‘Anersaamit illernartumit sunnertipput’

‘Pruffiitip siulittuutaa inuup piumasaagut tutsiutinngisaannarpoq, Anersaamilli Illernartumit sunnertillutik inuit Guutimit pisumik oqaaseqartarput.’ — 2 PETRUSI 1:21.

MALUGINIAGASSAT

Guutip Biibilimik allattut qanoq allassanersut ilisimatinniarlugit anersaaq illernartoq qanoq atorpaa?

Biibilip Guutiminngaanneersuuneranik upperinninnissamut suut uppernarsaataappat?

Biibilimik qujamasuutiginninnerit ersersinniarlugu ullut tamaasa susinnaavit?

1. Sooq Biibili pisariaqartipparput?

INUPPASSUIT ima aperisarput: Suminngaaneerpugut? Sooq nunarsuarmiippugut? Sumunnarpugut? Sooq silarsuaq taamaappa? Toqugutta qanoq pisoqassava? Guutip oqaasia piginngikkutsigu apeqqutit tamakku apeqqutillu pingaarutillit allat akissutissaqartissanngikkaluarpavut. Biibileqanngikkaluarpat uagut nammineq misilittakkavut pingaarnertut ilinniutigissagaluarpavut. Misilittakkavut ilinniutigissagaluarutsigik tussiaasiortup ‘Jehovap inatsisai’ pillugit misigineratut misigisinnaanngisaannassagaluarpugut. — Atuaruk Tussiaat 19:8.

2. Biibilimik suna pingaartitsinerulissutigisinnaavarput?

² Ajoraluartumik sallusuissummik Biibilimeersumik pingaartitsisimasut ilaat siornatigutulli pingaartitsiunnaarsimapput. (Naleqqiuguk Saqqummersitat 2:4) Jehovap iluarisaatut inuujunnaarput. (Esaja 30:21) Uagulli taamaattariaqanngilagut. Biibilimik tamatumanilu ilinniartitsissutigineqartunik sapinngisarput tamaat pingaartitsiuarsinnaavugut taamaaliortariaqarlutalu. Ilumut, Biibili Pinngortitsisitsinnit asannittumit tunissutisiaavoq nalissaqanngitsoq. (Jaaku 1:17) ‘Guutip oqaasianik’ suna pingaartitsinerulissutigisinnaavarput? Eqqarsaatigisariaqarparput angutit Biibilimik allanneranni qanoq siulersorneqarnersut aamma Biibilip Guutimit isumassarsiarititaaneranut uppernarsaaterpassuit ilaannik misissueqqissaartariaqarluta. Taamaaliorutta ullut tamaasa Guutip oqaasianik atuartarnissaq siunnersuutaanillu maleruaanissaq kissaatigilissavarput. — Hebræerit 4:12.

‘ANERSAAMIT ILLERNARTUMIT SUNNERTINNEQ’ — QANOQ?

3. Pruffiitit Biibilimillu allattut ‘Anersaamit Illernartumit sunnertittut’ qanoq isumaqarpa?

³ Ukiut 1610-it ingerlaneranni — 1513-imiit Kr.in.si.  98-imut Kr.in.king. — Biibili allanneqarpoq. Angutit 40-t missaasa Biibili allappaat, taakkua ilaat pruffiitiupput ‘Anersaamit Illernartumit sunnertittut’. (Atuakkit 2 Petrusi 1:20, 21). Grækerit oqaasiat “sunnertillutik”-mik uani nutserneqarsimasoq isumaqarpoq siulersorneqarneq, ingerlanneqarneq nammineerluniluunniit siulersortinneq. Apustilit Suliaat 27:15-imi oqaaseq taanna atorneqarpoq umiarsuup anorimit ‘tissukaatitinneranut’ tunngatillugu. Atuaraangatsigu pruffiitit Biibilimillu allattut ‘Anersaamit Illernartumit sunnertittut’ isumaqarpoq taakku Guutimit atassuteqarfigineqartut, sunnerneqartut taassumalu nukingata sulisup, anersaavata illernartup, siulersorai. Taamaattumik nammineq eqqarsaatitik pinnagit Guutip eqqarsaatai allappaat. Ilaannikkulli pruffiitit allattullu taakkua siulittuutitik allatatilluunniit nammineq paasineq ajorpaat. (Danieli 12:8, 9) Ilumut “Allakkat Illernartut tamarmik Guutimit isumassarsiarititaapput” taamaattumillu inuit isumaannik ilaqanngillat. — 2 Timotheusi 3:16, NV.

