NUKAPPIAQQAT uku marluk assigiinngik, ilaa? Atii nalunngiligit? Piserialersoq tassa Esau, savanillu paarsisoq tassa Jakob.

Esau Jakobilu marluliaapput Isakip Rebekkallu erneri. Ataataata, Isakip, Esau nuannareqaa aallaaniallaqqissuummat ilaqutariillu nerisassarsiuuttarmagit. Rebekkalli Jakob asanerpaavaa nukappiaraammat eqqissisimasoq sallaatsorlu.

Aataavat Abraham suli inuuvoq, takorloorsinnaavarpullu Jakobip tusarnaarusuttassagaa Jehova pillugu oqaluttuaraangat. 175-inik ukioqarluni Abraham toquvoq, marlulissat 15-inik ukioqartut.

Esaup 40-nik ukioqarluni Kana’anip nunaata arnartai marluk nuliartaarai. Isakip Rebekkallu tamanna aliasuutigeqaat, arnat taakku Jehovamik pallorfiginnittuunngimmata.

Ullulli ilaanni pisoqarpoq Esaup nukkaminut Jakobimut kamaatigisaanik. Isakip ernerminik angajullermik pilluaqqusinissaanut piffissanngorsimavoq. Jakobimit angajulliugami Esaup pilluaqqusaanissani ilimagaa. Siusinnerusukkulli Esaup pilluaqqusaasussaassutsini Jakobimut tunisimavaa. Nukappiaqqallu erniummata Guuti oqarsimavoq Jakob pilluaqqusaasussaasoq. Taamatullu pivoq. Isakip ernini Jakob pilluaqquaa.

Kingorna tamanna paasileramiuk Esaup Jakob kamaatilerpaa. Kamangaarami oqarpoq Jakob toqukkumallugu. Tamanna tusaramiuk Rebekka assut annilaangalerpoq. Taava uini Isak oqarfigaa: ’Ajussagaluaqaaq aamma Jakob Kana’anip nunaata arnartaasa ilaannik nuliassappat.’

Taava Isakip ernini Jakob qaaqquaa oqarfigalugulu: ’Kana’anip nunaata arnartaasa ilaannik nuliassanngilatit. Kisianni aallarit aatavit Betuelip inoqutaanut Karanimiittunut. Ernerata Labanip paniisa ilaannik nuliarniarit.’

Jakobip ataatani naalappaa, erniinnarlu Karanimut eqqarlimi najugaannut angalanissaq sivisooq aallartillugu.