Johannesimit 1. 3:1-24
3 Ataatap asangaarmatigut Guutip qitornaanik taaneqarsinnaavugut! Qitornaraatigullu. Inuilli ajortut ilisarisimannginnamikku naluaatigut.
2 Asasakka, maanna Guutip qitornaraatigut, sunngornissarpulli suli ilisimaneqalinngilaq. Nalunngilarput saqqummersinneqarpat pissusiviatut takussagatsigu taassumatut iliumaarluta.
3 Taanna minguitsuummat neriuffiginnittai tamarmik imminut minguiartarput.
4 Ajortuliorneq inatsisaatsuliornerummat ajortuliortuartut tamarmik inatsisaatsuliortarput.
5 Aamma nalunngilarsi Jiisusi ajortuliagut peeqqullugit saqqummersinneqartoq, taassumanilu ajorteqanngilaq.
6 Taassuminnga ataasioqateqartut tamarmik ajortuliortuarneq ajorput. Ajortuliortuartut tamarmik takusimanagulu ilisarisimalersimanngilaat.
7 Ikinngutikka,* tammartitaaniaqinasi. Jiisusip naapertuilluartuuneratut eqqortuliortuartoq naapertuilluartuuvoq.
8 Diaavulu aallaqqaammulli* ajortuliortarmat ajortuliortuartoq Diaavulumit siulersorneqarpoq. Diaavulup iliuusii unitsinniarlugit* Guutip ernera saqqummerpoq.
9 Guutimit erniusoq naajartortussamik* Guutimeersumik peqarami ajortuliortuarneq ajorpoq. Guutimit erniugami ajortuliortuarsinnaanngilaq.
10 Guutip qitornai Diaavulullu qitornai ima immikkoortinneqarsinnaapput: Kinaluunniit eqqortuliortuanngitsoq qatanngutiminillu asanninngitsoq Guutimit siulersorneqanngilaq.
11 Aallaqqaammulli tusarparsi asaqatigiissasugut.
12 Kaini, Diaavulumit* siulersorneqartoq nukkaminillu toqutsisoq, assigissanngilarput. Sooq nukkani toquppaa? Ajortunik iliuuseqartarami, nukkanili eqqortuliortarmat.
13 Qatanngutit, inunnit allanit uumigineqarnersi tupigusuutigissanngilarsi.
14 Qatanngutit asagatsigit nalunngilarput toqumiit inuunermut pisimalluta. Asanninngitsoq toqumiittuassaaq.
15 Qatanngutiminik uumiginnittoq toqutsisuuvoq, nalunngilarsilu toqutsisoq inuunermik naassaanngitsumik pigisaqanngitsoq.
16 Jiisusi Kristusi uagut pilluta toqummat asanninneq sunaasoq paasivarput. Uaguttaaq qatanngutigut pillugit toqunissamut pisussaavugut.
17 Pigisaqartup qatanngutini pissakilliortoq takugaluarlugu misiginneqatigiumanngikkuniuk qanoq ililluni Guuti asasinnaagamiuk?
18 Ikinngutikka, oqaasiinnartigut pinnata ilumoorlutali iliuuseqarnikkut asannittuliortariaqarpugut.
19 Taamaaliortarutta nalussanngilarput ilumoortumit aallaaveqarluta, imminullu qularunnaarsissinnaavugut Guutip asagaatigut.
20 Uummatittalu sunaluunniit pillugu pillagassaatissagaluarpatigut eqqaamassavarput Guuti uummatitsinnit annerullunilu sunik tamanik ilisimasaqartoq.
21 Asasakka, uummatitta pillagassaatinngippatigut Guuti qununata saaffigisinnaassavarput.
22 Aamma inassutaanik maleruaagatta iluarisaatullu iliuuseqartaratta qinnutigisatsinnik sunilluunniit tunissavaatigut.
23 Aap, inassutaa imaappoq: Ernerata Jiisusip Kristusip atia upperissallugulu asaqatigiissasugut, soorlu taama inakkaatigut.
24 Guutip inassutaanik maleruaasoq Guutimik ataasioqateqartuarpoq, Guutillu ataasioqatigissavaa. Anersaarlu uagutsinnut tunniussaa pissutigalugu nalunngilarput ataasioqatigiuaraatigut.
Ilanngussat
^ Nutsiinn.: “Meerannguakka”. Tamanna asannittumik oqariartaasiuvoq.
^ Imalt.: “aallartikkamili”.
^ Imalt.: “suujunnaarsinniarlugit”.
^ Tassa naajartortussaq inerititaqarsinnaasoq. Allassimaffinni ukunani anersaaq illernartoq pineqarpoq.
^ Nutsiinn.: “Ajortumit”.