4-6. Jehovap Biibilimik allattut qanorpiaq allassanersut qanoq ilisimatippai? Assersuuteqarit.

⁴ Guutilli Biibilimik allattut anersaaq illernartoq atorlugu qanoq isumassarsisippai? Qanorpiaq allassanerlutik paasitinneqarpat isumassarsisinneqaannarpalluunniit nammineq oqaasertaligassaminnik? Niuertup allakkanik allattarnera eqqarsaatigiuk. Oqaatsit eqqoqqissaartut atorneqarnerat pingaaruteqaraangat nammineerluni allattarpai allatsiniluunniit qanorpiaq allassanersoq oqarfigalugu. Allatsip allakkat allareeraangagit niuertup atsiortarpai. Ilaannikkulli allatsini allatassat pingaarnersaannik oqaluttuutiinnartarpaa, allatsillu allakkat nammineq oqaasertalersortarpai. Kingusinnerusukkut niuertup atuartarpai allanngortitassaqarpallu allatsimut allangorteqqullugit. Allakkat naammassigaangata atsiortarpai taassumalu allagaatut isigineqartarput.

⁵ Tamatumunnga assingusumik Biibilip ilaa Guutip nammineq allappaa. (2 Mosesi 31:18) Oqaatsit aalajangersimasut atorneqarnissaat pingaaruteqarluinnaraangat qanorpiaq allattoqassanersoq Jehovap oqaatigisarpaa. Assersuutigalugu Mosesimik allakkat aappaanni 34:27-mi allassimavoq Jehova Mosesimut ima oqartoq: “Oqaatsit tamakku allanniakkit, taakku tunngavigalugit illit Israelilu angerfigeqatigigassi.” Kingusinnerusukkut Jehovap pruffiiti Jeremia ima oqarfigaa: “Oqaatsit ilinnut oqaaserisakka tamaasa mappersakkamut allakkit!” — Jeremia 30:2.

⁶ Amerlanertigulli Guutip Biibilimik allattut qanorpiaq allassanersut oqaatiginagu isumaat uummataallu sunnerlugit isumassarsisittarpai tusarliussamilu oqaasertalerneqarnissaa taakkununnga aalajangertillugu. Oqaluussisartup oqaasii 12:10-mi ima allassimavoq: “Oqaluussisartup oqaatsit eqquisumik oqaatiginnittut atorniartarpai oqaatsillu ilumoortut peqqusersuitsumik allattorumasarlugit.” Aamma Lukasip ‘tamaasa aallaqqaataanniilli sukumiisumik misissorniarpai  tulleriiaarlugillu allaaseriniarlugit’. (Lukasi 1:3) Guutip tusarliussami inunnit naammalluinnanngitsunit allanngortinneqannginnissaa anersaani illernartoq atorlugu qulakkeerpaa.

7. Guutip inuit Biibilimik allatsimmagit ilisimassusia qanoq erserpa?

⁷ Guutip ilisimassuseqangaarnera erserpoq inuit Biibilimik allatsikkamigit. Oqaatsit paasissutissiiginnaratik aamma misigissuseqalersitsisarput. Taavami Jehovap inngilit Biibilimik allatsissimagaluarpagit? Inuit misigissuserisartagaat, soorlu siooraneq, aliasunneq pakatsinerlu, killitsinnartumik allaatigisinnaasimassagaluarpaat? Eqqarsaatit anersaakkut illernartukkut isumassarsiarititaasut inuit naammalluinnanngitsut namminneq oqaasertalersinnaagamikkik inunnut qamuuna attortinnarput.

