បញ្ចុះសពថ្ងៃសុក្រ តែថ្ងៃអាទិត្យផ្នូរនៅទទេ
ជំពូកទី១២៧
បញ្ចុះសពថ្ងៃសុក្រ តែថ្ងៃអាទិត្យផ្នូរនៅទទេ
មកដល់ឥឡូវនេះ គឺជារសៀលថ្ងៃសុក្រ ហើយថ្ងៃឈប់សំរាកនៅថ្ងៃទី១៥ ខែណែសាននឹងចាប់ផ្ដើមក្រោយពីថ្ងៃលិចទៅ។ សពរបស់ព្រះយេស៊ូគឺនៅព្យួរលើបង្គោលឈើនៅឡើយ ប៉ុន្តែចោរពីរនាក់ដែលនៅជិតទ្រង់ គឺនៅតែមានជីវិតនៅឡើយ។ គេហៅរសៀលថ្ងៃសុក្រថាជាថ្ងៃរៀបចំ ពីព្រោះនេះជាពេលដែលមនុស្សរៀបចំអាហារ និងបង្ហើយនូវកិច្ចការជាបន្ទាន់ ដែលមិនអាចទុករហូតដល់ក្រោយថ្ងៃឈប់សំរាកបានទេ។
ថ្ងៃឈប់សំរាកដែលនឹងចាប់ធ្វើ គឺមិនមែនជាថ្ងៃសំរាកធម្មតាទេ (ថ្ងៃទីប្រាំពីរក្នុងសប្ដាហ៍) ប៉ុន្តែក៏ជាថ្ងៃឈប់សំរាក‹ដ៏ធំ›ដែរ។ ថ្ងៃឈប់សំរាកនេះមានឈ្មោះដូចនេះ ពីព្រោះថ្ងៃទី១៥ ខែណែសាន ជាថ្ងៃទីមួយនៃបុណ្យនំប៉័ងឥតដំបែដែលមានគ្រប់ប្រាំពីរថ្ងៃ (ហើយត្រូវជាថ្ងៃឈប់សំរាក ទោះជាត្រូវចំថ្ងៃណាក្នុងសប្ដាហ៍ក៏ដោយ) ដែលលើកនេះចំនឹងថ្ងៃឈប់សំរាកធម្មតាដែរ។
យោងទៅតាមច្បាប់របស់ព្រះ មិនត្រូវព្យួរសពលើបង្គោលឈើនៅពេលយប់ទេ។ ដូច្នេះ ពួកយូដាសុំលោកពីឡាត់ ឲ្យគេបំបាក់ជើងរបស់អ្នកទោសដែលត្រូវព្យួរដើម្បីឲ្យពួកអ្នកទាំងនោះស្លាប់ឆាប់។ ដូច្នេះ ពួកទាហានក៏បំបាក់ជើងចោរទាំងពីរនាក់នោះ។ ប៉ុន្តែ ព្រះយេស៊ូពុំបានត្រូវគេបំបាក់ជើងទ្រង់ទេ ព្រោះទ្រង់ទំនងជាបានសោយទិវង្គតហើយ។ នេះគឺបានសម្រេចនឹងបទគម្ពីរ ដែលថា «គ្មានឆ្អឹងទ្រង់ណាមួយត្រូវបាក់សោះ»។
ប៉ុន្តែ ដើម្បីឲ្យប្រាកដថា ព្រះយេស៊ូសោយទិវង្គតមែន នោះទាហានម្នាក់យកលំពែងចាក់ត្រង់ចំហៀងទ្រង់។ លំពែងនោះចាក់ធ្លុះក្បែរបេះដូងរបស់ទ្រង់ ហើយក៏មានឈាមនិងទឹកបាញ់ចេញមកភ្លាម។ សាវ័កយ៉ូហានដែលជាសាក្សី រាយការណ៍ថានេះបានសម្រេចបទគម្ពីរមួយទៀត ដែលថា៖ «គេនឹងមើលព្រះអង្គដែលគេបានចាក់»។
