Kiffaanngissusivimmut Jehovamit siulersortigit
Kiffaanngissusivimmut Jehovamit siulersortigit
‘Kiffaanngissutsip inatsisaanik naammalluinnartunik isumaliutiginneqqissaarit’. — JAAKU 1:25.
UKU NASSUIARSINNAAVIGIT?
Inatsit suna kiffaanngissuseqalivitsitsissava, inatsillu tamanna kikkut iluaqutigissavaat?
Kiffaanngissuseqalivikkumalluta susariaqarpugut?
Jehovamut aalajaattuartut qanoq ittumik kiffaanngissuseqalissappat?
1, 2. (a) Inuit kiffaanngissusiannut tunngatillugu qanoq oqarsinnaavugut, aamma sooq taamaappa? (b) Jehovap kiffaasa kiffaanngissuseq qanoq ittoq neriutigaat?
PIFFISSAMI inuuffigisatsinni piumatussuseq, nakuuserneq inatsisinillu ataqqinninngitsuliorneq aatsaat taama ingasatsigilerput. (2 Timotheusi 3:1-5) Taamaattumik naalakkersuisut inatsisinik sukateripput, politiit amerlisippaat videokkullu nakkutilliinernik pilersitsiortorlutik. Nunat ilaanni inuit angerlarsimaffimminni isumannaallisaasarput kalerriisaarutit, parnaarsaatit arlallit allaallu ungalut sarfallit atorlugit. Inuppassuit unnukkut aninissartik qitornatilluunniit kisimiitillugit ulluugaluartukkulluunniit aneertinnissaat qunugisarpaat. Erseqqippoq inuit kiffaanngissusikilliartuinnartut pissutsillu pitsaaneruleriartorpasinngitsut.
2 Naatsiivimmi Edenimi Saatani oqarpoq inuit aatsaat kiffaanngissuseqalivissinnaasut Jehovamit siulersorneqarunnaarunik. Paasinarsivoq tamanna salluliuutaasoq ajorluinnaqqissaartoq! Inuit Guutip killigititaanik soqutigittaannerujartortillugit inuit naalliunnerujartorput. Pissutsit taamaatsillugit Jehovap kiffai aamma naalliupput. Neriuutigaarpulli inuit ajortimit nungujassusermillu aniguisitaanissaat Biibilimilu ‘kiffaanngissusermik Guutip qitornaasa naalannarsiffissami pisassaannik’ taaneqartumik pigisaqalernissaat. (Romamiut 8:21) Maannakkut Jehovap kiffaanngissuseq tamanna kiffaminut piareersarpaa. Qanoq?
3. Jehovap kiffani inatsisinik sunik tunivai, apeqqutillu suut sammissavavut?
3 Jehovap kiffani siunissami kiffaanngissuseqalernissaannut piareersarniarlugit ‘kiffaanngissutsip inatsisaanik naammalluinnartunik’ tunivai. (Atuaruk Jaaku 1:25) Biibilimik nutsikkami allami ima nutserneqarpoq: ‘Guutip inatsisai kiffaanngissuseqalersitsisut.’ (Den Nye Aftale) Inatsisit eqqartorneqaraangata eqqarsaatigineqarajuppoq killilersorneqarneq, kiffaanngissuseq pinnagu. Taavami ‘kiffaanngissutsip inatsisai naammalluinnartut’ suuppat? Qanorlu kiffaanngissuseqalersissavaatigut?
INATSISIT KIFFAANNGISSUSEQALERSITSISUT
4. ‘Kiffaanngissutsip inatsisai naammalluinnartut’ suuppat, kikkullu iluaqutigissavaat?
4 ‘Kiffaanngissutsip inatsisai naammalluinnartut’ tassaasinnaanngillat Mosesip inatsisai. Jehovap Israelikkut Mosesip inatsisaanik tunivai ajortiliunerannik paasitinniarlugit, Kristusillu Mosesip inatsisai eqquutitippai. (Matthæusi 5:17; Galatiamiut 3:19) Taavami Jaakup suut pivai? Eqqartugaa tassaavoq “Kristusip inatsisaa”, aamma ‘inatsimmik uppeqqussummik’ taaneqartarpoq. (Galatiamiut 6:2; Romamiut 3:27) Tassa ‘inatsisinut naammalluinnartunut’ ilaapput Jehovap uagutsinnut piumasaqaatai tamarmik. Kristumiut tanitat aamma ‘savat allat’ tamarmik inatsisit taakku iluaqutigissavaat. — Johannesi 10:16.
