TILLIFFIGITINNIKUUIT? — Nuanninngilaq, ilaa? — Allap pianik tigusisartoq tillinniamik taaneqartarpoq, tillinniarlu nuannarineqarneq ajorpoq. Qanorli ililluni inuk tillittunngortarsoraajuk? Isumaqarpit inunnguuserigaa? —

Paasereerparput tamatta ajorteqarluta inunngorsimasugut. Imaappoq tamatta naammalluinnanngitsuusugut. Kinaluunniilli tillinniaalluni inunngunngilaq. Tillinniaq ilaqutariinnit pitsaasuneersuusinnaavoq. Angajoqqaavi qatanngutaalu unneqqarissuusinnaapput. Aningaasanik pisiarineqarsinnaasunillu nuannarinnippallaaruni tillittunngorsinnaavoq.

Tillittoq siulleq kinaasoraajuk? — Eqqarsaatigilaariaruk. Taanna Ajoqersuisorsuup qilammiikkallarami nalunngisaraa. Inngilit ilagaat. Guutilli inngilit tamaasa naammalluinnartutut pinngortippai, taava qanoq ililluni inngili tillittunngorsinnaagami? — Tamanna atuakkami matumani kapitali 8-mi paasivarput. Inngili tillittunngorpoq piginngisani pilerigileramiuk. Suna pilerigineraa eqqaamaviuk? —

Guutip angut arnarlu siulliit pinngortereermagit inngilip pallorfigineqarnissani kissaatigilerpaa. Taamaaliortussaatitaanngilaq. Guuti kisimi pallorfigineqartussaavoq. Oqartoqarsinnaavoq Guutip pallorfigineqarnissaa tillikkaa! Inngili Adamimit Evamillu pallorfigineqalerpoq taamaalillunilu tillittunngorluni. Saatani Diaavulunngorpoq.

Qanoruna inuk tillittunngortartoq? — Inuk tillittunngortarpoq allap pii pilerigileraangamigit. Pileriginninneq ima sakkortutigilersinnaavoq allaat inuit ajunngitsuugaluartut ajortuliulerlutik. Tillittunngortut ilaat inuttut ajunngitsunngoqqinnianngisaannarput.  Jiisusip apustiliisa ilaat taamaappoq. Judasi Iskariotimik ateqarpoq.

Judasip nalunngilluinnarpaa tillinneq eqqunngitsuliornerusoq, mikinerminiimmi Guutip inatsisaanik ilinniartinneqarsimavoq. Nalunngilaa Guuti qilammiit innuttaminut ima oqarsimasoq: “Tillissanngilatit.” (2 Mosesi 20:15) Judasi inersimasunngorami Ajoqersuisorsuaq naapippaa taassumunngalu ajoqersuganngorluni. Kingusinnerusukkut allaat Jiisusip taanna apustilit aqqaneq-marluk ilaattut toqqarpaa.

Jiisusi apustilinilu angalaqatigiittarput. Aamma nereqatigiittarput. Tamarmillu aningaasaataat karsimi aalajangersimasumiipput. Jiisusip karsi taanna Judasimut paaritippaa. Soorunami aningaasat Judasip piginngilai. Tamatuma kinguninnguagut qanoq iliorsoraajuk? —

Judasi karsimit aningaasanik tigusisalerpoq. Allat isiginnginneranni aningaasanik tigusillattaartarpoq, allaallu eqqarsaatigisarlugu qanoq ililluni amerlanerusunik pisinnaanerluni. Piffissallu ingerlanerani aningaasat eqqarsaatigiuaannalerpai. Tamanna qanoq kinguneqarpa? Maanna tusassavat Ajoqersuisorsuaq ullualunnguit qaangiuppata toqusussaasoq qanoq pisoqarnersoq.

Mariap, Jiisusip ikinngutaata ilaata Lazarusip qatanngutaata, uulia tipigissaat akisoorsuaq Jiisusip isigaanut taniguppaa. Judasilli tamanna ajoraa. Soormitaava? — Oqarpoq uulia taanna tuniniarneqarsimasinnaagaluartoq aningaasallu piitsunut tunniullugit. Ilumoortumilli aningaasat karsimiittut amerlanerulertikkusuppai tillinniassagamigit. — Johannesi 12:1-6.

Jiisusip Judasi oqarfigaa Maria naviissanngikkaa. Maria tukkortuuvoq. Taama oqarfigitinnini Judasip nuannarinngilaa, taamaattumillu palasit Jiisusimut akeraasut ornippai. Taakkua Jiisusi tigusarerusuttorujussuuaat,  unnuamili aatsaat tigusariaqarpaat inunnit takuneqannginniassagamik.

