អត្ថបទសិក្សា ២៤
ចម្រៀងលេខ៩៨ បទគម្ពីរគឺមកពីព្រះ
មេរៀនយើងអាចរៀនពីទំនាយរបស់យ៉ាកុបពេលគាត់ជិតស្លាប់ ភាគទី១
«ចូរពួកកូនមកជិតពុកមក ដើម្បីពុកអាចប្រាប់កូនអំពីអ្វីដែលនឹងកើតឡើងចំពោះពួកកូន នៅគ្រាអនាគត»។—ដក. ៤៩:១
ចំណុចផ្ដោត
មេរៀនដ៏សំខាន់ដែលយើងអាចរៀនពីទំនាយរបស់យ៉ាកុបពេលគាត់ជិតស្លាប់ដែលទាក់ទងនឹងរូបេន ស៊ីម្មាន លេវី និងយូដា។
១-២. តើយ៉ាកុបបានធ្វើអ្វីមុនពេលគាត់ស្លាប់ ហើយហេតុអ្វី? (សូមមើលរូបភាពផងដែរ)
ពេលយ៉ាកុបមានវ័យចាស់ជរា គាត់បានធ្វើដំណើរជាមួយនឹងក្រុមគ្រួសាររបស់គាត់ទាំងអស់ពីស្រុកកាណានទៅស្រុកអេហ្ស៊ីប។ នៅទីនោះ គាត់បានបន្តបម្រើព្រះយេហូវ៉ាយ៉ាងស្មោះត្រង់អស់១៧ឆ្នាំទៀត។ (ដក. ៤៧:២៨) នៅក្នុងអំឡុងពេលនោះ គាត់ពិតជាសប្បាយដែលគាត់បានជួបយ៉ូសែបដែលជាកូនជាទីស្រឡាញ់របស់គាត់ម្ដងទៀត និងឃើញក្រុមគ្រួសាររបស់គាត់ទាំងមូលជួបជុំគ្នាឡើងវិញ។ ប៉ុន្តែឥឡូវ យ៉ាកុបដឹងថាខ្លួនគាត់ជិតស្លាប់ហើយ។ ដូច្នេះ គាត់បានហៅកូនប្រុសទាំងអស់របស់គាត់ឲ្យមកជួបគាត់ ដោយសារគាត់មានរឿងសំខាន់ចង់ប្រាប់ពួកគេ។—ដក. ៤៩:២៨
២ ធម្មតានៅសម័យនោះ ឪពុកដែលជាមេគ្រួសារច្រើនតែហៅសមាជិកក្រុមគ្រួសារឲ្យមកជួបជុំគ្នា ដើម្បីផ្ដែផ្ដាំពួកគេជាលើកចុងក្រោយមុនគាត់ស្លាប់។ (អេ. ៣៨:១) នៅពេលនោះ គាត់ប្រហែលជាប្រាប់សមាជិកក្រុមគ្រួសារថា អ្នកណានឹងទៅជាប្រមុខគ្រួសារក្រោយពីគាត់ស្លាប់។
ពេលយ៉ាកុបដេកលើគ្រែជិតស្លាប់ គាត់ប្រាប់ទំនាយដល់កូនប្រុសទាំង១២នាក់របស់គាត់ (សូមមើលវគ្គ១-២)
៣. តើយើងរៀនអ្វីពីដើមកំណើត ៤៩:១, ២?
