1, 2. Ilagiin­nik nak­kutil­liisup inuit Biibilimi eq­qaaneqar­tut aalajaatsut qanoq isigai, aam­ma sooq taak­ku ikin­ngutaal­luarsin­naap­pat?

“INUIT Biibilimi eq­qaaneqar­tut ikin­ngutigiuarsimasatut eq­qar­tor­pai.” Ilagiin­nik nak­kutil­liisoq utoq­qasaaq oqalugiar­toq tusar­naareerlugu qatan­ngut ar­naq taama iner­niliivoq. Qatan­ngutip angutip ukiuni qulik­kuutaani Guutip oqaasia atuaq­qis­saar­tarlugulu ilin­niar­titsis­sutigisaramiuk angutit ar­nal­lu Biibilimi eq­qaaneqar­tut up­perluar­tut ikin­ngutigiuarsimasatut isigilersimavai.

² Inuit Biibilimi eq­qaaneqar­tut ikin­ngutigalugit nuan­nerunangaarami, ilaa? Taak­ku piviusutut isigaagit? Angutit ar­nal­lu – soorlu Noa, Aaperaat, Ruthi, Elia Esterilu – peqatigalugit qanoq is­sanersoq takorlooruk. Il­lit inuunin­nut qanoq sun­niuteqarsin­naasut – siun­nersuil­luarsin­naanerat tup­pal­lersaangaarsin­naaneral­lu – eq­qarsaatigiuk. – Ussatit 13:20 atuaruk.

3. (a) Angutit ar­nal­lu Biibilimi eq­qaaneqar­tut up­perluar­tut ilin­niarfiginerat qanoq iluaqutigisin­naavar­put? (b) Apeq­qutit suut sam­mis­savavut?

³ Soorunami inuit naaper­tuil­luar­tut ‘makititaap­pata’ taak­kua ikin­ngutigiler­nis­saan­nut periarfis­saqas­saagut. (ApS 24:15) Maan­nangaarli angutit ar­nal­lu Biibilimi eq­qaaneqar­tut up­perluar­tut ilin­niarfiginerat iluaqutigisin­naavar­put. Qanoq? Apustili Paulusi ima siun­nersuivoq: ‘Malin­niarsigit up­per­nik­kut nikal­lujuin­nik­kul­lu Guutip neriorsuutigisaanik kingor­nus­sisus­sat.’ (Hebr 6:12) Angutit ar­nal­lu up­per­nerat pil­lugu atuaq­qis­saan­ngin­nitsin­ni Paulusip oqaasiinut tun­ngatil­lugu apeq­qutit akineqar­tariaqar­tut uku eq­qarsaatigik­kit: Up­per­neq qanoq paasisariaqar­pa aam­ma sooq pisariaqar­pa? Itsaq inuit up­perluar­tut qanoq ilaarsin­naavavut?

4. Inup­pas­suit up­per­neq suusoraat, aam­ma sooq kuk­kup­pat?

⁴ Up­per­neq pis­susiuvoq nuan­nersoq atuak­kami matumani angutit ar­nal­lu atuaq­qis­saagas­sat­ta as­sut pingaar­titaat. Ul­lumik­kut inup­pas­suit up­per­neq ilumoor­toq suunersoq ilisiman­ngilaat, isumaqar­put tas­saasoq up­per­narsaatis­saqan­ngitsumik tun­ngavis­saqan­ngitsumil­luun­niit up­per­neq. Kuk­kup­pul­li. Up­per­neq ilumoor­toq tas­saan­ngilaq up­per­tik­kuminar­tuuneq, aam­ma misigis­susiun­ngilaq. Up­per­tik­kuminar­tuuneq ulorianar­poq. Misigis­sutsit al­lan­ngorarsin­naap­put. Guutil­lu piuneranik up­perin­nin­neq naam­man­ngilaq, tas­sami “anersaapiluit­taaq taama up­per­put uulil­lutil­lu”. – Jaak 2:19.

5, 6. (a) Up­per­ner­put takus­saan­ngitsunik marlun­nik sunik im­mik­koor­toqar­pa? (b) Up­per­ner­put qanoq tun­ngavis­saqarluar­tigisariaqar­pa? As­sersuuteqarit.

