1-3. (a) Jehovap sumik tunivaatigut, tunissullu ajortumik qanoq atorneqartarpa? (b) Guutip asanninneraniittuinnarumalluta oqalussinnaanermik tunissut qanoq atussavarput?

QANIGINERPAASAVIT ilaasa ilinnit tunissut piaaraluni ajortumik atorsimappagu qanoq misigissagaluarpit? Assersuutigeriartigu biilimik tunisimagit, kingornali paasilerpat mianersuaalliorluni allat aqqunartiterlugit biilersimasoq. Tamanna pakatsissutigissagaluarpat, ilaa?

² Oqalussinnaaneq Jehovamit ‘ajunngitsunik naammalluinnartuusunillu tamanik’ Tunisisumit tunissutaavoq. (Jaak 1:17) Tunissut taanna inuit uumasunit allaassutigaat. Oqalussinnaanermi iluaqutigalugu qanoq eqqarsarnerluta qanorlu misigisarnerluta inuit allat paasitissinnaavavut. Kisianni soorlu biili ajortumik atorneqarsinnaasoq, taamatuttaaq oqalussinnaanermik tunissut ajortumik atorneqartarpoq. Inuit mianersuaalliorlutik allanut aliasunnangaartumik oqalukkaangata Jehovap qanoq pakatsissutigisartigaa!

³ Guutip asanninneraniittuinnarumalluta oqalussinnaanermik tunissut Tunisisup kissaatigisaatut atortariaqarparput. Jehovap oqaluttarneq qanoq ittoq iluaralugu erseqqissarpaa. Oqaasiani ima allassimavoq: “Oqaatsinik mikiarsimasunik qanissinnit aniatitaqarniaqinasi,  oqaatsinilli ajunngitsuinnarnik aniatitaqaritsi ineriartornissamut pisariaqartunik, tamakku tusartunut pilluaatissaaqqullugit.” (Ef 4:29) Maanna sammeriartigit sooq oqaloriaaserput eqqumaffigissagipput, oqaloriaatsit suut ingalattariaqarivut qanorlu ineriartornartumik oqaluttarsinnaasugut.

4, 5. Oqaatsit sunniuteqangaartarnerat Biibilimi qanoq allaatigineqarpa?

⁴ Oqaloriaatsitsinnik eqqumaffiginninnissatsinnut pissutaasoq siulleq pingaarutilik tassaavoq oqaatsit sunniuteqangaartarnerat. Ussatit 15:4-mi ima allassimavoq: “Silatusaarluni oqaaserisat tassaapput orpik inuunartoq, pisuusaarlunili oqalunneq ernumatsatsitsisarpoq.” * Soorlu imeq orpimmut qilalersumut iluaqutaasartoq taamatuttaaq oqaatsit eqqissisimalersitsisut tusarnaartunut inuummarissaataasinnaasarput. Ajortumilli siunertaqarluni oqalunneq allanut nikallungalersitsisinnaavoq. Aap, oqaaserisartakkavut ajoqutaasinnaallutilluunniit ineriartuutaasinnaapput. — Uss 18:21.

⁵ Oqaatsit sunniuteqangaartarnerat aamma Biibilimi ima takorlooruminartumik allaatigineqarpoq: “Eqqarsariaqqaarnani oqaaserisat panatut kapisisarput.” (Uss 12:18) Eqqarsaqqaarnani oqalunneq misigissutsikkut ikiliingaarsinnaavoq ikinngutigiinnillu avissaartitsisinnaalluni. Immaqa illit allat oqaaserisaannit uummatikkut kapineqartutut misiginikuuvutit. Allassimaffik ima  nangippoq: “Ilisimasulli oqaa katsorsaataasarpoq.” Aap, oqaatsit isumatusaartut ilisimassutsimik Guutimeersumik ersersitsisut qamuuna ikinik itisuunik katsorsaataasinnaallutillu ikinngutigiittoqaqqilersitsisinnaapput. Inussiarnersumik oqaluunneqarnikkut oqaatsit katsorsaataasinnaanerat misiginikuuiuk? (Ussatit 16:24 atuaruk). Oqaatsit sunniuteqangaartarnerat nalunnginnatsigu soorunami annernartumik oqalukkumanngilagut, katsorsaataasumilli oqalukkusuppugut.

