ខ្ញុំចង់ស្លាប់ តើគម្ពីរអាចជួយខ្ញុំពេលដែលខ្ញុំមានគំនិតចង់សម្លាប់ខ្លួនឬទេ?
ចម្លើយពីគម្ពីរ
ពិតជាអាច! ព្រោះគម្ពីរមកពី«ព្រះដែលសម្រាលទុក្ខអ្នកដែលបានធ្លាក់ទឹកចិត្ត»។ (កូរិនថូសទី២ ៧:៦) ទោះជាគម្ពីរមិនមែនជាសៀវភៅដែលទាក់ទងខាងសុខភាពផ្លូវចិត្តក្ដី តែគម្ពីរជួយមនុស្សជាច្រើនឲ្យយកឈ្នះគំនិតចង់សម្លាប់ខ្លួន។ ដំបូន្មានដ៏មានប្រយោជន៍ក្នុងគម្ពីរ ក៏អាចជួយអ្នកដែរ។
តើគម្ពីរផ្ដល់ដំបូន្មានដ៏មានប្រយោជន៍អ្វីខ្លះ?
● ចូររៀបរាប់ពីអារម្មណ៍របស់អ្នក។
គម្ពីររៀបរាប់ថា៖«មិត្រសំឡាញ់រមែងស្រឡាញ់គ្នានៅគ្រប់វេលា ឯបងប្អូនក៏កើតមកសំរាប់គ្រាលំបាកដែរ»។—សុភាសិត ១៧:១៧
មានន័យថា: យើងត្រូវការការគាំទ្រពីអ្នកឯទៀត ពេលយើងតានតឹងចិត្ត។
បើអ្នកលាក់ទុកអារម្មណ៍ នោះប្រៀបដូចជាអ្នកកំពុងលីបន្ទុកដ៏ធ្ងន់មួយដែលមិនអាចរែកពុនបាន។ ប៉ុន្តែ បើអ្នកប្រាប់អារម្មណ៍របស់អ្នកទៅអ្នកឯទៀត នោះអ្នកអាចមានអារម្មណ៍ល្អជាង ហើយអាចមានទស្សនៈផ្សេងចំពោះស្ថានភាពរបស់អ្នក។
សូមសាកធ្វើតាមយោបល់នេះ: សូមនិយាយប្រាប់អ្នកណាម្នាក់នៅថ្ងៃនេះ ប្រហែលជាអ្នកអាចប្រាប់សមាជិកគ្រួសារ ឬមិត្តភក្ដិដែលគួរឲ្យទុកចិត្ត។ a អ្នកក៏អាចកត់ទុកអារម្មណ៍របស់អ្នកនៅក្នុងសៀវភៅដែរ។
● ចូរទទួលជំនួយពីគ្រូពេទ្យជំនាញ។
គម្ពីររៀបរាប់ថា៖«មនុស្សដែលមានសុខភាពល្អមិនត្រូវការគ្រូពេទ្យទេ តែអ្នកដែលឈឺទើបត្រូវការគ្រូពេទ្យ»។—ម៉ាថាយ ៩:១២
មានន័យថា: ពេលយើងឈឺ យើងគួរតែស្វែងរកការព្យាបាល។
គំនិតចង់សម្លាប់ខ្លួនអាចជារោគសញ្ញានៃជំងឺផ្លូវចិត្តឬជំងឺសតិអារម្មណ៍។ ដូចជំងឺខាងរាងកាយដែរ ជំងឺនេះមិនមែនជាអ្វីដែលគួរឲ្យខ្មាសទេ។ ជំងឺផ្លូវចិត្តនិងជំងឺសតិអារម្មណ៍ អាចព្យាបាលបាន។
សូមសាកធ្វើតាមយោបល់នេះ: សូមស្វែងរកជំនួយពីគ្រូពេទ្យជំនាញឲ្យបានឆាប់បំផុត។
● ចូរចាំថាព្រះយកចិត្តទុកដាក់។
គម្ពីររៀបរាប់ថា៖«គេលក់ចាបពូកប្រាំក្បាលថ្លៃពីរសេន មែនទេ? ប៉ុន្តែព្រះមិនភ្លេចចាបទាំងនោះឡើយ សូម្បីតែចាបមួយក៏ដោយ។ . . . កុំខ្លាចឡើយ ព្រោះអ្នករាល់គ្នាមានតម្លៃជាងចាបពូកជាច្រើនទៅទៀត»។—លូកា ១២:៦, ៧