៣ សូមអាន ដើមកំណើត ៤៩:១, ២។ ប៉ុន្តែ ការជួបជុំនេះមិនដូចការជួបជុំក្រុមគ្រួសារធម្មតាទេ។ យ៉ាកុបជាអ្នកបម្រើព្រះនិងជាអ្នកប្រកាសទំនាយ ដូច្នេះក្នុងអំឡុងពេលជួបជុំនោះ ព្រះយេហូវ៉ាបានដឹកនាំគាត់ឲ្យនិយាយអំពីព្រឹត្តិការណ៍សំខាន់ៗនៅថ្ងៃអនាគត ដែលនឹងមានឥទ្ធិពលយ៉ាងខ្លាំងមកលើកូនចៅរបស់គាត់។ ដូច្នេះ ពាក្យរបស់យ៉ាកុបទៅកាន់កូនប្រុសៗរបស់គាត់គឺជាទំនាយ។
៤. តើយ៉ាកុបបានប្រាប់ទុកជាមុនអំពីអ្វី ហើយតើយើងអាចរៀនអ្វីពីពាក្យសម្ដីរបស់គាត់? (សូមមើលផងដែរនូវប្រអប់ដែលមានចំណងជើងថា «ក្រុមគ្រួសាររបស់យ៉ាកុប»)
៤ នៅក្នុងអត្ថបទនេះ យើងនឹងពិចារណាពាក្យដែលយ៉ាកុបបាននិយាយទៅកាន់កូនប្រុសបួននាក់របស់គាត់គឺរូបេន ស៊ីម្មាន លេវី និងយូដា។ នៅក្នុងអត្ថបទបន្ទាប់ យើងនឹងពិចារណាពាក្យដែលយ៉ាកុបបាននិយាយទៅកាន់កូនប្រុសរបស់គាត់៨នាក់ទៀត។ យើងនឹងឃើញថា យ៉ាកុបមិនគ្រាន់តែនិយាយអំពីកូនប្រុសរបស់គាត់ប៉ុណ្ណោះទេ តែគាត់ក៏និយាយអំពីកូនចៅរបស់ពួកគេដែលក្រោយមកនឹងទៅជាប្រជាជាតិអ៊ីស្រាអែល។ ពេលយើងពិនិត្យមើលអ្វីដែលបានកើតឡើងដល់ប្រជាជាតិអ៊ីស្រាអែលនៅអតីតកាល យើងនឹងឃើញអំពីរបៀបដែលពាក្យរបស់យ៉ាកុបបានក្លាយទៅជាការពិត។ ម្យ៉ាងទៀត ពេលយើងពិចារណាពាក្យរបស់គាត់ យើងនឹងរៀនមេរៀនដ៏សំខាន់ដែលអាចជួយយើងឲ្យធ្វើអ្វីដែលនាំឲ្យព្រះយេហូវ៉ាដែលជាបិតារបស់យើងនៅស្ថានសួគ៌ពេញចិត្ត។
រូបេន
៥. តើរូបេនប្រហែលជារំពឹងថាគាត់នឹងទទួលអ្វីពីឪពុករបស់គាត់?
៥ ដំបូង យ៉ាកុបបាននិយាយទៅកាន់រូបេនថា៖ «រូបេន[កូនជា]កូនច្បងរបស់ពុក»។ (ដក. ៤៩:៣) ដោយសាររូបេនជាកូនច្បង គាត់ទំនងជារំពឹងថាគាត់នឹងទទួលមត៌កលើសពីប្អូនប្រុសៗរបស់គាត់មួយជាពីរ។ គាត់ក៏ប្រហែលជារំពឹងថា គាត់នឹងទៅជាប្រមុខគ្រួសារបន្ទាប់ពីឪពុករបស់គាត់ស្លាប់ ហើយថាឯកសិទ្ធិនោះនឹងត្រូវផ្ទេរឲ្យកូនចៅរបស់គាត់នៅពេលក្រោយមក។
៦. ហេតុអ្វីរូបេនបានបាត់បង់សិទ្ធិជាកូនច្បង? (ដើមកំណើត ៤៩:៣, ៤)
៦ ប៉ុន្តែ រូបេនបានបាត់បង់សិទ្ធិជាកូនច្បង។ (១ប្រ. ៥:១) តើមានអ្វីកើតឡើងដែលនាំឲ្យគាត់បាត់បង់សិទ្ធិនោះ? ច្រើនឆ្នាំមុន រ៉ាជែលដែលជាប្រពន្ធជាទីស្រឡាញ់របស់យ៉ាកុបបានឲ្យប៊ីលហាដែលជាអ្នកបម្រើគាត់ ធ្វើជាប្រពន្ធបន្ទាប់របស់យ៉ាកុប។ ក្រោយមក រ៉ាជែលបានស្លាប់។ បន្ទាប់ពីនោះ រូបេនបានរួមដំណេកជាមួយនឹងប៊ីលហា។ (ដក. ៣៥:១៩, ២២) ហេតុអ្វីបានជារូបេនរួមដំណេកជាមួយនឹងប៊ីលហា? រូបេនគឺជាកូនប្រុសរបស់លេអាជាប្រពន្ធមួយទៀតរបស់យ៉ាកុប។ ដូច្នេះ រូបេនប្រហែលជាចង់ឲ្យយ៉ាកុបស្អប់ប៊ីលហា ហើយកាន់តែស្រឡាញ់ម្ដាយរបស់គាត់ ឬប្រហែលជារូបេនចាប់ចិត្តស្រឡាញ់ប៊ីលហា ហើយមិនបានគ្រប់គ្រងចំណង់ផ្លូវភេទរបស់គាត់។ មិនថាមានមូលហេតុណាក៏ដោយ អ្វីដែលគាត់បានប្រព្រឹត្តធ្វើឲ្យព្រះយេហូវ៉ា និងឪពុករបស់គាត់មិនពេញចិត្តជាខ្លាំង។—សូមអាន ដើមកំណើត ៤៩:៣, ៤
៧. តើអ្វីបានកើតឡើងចំពោះរូបេននិងកូនចៅរបស់គាត់? (សូមមើលផងដែរនូវប្រអប់ដែលមានចំណងជើងថា « ទំនាយរបស់យ៉ាកុបពេលគាត់ជិតស្លាប់»)
៧ យ៉ាកុបបានប្រាប់រូបេនថា៖ «កូននឹងមិនប្រសើរជាងប្អូនៗរបស់កូនទេ»។ ពាក្យនេះបានក្លាយទៅជាការពិត។ គម្ពីរមិនបានចែងថា កូនចៅរបស់រូបេនណាម្នាក់បានក្លាយទៅជាស្ដេច សង្ឃ ឬអ្នកប្រកាសទំនាយទេ។ ប៉ុន្តែ យ៉ាកុបនៅតែទទួលស្គាល់រូបេនជាកូន ហើយកូនចៅរបស់រូបេនបានទៅជាកុលសម្ព័ន្ធមួយក្នុងចំណោមពួកអ៊ីស្រាអែល។ (យ៉ូស. ១២:៦) រូបេនបានបង្ហាញគុណសម្បត្តិនៅក្នុងស្ថានភាពផ្សេងទៀត ហើយគម្ពីរមិនបានចែងថា គាត់បានប្រព្រឹត្តអំពើប្រាសចាកសីលធម៌ម្ដងទៀតឡើយ។—ដក. ៣៧:២០-២២; ៤២:៣៧
៨. តើយើងអាចរៀនអ្វីពីគំរូរបស់រូបេន?
៨ តើយើងអាចរៀនអ្វី? យើងត្រូវខំព្យាយាមអស់ពីសមត្ថភាពដើម្បីចេះទប់ចិត្ត ហើយបដិសេធអំពើប្រាសចាកសីលធម៌ខាងផ្លូវភេទ។ បើយើងបានត្រូវល្បួងឲ្យប្រព្រឹត្តអំពើខុសឆ្គង យើងគួរតែគិតជាមុនសិនថា ការប្រព្រឹត្តរបស់យើងនឹងធ្វើឲ្យព្រះយេហូវ៉ា ក្រុមគ្រួសារ និងអ្នកឯទៀតឈឺចិត្តខ្លាំងយ៉ាងណា។ យើងក៏គួរចាំដែរថា «មនុស្សទទួលផលតាមតែអ្វីដែលគេសាបព្រោះ»។ (កាឡ. ៦:៧) ម្យ៉ាងទៀត អ្វីដែលបានកើតឡើងដល់រូបេន រំលឹកយើងអំពីសេចក្ដីមេត្តាករុណារបស់ព្រះយេហូវ៉ា។ យើងប្រហែលជានៅតែរងទុក្ខដោយសារកំហុសរបស់យើង តែបើយើងប្រែចិត្ត ហើយខំព្យាយាមធ្វើអ្វីដែលត្រឹមត្រូវ នោះព្រះយេហូវ៉ានឹងអភ័យទោសឲ្យយើងនិងឲ្យពរយើង។
ស៊ីម្មាន និងលេវី
៩. ហេតុអ្វីបានជាយ៉ាកុបមិនពេញចិត្តនឹងស៊ីម្មាននិងលេវី? (ដើមកំណើត ៤៩:៥-៧)
