តើការណែនាំពីគម្ពីរនៅតែមានប្រយោជន៍ដល់សព្វថ្ងៃនេះឬទេ?

លេង

មនុស្សខ្លះថាទេ។ គ្រូពេទ្យម្នាក់បាននិយាយថា ការយកគម្ពីរមកប្រើសម្រាប់ណែនាំ គឺដូចជាការយកសៀវភៅសិក្សាឆ្នាំ១៩២០មកប្រើដើម្បីបង្រៀនថ្នាក់គីមីវិទ្យា។ អ្នកដែលមិនឲ្យតម្លៃគម្ពីរថែមទាំងនិយាយថាការយកគម្ពីរមកប្រើសម្រាប់ណែនាំ គឺដូចជាការយកសៀវភៅណែនាំសម្រាប់កុំព្យូទ័រចាស់មកប្រើទៅលើកុំព្យូទ័រថ្មី។ និយាយឲ្យចំ មនុស្សខ្លះចាត់ទុកគម្ពីរថាជាសៀវភៅហួសសម័យដែលគ្មានប្រយោជន៍។

ច្បាស់ជាគ្មានអ្នកណាប្រើការណែនាំដែលចាស់ដូចនេះនៅក្នុងសម័យទំនើបដែលមានបច្ចេកវិទ្យាថ្មីៗទេ មែនទេ? យ៉ាងណាមិញ គេហទំព័រផ្សេងៗ មានឱវាទនិងការណែនាំថ្មីៗជាច្រើន។ កម្មវិធីវិភាគតាមទូរទស្សន៍និងកម្មវិធីសម្ភាសន៍បង្ហាញអំពីចំណេះដឹងផ្សេងៗពីបុគ្គលមួយចំនួនដូចជា អ្នកចិត្ដវិទ្យា អ្នកដោះស្រាយបញ្ហាក្នុងជីវិត និងអ្នកនិពន្ធជាដើម។ ម្យ៉ាងវិញទៀត បណ្ណាគារជាច្រើនមានលក់យ៉ាងហៀរហូរនូវសៀវភៅសម្រាប់អប់រំចិត្ដ ដែលធ្វើឲ្យអ្នកនិពន្ធទទួលបានប្រាក់កម្រៃរាប់លានដុល្លារ។

ដោយសារមានព័ត៌មានថ្មីៗជាច្រើនហើយ ហេតុអ្វីចាំបាច់រកការណែនាំពីគម្ពីរដែលបានត្រូវសរសេរចប់ជិត២.០០០ឆ្នាំមុន? បើធ្វើដូច្នេះ គឺដូចជាការប្រើសៀវភៅគីមីហួសសម័យឬសៀវភៅណែនាំសម្រាប់កុំព្យូទ័រចាស់ ដូចអ្នកដែលមិនឲ្យតម្លៃគម្ពីរបាននិយាយ មែនទេ? តាមពិត ការវែកញែកទាំងនោះគឺមិនត្រឹមត្រូវទេ។ វិទ្យាសាស្ដ្រនិងបច្ចេកវិទ្យាតែងតែផ្លាស់ប្ដូរ ប៉ុន្ដែតើសេចក្ដីត្រូវការចាំបាច់របស់មនុស្សផ្លាស់ប្ដូរឬទេ? ជាឧទាហរណ៍ មនុស្សនៅតែចង់មានជីវិតដែលមានន័យខ្លឹមសារ សុភមង្គលនិងសេចក្ដីសុខ ទំនាក់ទំនងល្អក្នុងក្រុមគ្រួសារ និងមិត្ដភាពគង់វង្ស។

គម្ពីរបញ្ជាក់អំពីសេចក្ដីត្រូវការទាំងនេះនិងជាច្រើនទៀត។ គម្ពីរបានត្រូវសរសេរក្រោមការដឹកនាំរបស់ព្រះដែលជាអ្នកបង្កើតយើង។ គម្ពីរផ្ដល់ការណែនាំដល់យើងនៅគ្រប់ស្ថានភាពក្នុងជីវិត ហើយជួយយើងឲ្យយកឈ្នះការពិបាកផ្សេងៗ។ (ធីម៉ូថេទី២ ៣:១៦, ១៧) លើសពីនេះទៀត គម្ពីរមានការណែនាំដែលមិនចេះហួសសម័យ ពោលគឺតែងតែមានប្រយោជន៍រហូត។ គម្ពីរបានចែងថា៖ «បណ្ដាំរបស់ព្រះគឺមានជីវិតរស់នៅ»។—ហេប្រឺ ៤:១២

តើអ្វីដែលគម្ពីរអះអាងគឺជាកាពិតឬទេ? តើគម្ពីរជាសៀវភៅដែលហួសសម័យ ឬគម្ពីរជាសៀវភៅដែលនៅតែមានប្រយោជន៍ច្រើនបំផុតចំពោះយើងនៅសព្វថ្ងៃនេះ? ទស្សនាវដ្ដីប៉មយាមលេខនេះបានត្រូវរៀបចំឡើងជាពិសេសដើម្បីជួយអ្នកឲ្យរកឃើញចម្លើយចំពោះសំណួរទាំងនោះ។ ទស្សនាវដ្ដីលេខបន្ដបន្ទាប់នឹងបញ្ជាក់អំពីប្រធានបទសំខាន់ៗឯទៀត។