INUIT amerliartortillugit nunarsuarmi ajortuliornerit ajussuserlu siammariartupallapput. Pruffiitip Enokimik atillip, taamanikkut immaqa Jehovamut kiffartortutuaasup, mianersoqqussutigaa Jehovap guutiitsunik piuneerussinissaa. Ajortoqartuaannarporli ajorneruleraluttuinnarlutillu. Inngilit ilaat Jehovamut pikitsitsipput qilammi inissisimaffimminnik qimatsinermikkut, nunarsuarmi inuttut isikkoqalernermikkut piumatullutillu arnanik nulissiussisarnermikkut. Taakkua pissusissamisuunngitsumik atoqatigiikkamik nalinginnaanngitsumik nukittoorujussuarnik — inorujussuarnik peqqarniitsunik silarsuarmi nakuusertoqarnerulersitsisunik aammillu kuisisoqarnerulersitsisunik — kinguaaqalerput. Guuti pinngortitami nunamiittut ajortunngornerat takullugu aliasungaarpoq.

Enokip toqunerata kingorna silarsuarmi ajortumi angut ataaseq allaassuteqarpoq. Taanna Noamik ateqarpoq. Ilaquttanilu Guutip isaani eqqortumik iliorniartuupput. Guuti aalajangerami silarsuarmi tamatumani inuit ajortut piuneerunniarlugit Noa uumasullu sernigiumavai. Taamaattumik Noa umiarsualioqquaa — angallammik angisoorujussuarmik illerfiusatut ilusilimmik. Noap ilaquttamilu uumasullu assigiinngitsukkuutaat nunarsuaq tamakkerlugu ulersuassami taanna aniguissutigissavaat. Noap Guuti naalappaa. Ukiut qulikkuutaat ingerlaneranni Noa umiarsualiortilluni aamma ‘iluarnermik nalunaariartortitaavoq’. (2 Petrusi 2:5) Ulersuassaq pillugu inuit mianersoqquai, taakkuli tusaanngitsuusaarput. Noap taassumalu ilaqutaasa uumasullu umiarsuarmut ikinissaannut piffissanngorpoq. Ikereermata Guutip umiarsuup matua matuaa. Siallilerpoq.

Ulluni 40-ni unnuanilu 40-ni sialussuarpoq nunarsuaq tamaat qarsullugu. Inuit ajortut peerupput. Qaammatit arlallit qaangiuttut imaq appariartortillugu umiarsuaq qaqqamut tinuguppoq. Ukioq ilivitsoq umiarsuarmeereerlutik niusinnaalerput. Noa qujaniarluni Jehovamut pilliivoq. Guutip tamanna periarfigaa Noa taassumalu ilaqutai uumassusilinnik tamanik nungutitsiffiusumik ulersuartitseqqinngisaannarnissaminik uppernarsaavigalugit. Jehova neriusaamik pilersitsivoq tamatumunnga uppernarsaatitut takussaasutut, neriorsuummik tuppallernartumik tamatuminnga eqqaasitsissutissatut.

Ulersuup kingorna aamma Guuti inuiannut nutaanik peqqussuteqarpoq. Uumasut neqaannik nerisinnaatippai. Aammilli nerineq inerteqqutigaa. Aamma peqqusivoq Noap kinguaavi nunarsuarmut tamarmut siammassasut, ilaasali tamanna naalanngilaat. Nimrodimik atilik siulersortigalugu inuit kattupput illoqarfimmilu Babelimi, kingusinnerusukkut Babylonimik taaneqartalersumi, portusuumik napasulialiulerlutik. Anguniagaraat nunarsuarmut tamarmut siammarnissaq pillugu Guutip peqqussutaanut naalannginnissaq. Tamannali Guutip akornuserpaa pikitsitsisut oqaasii paatsiveerutitillugit oqaatsinik assigiinngitsunik oqaaseqalersillugit. Paaseqatigiissinnaannginnamik suliartik isumakkeerlugu siammarput.

— Tunngavigineqartut: 1 Mosesi kapitalit 6-11; Judasi 14, 15.