៩ សូមអាន ដើមកំណើត ៤៩:៥-៧។ បន្ទាប់មក យ៉ាកុបបាននិយាយចំៗទៅកាន់ស៊ីម្មាននិងលេវីដើម្បីបង្ហាញថា គាត់មិនពេញចិត្តនឹងពួកគាត់។ ច្រើនឆ្នាំមុន បុរសម្នាក់ពីស្រុកកាណានឈ្មោះស៊ីគឹម បានរំលោភឌីណាដែលជាកូនស្រីរបស់យ៉ាកុប។ យើងច្បាស់ជាយល់មូលហេតុដែលកូនប្រុសៗរបស់យ៉ាកុបខឹងយ៉ាងខ្លាំង អំពីអ្វីដែលបានកើតឡើងចំពោះប្អូនស្រីរបស់ពួកគេ។ ប៉ុន្តែ ស៊ីម្មាននិងលេវីមិនបានទប់កំហឹងរបស់ពួកគាត់ទេ។ ពួកគាត់បានប្រើឧបាយកលថានឹងចងសម្ព័ន្ធភាពជាមួយពួកបុរសក្រុងស៊ីគឹម បើបុរសទាំងអស់នោះយល់ព្រមទទួលការកាត់ចុងស្បែក។ បុរសទាំងនោះបានយល់ព្រម ហើយបានកាត់ចុងស្បែក។ កាលដែលពួកបុរសទាំងអស់នៅក្នុងក្រុងកំពុងនៅឈឺ ហើយមិនបានត្រៀមខ្លួននៅឡើយ ស៊ីម្មាននិងលេវី«បានកាន់ដាវចូលទៅសម្លាប់ពួកគេទាំងអស់ទៅ»។—ដក. ៣៤:២៥-២៩
១០. តើពាក្យរបស់យ៉ាកុបទៅកាន់ស៊ីម្មាននិងលេវីបានក្លាយទៅជាការពិតយ៉ាងដូចម្ដេច? (សូមមើលផងដែរនូវប្រអប់ដែលមានចំណងជើងថា « ទំនាយរបស់យ៉ាកុបពេលគាត់ជិតស្លាប់»)
១០ យ៉ាកុបខឹងយ៉ាងខ្លាំងដែលកូនប្រុសពីរនាក់របស់គាត់បានសម្លាប់មនុស្សជាច្រើន។ គាត់បានប្រកាសទុកជាមុនថា ពួកគាត់នឹងត្រូវបំបែកនិងកំចាត់កំចាយនៅពេញស្រុកអ៊ីស្រាអែល។ ទំនាយនោះបានក្លាយទៅជាការពិតជាង២០០ឆ្នាំក្រោយមក ពេលដែលប្រជាជាតិអ៊ីស្រាអែលចូលស្រុកដែលព្រះបានសន្យា។ កុលសម្ព័ន្ធស៊ីម្មានបានទទួលក្រុងខ្លះៗក្នុងទឹកដីរបស់កុលសម្ព័ន្ធយូដាជាមត៌ក។ (យ៉ូស. ១៩:១) កុលសម្ព័ន្ធលេវីបានទទួល៤៨ក្រុងជាមត៌កនៅកន្លែងផ្សេងៗក្នុងស្រុកអ៊ីស្រាអែល។—យ៉ូស. ២១:៤១
១១. តើកុលសម្ព័ន្ធស៊ីម្មាននិងលេវីបានធ្វើល្អអ្វីខ្លះ?
១១ កូនចៅរបស់ស៊ីម្មាននិងលេវីមិនបានធ្វើខុសដូចបុព្វបុរសរបស់ពួកគេទេ។ កុលសម្ព័ន្ធលេវីបានបង្ហាញភក្ដីភាពយ៉ាងខ្លាំងចំពោះការគោរពប្រណិប័តន៍ពិត។ ពេលម៉ូសេបានទទួលច្បាប់ពីព្រះយេហូវ៉ានៅលើភ្នំស៊ីណាយ ជនជាតិអ៊ីស្រាអែលជាច្រើននាក់បានគោរពបូជារូបកូនគោ។ ប៉ុន្តែ ពួកលេវីបានគាំទ្រនិងជួយម៉ូសេសម្លាប់ពួកអ្នកដែលគោរពបូជារូបកូនគោនោះ។ (ដច. ៣២:២៦-២៩) ព្រះយេហូវ៉ាបានសម្រេចចិត្តញែកកុលសម្ព័ន្ធលេវីដោយឡែក ដើម្បីផ្ដល់ឯកសិទ្ធិដ៏ថ្លៃថ្លាឲ្យពួកគេធ្វើជាសង្ឃ។ (ដច. ៤០:១២-១៥; ជប. ៣:១១, ១២) ក្រោយមក ពេលដណ្ដើមយកស្រុកសន្យា កុលសម្ព័ន្ធស៊ីម្មានរួមដៃជាមួយកុលសម្ព័ន្ធយូដាក្នុងចម្បាំង ហើយនោះនាំឲ្យព្រះយេហូវ៉ាពេញចិត្ត។—អសក. ១:៣, ១៧
១២. តើយើងអាចរៀនអ្វីពីគំរូរបស់ស៊ីម្មាននិងលេវី?