Judasi palasinut ima oqarpoq: ‘Oqarfigisinnaavassi Jiisusi sumi tigusarisinnaagissi. Aningaasanik qassinik tunissavisinga sumiinnera ilissinnut oqaatigigukku?’

Palasit ima akipput: ‘Aningaasanik sølvinik 30-nik tunissavatsigit.’ — Matthæusi 26:14-16.

Aningaasat taakku Judasip tiguai. Ajoqersuisorsuaq akeqqanut tunivaalusooq! Ilaa ajoq! — Taama ajortigisumik pisoqarsinnaavoq inuk tillittunngorluni aningaasanik amerlanerusunik perusulerpat. Aningaasat inunninngaanniit Guutimiillu asaneruai.

Immaqa ima oqassaatit: ‘Inuit pigisalluunniit Jehova Guutimit asanerunngisaannassavakka!’ Ajunngeqaaq taama eqqarsaravit. Nalunanngitsumik taamani Judasi taamatuttaaq eqqarsarsimassaaq Jiisusip apustilitut toqqarmani. Allallu tillittunngorsimasut taamatut eqqarsarsimassapput. Ilaannik oqaluttuutissavakkit.

Taakkua ilaat tassaavoq Guutip kiffaa Akanimik atilik. Ajoqersuisorsuup inunngornera sioqqutingaatsiarlugu  inuusimavoq. Akanip ilaanni atisat kusanartorujussuit, kuulti ilivitsukaanngortitaq aningaasallu sølvit takuai. Piginngilai. Biibilimi allassimavoq Jehovap pigigai, taakkumi tiguneqarput Guutip innuttaanut akeraasunit. Akanilli pigerusungaaramigit tillippai. — Josva 6:19; 7:11, 20-22.

Oqaluttuaq Biibilimeersoq alla sammilaariartigu. Tassani pineqarpoq Daavi, Jehovap Israelikkunnut kunnginngortitaa. Ullut ilaanni Daavip arnaq pinnersoq Batsebamik atilik takuaa. Isigiunnaarsinnaanngilaa angerlaaterusullugulu ilagiinniassagamik. Kisianni Batseba katereersimavoq; uia Uriamik ateqarpoq. Daavi qanoq iliussava? —

Daavip Batseba ingerlaannaq eqqarsaatigiunnaarsimasariaqaraluarpaa. Eqqarsaatigiuaramiulli  naggataatigut angerlaappaa. Allaat Uria toqunneqartippaa. Sooq Daavi taama ajortigisumik iliorpa? — Taama iliorpoq allap nulia pilerigiuaramiuk. — 2 Samueli 11:2-27.

Daavip ajortuliani peqqissimissutigaa, taamaammat Jehovap inuutippaa. Daavili ajornartorsiuterpassuaqalerpoq. Ernerata Absalomip kunngiuneranik arsaarniarsaraa. Inuit Daavi pulaarniarlugu takkukkaangata Absalomip sassarluni eqillugillu kunittarpai. Biibilimi allassimavoq ‘Absalomip Israelikkut uummataat tillikkai’. Daavimut taarsiulluni inuit imminik kunngeqarusulersippai. — 2 Samueli 15:1-12.

Akanitut, Daavitut Absalomitullu arlaannik taama ingasatsigisumik kissaateqarnikuuit? — Allap pigisaa akuerineqarnak tigusinnaanngilat. Tillinneruvoq. Eqqaamaviuk Saatanip, tillittup siulliup, suna pilerigigaa? — Guuti taarserlugu inunnit pallorfigineqarusuppoq. Adami Evalu imminut naalattunngortikkamigit tillippoq.

Pigisalik nammineq aalajangertussaatitaavoq pini kia atussaneraa. Immaqa ilaannikkut meeraqativit ilaannut pulaarlutit pinnguartarputit. Arlaannik tiguseqqusaavit angerlaallugulu? — Taamaalioqqusaavutit aatsaat angajoqqaavisa akuerippatsit. Apereqqaarnagit angerlaassiguit tillissaatit.

Qanoq ililluni tillikkusuttoqalersinnaava? — Tillikkusuttoqalersinnaavoq allap pigisaanik pileriginnileraanni. Imaassinnaavoq allanit takuneqarnani tigusisoqarsinnaasoq. Kimilli tamatigut takuneqartarpa? — Tassa Jehovamit Guutimit. Eqqaamassavarpullu Jehovap tillinneq uumigigaa. Guutimik asanninneq tullermillu asanninneq tillittunngunnginnissamut iluaqutaassaaq.