Atuakkatut allatulli ittoq?

“Allakkat Illernartut tamarmik Guutimit isumassarsiarititaapput iluaqutaallutillu . . . , inuk Guutip pigisaa piginnaaneqarluaqqullugu, ajunngitsuliornernut tamanut piareersarluagaaqqullugu.” — 2 TIMOTHEUSI 3:16, 17, NW.

INUIT ikittuinnaat tamatumani allassimasumut isumaqataapput. Illimmi? Ataani allassimasut arlaat sorleq illit Biibilimut isiginnittaatsinnut tulluunnerua?

• Atuakkiaq torrallataq

• Atuagarpassuit illernartut pingaarutillit ilaannaat

• Atuagaq oqaluttualianik ilinniarfissanik imalik

• Guutip oqaasia

Tamatumunnga tunngatillugu ima aperisoqarsinnaavoq: Biibili pillugu qanoq isumaqarneq pingaaruteqarami? Maluginiariaruk Biibilimi qanoq allassimasoqarnersoq: “Siornatigummi allagaasut tamarmik allassimapput uatsinnut ilinniutissaallutik, nikallujuilluta Allakkallu tunissutaat tuppallersaatigalugit neriuuterput aalajangiussinnaaqqullugu.” (Romamiut 15:4) Tassa allassimavoq Biibili uatsinnut ilinniutissatut, tuppallersaatissatut neriuutissiisussatullu allagaasoq.

Biibilili atuakkiaannaappat nalinginnaasoq atuagarpassuilluunniit illernartut ilaannarippassuk, allaallu illit tamatumani allassimasut eqqortuusorinngikkukkit, illit atuagaq taanna ilinnik ilaquttannillu siulersuisussatut tutsuigissagaluarpiuk? Biibilimi allassimasut oqaluttualiaannaappata, tamatumani neriorsuutigineqartut illit tuppallersaatigalugillu neriuuteqalissutigissagaluarpigit?

Taamaattoq inuit Biibilimik misissueqqissaarsimasut millionillit qularutigiunnaarsimavaat taanna immikkorluinnaq ittuusoq, Guutip oqaaserigaa. Qanoq ilillutik? Biibilip atuakkanit allanit tamanit suut allaassutigai? Kajumissaarpatsigit allaaserisat tulliuttut atuaqqullugit, Biibilip immikkorluinnaq ittuuneranut pissutaasut tallimat suunersut paasiniassagakku.