5. Sooq kiffaanngissutsip inatsisai artornartuunngillat?
5 ‘Inatsisit naammalluinnartut’ nunani amerlasuuni inatsisigineqartunit allaanerupput. Inatsisit taakku paasiuminartuullutillu maleruaruminartuupput tassaagamik inatsisit artornartuunngitsut najoqqutassiallu tunngaviusut. (1 Johannesi 5:3) Jiisusi ima oqarpoq: ‘Nammaatara iluaqaaq, nammakkiussaralu oqeqaluni.’ (Matthæusi 11:29, 30) Aamma ‘inatsisit naammalluinnartut’ inatsiserpassuarnik ilaqartariaqanngillat. Asanninnermik tunngaveqarput inuillu isumaannut uummataannullu allataapput, allaffissianut ujaraasunut allataanatik. — Atuakkit Hebræerit 8:6, 10.
‘INATSISIT NAAMMALLUINNARTUT’ QANOQ KIFFAANNGISSUSEQALERSIKKAATIGUT
6, 7. Jehovap najoqqutassiai qanoq oqaatigisinnaavavut, aamma sooq kiffaanngissutsip inatsisai naammalluinnartut illersuutaappat?
6 Jehovap inunnut killiliussai taakkununnga iluaqutaallutillu illersuutaapput. Assersuutigisinnaavarput pinngortitap inatsisaa — nunarsuup nutsuinera. Inuit inatsimmit taamaattumit naqisimaneqartutut misiginatik pinngortitap inatsisai pingaartittarpaat, nalunnginnamikku iluaqutigalugit. Taamatuttaaq Jehovap najoqqutassiai Missiarsip ‘inatsisaanit naammalluinnartunit’ ilikkakkavut iluaqutigiuaannarpavut.
7 Kiffaanngissutsip inatsisai illersuutigiitigalugit kissaatitsinnik eqqortunik pisinnaatippaatigut imminut allanulluunniit ajoqutaanngitsumik. Tassa nammineq piumasatsitut iliorsinnaatitaavugut, aatsaalli kissaativut eqqortuullutik Jehovap kinaassusianut najoqqutassiaanullu naapertuukkaangata. Jehovap nuannarisai nuannarisariaqarpavut uumigisaalu uumigisariaqarlugit. Taamaaliornissamut kiffaanngissutsip inatsisai iluaqutigissavavut. — Amosi 5:15.
8, 9. Kiffaanngissutsip inatsisaanut naalanneq qanoq iluaqutigaarput? Assersuuteqarit.
8 Naammalluinnanngitsuugatta kissaatit eqqunngitsut akiortuartariaqarpavut. Kiffaanngissutsip inatsisai ilumoorfiginnilluta naalakkutsigik nukik kiffaanngissuseqalersitsisoq maannangaaq misigissavarput. Assersuutigisinnaavarput Jay tubamik pinngitsuuisinnaanngitsoq. Biibilimik atuaqqissaartalerami paasivaa Guutip iluarinngisaanik ileqqoqarluni. Aalajangertariaqarpoq. Pujortagunnerminit aqunneqartuassava Jehovamulluunniit naalassava? Pujortagungaartaraluarluni aalajangerpoq Jehova kiffartorfiginiarlugu. Pujortartarunnaarami qanoq misigiva? Ima oqarpoq: “Kiffaanngissuseq nalissaqanngitsoq misigivara nuannaangaarpungalu.”
9 Jayp nammineq misigivaa silarsuarmi kiffaanngissuseq ‘uinimmut atasunut kajungernartuusoq’, inunnillu inussiaataalersitsiinnartartoq. Aamma misigivaa kiffaanngissuseq Guutimeersoq ‘anersaamut kajungernartuusoq’, ‘inuussutaallunilu eqqississutaasoq’ kiffaanngissuseqalersitsisartorlu. (Romamiut 8:5, 6) Jayp ileqquni qanoq taamaatippaa? Nammineernani Guutimit ikiorneqarpoq. Aalajangersimasumik Biibilimik atuaqqissaartarlunilu anersaaq illernartoq qinnutigisarlugulu ilagiinni qatanngutit asannittumik ikiuiumanerat akueraa. Aamma uagut taamaaliortarutta kiffaanngissuseqalivinnermut iluaqutigisinnaavavut. Misissoriartigu qanoq.
