អ្វីដែលពួកអ្នកវិទ្យាសាស្ត្រមិនដឹង

លេង

ពួកអ្នកវិទ្យាសាស្ត្រមើលទៅបានរៀនអ្វីគ្រប់បែបយ៉ាងនៅសកលវិទ្យាល័យ។ ប៉ុន្តែ មានសំណួរសំខាន់ៗជាច្រើនដែលពួកគេមិនអាចឆ្លើយបាន។

តើពួកអ្នកវិទ្យាសាស្ត្រអាចពន្យល់អំពីរបៀបដែលសកលលោកនិងជីវិតបានចាប់ផ្ដើមឬទេ? ចម្លើយដ៏សាមញ្ញគឺទេ។ មនុស្សមួយចំនួននិយាយថាអ្នកវិទ្យាសាស្ត្រខាងតារាសាស្ត្រអាចពន្យល់ពីទីចាប់ផ្ដើមនៃសកលលោក។ ប៉ុន្តែ សាស្ត្រាចារ្យផ្នែកតារាវិទ្យានៃសកលវិទ្យាល័យមួយឈ្មោះម៉ាសេឡូ ក្លេសើ ដែលជាអ្នកមិនជឿលើសាសនា បានតបឆ្លើយថា៖ «ពួកយើងមិនបានពន្យល់អំពីដើមកំណើតនៃសកលលោកទាល់តែសោះ» (Dartmouth College)។

ស្រដៀងគ្នាដែរស្ដីអំពីដើមកំណើតនៃជីវិត អត្ថបទក្នុងទស្សនាវដ្ដីមួយដែលទាក់ទងនឹងព័ត៌មានវិទ្យាសាស្ត្របានចែងថា៖ «យើងប្រហែលជាមិនអាចដឹងអំពីរបៀបដែលជីវិតបានចាប់ផ្ដើមនៅលើផែនដីនោះទេ ព្រោះថ្មនិងផូស៊ីលភាគច្រើនដែលអាចបង្ហាញអ្វីដែលបានកើតឡើងនៅដំបូងនៃកំណើតផែនដីបានបាត់បង់អស់ហើយ»។ (Science News) ពាក្យទាំងនេះបង្ហើបឲ្យដឹងថាវិទ្យាសាស្ត្រមិនទាន់ឆ្លើយសំណួរដែលថា តើសកលលោកនិងជីវិតបានចាប់ផ្ដើមឡើងយ៉ាងដូចម្ដេច?

ប៉ុន្តែប្រហែលជាអ្នកឆ្ងល់ថា ‹បើជីវិតនៅលើផែនដីមានអ្នកគ្រោងបង្កើត តើបុគ្គលនោះជាអ្នកណា?›។ អ្នកក៏ប្រហែលជាធ្លាប់សួរសំណួរដូចជា៖ ‹បើមានអ្នកគ្រោងបង្កើតដែលមានប្រាជ្ញាហើយប្រកបដោយសេចក្ដីស្រឡាញ់ ហេតុអ្វីលោកអនុញ្ញាតឲ្យយើងរងទុក្ខវេទនា? ហេតុអ្វីបានជាមានសាសនាច្រើនម្ល៉េះ? ហេតុអ្វីលោកអនុញ្ញាតឲ្យអ្នកគោរពប្រណិប័តន៍លោក ធ្វើអំពើអាក្រក់ច្រើនដល់ម្ល៉េះ?›។

វិទ្យាសាស្ត្រមិនអាចផ្ដល់ចម្លើយចំពោះសំណួរទាំងនេះបានឡើយ។ ប៉ុន្តែ នេះមិនមានន័យថាអ្នកមិនអាចរកឃើញចម្លើយដែលសមហេតុផលបាននោះទេ។ តាមពិត មនុស្សជាច្រើនបានរកឃើញចម្លើយដែលធ្វើឲ្យពួកគេស្កប់ចិត្តក្នុងគម្ពីរ។

អ្នកវិទ្យាសាស្ត្រខ្លះបានសិក្សាគម្ពីរ ហើយជឿថាមានអ្នកបង្កើតមែន។ បើអ្នកចង់ដឹងអំពីមូលហេតុដែលពួកគេជឿដូច្នេះ សូមចូលគេហទំព័រjw.org/km។ សូមស្វែងរកវីដេអូតភាគទស្សនៈអំពីដើមកំណើតនៃជីវិត។