 ⁵ Up­per­neq ilumoor­toq up­per­tik­kuminar­nermit al­laanerul­luin­nar­poq. Up­per­neq Biibilimi qanoq nas­suiar­neqar­toq maluginiaruk. (Hebræerit 11:1 atuaruk). Paulusi al­lap­poq up­per­neq marlun­nik takusin­naan­ngisatsin­nik im­mik­koor­toqar­toq. Siul­ler­tut, ‘takus­saan­ngitsunut’ piviusunut tun­ngavoq. Qilam­miit­tut – soorlu Jehova Guuti, Er­nera Naalagaaf­fil­luun­niit maan­na qilam­mi naalak­kersuisoq – isitsin­nik takusin­naan­ngilavut. Aap­paat­tut, up­per­neq ‘neriugisanut’ – siunis­sami pisus­sanut – tun­ngavoq. Silarsuas­saq nutaaq Guutip naalagaaf­fiata qanit­tuk­kut pilersitas­saa takusin­naan­ngilar­put. Taava imaap­pa piviusut pisus­sal­lu neriugisavut up­per­narsaatis­saqan­ngitsut?

⁶ Naamerluin­naq! Paulusip up­per­neq ilumoor­toq tun­ngavis­saqarluar­nerar­paa. Up­per­neq ‘tatigin­nil­luin­nar­nermik’ taagamiuk oqaaseq “pigin­nit­tuunermut up­per­narsaam­mik” nutser­neqarsin­naasoq ator­paa. Takorlooruk inuup al­lap il­lumik tunileraatit. Im­maqa il­lumik pigin­nit­tuunermut up­per­narsaat tun­niutis­savaa imalu oqarluni: “Aajuna il­lutaat.” Soorunami taama oqarami isumaqan­ngilaq pap­piaq­qami tas­sani najugaqas­sasutit. Isumaqar­porli inatsisitigut isumaqatigiis­sut il­lumik pigin­nit­tuunin­nut up­per­narsaataal­luangaarmat al­lak­kiap il­lu as­sigiin­naraa. Taamatut­taaq up­per­nit­ta Guutip oqaatsimini neriorsuutaasa eq­quuk­kumaar­neran­nik qularun­naarsit­tar­paatigut.

7. Up­per­nermut ilumoor­tumut suut ilaap­pat?

⁷ Taamaat­tumik misilit­tak­kat Jehovalu Guuti pil­lugu ilisimasat tun­ngavigalugit tatigin­nin­neq qularin­nin­ngil­luin­nar­nerlu up­per­nermut ilumoor­tumut ilaap­put. Up­per­ner­put iluaqutigalugu Jehova Ataatatut asan­nit­tutut isigisin­naal­lugulu neriorsuutaasa tamarmik eq­quuk­kumaar­nerat qularin­ngis­sin­naavar­put. Tamatumali saniatigut up­per­neq ilumoor­toq ineriar­tor­tin­neqar­tariaqar­poq. Suliak­kut ersersin­neqan­ngik­kuni toqus­saaq. – Jaak 2:26.

8. Sooq up­per­neq taama pingaaruteqar­tigaa?

⁸ Sooq up­per­neq taama pingaaruteqar­tigaa? Paulusip taman­na akil­luar­paa. (Hebræerit 11:6 atuaruk). Up­persuseqan­ngik­kut­ta Jehova qanil­lisin­naanagulu taas­suman­nga iluarisaasin­naan­ngilagut. Taamaat­tumik inuit anguniagarisin­naasaan­ni pingaar­ner­paaq – Ataatat­ta qilam­miusup, Jehovap, qanil­linis­saa naalan­narsisin­nis­saalu – anguneqas­sap­pat up­per­neq pingaaruteqarluin­nar­poq.

