexile kya yokulu. Mukubhanga o ima yoso yiyi, twejingastala 30.000 ajidolale b (12​.719.700,00 ajikwanza) ndenge phala kukala ni ima yoso phala o kibuka kya alunguludi a ijimbwete.

 Phala kukalakala kyambote ni kitadi kitusangela, o kilunga kyetu kyasoto jindunge jakufwamesa ni kubhebhulukisa dingi o ukexilu wakungalavala o jividyu. Kindala twamukalakala ni iselekete ya ubhe ya izuwa yalelu ibhanga ikalakalu iyadi, maji kiyate kitadi kyavulu, kana. Muveji dya kukalakala dingi ni jistudyu, o ibuka ya alunguludi atena kuta lona mba kupindala jiphalelu ni kolo ya yangu yawisu ni kungalavala mwene o jividyu mu jixikitodyu jawu. Mukifika, kyoso kyabhindama athu avulu phala kungalavala, o jiphange atena kubhanga o jividyu mu jixikiditodyu jawu mba kumabhata mawu; ene kabhingi kuya dikanga phala kubhanga o jividyu jiji.

 Etu we twabhange software mba apilikativu phala kukwatekesa mu kikalakalu kya jiphange akwa ijimbwete. O software yiyi yakwatekesa kusosolola o kithangana mu kaxi ya ibuka ya alunguludi a ijimbwete mukubhanga o jividyu ja. O jiphange jetu asakidila kyavulu mu ima yoso yiyi yabhange. Phange ya diyalaa Alexander wambe kuma: “Lelu o jividyu jamuhaba mu sayite mudimi dya ijimbwete jabeta kuvula m’ukulu ndenge. Eme ngasanguluka mukonda dya ima yoso yiyi. Ngitala jividyu izuwa yoso.”

 Lelu o ima yabhindamena o kibuka kya alunguludi, kyate dingi ndenge phala ku isumba 5.000 ya jidolale yavulu, (2.119​.950,00 ajikwanza). Mukonda dya kiki, lelu twamubhanga jividyu javulu mudimi dya ijmbwete m’ukulu ndenge.

 Kyoso o kibuka kizubha o kungalavala vidyu mudimi dya ijimbwete o jividyu jiji jikala mu sayte phala yo abhindamena. Mukulu twexile mubhanga jifita ja jividyu ni ji DVD, maji kubhanga m’ukexilu yu kyatele kitadi kyavulu, kwabhingile kithangana kyavulu ni kikalakalu kyavulu. Mukusuluka jingalavasa yoso exile mujitumikisa munditenda phala kubhanga jikopya, kyenephe ngó o jifita a jividyu ni ji DVD exile mujitumikisa mu Ilunga. Mu muvu wa 2013, twa ngastala 2.000.000 ajidolale (857​.985.400,00 ajikwanza) phala kubhanga ji DVD mudimi dya ijimbwete.

 O maxilu asangulukile kyavulu ni ima yoso yiyi. Maji sayi ithangana kwabhonzele kukalakala ni jividyu jiji, bengebenge kyoso o jifita ni ji DVD jexile mudibandekesa. Sayi ithangana phala kungalavala divulu dimoxi dya Bibidya kwabhingile ji DVD javulu. Phange yadiyala ku Brasil amwixana Gilnei wambe: “Kwabhonzele kyavulu mukonda, ithangana yoso itwamesenene kutanga velusu ya Bibidya kya dyanga twatokalele kusanga hanji o fita yatokala phala kutanga o velusu.” Phange ya muhatu amwixana Rafayane, wexile mukalakala ni ji DVD mudimi dya ijimbwete, wambe: “O kudilonga o Bibidya ubheka wami kwa bhonzele. Etu twexile mungastala kithangana kyavulu phala kusanga o jivelusu ja Bibidya mba jireferensya.” Kyoso o jiphange jetu jexile muya muboka, sayi ithangana atokalele kwambata o ji DVD mba jifita ni kubhinga phala o muthu waxikina phala ku ita ku televiza. Kate mwene sayi jiphange exile mukwambanta o ji DVD ja. Mukusuluka kwa moneka iselekete yavulu ya DVD portáteis, jiphange javulu exile mukalakala ni jiselekete jiji. Phange ya diyala amwixana Bobby, wa tungu mu ixi ya Estados Unidos, wambe: “Kyoso ki usuka o kutanga kibatulu kya Bibidya kumukwa dibhata anga umesena o kutanga dingi velusu yengi watokalele kubhinganesa o DVD. Kiki kyexile mutulalekesa ni kutubhonzesa kyavulu mu kukalakala ni Bibidya mu ukunji.”

 Kumuvu wa 2013, okilunga kya Jihova kyabhange apilikativu JW Library Sign Language (Biblioteca JW Mudimi dya Ijimbwete). Ni apilikativu yiyi o jiphange eji tena kukatula ni kuxika o jividyu mudimi dya ijimbwete mumitelembe ya mba jitablet ikwatekesa o jiphange. Kudimatekenu o apilikativu yiyi a dibhangele ngó mudimi dya ijimbwete ya America. O kupholo dya kwenda kumuvu wa 2017, yene yo bandekese o uhete we phala kutamu dingi o madimi oso a ijimbwete. Jiphange jamala ni ja ahatu asanguluka kyavulu. Phange ya diyala ku Brasil amwixana Juscelino wambe: “Eme ngadiwanene kyavulu! Ngexile ngó muxinganeka kyebhi o jiphange ja Kibuka Kya Utuminu azolo o maxilu ni kwila amesena tukula muzumbi kala yo kimaxilu. Eme ngasanguluka kyavulu, ni kwila o apilikativu yiyi yangiswinisa kusuluka kudilonga o Bibidya.”

 Lelu o jividyu mu dimi dya ijimbwete a mujibhanga mukexilu wa dijitale anga ajita mu sayite yetu ni mu apilikativu JW Library Sign Language. Mukonda dya kiki, o madivulu metu mudimi dya ijimbwete atena kwalungulula ni kwangalavala mutwizuwa kana dingi mujimbeji mba mivu. Mukidi, madimi avulu a ijimbwete ene muzubha o madivulu mu kithangana kimoxi ni madimi akamukwa akuzwela.

 Tala yazwela o jiphange ala maxilu. Sayi phange amwixana Klizia ujimbulula, “O kilunga kya Jihova kisuwa kyavulu o maxilu, kitukwatekesa kusanga kudya mu nzumbi se kutubhonzesa o ima. O kwila sayiku kilunga kyengi kibhanga kiki? Seku kima mu ngongo kitukisokelesa ni ima itubhangela o kilunga kya Jihova.” Phange Vladimir wambe: “O jividyu jene mungilondekesa kwila Jihova usuwa o maxilu kala kya suwa yo kala maxilu.”

 O jividyu jetu mudimi dya ijimbwete yala ni izwelu yiyi: “O kadivulu kaka, ka kabhange phala kukasumbisa. Ka tokala ku kikalakalu kya kulonga o Bibidya ku mundu woso, akabhange ni kitadi kibhana athu mu vondadi yâ.” Twamisakidila ni muxima wetu woso o kitadi kimwene musangela bhukaxi ka sayite donate.jw.org. O kitadi kiki kyene mutukwatekesa kubhanga Jibibidya ni madivulu akudilonga o Bibidya phala o athu oso, kate mwene yo ala maxilu mba akwa ijimbwete.