GUUTIP OQAASIANUT ‘ITSUARIT’
10. Guutip inatsisaanut ‘itsuarneq’ qanoq paasisariaqarpa?
10 Jaaku 1:25-mi ima allassimavoq: ‘Kiffaanngissutsip inatsisaanik naammalluinnartunik isumaliutiginneqqissaartoq aalajangiussisorlu, tusakkaminik puigutuujunani . . . taamaaliornermigut pilluarumaarpoq.’ Grækerit oqaasiat uani ‘isumaliutiginneqqissaartumik’ nutserneqarsimasoq, Biibilimik nutsikkami 1936-meersumi ‘itsuartumik’ nutserneqarsimasoq, isumaqarpoq peqilluni qanimut takunninniaasoq. Erseqqippoq iliuuseqartoqartariaqartoq. Taamaattumik kiffaanngissutsip inatsisai isumatsinnut uummatitsinnullu sunniuteqartikkusukkutsigik peqqissaartumik aalajangersimasumillu Biibilimik atuaqqissaartariaqarpugut atuakkatsinnillu isumaliutiginneqqissaartariaqarluta. — 1 Timotheusi 4:15.
11, 12. (a) Sallusuissut inooriaaserilertariaqaripput ersersinniarlugu Jiisusi qanoq oqarpa? (b) Assimi qulaaniittumi ersersinneqartutut ingammik inuusuttuugutta navianartoq suna ingalassimasariaqarparput?
11 Taamaaliuutigaluta Guutip oqaasianik ‘aalajangiussisariaqarpugut’ taamaalilluta sallusuissut inooriaaserilerlutigu. Tamatumunnga assingusumik Jiisusi imminik upperfiginnilersunut ima oqarpoq: “Oqaasera aalajangiussimajuarussiuk ilumut ajoqersugarissavassi, sallusuissullu ilisimalissavarsi, sallusuissutillu inussiaajunnaarsissavaasi.” (Johannesi 8:31, 32) Ujarlerfissiaq taamatorlugu ‘ilisimasaqarneq’ aamma pingaartitsinermik isumaqarpoq ‘ilisimasaq’ ilisimasalimmut naleqarmat pingaaruteqarmalluunniit. Taamaattumik sallusuissut inooriaaserilerutsigu oqarsinnaassaagut sallusuissut tamakkiisumik ilisimallutigu. Taava ‘Guutip oqaasia’ uagutsinni ‘sunniissaaq’. Tamanna inuttut pissusitsinnik allannguinissatsinnut iluaqutigissavarput Ataatarput qilammiusoq ilaarnerusinnaalerlutigu. — 1 Thessalonikamiut 2:13.
12 Imminut ima aperigit: ‘Sallusuissut ilumut ilisimavara? Inooriaaserilersimavara? Silamiutut kiffaanngissuseqarusuppunga?’ Qatanngutip kristumiunik angajoqqaallip misigisani oqaluttuaraa. Inuusuttuaraalluni Jehovamik upperinnittuuvoq, ilisarisimalivinngisaannarpaali. Ima allappoq: “Jehovap uumigisai uumigilinngisaannarsimavakka. Upperinngisaannarsimavara qanoq iliornikka isumakuluutigisarai. Ajornartorsioraangama taassumunnga ikiortissarsiorneq ilikkanngisaannarsimavara. Nammineq paasisimasaqassutsiga tatigisarpara, maannakkullu takusinnaavara qanoq sianiilliornerutigisoq, ilisimasakissimaqaangami.” Qujanartumik qatanngutip taassuma kingusinnerusukkut paasivaa eqqarsartaaserisimasani qanoq eqqunngitsigisimasoq, pingaarutilinnillu allannguivoq. Allaammi pionerinngorpoq.