១២ តើយើងអាចរៀនអ្វី? ចូរកុំឲ្យកំហឹងមានឥទ្ធិពលលើការសម្រេចចិត្តនិងការប្រព្រឹត្តរបស់អ្នកឡើយ។ បើយើងឬបុគ្គលជាទីស្រឡាញ់បានត្រូវគេធ្វើបាប តាមធម្មតាយើងនឹងខឹង។ (ចសព. ៤:៤) ប៉ុន្តែ យើងត្រូវចាំថា ព្រះយេហូវ៉ាមិនពេញចិត្តពាក្យសម្ដីនិងការប្រព្រឹត្តដែលផុសចេញពីការខឹងសម្បាទេ។ (យ៉ា. ១:២០) ពេលយើងរងអំពើអយុត្តិធម៌ មិនថានៅក្នុងក្រុមជំនុំឬក្រៅក្រុមជំនុំក្ដី យើងប្រព្រឹត្តស្របតាមគោលការណ៍គម្ពីរ។ យ៉ាងនេះ យើងជៀសវាងពីបញ្ហាដែលបណ្ដាលមកពីការមិនចេះគ្រប់គ្រងកំហឹង។ (រ៉ូម ១២:១៧, ១៩; ១ពេ. ៣:៩) ម្យ៉ាងទៀត ទោះជាឪពុកម្ដាយរបស់អ្នកធ្វើអ្វីដែលព្រះយេហូវ៉ាមិនពេញចិត្តក្ដី សូមចាំថាអ្នកមិនចាំបាច់ធ្វើតាមគំរូរបស់ពួកគេទេ។ សូមកុំអស់សង្ឃឹមចំពោះខ្លួន ឬសន្និដ្ឋានថាអ្នកមិនអាចទទួលពរពីព្រះយេហូវ៉ាឡើយ។ ព្រះយេហូវ៉ានឹងតែងតែឲ្យរង្វាន់ចំពោះការខំព្យាយាមរបស់អ្នក ដើម្បីជឿនទៅមុខនិងធ្វើអ្វីដែលត្រឹមត្រូវ។
យូដា
១៣. ហេតុអ្វីយូដាប្រហែលជាព្រួយបារម្ភពេលដល់វេនដែលឪពុកគាត់និយាយទៅកាន់គាត់?
១៣ បន្ទាប់មកទៀត យ៉ាកុបបាននិយាយទៅកាន់យូដា។ ក្រោយពីឮអ្វីដែលយ៉ាកុបបាននិយាយទៅកាន់បងប្រុសៗរបស់គាត់ យូដាប្រហែលជាព្រួយចិត្ត។ ហេតុអ្វី? ពីព្រោះគាត់ក៏បានធ្វើខុសធ្ងន់ធ្ងរដែរ។ តាមមើលទៅ គាត់បានចូលរួមក្នុងការចាប់យករបស់របរពីក្រុងស៊ីគឹម។ (ដក. ៣៤:២៧) ម្យ៉ាងទៀត គាត់ចូលរួមជាមួយបងប្អូនប្រុសរបស់គាត់ក្នុងការលក់យ៉ូសែបឲ្យធ្វើជាខ្ញុំបម្រើ និងក្នុងការបោកបញ្ឆោតឪពុករបស់ពួកគេអំពីរឿងនោះ។ (ដក. ៣៧:៣១-៣៣) មួយវិញទៀត នៅពេលក្រោយមក គាត់បានរួមដំណេកជាមួយនឹងថេម៉ាដែលជាកូនប្រសាស្រីរបស់គាត់ ដោយស្មានថានាងជាស្រីពេស្យា។—ដក. ៣៨:១៥-១៨
១៤. តើយូដាបានប្រព្រឹត្តល្អអ្វីខ្លះ? (ដើមកំណើត ៤៩:៨, ៩)
១៤ ប៉ុន្តែក្រោមការដឹកនាំរបស់ព្រះ យ៉ាកុបឲ្យតែពរនិងសរសើរយូដាប៉ុណ្ណោះ។ (សូមអាន ដើមកំណើត ៤៩:៨, ៩) យូដាបានបង្ហាញការយកចិត្តទុកដាក់យ៉ាងខ្លាំងចំពោះឪពុកវ័យចាស់របស់គាត់។ គាត់ក៏បានបង្ហាញចិត្តអាណិតមេត្តាដល់បេនយ៉ាមីនដែលជាប្អូនប្រុសពៅរបស់គាត់ដែរ។—ដក. ៤៤:១៨, ៣០-៣៤
១៥. តើយូដាបានទទួលពរតាមរបៀបណាខ្លះ?
