ILAANNIKKUT Jehova Guuti oqaluuttarpiuk? — Taamaaliortarnissat kissaatigaa. Guutimut oqalukkaanni qinunermik taaneqartarpoq. Jiisusip Ataatani qilammiusoq oqaluutikulasarpaa. Ilaannikkut kisimiikkumasarpoq Guuti oqaluukkaangamiuk. Biibilimi allaqqavoq ilaanni ‘qaqqamut majuartoq kisimiilluni qinujartorluni. Unnummallu tassani kisimiippoq’. — Matthæusi 14:23.

Qaqugukkut kisimiissinnaavit Jehovamullu qinullutit? — Immaqa unnukkut innaleruit qinusinnaavutit. Jiisusi ima oqarpoq: ‘Illit qinuleruit ininnguannut iserit matulu matullugu, Ataatannullu qinugit.’ (Matthæusi 6:6) Unnuit tamaasa innartinnak Jehovamut qinusarpit? — Taamaaliortussaavutit.

Jiisusi inuit allat ilagitillugit aamma  Guutimut qinusarpoq. Jiisusi ikinngutini Lazarusi toqummat ilisaaffiata saani qinuvoq allanik najuuttoqartillugu. (Johannesi 11:41, 42) Aamma Jiisusi qinusarpoq ajoqersukkanilu ataatsimooraangamik. Uaguttaaq naalagaaffilersaarfimmi ataatsimiikkaangatta Jehovamut qinusarpugut, ilaa? — Naalagaaffilersaarfimmi uagut sinnerluta qinusoqartarpoq. Qinusoq Guutimut oqalukkaangami aamma illit sinnerlutit Guutimut oqaluttarpoq, taamaammat oqaasii tusarnaarluartarniakkit. Taava qinuneq naammassippat ‘amen’-eersinnaassaatit. Nalunngiliuk qinnutip naanerani ‘amen’-eerneq qanoq isumaqarnersoq? — Isumaqarpoq oqaatigineqaqqammersut tamaasa isumaqatigigitit. Assigiinnarpaa oqarluni: “Oqaatigineqartut isumaqatigaakka.” Taamaammat ‘amen’-eeraangatta nammineq qinnutigilertarparput.

Jiisusi aamma nerilernermi qinusarpoq. Nerisassat pillugit Jehova qutsavigisarpaa. Illittaaq neritinnak qujaqqaartuaannarpit? — Ajunngitsuliussaagut neritinnata Jehova qutsavigisarutsigu. Arlallit nereqatigiikkaangata imaassinnaavoq arlaat qujasartoq. Qanormi iliussavit kisimiillutit nerileruit? Imaluunniit Jehovamut qujaneq ajortunik nereqateqaleruit? — Taava nammineerlutit qinusariaqassaatit.

Tamatigut tusaaneqarsinnaasumik qinusariaqarpugut? Imaluunniit isumaqarpit Jehovap tusaasinnaagaatigut eqqarsaatitsiguinnaq qinugutta? — Nehemiamut pisimasoq tusarutsigu akissutaa paasissavarput.  Nehemia Jehovamut pallorfiginnittuuvoq, Persiamiullu kunngiata Artaxerxesip illussaarsuani sulisuulluni. Ullut ilaanni Nehemia aliasungaalerpoq tusaramiuk Jerusalemip qarmarsui suli qarmaqqinneqarsimanngitsut. Nunaqqataanummi Jerusalemi illoqarfiuvoq pingaarnerpaaq.

Kunngip Nehemia aperaa sooq taama nikallungatiginersoq, kunngili akitinnagu nipaqanngitsumik qinoqqaarpoq. Taava Nehemiap kunngi oqaluttuuppaa sooq nikallunganerluni, aperalugulu Jerusalemiliarsinnaanerluni qarmarsuaq qarmaqqikkiartorlugu. Susoqarpamita? —

Jehovap Nehemiap qinnutaa tusarpaa. Kunngillu aallarnissaa akueraa! Allaat kunngip Nehemia qisuppassuarnik tunivaa qarmarsuup qarmaqqinnerani atorneqarsinnaasunik. Tassa Guutip qinnut tusarsinnaavaa  naak nipilimmik qinnutigineqanngikkaluartoq. — Nehemia 1:2, 3; 2:4-8.