6. Sooq oqaluttarnerput aqukkuminaappa?

⁶ Sapinngisarput tamaat iliuuseqaraluarluta oqaluttarnitsinnik aqutsilluinnarsinnaanngilagut. Taamaattumik oqaloriaatsitsinnik eqqumaffiginninnissatsinnut pissutaasut aappaat tassaavoq ajortiliullutalu naammalluinnanngitsuugatta ajortumik oqaloqqajaasarnerput. Oqaatsit uummammit aallaaveqarput, inuillu ajortuinnarnik uummammioqaqqajaasarput. (1 Mos 8:21; Luk 6:45) Taamaattumik oqqatta naalatsinnissaa sapernartorujussuusinnaavoq. (Jaaku 3:2-4 atuakkit). Oqaluttarnitsinnik aqutsilluinnarsinnaanngikkaluarluta oqqatsinnik aqutsillaqqinnerulernissarput sulissutigiuarsinnaavarput. Soorlu qajartortartoq anori assorlugu qajartorsuataartariaqartoq, taamatuttaaq  ajortumik oqaloqqajaasarnerput akiorumallugu ilungersortuartariaqarpugut.

7, 8. Oqaloriaaserput Jehovamik pallorfiginninnitsinnut qanoq sunniuteqarsinnaava?

⁷ Oqaloriaatsitsinnik eqqumaffiginninnissatsinnut pissutaasut pingajuat tassaavoq oqaaserisatta Jehovamik pallorfiginninnermut attuumassuteqarnerat. Oqaluttarnerput inunnut allanut attaveqarnitsinnuinnaanngitsoq aammali Jehovamut attaveqarnitsinnut sunniuteqartarpoq. Jaakup allagaani 1:26-mi ima allassimavoq: “Guutisiortuusorisoq oqqaminilli naalatsitsinani imminik salloqittarpoq; taassuma guutisiornera sussaanngilaq.” * Soorlu kapitalip siuliani sammereeripput oqaluttarnerput Jehovamik pallorfiginninnitsinnut attuumassuteqarluinnarpoq. Imminut naalakkersinnaanata ajoqutaasumik “toqunartumillu toqussutaasartumik” oqalukkutta kristumiutut kiffartornermi iliuuserisavut tamarmik Guutip isaani sussaassanngillat. Eqqarsarnangaarami, ilaa? — Jaak 3:8-10.

⁸ Erseqqippoq oqalussinnaanermik tunissutip ajortumik atunnginnissaanut pissutissaqarluartugut. Ineriartornartumik oqaloriaatsit sammitinnagit oqaloriaatsit kristumiunut ilumoortunut naleqqutinngilluinnartut sammeqqaariartigit.

9, 10. (a) Oqaloriaatsit suut ullumikkut nalinginnaalersimappat? (b) Sooq oqaasipilunneq kanngunartunillu oqalunneq ingalattariaqarpavut? (Aamma quppernerup ataani ilanngussaq takuuk).

⁹ Oqaasipilunneq kanngunartunillu oqalunneq.  Ullumikkut oqaasipilunneq, oqaatsinik Guutimik mitaatiginnippaluttunik atuineq oqaloriaatsillu kanngunartut allat nalinginnaapput. Inuppassuit oqaatsit nalunngisamik killeqarnerat pissutigalugu oqaasipiluit atorlugit aatsaat erseqqissaarisinnaasarput. Quiasaarisartut inunnik illartitsiniaannarlutik taqassinartumik oqaloriaaseqarlutillu atoqatigiinnermut tunngasunik eqqartuisarput. Taqassinartumilli oqalunneq quianartuunngilaq. Ukiut 2000-t missaat matuma siorna apustilip Paulusip isumassarsiarititaalluni ilagiit Kolossemiut ‘kanngunartunik oqalussaaqquai’. (Kol 3:8) Paulusillu ilagiit Efesosimiut allaffigai ‘quiasaarnipalaanik oqalunneq ileqqussaanngitsoq’, allaallu kristumiut ilumoortut akornanni ‘mingunnartut taaneqassanngitsulluunniit’. — Ef 5:3, 4.