9. Jehovap up­persuseqar­nis­satsin­nik pisariaqar­titsiner­put nalunagu qanoq ersersip­paa?

⁹ Jehovap up­per­nerup pisariaqarluin­nar­nera nalun­ngin­namiuk up­per­nermik qanoq ineriar­tor­titsisin­naal­lutalu ersersitsisin­naanitsin­nik ilin­niar­tin­niarluta maligas­saqar­titsivoq.  Angutinik aalajaatsunik siulersuisunik maligas­siuisunil­lu ilagiit pil­luaq­quai. Oqaasiani ima al­las­simavoq: ‘Up­persuseqar­nerisigut as­siginiarsigit.’ (Hebr 13:7) Tamatuma saniatigut aam­ma al­lamik iliuuseqar­poq. Paulusip angutit ar­nal­lu ‘nalunaajaasut amerlasuut’ itsaq inuusut up­per­nik­kut maligas­saal­luar­tut al­laatigai. (Hebr 12:1) Jehovap kif­fai aalajaatsut Paulusip Hebræerinut al­lak­kani kapitali 11-mi eq­qaasaanit amerlanerujus­suup­put. Angutit, ar­nat, inuusut­tut utoq­qaal­lu up­persuseqarluar­tut as­sigiin­ngitsunik inuunermi atugal­lit pil­lugit oqalut­tuanik pisimasuin­nik Biibili ulik­kaar­poq. Taak­kulu silarsuarmi matumani up­persuseqarfiun­ngitsumi ilin­niarfigingaarsin­naavavut.

10. Angutit ar­nal­lu aalajaatsut Biibilimi eq­qaaneqar­tut ilaar­nis­saan­nut nam­mineq atuaq­qis­saar­tar­neq qanoq iluaqutigisin­naavar­put?

¹⁰ Inuk ilaarsin­naajumal­lugu ilisarisimal­luar­tariaqar­pat. Atuak­kap matuma atuar­nerani angutit ar­nal­lu up­perluar­tut ilisarisimal­lualer­nias­sagak­kit misis­sueq­qis­saar­toqarsimanera maluginias­sagunar­pat. Aam­ma il­lit nam­mineq misis­sueq­qis­saaruit pitsaas­saaq. Nam­mineq atuaq­qis­saar­nin­ni ujarliutit pis­sarsiarisin­naasatit atorlugit Biibili misis­soq­qis­saaruk. Atuak­kavit eq­qarsaatigeq­qis­saar­neran­ni Biibilimi oqalut­tuap sumiif­fia tunuliaqutaalu takorluuk­kit. Sumiif­fik takusin­naal­lugu, nipit tusaasin­naal­lugit aam­ma tipit naamasin­naal­lugit takorlooruk. Pingaar­ner­tut, inuit eq­qar­tor­neqar­tut misigis­susaat paasiniak­kit. Angutit ar­nal­lu aalajaatsut ilisarisimal­luar­nerujar­tor­til­lugit piviusutut qanimul­lu ikin­ngutitut isiginerujar­tuin­nas­savatit.

11, 12. (a) Aaperaamut Saramul­lu qanoq qanin­nerusutut misigilersin­naavit? (b) Han­nap, Eliap Samuelil­lu maligas­siuil­luar­nerat qanoq iluaqutigisin­naavigit?

¹¹ Ilisarisimal­lualeruk­kit ilaarusulis­savatit. As­sersuutigalugu takorlooruk im­mik­kut pisin­naatitaaf­feqalerlutit. Oqaluus­sinermi iliuuseqar­nerunis­samut Jehovap peqatigiis­sor­taanit kajumis­saar­neqar­putit. Im­maqa sumiif­fim­mut oqaluus­sisar­tunik pisariaqar­titsif­fiunerusumut nuuk­kusun­nersutit aperineqar­putit, im­maqaluun­niit oqaluus­seriaatsit sungiusiman­ngisatit unam­miniar­nar­titatil­luun­niit misilin­nis­saan­nut kajumis­saar­neqar­putit. Sulias­sap eq­qarsaatiginerani qinusar­nin­nilu Aaperaap maligas­siuinerata eq­qarsaatigeq­qis­saar­nis­saa iluaqutaas­sava? Saralu marluul­lutik il­loqarfim­mit Urimit pigis­saarfiusumit aal­lar­nis­samut piumas­suseqaramik pil­luaq­quneqangaar­put. Taak­ku ilaar­til­lugit misigilis­saatit ilisarisimal­lualerlugit.