UPPERNARSAATIT EQQUMAFFIGIKKIT

8. Sooq oqarsinnaavugut Biibili upperisarsiornikkut atuakkanit allanit allaanerusoq?

⁸ Biibilip Guutiminngaanneersuuneranik upperinninnissatsinnut pissutissarpassuaqarpugut. Biibili Guutimik ilumoortumik ilisarisimannilernissatsinnik iluaqutigigatsigu upperisarsiornikkut atuakkanit allanit allaaneruvoq. Assersuutigalugu hindusiortut upperisarsiornikkut atuagaataanni upperisarsiornikkut ileqqulersuutit, isumaliutersuutit, oqaluttuatoqqat ileqqorissaarnermillu ajoqersuutit allaaserineqarput. Buddhasiortut upperisarsiornikkut atuagaataanni malittarisassat mattuttut malittariaqagaat aamma Buddhasiortut ajoqersuutaat Buddhallu ilinniartitsissutai nassuiarneqarput. Buddha nammineq guutiuneranngilaq Guutilu pillugu ilinniartitsissuteqarpiarnani. Konfucisiortut upperisarsiornikkut atuagaataanni eqqartorneqarput qanga pisimasut, ileqqussatigut malittarisassat, angakkuarniutit erinarsuutillu. Aamma islammisiortut upperisarsiornikkut atuagaataanni ilinniartitsissutigineqarpoq Guuteqartoq taassumalu suut tamaasa siunersaq ilanngullugu ilisimagai. Tamatumanili Guutip aqqa, Jehova, 7000-it missaannik Biibilimi atorneqartoq, saqqummiunneqanngilaq.

9, 10. Guuti pillugu Biibilimi suut paasisinnaavavut?

⁹ Upperisarsiornikkut allakkat amerlanersaanni Guuti ilinniartitsissutigineqarpianngilaq. Biibilili iluaqutigalugu Jehova Guuti taassumalu suliarpassui pillugit ilisimasaqalersinnaavugut. Kinaassusianut tunngasorpassuit paasisinnaavavut. Tassani ersersinneqarpoq Guutiusoq naapertuilluartuullunilu ilisimassuseqarlunilu pissaaneqangaartoq, uagutsinnillu asanittuusoq. (Atuakkit Johannesi 3:16; 1 Johannesi 4:19). Aammattaarli allassimavoq “Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq”. (Apustilit Suliaat 10:34, 35) Tamatumunnga ersiutaavoq Biibilip oqaatsinut assigiinngitsorpassuarnut nutserneqarsimanera. Oqaatsinik ilisimatuut oqartarput inuiaat oqaasii assigiinngitsut 6700-t missaat ullumikkut atorneqartut. Nunarsuullu inuisa 90 procentiisa oqaatsit taakku ilaat 100-t missaat paasisinnaagaat.  Biibili tamakkerlugu ilaannaaluunniit oqaatsinut 2400-nit amerlanerusunut nutserneqarsimavoq. Taamaattumik inuit tamangajammik oqaatsit paasisinnaasatik atorlugit Biibili ilaannaaluunniit atuarsinnaavaat.

¹⁰ Jiisusi ima oqarpoq: “Ataataga suliuarmat uangattaaq sulivunga.” (Johannesi 5:17) Jehova Guutiuvoq “naassaanngilluinnartumik”. Naammassisimasarpassui eqqarsaatigeriakkit! (Tussiaat 90:2) Biibilimiinnaq ilisimatinneqarpugut Guuti siornatigut maannakkullu sulerinersoq siunissamilu suleriumaarnersoq. Aamma suut nuannarinerai suullu nuannarinnginnerai qanorlu ‘qanillisinnaaneripput’ Biibilimi ilinniartinneqarpugut. (Jaaku 4:8) Inuttut soqutigisat isumakuluutilluunniit pissutigalugit Jehovamit qimagutinngisaannarta.