ANERSAAP ILLERNARTUP KIFFAANNGISSUSEQALERSISSINNAAVAATIT
13. Guutip anersaavata illernartup qanoq kiffaanngissuseqalersippaatigut?
13 Korinthimiunut allakkat aappaat 3:17-imi ima allassimavoq: ‘Naalakkap Anersaavata najuuffigisaaniippoq kiffaanngissuseq.’ Anersaap illernartup qanoq kiffaanngissuseqalersippaatigut? Pissuserineqartussanik ineriartortitsinitsinni iluaqutigaarput, ilaatigut uku ineriartortippavut: “Asanninneq, nuannaarneq, eqqissineq, kamajasuunnginneq, inussiarnisaarneq, ajunngitsuuneq, unneqqarissuseq, qanilaarneq imminullu naalakkersinnaaneq.” (Galatiamiut 5:22, 23) Taamaattunik pissuseqanngikkaanni, ingammik asannissuseqanngikkaanni, kiffaanngissusivik misigineqarsinnaanngilaq. Tamanna silarsuarmi pissutsinit erseqqippoq. Apustilip Paulusip anersaap inerititaa allaatigereerlugu ima allappoq: “Tamakku inatsisini inerteqqutaanngillat!” Sunaana pigaa? Guutip anersaavata inerititaa inatsimmit sumilluunniit killilerneqanngilaq. Inatsisiliortoqarsinnaanngilaq pissuserineqartussanik taakkuninnga ineriartortitsinermi akornusiisinnaasunik. (Galatiamiut 5:18) Jehovap kissaatigaa pissuserineqartussat taakkua sulissutigiuassagivut naassaanngitsumillu ersersissagivut.
14. Silarsuup anersaavanut nakkaannartut qanoq inussiaataappat?
14 Silarsuup anersaavanit aqunneqartittut uinngullu pilerigisaanik tamanik pisartut immaqa isumaqarput kiffaanngissuseqarlutik. (Atuakkit 2 Petrusi 2:18, 19). Naluaalli inussiaataallutik, ajoqutaasumik pissusilunnerat piumatuujunerallu pissutigalugit naalakkersuisut inatsiserpassualiortariaqarput. Paulusilu allappoq inatsisit “peqqusersuitsumik inuusut pillugit pilersitaanngitsut, ukuli pillugit: inatsisinik unioqqutitsisut naalasseriitsullu”. (1 Timotheusi 1:9, 10) Aamma uinimminnut ajortiliusumut inussiaataapput ‘uinimmik pilerissusiatigut iliortaramik’, uinillu naalagaavoq naakkittaatsoq. (Efesosimiut 2:1-3) Inuit taakku sullinernut tungusunnitsugunnertik pissutigalugu honningiisivimmut pisunut tingeqqissinnaajunnaartunullu assersuunneqarsinnaapput, taakkumi kissaatitik eqqunngitsut malillugit iliorput ajortimillu pisaritillutik. — Jaaku 1:14, 15.
ILAGIINNI KRISTUMIUNI KIFFAANNGISSUSEQARNEQ
15, 16. Ilagiinnut ilaalernerput qanoq iluaqutigaarput, kiffaanngissuserlu suna misigaarput?
15 Ilagiinnut kristumiunut ilaalerneq peqatigiiffimmut ilaasortanngornertut inngilaq. Ilagiinniilerputit tassaniissasutit Jehovap kissaatigimmagu. (Johannesi 6:44) Sooq kajungilersippaatit? Naapertuilluartuullutillu Guutimik mianerinnittuunerit pissutigalugu? Immaqa ima oqassaatit: “Naamerluinnaq!” Taavami Guutip suna takuaa? Inatsisiminut naalakkusussuseqartutit asannittumillu siulersuinera akuererusukkit takuaa. Ilagiinnulli ilaaleravit Jehovap isumagilerpaatit Oqaatsimineersunik ilinniartillutit. Upperisarsiornermi eqqunngitsumi salluliuutinit upperisapalaanillu aniguisippaatit Kristusillu pissusiinik ilaarsinissannik ilinniartillutit. (Atuakkit Efesosimiut 4:22-24). Tamatuma kingunerisaanik silarsuarmi inuiannut kiffaanngissuseqavissutuanut ilaalerputit. — Jaaku 2:12.
16 Una eqqarsaatigeriaruk: Jehovamik qamannga pisumik asannittut ilagigaangakkit toqqissisimanngitsutut misigisarpit? Naalagaaffilersaarfimmi qatanngutitit oqaloqatigitillugit pigisavit tillinneqarnissaat annilaangagisarpiuk? Naamerluinnaq! Eqqissisimallutillu iluarusupputit. Sumiiffimmi allami taama misiginaviarunanngilatit. Kiffaanngissuserli Jehovap innuttaasa akornanni misigisat siunissamut qilanaartuutaannaavoq.