មានន័យថា: អ្នកមានតម្លៃចំពោះព្រះ។
អ្នកប្រហែលមានអារម្មណ៍ថាគ្មានអ្នកណាយកចិត្តទុកដាក់នឹងអ្នកទេ តែព្រះយល់ទុក្ខវេទនារបស់អ្នក។ លោកយកចិត្តទុកដាក់ចំពោះអ្នក ទោះជាអ្នកមានអារម្មណ៍ថាលែងចង់រស់ទៀតក៏ដោយ។ ទំនុកតម្កើង ៥១:១៧ ចែងថា៖«ឱព្រះអង្គអើយ ទ្រង់មិនមើលងាយចំពោះចិត្តខ្ទេចខ្ទាំ ហើយទន់ទាបឡើយ»។ ព្រះចង់ឲ្យអ្នករស់ ព្រោះលោកស្រឡាញ់អ្នក។
សូមសាកធ្វើតាមយោបល់នេះ: សូមពិនិត្យមើលភ័ស្តុតាងពីគម្ពីរដែលបញ្ជាក់ថា ព្រះស្រឡាញ់អ្នក។ ជាឧទាហរណ៍ សូមមើលសៀវភៅជំនួយសិក្សាគម្ពីរ ចូរចូលទៅជិតព្រះយេហូវ៉ា ជំពូកទី២៤។
● ចូរអធិដ្ឋានទៅព្រះ។
គម្ពីររៀបរាប់ថា៖«ផ្ទេរកង្វល់ទាំងអស់ទៅព្រះ ពីព្រោះលោករមែងគិតអំពីអ្នករាល់គ្នា»។—ពេត្រុសទី១ ៥:៧
មានន័យថា: ព្រះអញ្ជើញអ្នកឲ្យប្រាប់លោកដោយស្មោះនិងឥតលាក់លៀមអំពីអ្វីដែលអ្នកគិតនិងព្រួយបារម្ភ។
ព្រះអាចឲ្យអ្នកមានសេចក្ដីសុខសាន្ត និងកម្លាំងដើម្បីស៊ូទ្រាំនឹងស្ថានភាពរបស់អ្នក។ (ភីលីព ៤:៦, ៧, ១៣) នេះជារបៀបដែលលោកគាំទ្រអស់អ្នកដែលអធិដ្ឋានសុំជំនួយពីលោក។—ទំនុកតម្កើង ៥៥:២២
សូមសាកធ្វើតាមយោបល់នេះ: សូមអធិដ្ឋានទៅព្រះនៅថ្ងៃនេះ។ សូមប្រើឈ្មោះយេហូវ៉ាជាឈ្មោះរបស់លោក ហើយប្រាប់លោកអំពីអារម្មណ៍របស់អ្នក។ (ទំនុកតម្កើង ៨៣:១៨) សូមសុំលោកជួយអ្នកឲ្យបន្តរស់តទៅទៀត។
● ចូររំពឹងគិតអំពីសេចក្ដីសង្ឃឹមក្នុងគម្ពីរនាពេលអនាគត។
គម្ពីររៀបរាប់ថា៖«សេចក្ដីសង្ឃឹមនេះជាយុថ្កាសម្រាប់ជីវិតយើង ក៏រឹងមាំនិងពិតប្រាកដ»។—ហេប្រឺ ៦:១៩
មានន័យថា: ទោះជាអារម្មណ៍របស់អ្នកអាចឡើងចុះ ដូចកប៉ាល់បើកកាត់ព្យុះក៏ដោយ តែសេចក្ដីសង្ឃឹមក្នុងគម្ពីរអាចជួយអ្នកឲ្យមានអារម្មណ៍នឹងនរ។
នេះមិនមែនជាសេចក្ដីសង្ឃឹមដែលមិនអាចទៅរួចទេ តែសេចក្ដីសង្ឃឹមនោះមានមូលដ្ឋានទៅលើសេចក្ដីសន្យារបស់ព្រះដែលថា លោកនឹងបំបាត់ដើមហេតុដែលធ្វើឲ្យយើងឈឺចាប់។—ការបើកបង្ហាញ ២១:៤