11. Ilisimassusersuaq tutsuiginartoq suna Biibilimi malunnarluarpa?

¹¹ Guutip ilisimassusersua tutsuiginartoq Biibilimi malunnarluarpoq, tamannalu Biibilimik upperinninnissamut pissutissat ilagaat. Paulusi ima allappoq: ‘Kiap Jehovap eqqarsaatai ilisimavai ilitsersorsinnaallugulu?’ (1 Korinthimiut 2:16) Versip tamatuma tunngavigaa pruffiitip Esajap nalimini inuusunut apeqqutigisaa una: “Kia ajoqersorsinnaavaa [Jehovap] anersaava, kia ilitsersorsinnaavaa ilinniartillugulu?” (Esaja 40:13, 1990) Soorunami kinaluunniit taamaaliorsinnaanngilaq. Jehova ilisimasaqarnerpaajummat aappariinneq, qitornat, aliikkutassat, ilagisartakkat, eqiasuitsuuneq, unneqqarissuuneq ileqqorissuunerlu pillugit siunnersuutinik Biibilimeersunik maleruaaneq ajunnginnerpaamik kinguneqartarput. Biibilimi siunnersuutipalaaqanngilaq! Inuilli naammattumik ilisimassuseqanngillat atorsinnaajuaannartunik siunnersuuteqarnissamut. (Jeremia 10:23) Kukkusumik siunnersuisimallutik paasigaangamikku siunnersuutitik allanngortikkajuppaat nutarterajuttarlugillu. Biibilimi allassimavoq inuit siunnersuutaat naleqarpianngitsuusut. — Tussiaat 94:11.

12. Inuit Biibilimik qanoq piuneerutsitsiniaraluarpat?

¹² Aamma oqaluttuarisaanermit erserpoq Biibilip Guutimit ilumoortumeersuuneranik upperinninnissatsinnut tunngavissaqartugut. Itsaq inuppassuit Guutip tusarliussaa piuneerutsinniarsarigaluarpaat. Ukiumi 168-imi Kr.in.si. Syriamiut kunngiata Antiochos IV-ip Inatsisit isumassarsiarititaasut tamaasa ikuallanniarlugit ujartippai. Ukiumi 303-mi Kr.in.king. Diokletian, Romamiut kaasariat, peqqusivoq kristumiut ataatsimiittarfii tamarmik isaterneqassasut Allagaataallu Illernartut ikuallanneqassasut. Ukiuni qulini taamatut piuneerussiniartoqarpoq. Ukiuni 1000-ikkunniilli paavit sapinngisartik tamaat Biibilip inuinnaat oqaaserisaannut nutserneqatsaalivaat. Naak Saatani inuillu taassuminnga tapersersuisut Biibilimik piuneerussiniartaraluartut ullumikkut Biibili suli pigaarput. Jehovap inunnut tunissutini piuneerunneqatsaalivaa.

UPPERNARSAATERPASSUIT

13. Suut pissutigalugit Biibilip Guutiminngaanneersuunera upperisinnaavarput?

¹³ Biibilip Guutiminngaanneersuuneranik upperinninnissatsinnut allanik tunngavissaqarpugut. Imarisai imminnut akerliunngillat, ilisimatuussutsikkut oqaluttuarisaanikkullu eqqortuuvoq, siulittuutai eqquuttarput taassuminngalu allattut unneqqarissuujuaannarput. Aamma Biibili inuit inuunerannik allannguisinnaassuseqarpoq immikkoortumilu siullermi apeqqutigineqartunik naammaginartumik akissuteqarluni. Inuit ilaasa Biibilip Guutiminngaanneersuuneranik qanoq qularunnaarsinneqarsimanerat misissoriartigu.

14-16. (a) Inuit assigiinngitsut pingasut Biibilip Guutiminngaanneersuuneranik suut qularunnaassutigaat? (b) Oqaluussigaangavit Biibilip Guutiminngaanneersuuneranut suut tunngavilersuutigissallugit nuannaraajuk?

¹⁴ Anwar * nunami Kangiani Qiterlermiittumi musliimitut peroriartorpoq. Amerikami  Avannarlermi najugaqartilluni Jehovap Nalunaajaasuinit kasuttorfigineqarpoq. Ima oqarpoq: “Kristumiuunerartut nuannarinngilakka siornatigut pisartunut ajortorpassuarnut pisuummata. Alapernaatsuugamali Biibilimik atuaqateqarnissamut akuersivunga.” Kingunitsiannguali Anwar nunaminut uterpoq Jehovap Nalunaajaasui attaveqarfigiunnaarlugit. Ukiut arlallit tamatuma kingorna Europamut nuukkami Biibilimik atuaqqissaaqqittalerpoq. Ima oqarpoq: “Biibilimi siulittuutit eqquuttarneri, imarisaasa imminnut naapertuullutillu imminnut akerliunnginnerat Jehovallu kiffaasa asaqatigiinnerat qularunnaassutigaakka Biibili ilumut tassaasoq Guutip oqaasia.” Anwar 1998-imi kuisippoq.