¹² Taavami ilisarisimal­luak­kan­nit ajor­tumik pineqar­nerit nikal­lus­sutigalugu ataatsimiigian­ngin­nis­samut us­ser­nar­torsiuleruit? Han­nap Penin­namit ajor­tumik pineqaraluarluni Jehovamut aalajaat­tuar­nermik maligas­siuil­luar­neranik  eq­qarsaatigin­nit­tar­nerit silatusaar­tumik aalajangiisar­nis­san­nut iluaqutigis­sal­lugulu Han­na ikin­ngutigil­lualis­saval­lusooq. Taamatut­taaq naleqan­ngitsutut misiginerit pis­sutigalugu nikal­lungaguit Eliap qimaanera Jehovamil­lu tup­pal­lersar­neqar­nera pil­lugit atuaq­qis­saaruit Eliamut qanin­nerusutut misigilis­saatit. Aam­ma inuusut­tut atuaqatimin­nit kinguaas­siuutitigut inuunerlut­tunit tatineqar­tuar­tut Samuelip Tupermi Naapeqatigiit­tarfim­mi Elip er­nerinit ajor­tumik sun­ner­neqar­naveersaar­nera atuaq­qis­saareerlugu Samuelimut qanin­nerulersutut misigilersin­naap­put.

13. Inun­nik Biibilimi eq­qaaneqar­tunik up­perluar­tunik ilaarsigut­ta up­per­ner­put Jehovamit naleqan­ngin­nerusutut isigineqalis­sava? Nas­suiaruk.

¹³ Inun­nik Biibilimi eq­qaaneqar­tunik up­perluar­tunik ilaarsiguit up­per­nerit Jehovamit naleqan­ngin­nerusutut isigineqalis­sava? Naamerluin­naq! Eq­qaamajuk Jehovap oqaasiata inuit up­per­tut ilaaq­qul­lugit kajumis­saarmatigut. (1 Kor 4:16; 11:1; 2 Th 3:7, 9) Tamatuma saniatigut inuit matumani atuaq­qis­saagas­sat­ta ilaasa itsaq inuusut aalajaatsut ilaar­tar­paat. As­sersuutigalugu atuak­kami matumani kapitali 17-imi maluginias­savat Maria Han­nap oqaasiinik, maligas­sarisutut isigalugu, is­suaagunarmat. Taman­na Mariap up­per­neranik naleqan­ngin­nerulersitsiva? Naamik! Paarlat­tuanik Han­nap maligas­siuinera Mariap Jehovamit Guutimit ajun­ngitsumik tusaamaneqaleq­qul­luni up­persuseqar­nis­saminut iluaqutigaa.

14, 15. Atuak­kami matumani iluaqutis­sat ilaat suup­pat, qanorlu atorluarsin­naavavut?

¹⁴ Atuagaq una up­per­nin­nik nakus­satsitsinis­samut iluaqutis­sat­tut suliarineqar­poq. Kapitalit tul­liut­tut al­laaserisanit “Up­persusiat maliguk”-mit Napasuliaq Alapernaarsuiffik-mi 2008-p 2013-il­lu ingerlaneran­ni saq­qum­mersunit tigusaap­put. * Iluaqutis­sal­li nutaat ilan­ngun­neqar­put. Kapitalit tamarmik eq­qar­tuinermut ilik­kak­kanil­lu maleruaanis­samut iluaqutis­sanik apeq­qutitaqar­put. As­silis­sat qalipaatigis­sut peq­qis­saarus­samil­lu qalipak­kat atuak­kamut matumun­nga im­mik­kut suliarineqarlutil­lu as­silis­sat atoq­qitat anginerulersin­neqarlutil­lu kusas­saq­qitaap­put. Iluaqutis­sat al­lat, soorlu pif­fis­salersuineq nunal­lu as­singi, ilan­ngun­neqar­put. Uppersusiat maliguk nam­mineq ilaqutariit­tul­lu atuaq­qis­saar­nermut ilagiil­lu atuaq­qis­saaqatigiin­neran­nut naleq­qus­sagaavoq. Aam­ma ilaqutariip­pas­suit oqalut­tuanik atuf­fateqatigiit­tar­ner­tik nuan­naarutigingaarsin­naavaat.

¹⁵ Kis­saatigaar­put atuagaq una itsaq Jehovap kif­faasa aalajaatsut up­per­neran­nik ilaarsinis­san­nut Ataatan­nul­lu qilam­miusumut, Jehovamut, qanil­liar­tor­til­lutit up­persuseqar­neruler­nis­san­nut iluaqutigis­sagit.