Maanna allamik aperiniarpakkit. Niaqorput sikitittuaannassavarput Jehovamut qinugaangatta? Seeqqummertuaannassaagut? Qanoq isumaqarpit? — Jiisusi qinugaangami ilaannikkut seeqqummertarpoq. Ilaannikkut nikorfasarpoq. Ilaannikkullu qinugaangami qilaap tungaanut qiviaqqasarpoq; soorlu taamaaliortoq Lazarusi qinnukkamiuk.

Tamatumani suna paasivarput? — Paasivarput qinunitsinni nikorfanersugut issianersugulluunniit apeqqutaanngitsoq. Kisianni niaqoq sikitillugu sequnngerlunilu qinusarnissaq pitsaassaaq. Immaqa ilaannikkut seeqqummeqarusuttarpugut, soorlu Jiisusi taamaaliortarsimasoq. Eqqaamassavat qaqugukkulluunniit Guutimut qinusinnaagatta, ulluugaluarpat unnuaagaluarpalluunniit, tusaajumaarpaatigut. Qinunermi pingaarnerpaavoq upperilluinnassallugu Jehovap qinnuterput tusaajumaaraa. Illit qinugaangavit qinnutit Jehovap tusaasaraa upperaajuk? —

Qanormi Jehovamut qinunitsinni oqartassaagut? — Oqaluttuuteriannga: Jehova qanoq oqarfigisarpiuk? — Amerlasoorpassuarnik nuannaarutigisatsinnik tunivaatigut. Tamakkununnga qutsavigisariaqarparput, ilaa? — Nerisatsinnut qutsavigisinnaavarput. Qilak tungutsorissoq, aput pinnguarfigiuminartoq, naasunnguillu kusanartut qujassutigisarpigit? — Tamakkuninngattaaq tunivaatigut.

Ilaanni ajoqersukkat Jiisusi qinnuigaat Guutimut qinunermik ilinniarteqqullutik.  Ajoqersuisorsuarlu taamaaliorpoq, oqaluttuullugillu qinunermi suut eqqaassallugit pingaarnerpaanersut. Suunersut nalunngiligit? — Biibilit tigoriaruk Matthæusillu iivangkiiliuani kapitali 6 qupperlugu. Versini 9-mit 13-imut qinnummik allassimasoqarpoq amerlasuut ataatarpuumik taasagaannik. Atuariartigu.

Siullermik Jiisusip ilinniartippaatigut Guutip atia qinnutitsinni ilaassasoq. Qinnutigissavarput illernarsisinneqassasoq, tassa imaappoq illernartutut isigineqassasoq. Guuti qanoq ateqarami? — Aap, Jehovamik ateqarpoq, aterlu taanna pingaartingaarparput.

Aappassaanik qinnutigissavarput Guutip naalagaaffiata tikiunnissaa. Naalagaaffik tamanna pingaartorujussuuvoq nunami eqqissinermik pilersitsisussaagami, nunalu paratiisinngortillugu.

Pingajussaanik Ajoqersuisorsuup Guutip piumasaata qilammisut nunami pinissaa uagutsinnut qinnutigisaqquaa. Qinnutigigutsigu taava Guutip kissaatigisaatut iliortariaqarpugut.

Aamma Jiisusip ilinniartippaatigut ullut tamaasa nerisassaqarnissarput qinnutigisassagipput. Eqqaavaalu ajortuliorsimagaangatta Guuti oqaluttuuttassagipput peqqissimilluta. Guutilu qinnuigissagipput isumakkeerfigeqqulluta. Isumakkeerfigitinnginnitsinnili allat uagutsinnut ajortuliorsimasut isumakkeerfigisariaqarpavut. Isumaqarpit isumakkeerfiginninnissaq ajornanngitsuusoq? —

Naggataatigut Jiisusi oqarpoq Jehova Guuti qinnuigisassagipput ajortumut, Saatanimut Diaavulumut uagutsinnik illersuinissaanik. Tamakku tamarmik Guutimut qinunermi eqqaassallugit pitsaasuupput.

Upperisariaqarparput qinugaangatta Jehovap tusaasaraatigut. Qinnuigiinnartassanngilarput, kisiannili aamma qutsaviginissaa eqqaamasassavarput. Nuannarisarpaa qinnutivut ilumoorukkaangatsigit eqqortunik qinnuigigaangatsinni. Taava qinnutigisatsinnik tuniumaarpaatigut. Tamanna upperaajuk? —