Efesossimiut 3:1-21
3 Taamaattumik uanga, Paulusi, Kristusi Jiisusi pissutigalugu ilissi juutiunngitsusi pillusi parnaarussaaqqavunga …*
2 Ilissi pillusi Guutip ajunngisaangaarneranik isumaginnittussanngortinneqarnera tusareersimavarsi.
3 Siusinnerusukkut naatsumik allaatigaara Guutip isertugaataa uannut saqqummersinneqartoq.
4 Tamanna atuarussiuk Guutip Kristusi pillugu isertugaataanik ilisimasaqartunga paasissavarsi.
5 Isertugaq tamanna anersaaq iluaqutigalugu Guutip apustiliinut pruffiitiinullu illernartunut maanna saqqummersinneqarneratut itsaq kinguaariinnut ilisimaneqalersinneqanngilaq.
6 Una isertugaataavoq: Juutiunngitsut Kristusimik Jiisusimik ataasioqateqarnertik nutaarsiassallu nuannersut pissutigalugit kingornusseqatigissagaatigut, timimi ataatsimi ataasioqatigissagaatigut neriorsuummillu pissarseqatigissagaatigut.
7 Guutip isertugaataa paasiniassagassiuk ajunngisaangaarluni tunissutaa akeqanngitsoq, pissaanermigut uannut tunniussaa, tunngavigalugu kiffanngorpunga.
8 Pisuussutit Kristusimeersut nalissaqanngitsut pillugit nutaarsiassat nuannersut juutiunngitsunut oqaluussissutiginiassagakkit ajunngisaangaarneq taanna uannut, illernartut tamarmik minnersarisaannut, tunniunneqarpoq.
9 Guutip isertugaataanik aqutseriaaseq, tamanik pinngortitsisuusumi ukiorpassuarni isertorneqarsimasoq, inunnut tamanut paasinarsisittussaavara.
10 Taamaalilluni Guutip ilisimassusia, assigiinngitsorpassuartigut ersertartoq, ilagiit aqqutigalugit qilammi naalagaaffinnut oqartussaasunullu nalunaarutigineqassaaq.
11 Tamanna Kristusimut, Jiisusimut Naalakkatsinnut, tunngatillugu siunertaanut atuuttuartumut naapertuuppoq.
12 Kristusi upperigatsigu sapiilluta oqalussinnaallutalu Guuti tatigalugu qanoq ilisukkulluunniit saaffigisinnaavarput.
13 Taamaattumik ilissi pillusi annikilliuuteqarninni qinnuigaassi tunniutiinnaqqunasi, annikilliornikkami ilissinnut ataqqinaataassapput.
14 Taamaattumik Ataataq seeqqummerfigaara,
15 qilammimi nunarsuarmilu ilaqutariit tamarmik taanna ateqaatigimmassuk.
16 Qinnutigisarpara alutornangaassutsimini anersaami pissaanera atorlugu inuttut qamuuna nakussatsissagaasi
17 asannittuliortarnissilu saniatigut uppernikkut Kristusi uummatissinni ineqassasoq. Aamma qinnutigisarpara sorlaqassasusi toqqavimmilu aalajaassasusi,
18 taamaalillusi illernartullu tamassi silissuseq, takissuseq, portussuseq itissuserlu paasilluarsinnaaniassagassigit
19 aamma Kristusip asanninnera paasisimasaqassutsimit pingaaruteqarnerusoq ilisimaniassagassiuk, taamaalillusilu Guutip pissusiinik ulikkaarniassagassi.
20 Guuti pissaanini, uagutsinni sunniisoq, atorlugu qinnutigisatsinnit takorloorsinnaasatsinnillu annerungaartumik iliuuseqarsinnaavoq.
21 Ilagiit Kristusilu Jiisusi aqqutigalugit qaqugorsuarmut kipisuitsumillu kinguaariinni tamani ataqqinarsisinneqarli. Amen.
Ilanngussat
^ Eqqartukkani versi 14-imi nangeqqippasippaa.