សូមសាកធ្វើតាមយោបល់នេះ: សូមរៀនថែមទៀតអំពីសេចក្ដីសង្ឃឹមក្នុងគម្ពីរដោយអានអត្ថបទ«សេចក្ដីសង្ឃឹមដ៏ពិតប្រាកដកំពុងរង់ចាំអ្នក»។
● ចូរធ្វើអ្វីដែលអ្នកចូលចិត្ត។
គម្ពីររៀបរាប់ថា៖«ចិត្តដែលសប្បាយជាថ្នាំយ៉ាងវិសេស»។—សុភាសិត ១៧:២២
មានន័យថា: ពេលយើងធ្វើអ្វីដែលនាំឲ្យយើងសប្បាយ នោះផ្លូវចិត្តឬអារម្មណ៍របស់យើងនឹងកាន់តែល្អប្រសើរឡើង។
សូមសាកធ្វើតាមយោបល់នេះ: សូមធ្វើអ្វីដែលធម្មតាអ្នកចូលចិត្ត។ ជាឧទាហរណ៍ សូមស្ដាប់ចម្រៀងនិងអានអ្វីដែលលើកទឹកចិត្ត ឬចំណាយពេលធ្វើសកម្មភាពផ្សេងៗដែលអ្នកចូលចិត្ត។ អ្នកនឹងមានសុភមង្គលថែមទៀត បើអ្នកជួយអ្នកឯទៀត ទោះជានោះតូចតាចក្ដី។—សកម្មភាព ២០:៣៥
● ចូរថែរក្សាសុខភាពរបស់អ្នក
គម្ពីររៀបរាប់ថា៖«ការហ្វឹកហាត់ខ្លួនប្រាណមានប្រយោជន៍»។—ធីម៉ូថេទី១ ៤:៨
មានន័យថា: យើងទទួលប្រយោជន៍ពេលយើងហាត់ប្រាណ គេងគ្រប់គ្រាន់ និងបរិភោគអាហារដែលមានជីវជាតិ។
សូមសាកធ្វើតាមយោបល់នេះ: សូមដើរហាត់ប្រាណលឿនៗ ទោះជា១៥នាទីក្ដី។
● ចូរចាំថាអារម្មណ៍និងអ្វីដែលមានក្នុងជីវិតអាចផ្លាស់ប្ដូរបាន។
គម្ពីររៀបរាប់ថា៖«អ្នករាល់គ្នាមិនដឹងថាជីវិតរបស់អ្នករាល់គ្នានឹងទៅជាយ៉ាងណាទេនៅថ្ងៃស្អែក»។—យ៉ាកុប ៤:១៤
មានន័យថា: ទោះជាបញ្ហាដែលធ្វើឲ្យអ្នកតានតឹងចិត្ត មើលទៅដូចជាគ្មានដំណោះស្រាយក៏ដោយ តែបញ្ហានោះគ្រាន់តែបណ្ដោះអាសន្នប៉ុណ្ណោះ។
ទោះជាស្ថានភាពរបស់អ្នកតានតឹងនៅថ្ងៃនេះក៏ដោយ តែវាអាចផ្លាស់ប្ដូរនៅថ្ងៃស្អែក។ ដូច្នេះ សូមរកវិធីដោះស្រាយ។ (កូរិនថូសទី២ ៤:៨) ស្ថានភាពដែលធ្វើឲ្យអ្នកតានតឹងចិត្ត ទំនងជាអាចផ្លាស់ប្ដូរនៅពេលក្រោយ តែបើអ្នកសម្លាប់ខ្លួន អ្នកមិនអាចបកក្រោយបានទេ។
សូមសាកធ្វើតាមយោបល់នេះ: សូមអានកំណត់ហេតុក្នុងគម្ពីរអំពីមនុស្សដែលមានអារម្មណ៍ធ្លាក់ទឹកចិត្តរហូតដល់ចង់សម្លាប់ខ្លួន ហើយសូមមើលនូវរបៀបដែលជីវិតរបស់ពួកគេបានផ្លាស់ប្ដូរទៅជាប្រសើរជាងនៅក្រោយមក គឺតាមរបៀបដែលពួកគេមិនអាចដឹងទុកជាមុន។ សូមពិចារណាឧទាហរណ៍ខ្លះ។
តើគម្ពីរប្រាប់យើងអំពីមនុស្សដែលចង់ស្លាប់ឬទេ?
