តើផែនដីយើងអាចនៅស្ថិតស្ថេរឬទេ?
ទឹកសាប
បើគ្មានទឹក ជាពិសេសទឹកសាប នោះមិនអាចមានជីវិតនៅផែនដីនោះទេ។ តាមពិត ទឹកគឺជាធាតុដែលមានច្រើនបំផុតក្នុងសារពាង្គកាយនៃភាវរស់ទាំងអស់។ បឹង ទន្លេ ដីសើម និងទឹកក្រោមដី ផ្ដល់ទឹកដល់មនុស្សនិងសត្វ ហើយក៏សម្រាប់ស្រោចស្រពដំណាំផងដែរ។
កត្តាដែលបង្ខូចទឹកសាប
ភពផែនដីរបស់យើង ភាគច្រើនបានត្រូវគ្របដណ្ដប់ដោយទឹក។ ទោះជាយ៉ាងណាក៏ដោយ យោងទៅតាមអង្គការឧតុនិយមពិភពលោក «នៅលើផែនដីមានទឹកសាបតែ០.៥ភាគរយប៉ុណ្ណោះ ដែលអាចប្រើប្រាស់បាន»។ ទោះជាទឹកសាបមានតិចតួចក្ដី នេះគឺគ្រប់គ្រាន់សម្រាប់ទ្រទ្រង់ជីវិតនៅលើផែនដី។ ក្នុងចំណោមទឹក០.៥ភាគរយដែលអាចប្រើប្រាស់បាននោះ ភាគច្រើនបានត្រូវបង្ខូច ដោយសារមនុស្សបានប្រើប្រាស់វាច្រើនពេក និងបម្រែបម្រួលអាកាសធាតុ។ អ្នកជំនាញសន្និដ្ឋានថា ក្នុងរយៈពេល៣០ឆ្នាំខាងមុខនេះ មនុស្សប្រាំពាន់លាននាក់នឹងមិនមានទឹកគ្រប់គ្រាន់ដើម្បីប្រើប្រាស់នោះទេ។
ផែនដីបានត្រូវបង្កើតឲ្យនៅស្ថិតស្ថេរ
ផែនដីតែងតែមានទឹកគ្រប់គ្រាន់ដោយសារមានដំណើរការនៃប្រព័ន្ធធម្មជាតិ។ ដី ភាវរស់ដែលរស់នៅក្នុងទឹក និងពន្លឺព្រះអាទិត្យសហការគ្នាដើម្បីសម្អាតទឹករបស់យើង។ សូមពិចារណាភ័ស្តុតាងមួយចំនួនដែលបង្ហាញថា ផែនដីគឺជាភពតែមួយគត់ដែលបានត្រូវបង្កើតឲ្យនៅស្ថិតស្ថេរ។
-
ការស្រាវជ្រាវបង្ហាញថា ដីអាចកម្ចាត់ជាតិកខ្វក់ចេញពីទឹកយ៉ាងមានប្រសិទ្ធភាព។ នៅតំបន់ដីសើម មានរុក្ខជាតិមួយចំនួនដែលអាចកម្ចាត់សារធាតុពុលផ្សេងៗ ដូចជាអាសូត ផូស្វ័រ និងថ្នាំសម្លាប់សត្វល្អិត។
-
អ្នកវិទ្យាសាស្ត្របានរកឃើញថា ដំណើរការធម្មជាតិផ្សេងៗអាចកម្ចាត់ជាតិពុលពីកាកសំណល់ធម្មជាតិ។ សារធាតុពុលទាំងនោះ បានត្រូវកាត់បន្ថយដោយទឹកហូរ និងដោយមីក្រុបសារពាង្គកាយ។
-
លៀសនិងគ្រំទាញយកសារធាតុគីមីមួយចំនួនដែលអាចបង្កឲ្យមានគ្រោះថ្នាក់ ចេញពីទឹកក្នុងរយៈពេលតែប៉ុន្មានថ្ងៃប៉ុណ្ណោះ ហើយនេះមានប្រសិទ្ធភាពជាងរោងចក្របន្សុទ្ធទឹកទៅទៀត។