¹⁰ Jehovap kanngunartunik oqalunneq maajugimmagu Jehovamik asannittut aamma tamanna maajugaat. Aap, Jehovamik asanninnerput kajumississutigalugu kanngunartunik oqalunneq ajorpugut. Paulusip “uinngup suliai” eqqartoramigit eqqaavaa “mingunnartuliorneq”, tamatumunngalu ilaavoq oqaloriaatsikkut minguttuuneq. (Gal 5:19-21) Tamanna pimoorussassaavoq. Kristumiu arlaleriarluni oqaaqqissaarneqareeraluarluni peqqissiminani kannguttaatsumik ajoqutaasumillu oqaloriaaseqartuarpat ilagiinnut ilaajunnaarsinneqarnermik kinguneqarsinnaavoq. *

11, 12. (a) Qaqugukkut allat pillugit oqalunneq ajoqutaalersinnaava? (b) Sooq Jehovamut kiffaasut mamarliisussaanngillat?

 ¹¹ Allat pillugit ajortumik oqalunneq mamarliinerlu. Inuit allat pillugit oqalunneq ajoqutaajuaannarpa? Naamik. Paasissutissat iluaqutaasut nuannersullu, assersuutigalugu kina kuisissimanersoq kinalu qiimmassarneqartariaqarnersoq, eqqartorutsigit iluaqutaasinnaavoq. Kristumiut siulliit uppeqatiminnik soqutiginnillutillu taakku pillugit paasissutissat oqaloqatigiissutigisarpaat. (Ef 6:21, 22; Kol 4:8, 9) Paasissutissalli killormut saatsikkutsigit allanulluunniit oqaatigeqqusaanngitsut oqaatigigutsigit ajoqutaasinnaavoq. Taamaaliornerlu mamarliinermik kinguneqarsinnaavoq, tamannalu ajoqutaajuaannarpoq. Mamarliineq tassaavoq allamik tusaamanerlutitsiniaannarluni ilumuunngitsumik pasilliilluni oqalunneq. Assersuutigalugu farisiiarit Jiisusi isiginerlugaalersinniaannarlugu mitallerlutik mamarliipput. (Matt 9:32-34; 12:22-24) Mamarliineq saqitsaannermik kinguneqarajuppoq. — Uss 26:20.

¹² Oqalussinnaanermik tunissut atorlugu allanik tusaamanerlutitsisunut avissaartuutitsisunullu Jehova qanoq isiginnittaaseqarpa? ‘Qatanngutigiinnik saqitsaatilersitsisut’ uumigai. (Uss 6:16-19) Oqaaseq grækerisooq ‘mamarliisumik’ nutserneqartoq, diaʹbolos, Saatanimut taaguutigitinneqarpoq. Taanna ‘Diaavuluuvoq’ Guutimut mamarliigami. (Saqq 12:9, 10) Diaavulu ilaarusunnginnatsigu soorunami mamarliisumik oqaloriaaseqarumanavianngilagut. Ilagiinni uinngup suliaasa ilaannik, soorlu ‘saqitsaannernik assuariinnernillu’, kinguneqartumik mamarliisoqartussaanngilaq. (Gal 5:19-21) Taamaattumik allat pillugit  tusakkannik ingerlatitseqqinnginninni imminut ima aperigit: ‘Ilumoorpa? Ingerlatitseqqikkuma asannittuliornerussava? Ingerlatitseqqiinissaq pisariaqarpa? Naleqquppa?’ — 1 Petrusi 4:15 atuaruk.

13, 14. (a) Mitalliineq allanut qanoq sunniuteqarsinnaava? (b) Sooq mitaatiginnittuartoq imminut navianartorsiortippa?