វិទ្យាសាស្ត្រនិងគម្ពីរធ្វើឲ្យពួកគេជឿថាមានអ្នកបង្កើត

ចូជី ខូដាន់ គីមីវិទូ

«ជារឿយៗ ការងាររបស់ខ្ញុំរួមបញ្ចូល‹ការប្រមូលផ្ដុំ›ម៉ូលេគុលផ្សេងៗ។ នេះតម្រូវឲ្យខ្ញុំរៀបចំផែនការឲ្យបានល្អទុកជាមុន បើខ្ញុំរំលងជំហានណាមួយ នោះម៉ូលេគុលអាចបែកចេញពីគ្នា។ ការងាររបស់ខ្ញុំគឺសាមញ្ញណាស់ បើប្រៀបធៀបទៅនឹងសារធាតុគីមីរាប់ពាន់ដែលកើតឡើងក្នុងកោសិកានីមួយៗដើម្បីបង្កើតឲ្យមានម៉ូលេគុលដែលស្មុគស្មាញជាច្រើន។ នេះនាំឲ្យខ្ញុំជឿថាពិតជាមានព្រះដែលជាគីមីវិទូដ៏អស្ចារ្យម្នាក់មែន។

«ពេលខ្ញុំរៀនគម្ពីរ ខ្ញុំឃើញថាគម្ពីរមិនមែនជាសៀវភៅធម្មតានោះទេ។ ទោះជាគម្ពីរបានត្រូវសរសេរចប់២.០០០ឆ្នាំមុនក៏ដោយ ប៉ុន្តែការណែនាំក្នុងគម្ពីរនៅតែមានប្រយោជន៍សព្វថ្ងៃនេះ។ អ្វីដែលគម្ពីរចែងអំពីការដោះស្រាយទំនាស់នៅក្នុងក្រុមគ្រួសារ នៅកន្លែងធ្វើការ និងជាមួយអ្នកជិតខាងពិតជាជួយយើងមែន។ ខ្ញុំជឿថាការណែនាំដ៏គួរឲ្យទុកចិត្តនេះ ច្បាស់ជាមកពីបុគ្គលម្នាក់ដែលមានប្រាជ្ញាច្រើនជាងយើងឆ្ងាយណាស់»។

យ៉ានដឺ ហ្សូ អ្នកជំនាញផ្នែកអំប៊្រីយ៉ុង

«ពេលដែលអំប៊្រីយ៉ុងចាប់ផ្ដើមលូតលាស់ កោសិកាផ្សេងៗត្រូវសហការជាមួយគ្នាដើម្បីបង្កើតឲ្យមានសរសៃឈាម សាច់ដុំ ឆ្អឹង ឈាម និងជាលិកាផ្សេងៗ ហើយនៅទីបំផុតក្លាយទៅជាទារក។ ប៉ុន្តែ យើងនៅតែមិនទាន់យល់ច្បាស់អំពីរបៀបដែលអំប៊្រីយ៉ុងបានត្រូវបង្កើតមក។ តាមទស្សនៈរបស់ខ្ញុំ ជីវិតពិតជាបានត្រូវគ្រោងបង្កើតដោយបុគ្គលដ៏ឈ្លាសវៃម្នាក់។

«របៀបដែលចម្រៀងសរសើរព្រះ ១៣៩:១៥, ១៦រៀបរាប់អំពីការលូតលាស់នៃអំប៊្រីយ៉ុងនៅក្នុងផ្ទៃម្ដាយ គឺស្រដៀងគ្នាទៅនឹងអ្វីដែលអ្នកវិទ្យាសាស្ត្របានរកឃើញនៅពេលថ្មីៗនេះ។ តើអ្នកសរសេរគម្ពីរអាចកត់ទុកព័ត៌មានដ៏ត្រឹមត្រូវនេះយ៉ាងដូចម្ដេចបាន បើគ្មានអ្នកបង្កើតណែនាំពួកគេ?»។

សូមទស្សនាវីដេអូ អាយរីន ហូស ឡូរ៉េនសាវ: គ្រូពេទ្យផ្នែកវះកាត់សន្លាក់ឆ្អឹងម្នាក់ពន្យល់អំពីជំនឿរបស់គាត់។ សូមស្វែងរកវីដេអូនេះនៅក្នុងjw.org/km។