១៥ យ៉ាកុបបានប្រាប់ទុកជាមុនថា យូដានឹងធ្វើជាអ្នកនាំមុខបងប្អូនប្រុសរបស់គាត់។ ប៉ុន្តែ ត្រូវការពេលយូរដើម្បីឲ្យទំនាយនោះបានសម្រេច។ ប្រមាណ២០០ឆ្នាំក្រោយមក ជនជាតិអ៊ីស្រាអែលបានចាកចេញពីស្រុកអេហ្ស៊ីប។ ក្នុងអំឡុងពេលនោះ កុលសម្ព័ន្ធយូដាបាននាំមុខពួកគេ ពេលឆ្លងកាត់តំបន់ស្ងាត់ជ្រងំឆ្ពោះទៅស្រុកសន្យា។ (ជប. ១០:១៤) ច្រើនឆ្នាំក្រោយមក កុលសម្ព័ន្ធយូដាបាននាំមុខក្នុងការចាប់យកស្រុកសន្យា។ (អសក. ១:១, ២) ម្យ៉ាងទៀត ដាវីឌគឺជាស្ដេចដំបូងគេដែលមកពីកុលសម្ព័ន្ធយូដា។ ប៉ុន្តែ ទំនាយអំពីយូដាបានសម្រេចតាមរបៀបផ្សេងទៀត។
១៦. តើទំនាយនៅដើមកំណើត ៤៩:១០បានសម្រេចយ៉ាងដូចម្ដេច? (សូមមើលផងដែរនូវប្រអប់ដែលមានចំណងជើងថា « ទំនាយរបស់យ៉ាកុបពេលគាត់ជិតស្លាប់»)
១៦ យ៉ាកុបបានបង្ហាញថា កូនចៅម្នាក់របស់យូដានឹងទៅជាអ្នកគ្រប់គ្រងលើមនុស្សជាតិជារៀងរហូត។ (សូមអាន ដើមកំណើត ៤៩:១០ និងកំណត់សម្គាល់) អ្នកគ្រប់គ្រងនោះគឺជាលោកយេស៊ូគ្រិស្ត ជាអ្នកដែលយ៉ាកុបហៅថាស៊ីឡូរ។ ស្ដីអំពីលោកយេស៊ូ ទេវតាមួយរូបបាននិយាយថា៖ «ព្រះយេហូវ៉ានឹងប្រគល់បល្ល័ង្ករបស់ដាវីឌជាបុព្វបុរស ឲ្យដល់បុត្រនោះ»។ (លូក. ១:៣២, ៣៣) លោកយេស៊ូក៏បានត្រូវហៅថា៖ «ជាតោពីកុលសម្ព័ន្ធយូដា»ដែរ។—បប. ៥:៥
១៧. តើយើងអាចមានទស្សនៈដូចព្រះយេហូវ៉ាចំពោះអ្នកឯទៀតយ៉ាងដូចម្ដេច?