¹⁵ Ashap 16-inik ukiullip ilaqutai hindusiortuupput uppertut. Ima oqarpoq: “Aatsaat naalaffimmiikkaangama ajornartorsiuleraangamaluunniit Guutimut qinusarpunga, ingerlalluaraangamalu Guuti eqqaanngisaannarlugu. Ilaannili Jehovap Nalunaajaasuisa kasuttorfigimmannga inuunera allanngorluinnarpoq.” Asha Biibilimik atuaqqissaartalerpoq Guutilu ikinngutimisut ilisarisimalerlugu. Biibilip Guutiminngaanneersuuneranut suna qularunnaassutigaa? Ima oqarpoq: “Apeqqutigisakka tamarluinnarmik Biibilimit akineqarput. Biibili iluaqutigalugu paasilerpara Guuti takusinnaanngikkaluarlugu upperisinnaallugu — tassa, naalaffiliartariaqanngilanga guutiliallu assingi pallorfigisariaqarnagit.”

¹⁶ Paula katuullisut peroriartorpoq. Inersimasunngoramili qularilerpaa Guuti piunersoq. Taavali pisoqarpoq. Ima oqarpoq: “Ikinngutiga qaammatini arlalinni takusimanngisara naapippara. Uagut hippiet nalaanneersuuvugut. Taannali allanngorsimavoq. Umeerussimavoq, nutsani killortissimavai nuannaarpasillunilu. Taamaattumik sosoqarsimanersoq sumiissimanersorlu aperivara. Oqarpoq Jehovap Nalunaajaasuisa Biibilimik atuaqqissaaqatigisalersimagaanni, nalunaajaaffigalungalu.” Paulap takusinnaagamiuk ikinngutini sallusuissut Biibilimeersoq pissutigalugu qanoq allanngortigisimasoq, tusarliussaq Biibilimeersoq soqutigilerpaa upperilerlugulu Biibili Guutiminngaanneersuusoq.

“OQAATSITIT NANERUARAAKKA ISIKKANNUT”

17. Biibilimik ullut tamaasa atuartaruit atuakkatillu eqqarsaatigeqqissaartarukkit qanoq iluaqutigissaviuk?

¹⁷ Biibili tunissutisiaavoq nuanningaartoq Jehovap anersaani illernartoq atorlugu uagutsinnut tunniussaa. Ullut tamaasa atuartarukku Guuti asanerulissavat Biibililu pingaartinnerulerlugu. (Tussiaat 1:1, 2) Biibilimik atualernerit tamaasa Guutimut anersaava illernartoq qinnutigisaruk atuakkatit paasilluarneruniassagakkit. (Lukasi 11:13) Biibili Guutip eqqarsaataanik imaqarmat atuakkatit eqqarsaatigeqqissaaraanngakkit Guutip eqqarsartaasiatut eqqarsarneq ilikkarsinnaavat.

18. Sooq Biibilip ilinniarfigiuarnissaa kissaatigaajuk?

¹⁸ Sallusuissut Biibilimeersoq pillugu ilinniarnerujartortillutit ilikkakkatit atortakkit. (Atuaruk Tussiaat 119:105). Biibilimik atuarneq tarrarsornertullusooq ippoq. Taamaattumik paasigukku arlaannik allannguisariaqarlutit allannguigit. (Jaaku 1:23-25) Guutip oqaasia panatullusooq ippoq. Upperisannik illersuinermut atorsinnaavat. Aammali inuit eqqortuliorusuttut ajoqersuinerluutinik iperaanissaannik ikiorsinnaavatit. (Efesosimiut 6:17) Biibili atoraangakku qujamasuutigisaruk pruffiitit angutillu Biibilimik allattut ‘Anersaamit Illernartumit sunnertillutik’ allassimammata.

[Quppernerup ataani ilanngussaq]

[Atuaqqissaarnermi apeqqutit]

[Qupp. 32-mi issuagaq]

Ullut tamaasa Biibili atuartaruk Atuakkiortualu asanerulerlugu

[Qupp. 29-mi assiliartaq]

Allakkat atsiortuaneersutut isigineqartarput