មែន! ការពិត គម្ពីរប្រាប់យើងអំពីបុគ្គលខ្លះដែលនិយាយថា៖«ខ្ញុំចង់ស្លាប់»។ ព្រះមិនបានស្ដីបន្ទោសពួកគេទេ តែលោកបានជួយពួកគេ។ លោកក៏ធ្វើបែបនោះចំពោះអ្នកដែរ។
អេលីយ៉ា
● តើគាត់ជាអ្នកណា? អេលីយ៉ាជាអ្នកប្រកាសទំនាយដ៏ក្លាហាន។ ប៉ុន្តែ ពេលខ្លះគាត់បានធ្លាក់ទឹកចិត្ត។ យ៉ាកុប ៥:១៧ចែងថា៖«អេលីយ៉ាចេះមានអារម្មណ៍ដូចយើងដែរ»។
● ហេតុអ្វីបានជាគាត់ចង់ស្លាប់? នៅពេលមួយ អេលីយ៉ាមានអារម្មណ៍ឯកោ ភ័យខ្លាច និងគិតថាខ្លួនគ្មានតម្លៃ។ ដូច្នេះ គាត់បានសុំថា៖«ឱព្រះយេហូវ៉ាអើយ សូមយកព្រលឹងទូលបង្គំទៅឥឡូវចុះ»។—ពង្សាវតារក្សត្រទី១ ១៩:៤
● តើអ្វីបានជួយគាត់? អេលីយ៉ាបានប្រាប់ព្រះយេហូវ៉ានូវអារម្មណ៍ពិតរបស់គាត់។ តើព្រះបានលើកទឹកចិត្តគាត់តាមរបៀបណា? ព្រះបានបង្ហាញការយកចិត្តទុកដាក់ ហើយឲ្យគាត់ឃើញការអស្ចារ្យដែលបង្ហាញអំពីឫទ្ធានុភាពរបស់លោក។ លោកក៏បានផ្ដល់ការធានាដល់អេលីយ៉ាថាគាត់នៅតែមានតម្លៃ ហើយលោកបានផ្ដល់ជំនួយនិងការយកចិត្តទុកដាក់ចំពោះអេលីយ៉ា។
▸ សូមអានអំពីអេលីយ៉ា: ពង្សាវតារក្សត្រទី១ ១៩:២-១៨
យ៉ូប
● តើគាត់ជាអ្នកណា? យ៉ូបជាអ្នកមានស្ដុកស្តម្ភ និងមានក្រុមគ្រួសារធំ ហើយគាត់ជាអ្នកគោរពប្រណិប័តន៍ព្រះពិតយ៉ាងស្មោះត្រង់។
● ហេតុអ្វីបានជាគាត់ចង់ស្លាប់? មានរឿងអាក្រក់ជាច្រើន បានកើតឡើងចំពោះយ៉ូបភ្លាមមួយរំពេច។ គាត់បាត់បង់ទ្រព្យសម្បត្តិទាំងអស់។ កូនៗរបស់គាត់ទាំងអស់បានស្លាប់ដោយសារមហន្តរាយ។ គាត់មានជំងឺដ៏ឈឺចាប់បំផុត។ ហើយចុងក្រោយ គាត់បានត្រូវគេចោទប្រកាន់អាក្រក់ៗនិងមិនពិត អំពីដើមហេតុនៃបញ្ហារបស់គាត់។ យ៉ូបនិយាយថា៖«ទូលបង្គំខ្ពើមជីវិតណាស់ ទូលបង្គំនឹងមិនរស់ជាដរាបទេ»។—យ៉ូប ៧:១៦