យ៉ូសែបពីក្រុងអើរីម៉ាថេ ជាសមាជិកដែលមានឈ្មោះល្អក្នុងក្រុមប្រឹក្សាជាន់ខ្ពស់ ក៏មានវត្តមាននៅឯកន្លែងប្រហារជីវិតនេះដែរ។ លោកបដិសេធពុំបោះឆ្នោតគាំទ្រនូវការប្រព្រឹត្តដ៏អយុត្ដិធម៌របស់តុលាការជាន់ខ្ពស់ ប្រឆាំងនឹងព្រះយេស៊ូឡើយ។ តាមពិត យ៉ូសែបក៏ជាសិស្សរបស់ព្រះយេស៊ូម្នាក់ដែរ ទោះជាគាត់ខ្លាចប្រាប់គេ ថាគាត់ជាសិស្សរបស់ទ្រង់ក៏ដោយ។ ប៉ុន្តែ ឥឡូវនេះ លោកសម្ដែងនូវភាពក្លាហាន ហើយទៅជួបលោកពីឡាត់សុំយកព្រះសពរបស់ព្រះយេស៊ូ។ លោកពីឡាត់ហៅមេទ័ពមកជួប ហើយក្រោយពីទាហានបញ្ជាក់ថា ព្រះយេស៊ូសោយទិវង្គតហើយ នោះលោកក៏អនុញ្ញាតឲ្យគេយកព្រះសពទ្រង់ទៅ។
យ៉ូសែបយកព្រះសពរុំនឹងសំពត់ទេសឯក ដើម្បីរៀបចំបញ្ចុះសព។ លោកនីកូដេមដែលជាសមាជិកម្នាក់ទៀតនៃក្រុមប្រឹក្សាជាន់ខ្ពស់ ក៏បានជួយយ៉ូសែបដែរ។ លោកនីកូដេមក៏មិនបានសារភាពថា លោកមានជំនឿលើព្រះយេស៊ូដូចយ៉ូសែបដែរ ព្រោះលោកខ្លាចបាត់បង់នូវឋានៈរបស់លោក។ តែឥឡូវនេះ លោកនីកូដេមយកជ័រល្វីងទេសលាយនឹងគ្រឿងក្រអូបដ៏ថ្លៃ ប្រហែលជា៣៣គីឡូក្រាមមកជាមួយដែរ។ ពួកគាត់រុំសពរបស់ព្រះយេស៊ូនឹងសំពត់ទេសឯក ជាមួយនឹងគ្រឿងក្រអូបទាំងនេះ តាមទំនៀមទម្លាប់របស់ជនជាតិយូដាក្នុងការរៀបចំបញ្ចុះសព។
រួចមក គេដាក់សពរបស់ព្រះយេស៊ូក្នុងផ្នូរថ្មី ដែលជាកម្មសិទ្ធិរបស់យ៉ូសែប នៅក្នុងសួនឧទ្យានមួយនៅក្បែរនោះ។ នៅទីបំផុត គេប្រមៀលថ្មមួយយ៉ាងធំមកបិទសន្ធប់ខ្ទប់មាត់ផ្នូរនោះ។ ការរៀបចំបញ្ចុះសពគឺធ្វើឡើងដោយប្រញាប់ប្រញាល់ ដើម្បីឲ្យរួចមុនថ្ងៃឈប់សំរាក។ ដូច្នេះ ម៉ារាម៉ាក់ដាឡា និងម៉ារាជាម្ដាយយ៉ាកុប ដែលប្រហែលជាបានជួយនឹងការរៀបចំនេះ ពួកគាត់ក៏ប្រញាប់ទៅផ្ទះវិញដើម្បីរៀបចំគ្រឿងក្រអូបនឹងប្រេងអប់ថែមទៀត។ ក្រោយពីថ្ងៃឈប់សំរាក ពួកគេបំរុងនឹងលាបប្រេងក្រអូបលើសពរបស់ព្រះយេស៊ូម្ដងទៀតដើម្បីតំកល់សពឲ្យបានយូរ។
