អេសាយ ៧:១-២៥
៧ នៅគ្រាស្ដេចអេហាស+ជាកូនយ៉ូថាម ដែលត្រូវជាចៅរបស់អូសៀស គ្រប់គ្រងលើស្រុកយូដា រេសិនជាស្ដេចស្រុកស៊ីរីនិងភេកា+ជាកូនរេម៉ាលៀ ជាស្ដេចស្រុកអ៊ីស្រាអែល បាននាំគ្នាមកច្បាំងនឹងក្រុងយេរូសាឡិម តែពួកគាត់*មិនអាចដណ្ដើមយកក្រុងនោះបានទេ។+
២ ពេលនោះ មានគេមករាយការណ៍ប្រាប់ពូជពង្សដាវីឌថា៖ «ពួកស៊ីរីបានចូលដៃជាមួយនឹងពួកអេប្រាអ៊ីមហើយ»។
ឮដូច្នេះ ក្នុងចិត្តអេហាសនិងចិត្តរាស្ត្រគាត់ចាប់ផ្ដើមភ័យរន្ធត់ ប្រៀបដូចជាដើមឈើក្នុងព្រៃញ័ររញ្ជួយពេលត្រូវខ្យល់បក់បោក។
៣ បន្ទាប់មក ព្រះយេហូវ៉ាមានប្រសាសន៍ទៅអេសាយថា៖ «សូមអ្នកនិងសេអាយ៉ាសិប*+ជាកូន ទៅជួបអេហាសនៅក្បែរប្រឡាយចេញពីអាងទឹកខាងលើ+ ដែលនៅតាមផ្លូវទៅវាលអ្នកបោកគក់។
៤ រួចត្រូវប្រាប់គាត់ថា៖ ‹ចូរតាំងស្មារតីរឹងមាំឡើង កុំភ័យខ្លាចឬស្រយុតចិត្តដោយសារតែកំហឹងរបស់រេសិនស្ដេចស្រុកស៊ីរី និងកូនរេម៉ាលៀ+នោះឡើយ ព្រោះពួកគេប្រៀបដូចជាកន្ទុយអុសពីរប៉ុណ្ណោះ។
៥ ព្រោះពួកស៊ីរីនិងកូនរេម៉ាលៀ រួមទាំងពួកអេប្រាអ៊ីម បានឃុបឃិតគ្នាទាស់នឹងអ្នក ដោយនិយាយថា៖
៦ «ចូរយើងនាំគ្នាទៅកម្ទេច*ស្រុកយូដា ហើយដណ្ដើមយក*ស្រុកនោះទុកជារបស់យើងទៅ។ រួចយើងនឹងតែងតាំងកូនរបស់តាបបៀលឲ្យធ្វើជាស្ដេចជំនួសវិញ»។+
៧ «‹ព្រះយេហូវ៉ាជាម្ចាស់ដ៏ឧត្ដមបំផុតមានប្រសាសន៍ដូច្នេះថា៖
«គម្រោងការពួកគេនឹងមិនសម្រេចទេហើយក៏មិនអាចទទួលជោគជ័យដែរ។
៨ ព្រោះក្រុងដាម៉ាស់ជារាជធានីស្រុកស៊ីរីហើយរេសិនគ្រប់គ្រងពីក្រុងដាម៉ាស់។
ក្នុងអំឡុងពេល៦៥ឆ្នាំប៉ុណ្ណោះពួកអេប្រាអ៊ីមនឹងត្រូវខ្ចាត់ខ្ចាយ ហើយលែងជាប្រជាជាតិតទៅទៀត។+
៩ ក្រុងសាម៉ារី+គឺជារាជធានីរបស់ពួកអេប្រាអ៊ីមហើយកូនរេម៉ាលៀគ្រប់គ្រងពីក្រុងសាម៉ារី។+បើអ្នកគ្មានជំនឿមុតមាំ នោះរាជ្យអ្នកនឹងមិនរឹងមាំឡើយ»›»។
១០ ព្រះយេហូវ៉ាមានប្រសាសន៍ទៅអេហាសថែមទៀតថា៖
១១ «ចូរសុំសញ្ញាសម្គាល់មួយពីព្រះយេហូវ៉ាជាព្រះរបស់អ្នកចុះ។+ សញ្ញាសម្គាល់នោះអាចជ្រៅរហូតដល់ក្រោមដី ឬអាចខ្ពស់រហូតដល់មេឃ»។
១២ ប៉ុន្តែ អេហាសបានឆ្លើយថា៖ «ខ្ញុំនឹងមិនសុំទេ ហើយក៏មិនចង់ល្បងលព្រះយេហូវ៉ាដែរ»។
១៣ រួចមក អេសាយបាននិយាយថា៖ «ឱកូនចៅដាវីឌអើយ! សូមស្ដាប់ចុះ! តើអ្នកសាកល្បងចិត្តអត់ធ្មត់របស់មនុស្សមិនគ្រប់គ្រាន់ឬ បានជាចង់សាកល្បងចិត្តអត់ធ្មត់របស់ព្រះថែមទៀត?+