១៧ តើយើងអាចរៀនអ្វី? ព្រះយេហូវ៉ាបានឲ្យពរដល់យូដា សូម្បីតែគាត់បានធ្វើខុសធ្ងន់ធ្ងរក៏ដោយ។ បងប្អូនប្រុសរបស់យូដាប្រហែលជាបានឆ្ងល់ថា ហេតុអ្វីបានជាព្រះយេហូវ៉ាផ្ដល់ពរដល់គាត់? យើងមិនដឹងថាពួកគេគិតយ៉ាងណាទេ តែយើងដឹងថាព្រះយេហូវ៉ាឃើញចំណុចល្អរបស់យូដា ហើយឲ្យពរគាត់។ តើតាមរបៀបណាយើងអាចធ្វើតាមគំរូរបស់ព្រះយេហូវ៉ា? ពេលបងប្អូនរួមជំនឿណាម្នាក់ទទួលឯកសិទ្ធិពិសេសមួយ ដំបូងយើងប្រហែលជាផ្ដោតអារម្មណ៍លើភាពមិនល្អឥតខ្ចោះរបស់បុគ្គលនោះ។ ប៉ុន្តែ គឺជាការល្អឲ្យយើងចាំថា ព្រះយេហូវ៉ាពេញចិត្តគុណសម្បត្តិរបស់បុគ្គលនោះ។ ព្រះយេហូវ៉ាស្វែងរកចំណុចល្អរបស់អ្នកគោរពប្រណិប័តន៍លោក។ សូមឲ្យយើងព្យាយាមធ្វើដូចលោកដែរ។
១៨. ហេតុអ្វីយើងត្រូវមានចិត្តអត់ធ្មត់?
១៨ មេរៀនមួយទៀតដែលយើងអាចរៀនពីគំរូរបស់យូដាគឺ យើងត្រូវមានចិត្តអត់ធ្មត់។ ព្រះយេហូវ៉ាតែងតែធ្វើតាមសេចក្ដីសន្យារបស់លោក តែលោកមិនតែងតែធ្វើដូច្នោះតាមរបៀបឬពេលដែលយើងបានរំពឹងទុកនោះទេ។ កូនចៅរបស់យូដាមិនបានចាប់ផ្ដើមនាំមុខរាស្ត្ររបស់ព្រះភ្លាមៗឡើយ។ ប៉ុន្តែ ពួកគេមានភក្ដីភាព ដោយគាំទ្រពួកអ្នកដែលព្រះយេហូវ៉ាបានតែងតាំងឲ្យនាំមុខ មិនថាម៉ូសេពីកុលសម្ព័ន្ធលេវី យ៉ូស្វេពីកុលសម្ព័ន្ធអេប្រាអ៊ីម ឬស្ដេចសុលពីកុលសម្ព័ន្ធបេនយ៉ាមីនក្ដី។ យើងក៏គួរគាំទ្រអ្នកណាក៏ដោយដែលព្រះយេហូវ៉ាជ្រើសរើសឲ្យនាំមុខយើងនៅសព្វថ្ងៃនេះដែរ។—ហេ. ៦:១២
១៩. ដោយពិចារណាទំនាយរបស់យ៉ាកុបពេលគាត់ជិតស្លាប់ តើយើងអាចរៀនអ្វីអំពីព្រះយេហូវ៉ា?
១៩ មកដល់ត្រឹមនេះ តើយើងបានរៀនអ្វីពីទំនាយរបស់យ៉ាកុបពេលគាត់ជិតស្លាប់? យើងឃើញច្បាស់ថា «របៀបដែលមនុស្សមើល គឺខុសពីរបៀបដែលព្រះមើល»។ (១សាំ. ១៦:៧) ព្រះយេហូវ៉ាមានចិត្តអត់ធ្មត់យ៉ាងខ្លាំង និងអភ័យទោស។ លោកមិនពេញចិត្តទាល់តែសោះ ពេលដែលយើងប្រព្រឹត្តអ្វីដែលអាក្រក់ ប៉ុន្តែលោកក៏មិនតម្រូវឲ្យយើងល្អឥតខ្ចោះដែរ។ លោកក៏ថែមទាំងអាចផ្ដល់ពរដល់បុគ្គលដែលបានធ្វើខុសធ្ងន់ធ្ងរនៅអតីតកាលទៀតផង បើពួកគេប្រែចិត្តយ៉ាងស្មោះ ហើយធ្វើអ្វីដែលត្រឹមត្រូវ។ នៅក្នុងអត្ថបទបន្ទាប់ យើងនឹងពិចារណាអ្វីដែលយ៉ាកុបបាននិយាយទៅកាន់កូនប្រុសៗរបស់គាត់៨នាក់ទៀត។
ចម្រៀងលេខ១២៤ ចូរមានភក្ដីភាពជានិច្ច