¹³ Mitalliineq. Sammeriikkatsitut oqaatsivut ajoqutaangaarsinnaapput. Naammalluinnanngitsuugatta tamatta ilaannikkut kingorna peqqissimissutigisatsinnik oqartoortarsinnaavugut. Taamaakkaluartorli Biibili naapertorlugu oqaloriaaseqarpoq kristumiut angerlarsimaffianni ilagiinnilu akuersaarneqarsinnaanngilluinnartunik. Paulusi ima peqqusivoq: “Narrutsatsitsinerit, puffajanerit, kamannerit, nipiliornerit mitalliinerillu ... eqqaasassanngilasiluunniit.” (Ef 4:31) Biibilimik nutsikkani allani oqaaseq ‘mitalliinerit’ ima nutserneqarsimavoq: “Oqaatsit ajortut”, “nikanarsaataasumik oqalunneq” aamma “ajuallannartumik oqalunneq”. Mitalliineq — assersuutigalugu isornartorsiuiuarneq aterusersuinerlu — allanik nikanarsaatitsisarpoq naleqartutullu misigiunnaarsitsisarluni. Meeqqat malussarissuullutillu tatiginnittuusarmata oqaatsit sakkortuut ingammik taakkununnga ajoqutaangaarsinnaapput. — Kol 3:21.

¹⁴ Ajuallatsitsinikkut, nikanarsaatitsinikkut sorraatsumilluunniit oqalunnikkut allanik mitaatiginnittuarneq Biibilimi assuarineqangaarpoq. Mitaatiginnittuartoq imminut navianartorsiortippoq, arlaleriarlunimi allannguinissaminut ikiorniarneqareeraluarluni allannguiumanngikkuni ilagiinnut ilaajunnaarsinneqarsinnaavoq. Oqaloriaatsinilu allanngortikkumanngikkuniuk aamma Guutip naalagaaffiata pilluaqqussutisiassartai  annaasinnaavai. (1 Kor 5:11-13; 6:9, 10) Erseqqippoq ineriartornanngitsumik, ilumuunngitsumik sakkortuumillu oqaloriaaseqarutta Guutip asanninneraniittuinnarsinnaanngitsugut. Taamatut oqaloriaaseqarneq ajoqutaalluinnarpoq.

15. Ineriartornartumik oqalunneq qanoq paasisariaqarpa?

¹⁵ Oqalussinnaanermik tunissut Guutip siunertarisaatut qanoq atorsinnaavarput? Eqqaamajuk Biibilimi ‘oqaatsinik ajunngitsuinnarnik ineriartornissamullu pisariaqartunik aniatitaqarnissatsinnut’ kajumissaarneqaratta. (Ef 4:29) Ineriartornartumik, kajumissaataasumik allallu nakussatsissutigisinnaasaannik oqalukkaangatta Jehovap tamanna nuannaarutigisarpaa. Taamatut oqaloriaaseqassagutta oqaaseriniakkavut eqqarsaatigeqqissaartariaqarpavut. Tamatumunnga tunngatillugu Biibilimi aalajangersimasumik malittarisassiaqanngilaq, oqaatsillu suut ‘peqqissinartuunersut’ sukumiisumik allaatigineqanngillat. (Tit 2:8) Oqalunnerput ineriartornartuussappat ineriartornartumik oqalunnermut ilisarnaataasut tunngaviusut pingaarutillit pingasut uku eqqaamassavavut: Oqaatsivut ilumoortuullutik, asannippaluttuullutillu isumalluartuussapput. Taakku eqqarsaatigalugit ineriartornartunik oqaloriaatsit ilaat sammeriartigit. — Takuuk ungalusaq “ Ineriartornartumik oqaluttarpunga?”

16, 17. (a) Sooq allanik nersualaarisassaagut? (b) Ilagiinni ilaqutariinnilu qaqugukkut nersualaarisarsinnaavugut?