១៤ ហេតុនេះ ព្រះយេហូវ៉ានឹងឲ្យសញ្ញាសម្គាល់មួយដល់អ្នក៖ មើល! ស្រីក្រមុំបរិសុទ្ធម្នាក់នឹងពពោះ ហើយសម្រាលបានកូនប្រុសមួយ+ រួចនាងនឹងដាក់ឈ្មោះកូននោះថាអេម៉ាញូអែល។*+
១៥ មុនកូននោះដឹងក្ដី ហើយចេះបដិសេធអ្វីដែលអាក្រក់និងចេះជ្រើសរើសអ្វីដែលល្អ នោះគាត់នឹងគ្មានអ្វីបរិភោគក្រៅពីខ្លាញ់ទឹកដោះ*និងទឹកឃ្មុំទេ។
១៦ ព្រោះមុនកូននោះដឹងក្ដី ហើយចេះបដិសេធអ្វីដែលអាក្រក់និងចេះជ្រើសរើសអ្វីដែលល្អ ស្រុករបស់ស្ដេចពីររូបដែលអ្នកខ្លាចនោះ នឹងត្រូវបោះបង់ចោល។+
១៧ ព្រះយេហូវ៉ានឹងបណ្ដាលឲ្យអ្នកនិងរាស្ត្ររបស់អ្នក ព្រមទាំងពូជពង្សឪពុកអ្នក ជួបគ្រាលំបាកមួយដែលមិនធ្លាប់មានពីមុនមក តាំងពីគ្រាដែលអេប្រាអ៊ីមបែកចេញពីយូដា។+ ព្រោះលោកនឹងនាំស្ដេចស្រុកអាស៊ីរីមកវាយប្រហារអ្នក។+
១៨ «នៅគ្រានោះ ព្រះយេហូវ៉ានឹងហួចហៅហ្វូងរុយពីអូរឆ្ងាយៗដែលបែកចេញពីទន្លេនីលក្នុងស្រុកអេហ្ស៊ីប និងហៅហ្វូងឃ្មុំពីស្រុកអាស៊ីរី។
១៩ ពួកវាទាំងអស់ក៏មកទំនៅជ្រលងនានា ក្រហែងថ្ម គុម្ពបន្លា និងវាលស្មៅ*ទាំងឡាយ។
២០ «នៅគ្រានោះ ព្រះយេហូវ៉ានឹងប្រើស្ដេចស្រុកអាស៊ីរី+ដែលប្រៀបដូចជាកាំបិតកោរដែលគេជួលពីតំបន់ទន្លេអឺប្រាត ដើម្បីកោរសក់ កោររោមជើង និងកោរពុកចង្កាអ្នក។
២១ «នៅគ្រានោះ មនុស្សនឹងទុកជីវិតឲ្យគោញីមួយក្បាល និងចៀមពីរក្បាល
២២ ហើយដោយសារសម្បូរទឹកដោះ គាត់នឹងបានខ្លាញ់ទឹកដោះបរិភោគ។ ព្រោះមនុស្សទាំងអស់ដែលនៅសល់ក្នុងស្រុកនឹងបានខ្លាញ់ទឹកដោះ និងទឹកឃ្មុំបរិភោគ។
២៣ «នៅគ្រានោះ គ្រប់កន្លែងដែលធ្លាប់មានដើមទំពាំងបាយជូរ១.០០០ដើម តម្លៃជាប្រាក់១.០០០ដុំ នឹងក្លាយទៅជាកន្លែងដែលមានសុទ្ធតែគុម្ពបន្លានិងស្មៅចង្រៃវិញ។
២៤ មនុស្សនឹងទៅទីនោះដោយយកព្រួញនិងធ្នូទៅជាមួយ ព្រោះស្រុកនោះមានពេញទៅដោយគុម្ពបន្លានិងស្មៅចង្រៃ។
២៥ ឯភ្នំទាំងឡាយដែលគេធ្លាប់ភ្ជួររាស់ដាំដុះ អ្នកនឹងមិនហ៊ានទៅក្បែរទេ ព្រោះខ្លាចគុម្ពបន្លានិងស្មៅចង្រៃ។ ទីនោះនឹងក្លាយទៅជាកន្លែងសម្រាប់គោស៊ីស្មៅ និងចៀមដើរជាន់វិញ»។
កំណត់សម្គាល់
^ ឬប្រហែលជាមានន័យថា«គាត់»
^ មានន័យថា«មានតែមួយចំនួនតូចប៉ុណ្ណោះដែលនឹងត្រឡប់មកវិញ»
^ ឬប្រហែលជាមានន័យថា«ធ្វើឲ្យមានភាពចលាចល»
^ ឬ«ទម្លាយកំពែង»
^ មានន័យថា«ព្រះនៅជាមួយយើង»
^ ឬ«បឺរ»
^ ឬ«កន្លែងឲ្យទឹកសត្វ»
