JOSIAS arfineq-pingasuinnarnik ukioqarluni Israelimi naggueqatigiinnut marlunnut kujalliusunut kunnginngorpoq. Kunngiunissaminut meeraagaluaqaaq. Taamaattumik aallaqqaataani inuit inersimasut naalakkersuinerani ikiorpaat.

Josiasip ukiut arfineq-marluk kunngioreerluni Jehova ujalerpaa. Kunngit maligassaalluartut soorlu David, Josafat Ezekiasilu malippai. Taava suli 20-nik ukioqalernani Josias sapiitsumik iliorpoq.

Israelikkut amerlanersaat sivisuumik ajortuliortarsimaqaat. Guutipilussiortarput. Inuusaliat pallorfigisarpaat. Taava Josias angutitaalu aallarput nunami guutipilussiorneq tamaat piiariartorlugu. Suliassaq annertoqaaq inuit taama amerlatigisut guutipilussiortuummata. Uani Josias angutitaalu inuusalianik aserorteripput.

Tamanna pereermat Josiasip angutit pingasut Jehovap naalaffiata iluarsaanneqarnissaanut nakkutilliisunngortippai. Aningaasanik katersuisitsineqarpoq isertitallu angutinut taakkununnga tunniunneqarput suliassanut akiliutissat. Naalaffik suliarineqartillugu palasiuneq Hilkia pingaarutilimmik nassaarpoq. Tassaapput inatsisinik allakkat Jehovap Mosesimut qangarsuaq allatsitai. Ukiorpassuit tammarsimasimapput.

Allakkat Josiasimut aanneqarput, taassumalu nipituumik atuarneqarnissaat kissaatigaa. Tusarnaartilluni Josiasip paasilerpaa inuit Jehovap inatsisai naalassimanngikkaat. Tamanna aliasuutigeqaa, taamaattumillu atisani alippai, soorlu uani takusinnaagit. Oqarpoq: ’Jehovap kamaappaatigut, siuaasatta inatsisit allakkani ukunani allassimasut naalanngimmatigik.’

Josiasip palasiuneq Hilkia peqquaa Jehovap inunnut iliuusissai paasiniaqqullugit. Hilkiap pruffiiti arnaq Huldamik atilik paasiniaaffigaa, taassumalu Jehovap akissutissaanik imaattumik Josiasimut tusarliisippaa: ’Jerusalem nunallu inui tamarmik pillarneqarumaarput guutipilussioramik nunalu ajortilissuanngormat. Illilli Josias ajunngitsulioravit, toqoreeruit aatsaat pillaatissaq nalliukkumaarpoq.’