ថ្ងៃស្អែក ដែលជាថ្ងៃសៅរ៍ (គឺថ្ងៃឈប់សំរាក) នោះពួកសង្គ្រាជនិងពួកផារីស៊ីនាំគ្នាទៅជួបលោកពីឡាត់ ហើយពោលថា៖ «លោក! យើងខ្ញុំនឹកចាំពីពាក្យដែលអាកំភូតនោះបាននិយាយ ពីកាលនៅរស់នៅឡើយថា ‹ក្រោយមក៣ថ្ងៃ ខ្ញុំនឹងរស់ឡើងវិញ›។ ដូច្នេះ សូមលោកបង្គាប់ឲ្យគេប្រុងប្រយ័តផ្នូរនោះ ដរាបដល់គំរប់៣ថ្ងៃ ក្រែងពួកសិស្សរបស់វាមកលួចយកខ្មោចវាទាំងយប់ទៅ រួចប្រាប់ដល់បណ្ដាជនថា វាបានរស់ពីស្លាប់ឡើងវិញហើយ បើយ៉ាងនោះ សេចក្ដីកំភូតជាន់ក្រោយនេះ នឹងបានអាក្រក់ជាងជាន់មុនទៅទៀត»។
លោកពីឡាត់មានប្រសាសន៍ថា៖ «អ្នករាល់គ្នាមានអ្នកយាមល្បាតស្រាប់ហើយ ដូច្នេះ ចូរទៅរក្សាឲ្យមាំមួនតាមចិត្តចុះ!»។ រួចមក ពួកគេទៅបំបិទផ្នូរឲ្យជិតថែមទៀត និងដាក់ទាហានរ៉ូមឲ្យនៅយាមផង។
នៅព្រឹកថ្ងៃអាទិត្យ ម៉ារាជាអ្នកស្រុកម៉ាក់ដាឡា និងម៉ារាម្ដាយរបស់យ៉ាកុប សាឡូមេ យ៉ូអាន់ និងស្ត្រីឯទៀត នាំគ្នាយកគ្រឿងក្រអូបនេះទៅផ្នូរដើម្បីលាបព្រះសពព្រះយេស៊ូ។ ពេលធ្វើដំណើរតាមផ្លូវ ពួកគេនិយាយគ្នាថា៖ «តើមានអ្នកណា នឹងប្រមៀលថ្មចេញពីមាត់ផ្នូរឲ្យយើង?»។ ប៉ុន្តែ ពេលមកដល់ ពួកគេឃើញថាដីក៏បានកក្រើកយ៉ាងខ្លាំង ហើយមានទេវតារបស់ព្រះយេហូវ៉ាបានប្រមៀលថ្មចេញពីមាត់ផ្នូរ។ អ្នកយាមទៅណាបាត់ហើយៗផ្នូរក៏នៅទទេដែរ។ ម៉ាថាយ ២៧:៥៧–២៨:២; ម៉ាកុស ១៥:៤២–១៦:៤; លូកា ២៣:៥០–២៤:៣, ១០; យ៉ូហាន ១៩:១៤, យ៉ូន. ១៩:៣១–២០:១; យ៉ូន. ១២:៤២; លេវីវិន័យ ២៣:៥-៧; ចោទិយកថា ២១:២២, ២៣; ទំនុកដំកើង ៣៤:២០; សាការី ១២:១០
▪ ហេតុអ្វីគេហៅថ្ងៃសុក្រថាជា ថ្ងៃរៀបចំ? ហើយតើថ្ងៃឈប់សំរាក‹ដ៏ធំ›ជាអ្វី?
▪ តើបទគម្ពីរអ្វីដែលបានសម្រេចទាក់ទងនឹងព្រះសពព្រះយេស៊ូ?
▪ តើលោកយ៉ូសែបនិងលោកនីកូដេមបានធ្វើអ្វី ដើម្បីជួយបញ្ចុះសពព្រះយេស៊ូ? ហើយពួកគេមានទំនាក់ទំនងអ្វីនឹងព្រះយេស៊ូ?
▪ តើពួកសង្ឃស្នើសុំអ្វីពីលោកពីឡាត់ ហើយលោកតបឆ្លើយយ៉ាងដូចម្ដេច?
▪ តើមានអ្វីកើតឡើងនៅពេលព្រឹកព្រលឹមថ្ងៃអាទិត្យ?