● តើអ្វីបានជួយគាត់? យ៉ូបបានអធិដ្ឋានទៅព្រះ ហើយនិយាយទៅកាន់អ្នកឯទៀត។ (យ៉ូប ១០:១-៣) គាត់បានទទួលការលើកទឹកចិត្តពីអេលីហ៊ូវជាមិត្តដែលមានចិត្តអាណិតអាសូរ។ អេលីហ៊ូវបានជួយគាត់ឲ្យមានទស្សនៈផ្សេងអំពីស្ថានភាពរបស់គាត់។ សំខាន់បំផុត យ៉ូបពេញចិត្តទទួលការណែនាំនិងជំនួយពីព្រះ។
▸ សូមអានអំពីយ៉ូប: យ៉ូប ១:១-៣, ១៣-២២; ២:៧; ៣:១-១៣; ៣៦:១-៧; ៣៨:១-៣; ៤២:១, ២, ១០-១៣
ម៉ូសេ
● តើគាត់ជាអ្នកណា? ម៉ូសេជាអ្នកដឹកនាំជនជាតិអ៊ីស្រាអែល និងជាអ្នកប្រកាសទំនាយដ៏ស្មោះត្រង់។
● ហេតុអ្វីបានជាគាត់ចង់ស្លាប់? ម៉ូសេមានភារកិច្ចដ៏ធំ ហើយបានទទួលការរិះគន់ជាញឹកញយ និងអស់កម្លាំងជាខ្លាំង។ ដូច្នេះ គាត់បានស្រែកអង្វរព្រះថា៖«សូមសម្លាប់ទូលបង្គំទៅវិញចុះ»។—ជនគណនា ១១:១១, ១៥
● តើអ្វីបានជួយគាត់? ម៉ូសេបានប្រាប់អារម្មណ៍របស់គាត់ដល់ព្រះ។ ព្រះបានជួយសម្រាលកិច្ចការរបស់គាត់ដើម្បីឲ្យគាត់មានអារម្មណ៍ធូរស្រាល។
▸ សូមអានអំពីម៉ូសេ: ជនគណនា ១១:៤-៦, ១០-១៧
a បើអ្នកមានអារម្មណ៍ចង់សម្លាប់ខ្លួនយ៉ាងខ្លាំង ហើយបុគ្គលដែលអ្នកអាចទុកចិត្តមិននៅក្បែរ សូមទូរស័ព្ទទៅមណ្ឌលសម្រាប់អ្នកដែលមានវិបត្ដិ ឬទូរស័ព្ទទៅលេខសង្គ្រោះបន្ទាន់។
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
ចុះបើខ្ញុំមិនចង់រស់ទៀត?
មានយោបល់បួនយ៉ាងដែលអាចជួយប្អូនឲ្យយកឈ្នះអារម្មណ៍ដែលថាជីវិតគ្មានតម្លៃ។
សេចក្ដីបង្រៀនសំខាន់ៗក្នុងគម្ពីរ
ហេតុអ្វីព្រះអនុញ្ញាតឲ្យមានទុក្ខវេទនា?
មនុស្សជាច្រើនឆ្ងល់ថាហេតុអ្វីពិភពលោកនេះពោរពេញដោយការស្អប់គ្នានិងទុក្ខវេទនាច្រើនម៉្លេះ។ គម្ពីរមានចម្លើយដែលធ្វើឲ្យលោកអ្នកអស់ចម្ងល់ ហើយក៏សម្រាលទុក្ខផងដែរ។