“KIFFAANNGISSUSEQ GUUTIP QITORNAASA NAALANNARSIFFISSAMI PISASSAAT”
17. “Guutip qitornaasa saqqummersitaanissaat” qanoq inunnik kiffaanngissuseqalersitsissava?
17 Paulusi kiffaanngissuseq Jehovap nunarsuarmi innuttaminut tunniussassaa pillugu ima allappoq: ‘Pinngortitat erinisullutik Guutip qitornaasa saqqummersitaanissaat utaqqivaat.’ Imalu nangippoq: “Pinngortitattaaq namminneq aniguisitaajumaartut nungujassusermi inussiaataanermit kiffaanngissuseq Guutip qitornaasa naalannarsiffissami pisassaat pigilerlugu.” (Romamiut 8:19-21) ‘Pinngortitat’ tassaapput inuit nunarsuarmi naassaanngitsumik inuunissamik neriugisallit “Guutip qitornaasa” tanitat ‘saqqummersitaanerannik’ iluaqutiginnittussat. Saqqummersitaaneq tamanna aallartissaaq tanitat Kristusi peqatigalugu qilammiit inuit ajortut periuneeruppatigit ‘amerlangaartullu’ Guutip silarsuassaanut nutaamut pisippagit. — Saqqummersitat 7:9, 14.
18. Inuit aalajaatsut qanoq kiffaanngissuseqarnerujartuinnassappat, sunalu kingunerissavaa?
18 Taava inuit immikkorluinnaq ittumik kiffaanngissuseqalissapput. Saatanimit anersaapilunnillu sunnerneqarsimajunnaassapput. (Saqqummersitat 20:1-3) Qanoq oqiliallannartigissava! Tamatuma kingorna 144.000-it, Kristusip kunngioqatigalugillu palasioqataasa, utertitsissutitut pilliut inuit iluaqutigisaannik atussavaat inuit naammalluinnanngissusermik ajortimillu aniguisitaalluinnarnissaasa tungaanut. (Saqqummersitat 5:9, 10) Misilinneqaraluarlutik aalajaatsut Jehovap aallaqqaammut taakkununnga siunertaarisaatut naammalluinnartumik kiffaanngissuseqalissapput, tassa “kiffaanngissuseq Guutip qitornaasa naalannarsiffissami pisassaat pigilerlugu”. Eqqarsaatigeriaruk! Guutip eqqortuuneragaatut iliornissat sapernartikkunnaassavat. Timit, uummatit isumallu naammalluinnartuulersimassapput Guutillu pissusii ilaaqqissarsinnaalissavatit.
19. “Kiffaanngissuseq Guutip qitornaasa naalannarsiffissami pisassaat” misigerusukkutsigu qanoq iliortuartariaqarpugut?
19 “Kiffaanngissuseq Guutip qitornaasa naalannarsiffissami pisassaat” qilanaaraajuk? Taamaakkuit isumat uummatillu ‘kiffaanngissutsip inatsisaanik naammalluinnartunik’ ilusilersortittuakkit. Peqqissaartumik aalajangersimasumillu Biibilimik atuaqqissaartarit. Sallusuissut inooriaaserileruk. Anersaaq illernartoq qinnutigiuk. Ilagiit kristumiut anersaakkullu inuussutissat Jehovap uagutsinnut tunniussai tamakkiisumik iluaqutigikkit. Saatanimit isumaqalersinneqaqinak Guutip piumasaqaatai sukannerpallaartut, soorlu Eva taama nakutikkaa. Diiaavulu peqqusersuujugaluartoq nakutitaasariaqanngilagut “nalunngilarpummi taanna qanoq ittumik pilersaaruteqartoq”. Tamanna allaaserisami tulliuttumi sammissavarput. — 2 Korinthimiut 2:11.
[Atuaqqissaarnermi apeqqutit]
[Qupp. 14-mi Assiliartat]
Silamiutut kiffaanngissuseqarusuppunga?
[Qupp. 14-mi Assiliartat]
Sallusuissut inooriaaserilersimavara?
