មេរៀនទី៥៥
ទេវតាព្រះយេហូវ៉ាការពារហេសេគា
ចក្រភពអាស៊ីរីដណ្ដើមយកបានកុលសម្ព័ន្ធ១០នៃរាជាណាចក្រអ៊ីស្រាអែល។ ឥឡូវ សានហេរីបស្ដេចស្រុកអាស៊ីរី ចង់កាន់កាប់កុលសម្ព័ន្ធពីរនៃរាជាណាចក្រយូដាទាំងមូល។ គាត់ចាប់ផ្ដើមវាយយកក្រុងម្ដងមួយៗក្នុងស្រុកយូដា ហើយក្រុងដែលគាត់ចង់បានបំផុត គឺក្រុងយេរូសាឡិម។ ប៉ុន្តែ សានហេរីបមិនបានដឹងថា ព្រះយេហូវ៉ាកំពុងការពារក្រុងយេរូសាឡិមទេ។
ស្ដេចហេសេគាស្រុកយូដាបានបង់ប្រាក់ជាច្រើនដល់សានហេរីប ដើម្បីកុំឲ្យគាត់វាយយកក្រុងយេរូសាឡិម។ ទោះជាសានហេរីបបានទទួលប្រាក់ក៏ដោយ គាត់នៅតែបញ្ជូនកងទ័ពដ៏ខ្លាំងក្លាឲ្យទៅវាយប្រហារក្រុងយេរូសាឡិម។ បណ្ដាជនក្នុងក្រុងភ័យខ្លាចជាខ្លាំង ព្រោះកងទ័ពអាស៊ីរីមកកាន់តែជិតក្រុងហើយ។ ប៉ុន្តែ ហេសេគាបានប្រាប់បណ្ដាជនថា៖ ‹កុំភ័យខ្លាចឡើយ។ ពិតមែនតែកងទ័ពអាស៊ីរីខ្លាំង តែព្រះយេហូវ៉ានឹងធ្វើឲ្យយើងខ្លាំងជាងពួកគេ›។
សានហេរីបបានចាត់រ៉ាបសាកេ ឲ្យទៅចំអកមើលងាយបណ្ដាជននៅក្រុងយេរូសាឡិម។ រ៉ាបសាកេឈរនៅខាងក្រៅក្រុង ហើយស្រែកថា៖ ‹ព្រះយេហូវ៉ាមិនអាចជួយពួកអ្នកបានទេ។ កុំចាញ់ពាក្យបោកបញ្ឆោតរបស់ហេសេគា! គ្មានព្រះណាអាចជួយពួកអ្នកឲ្យរួចពីដៃរបស់យើងបានឡើយ›។
ហេសេគាសួរព្រះយេហូវ៉ាថាគាត់គួរធ្វើយ៉ាងណា។ ព្រះយេហូវ៉ាឆ្លើយថា៖ ‹កុំភ័យខ្លាចដោយសារសម្ដីរបស់រ៉ាបសាកេ។ សានហេរីបនឹងមិនបានក្រុងយេរូសាឡិមទេ›។ បន្ទាប់មក ហេសេគាបានទទួលសំបុត្រមួយចំនួនពីសានហេរីប។ ក្នុងសំបុត្រទាំងនោះថា៖ ‹ចូរបោះបង់ចោលទៅ។ ព្រះយេហូវ៉ាមិនអាចសង្គ្រោះអ្នកបានទេ›។ ហេសេគាបានអធិដ្ឋានថា៖ ‹ឱព្រះយេហូវ៉ាអើយ សូមសង្គ្រោះយើងផង ដើម្បីឲ្យមនុស្សទាំងអស់ដឹងថា លោកជាព្រះពិតតែមួយ›។ ព្រះយេហូវ៉ាតបទៅគាត់ថា៖ ‹ស្ដេចអាស៊ីរីគ្មានថ្ងៃចូលមកក្នុងក្រុងយេរូសាឡិមបានឡើយ។ ខ្ញុំនឹងការពារក្រុងរបស់ខ្ញុំ›។
សានហេរីបជឿជាក់ថា ក្រុងយេរូសាឡិមនឹងក្លាយជារបស់គាត់ក្នុងពេលឆាប់ៗ។ ប៉ុន្តែ នៅយប់មួយ ព្រះយេហូវ៉ាបានចាត់ទេវតាមួយរូប ឲ្យទៅជំរំទ័ពពួកអាស៊ីរីដែលនៅខាងក្រៅក្រុង ហើយទេវតានោះបានសម្លាប់ទ័ពអាស៊ីរីអស់១៨៥.០០០នាក់! ស្ដេចសានហេរីបបាត់បង់ទាហានដ៏ខ្លាំងក្លាទាំងអស់របស់ខ្លួន។ គាត់បរាជ័យយ៉ាងធ្ងន់ធ្ងរ ដូច្នេះគាត់ត្រូវត្រឡប់ទៅស្រុករបស់ខ្លួនវិញ។ ព្រះយេហូវ៉ាបានការពារហេសេគានិងក្រុងយេរូសាឡិម ដូចដែលលោកបានសន្យាមែន។ បើពេលនោះអ្នករស់នៅក្នុងក្រុងយេរូសាឡិម តើអ្នកនឹងទុកចិត្តព្រះយេហូវ៉ាឬទេ?
«ទេវតារបស់ព្រះយេហូវ៉ាការពារអស់អ្នកដែលកោតខ្លាចលោក ហើយសង្គ្រោះពួកគេ»។—ចម្រៀងសរសើរព្រះ ៣៤:៧