¹⁶ Qamannga pisumik nersualaarineq. Jehovap Jiisusillu nalunngilaat oqaatsitigut iluarinninnermik ersersitsinerup nersualaarinerullu pingaaruteqassusiat.  (Matt 3:17; 25:19-23; Joh 1:47) Kristumiuugatta uaguttaaq qamannga pisumik allanik nersualaarisariaqarpugut. Sooq? Ussatit 15:23-mi ima allassimavoq: “Ila ajunngittassusia oqaasissat piffissaasigut anillugit!” Imminut ima aperisinnaavutit: ‘Nersualaarneqaraangama qanoq misigisarpunga?’ Uummatikkut kissalaajummertarputit qiimmassarneqartutullu misigisarlutit, ilaa? Aap, ilumoortumik nersualaarneqaraangavit nalusanngilat allamit malugineqarlutillu soqutigineqarlutit ilungersornerillu naleqangaartutut isigineqartoq. Nersualaarneqarnerit imminut tatiginerulissutigisinnaavat aallussilluarnerulernissannullu kajumississutigisinnaallugu. Nersualaarneqarnerit nuannaarutigigakku soorunami allanik nersualaarisarnissannut periarfissarsiussaatit, ilaa? — Matthæusi 7:12 atuaruk.

¹⁷ Allat pissusii iliuusiilu ajunngitsut maluginiarlugillu taakku pillugit nersualaarisarnissat sungiusaruk. Immaqa ilagiinni oqalugiallaqqissoq tusarnaarpat, inuusuttoq anersaakkut anguniakkaminik sulissutiginnittoq maluginiarpat, imaluunniit utoqqaq peqqiillioraluarluni ataatsimiigiartuartoq maluginiarpat. Qamannga pisumik taakku nersualaarukkit oqaatsitit killitsissutigisinnaavaat anersaakkullu nakussatsissutigisinnaallugit. Ilaqutariinni uiusup nuliaasullu imminut nersualaaqatigiittarnissartik pisariaqartippaat. (Uss 31:10, 28) Ingammik meeqqat soqutigineqarlutillu pingaartinneqaraangamik toqqissisimasutut misigisarput. Soorlu naasoq imerterneqartariaqarlunilu seqinnerfigitittariaqartoq, taamatuttaaq meeraq nersualaarneqartariaqarlunilu iluarineqartutut misigitinneqartariaqarpoq. Angajoqqaajususi, meeqqassi pissuserisaat pitsaasut ajunngitsuliornerallu  pillugit nersualaarinissassinnut periarfissarsiortaritsi. Meeqqat taamatut nersualaarneqarnertik imminut tatiginerulissutigisinnaallugulu eqqortumik iliornerminni ilungersornerunissaminnut kajumississutigisinnaavaat.

18, 19. Sooq uppeqativut sapinngisatsinnik tuppallersarlugillu qiimmassassavavut, qanorlu taamaaliorsinnaavugut?

¹⁸ Tuppallersaaneq qiimmassaanerlu. Jehovap ‘nikallortut neriuutaaruttullu’ isumassungaarpai. (Es 57:15) Guutip oqaasiani kajumissaarneqarpugut ‘tuppallersaqatigeeqqulluta’ nikallungasullu ‘tuppallersaqqullugit’. (1 Th 5:11, 14) Qularutigissanngilarput uppeqativut nikallungasut tuppallersarniarlugillu qiimmassarniarlugit ilungersornivut Guutip maluginiartarai iluaralugillu.

¹⁹ Kristumioqatilli nikallungasoq nanertisimasorluunniit qiimmassarniarlugu qanoq oqaaseqarsinnaavit? Misigissanngilatit ajornartorsiutaa aaqqittariaqarlugu. Amerlanertigut oqaaseqalaarneq iluaqutaasarpoq. Nikallungasumut asannillutillu isumassuerusunnerit oqaatigiuk. Qinoqatigiumasinnaavat. Qinoqatigiinnermi Jehova qamannga pisumik qinnuigisinnaavat nikallungasup inunnit allanit Jehovamillu asaneqangaarnerminik paasinninnissaanut ikioqqullugu.  (Jaak 5:14, 15) Nikallungasoq paasitiguk ilagiinni pisariaqartinneqarlunilu erligineqangaartoq. (1 Kor 12:12-26) Allassimaffimmik qiimmassaataasumik Jehovap taassuminnga ilumut soqutiginninneranik ersersitsisumik atuaagit. (Tuss 34:19; Matt 10:29-31) Nikallungasoq piffissaqarfigigukku qamanngalu pisumik qiimmassaataasunik oqaaseqaruit nikallungasup asaneqartutut soqutigineqartutullu misiginerulernissaanut iluaqutaassaaq. — Ussatit 12:25 atuaruk.