-
ផែនដីយើងរក្សាទឹកដោយប្រព័ន្ធធម្មជាតិមួយដែលគេហៅថាវដ្ដទឹក។ វដ្ដទឹកនេះរួមជាមួយនឹងដំណើរការនៃប្រព័ន្ធធម្មជាតិផ្សេងៗទៀត ការពារទឹកកុំឲ្យចេញពីបរិយាកាសរបស់យើង ឬហួតហែងលែងមានទៀត។
អ្វីដែលមនុស្សព្យាយាមធ្វើ
ដោយជួសជុលរថយន្តដែលហៀរប្រេង និងបោះចោលសារធាតុពុលតាមរបៀបត្រឹមត្រូវ យើងជួយរក្សាប្រភពទឹកសាបឲ្យស្អាត
អ្នកជំនាញណែនាំឲ្យយើងសន្សំសំចៃទឹកបើអាចធ្វើទៅបាន។ ដើម្បីកាត់បន្ថយការបំពុលទឹក ពួកគេណែនាំឲ្យយើងជួសជុលរថយន្តបើវាហៀរប្រេង ហើយមិនត្រូវបោះថ្នាំឬសារធាតុពុលចូលក្នុងប្រព័ន្ធលូឡើយ។
វិស្វករបានបង្កើតរបៀបទំនើបមួយដែលគេអាចដកយកជាតិប្រៃចេញពីទឹក។ គោលដៅរបស់ពួកគេគឺឲ្យមានទឹកសាបកាន់តែច្រើន។
ប៉ុន្តែយើងត្រូវព្យាយាមធ្វើច្រើនថែមទៀត។ ការដកជាតិប្រៃចេញពីទឹកមិនមែនជាដំណោះស្រាយល្អបំផុតនោះទេ ដោយសារវិធីនេះតម្រូវឲ្យចំណាយថវិកាច្រើន ហើយក៏ត្រូវការថាមពលច្រើនដែរ។ យោងទៅតាមរបាយការណ៍ឆ្នាំ២០២១របស់អង្គការសហប្រជាជាតិអំពីការគ្រប់គ្រងទឹក បានរៀបរាប់ថា៖ «ការខំប្រឹងឲ្យមានទឹកដែលអាចប្រើប្រាស់បាន ត្រូវកើនឡើងទ្វេដងនៅទូទាំងពិភពលោក»។
យើងអាចមានសេចក្ដីសង្ឃឹមអ្វីដែលគម្ពីរចែង
«ព្រះ . . . បង្ហួតទឹកឡើងទៅលើ ឲ្យកើតជាចំហាយ ហើយក្លាយទៅជាកំណក រួចទៅជាតំណក់ទឹក។ រួចពពកបង្អុរភ្លៀងចុះមកស្រោចស្រពលើមនុស្សគ្រប់ប្រាណ»។—យ៉ូប ៣៦:២៦-២៨
ព្រះបានបង្កើតវដ្ដធម្មជាតិផ្សេងៗដើម្បីការពារទឹកដែលមាននៅក្នុងផែនដី។—អ្នកទូន្មាន ១:៧
សូមពិចារណា៖ ប្រសិនបើអ្នកបង្កើតធ្វើឲ្យផែនដីអាចសម្អាតទឹកបានដោយខ្លួនឯង នោះយើងប្រាកដថា លោកច្បាស់ជាមានឫទ្ធានុភាព ហើយចង់ដោះស្រាយបញ្ហាទាំងអស់ដែលបង្កឡើងដោយមនុស្សជាតិ មែនទេ? សូមមើលអត្ថបទ«ព្រះសន្យាថាផែនដីយើងនឹងនៅស្ថិតស្ថេរ» នៅទំព័រ១៥។