20, 21. Sunniuteqarluartumik siunnersuinissamut suut iluaqutaappat?

²⁰ Sunniuteqarluartumik siunnersuineq. Naammalluinnanngitsuugatta tamatta ilaannikkut siunnersorneqarnissarput pisariaqartittarparput. Biibilimi ima kajumissaarneqarpugut: “Siunnersuutit tusaaniartarniakkit oqaaqqissaarutillu pigiliullugit, taava naggataatigut ilisimassusermik pigisaqalissaatit.” (Uss 19:20, 1990) Utoqqaanertaannaanngitsut siunnersuisinnaapput. Aamma angajoqqaat meeqqaminnik siunnersuisarput. (Ef 6:4) Ilaannikkullu qatanngutit arnat anersaakkut inersimalluartut arnanik inuusuttuunerusunik siunnersuisariaqarsinnaapput. (Tit 2:3-5) Asanninneq kajumississutigalugu siunnersorneqartup aliatsaatigisaanik akueriuminaatsitaanillu siunnersuerusunnavianngilagut. Sunniuteqarluartumik siunnersuinissatsinnut suut iluaqutigisinnaavavut? Uku pingasut sammilaariartigit: Siunnersuisup isiginnittaasia pissutiginiagaalu, siunnersuutip suna tunngavigineraa aamma qanoq siunnersueriaaseqartoqarnersoq.

²¹ Siullertut, siunnersuiniartup sunniuteqarluartumik siunnersuiumaguni isiginnittaatsini pissutiginiakkanilu eqqumaffigisariaqarpai. Imminut ima  aperigit: ‘Siunnersorneqaraangama siunnersuutit suut maleruarumanerusarpakka?’ Inuup ilinnik asanninnini kajumississutigalugu puffaassinanilu siunertapiloqaranilu siunnersoraangatit siunnersuutaa maleruaruminarnerutittarpat, ilaa? Taamaattumik aamma illit siunnersuigaangavit taamatut isiginnittaaseqartariaqarputit. Aappassaattut, sunniuteqarluartumik siunnersuineq Guutip oqaasianik tunngaveqarpoq. (2 Tim 3:16) Biibili issuaraluarutsigu issuanngikkaluarutsiguluunniit siunnersuigaangatta Biibili tunngavigiuaannartariaqarparput. Taamaattumik utoqqaanertat qatanngutimik namminermissut isumaqalersinniarsarinnginnissaat eqqumaffigisariaqarpaat. Aamma allassimaffiit namminneq isummaminnut tulluarsarumanavianngilaat. Pingajussaattut, ajunngitsumik periaaseqarluni siunnersuigaanni sunniuteqarluarnerusarpoq. “Inussiarnersumik tarajulimmillu” siunnersuigaanni siunnersorneqartoq nikanarsarneqartutut misiginavianngilaq, siunnersuutillu maleruaruminarnerutissavai. — Kol 4:6.

22. Oqalussinnaanermik tunissummut tunngatillugu sunissat aalajangiusimaviuk?

²² Aap, oqalussinnaaneq Guutimit tunissutaavoq naleqangaartoq. Jehovamik asanninnerput kajumississutigalugu oqalussinnaanermik tunissut atornerlukkumanngilarput. Eqqaamasariaqarparput oqaatsivut sunniuteqangaartut — ineriartuutaasinnaapput ajoqutaasinnaallutilluunniit. Taamaattumik oqalussinnaanermik tunissut Tunisisup kissaatigisaatut atorniarlugu ilungersorisa. Taamaaliornikkut ineriartornartumik oqalunnerput allanut nuannaarutaassaaq Guutillu asanninneraniittuinnarnissatsinnut iluaqutaalluni.