Aappariittut ingerlanerliorussi isumalluartuugitsi

“Aappaqartut peqqusiffigaakka, uannit pisuunngitsumik Naalakkamilli pisumik.” — 1 KORINTHIMIUT 7:10.

UKU NASSUIARSINNAAVIGIT?

Aappariit Guutimit qanoq ‘ataqatigiilersinneqarpat’?

Aappariit kristumiut ajornartorsiutillit utoqqaanertanit qanoq ikiorneqarsinnaappat?

Appariinneq qanoq isigisariaqarparput?

1. Kristumiut aappariinnermut tunngatillugu qanoq isiginnittaaseqarpat aamma sooq?

KRISTUMIUT katikkaangamik Guutimut neriorsuisarput. Tamanna akisussaaffiuvoq pimooruttariaqartoq. (Oqaluussisartup oqaasii 5:3-5) Jehova aappariinnermik pilersitsisuugami aappariinnik ‘ataqatigiilersitsisarpoq’. (Markusi 10:9) Aappariinnermut tunngatillugu nunami inatsisaasut Guutip inatsisaanut tamatigut naapertuuttanngillat Jehovamulli kiffaasut tamatumunnga tunngatillugu Guutitut isiginnittaaseqartariaqarput. Tamanna pimooruttariaqartutut isigaarput katikkatta Guutimut kiffartortuunerput kiffartortuunnginnerpulluunniit apeqqutaatinnagu.

2. Allaaserisami matumani apeqqutit suut sammineqassappat?

² Aappariittut ingerlalluaraanni pilluangaartoqarsinnaavoq. Aappariittulli ingerlanerlioraanni qanoq iliortoqarsinnaava? Aappariittut ingerlanerlioraanni ilumut ingerlallualertoqarsinnaava? Aappariit aappariittut ingerlanerliortut qanoq ikiorserneqarsinnaappat?

PILLUASSAPPAT PILLUAASSAPPALLUUNNIIT?

3, 4. Aappassamik toqqaanitsinni silatusaanngikkutta qanoq kinguneqarsinnaava?

³ Aappariit kristumiut ingerlalluaraangamik pilluangaartarput tamannalu Jehovamut ataqqinaataasarpoq. Aappariittulli ingerlanerliorneq aliasuutaangaarsinnaavoq ajornerusumilluunniit kinguneqarsinnaalluni. Kristumiut aappartaarusuttut Guutip najoqqutassiaanik maleruaasut aappariittut aallartilluarnerusinnaapput. Kristumiuli aappassaminik silatusaarnani toqqaaguni pakatsisinnaallunilu aliasussinnaavoq. Assersuutigalugu inuusuttut aappariittut akisussaaffeqalernissamut piareersimanatik aappassiaqalertarput. Allat internetti aqqutigalugu aappassiartaartarput, tamannalu pissutigalugu katiaarpallaartarlutillu sivitsunngitsoq aappariittut pilluaatsunngorsinnaasarput. Allat aappassiariinnerminni ingasattumik ajortuliortarput  aappariilertarpullu imminnut ataqqivallaaratik.

⁴ Kristumiut ilaat “Naalakkami” katinnginnamik aappartaamillu Jehovamut kiffaannginnera pissutigalugu naalliuuteqartarput. (1 Korinthimiut 7:39) Illit taamatut atugaqaruit Guuti isumakkeerfigeqqullutit ikioqqullutillu qinnuigisariaqarpat. Jehovap kukkussutigisimasatta kingunerinut illersortanngilaatigut, taassumali inuk eqqortuliorusukkaangat kukkussutiminillu nassuerutiginnikkaangat atukkami naammagalugit atornissaannut nakussatsissinnaavaa. (Tussiaat 130:1-4) Taamaattumik sapinngisat tamaat Guutip iluarisaanik iliuuseqarniartuarit taava Jehovami ‘nuannaarneq nakuussutigissavat’. — Nehemia 8:10.

AAPPARIINNERLIORAANNI

5. Aappariittut pilluaakkaanni qanoq eqqarsartoqarnaveersaartariaqarpa?

⁵ Aappariittut pilluaatsut ilaat immaqa ima eqqarsarput: ‘Aappara aappariinnassavara? Allamut katikkuma immaqa pilluarnerussaanga!’ Taama eqqarsartut immaqa takorloorpaat avinnissartik imalu eqqarsarlutik: ‘Kiffaanngissuseqaleqqissaanga! Avissinnaavunga? Biibili naapertorlugu avinngikkaluarlunga aappannit averusersinnaavunga inuuneralu nuannaarutigeqqilerlugu.’ Kristumiup taamatut eqqarsarani pissutsilluunniit qanoq issinnaasimagaluarnerat takorloornagu pissutsit atukkani ajunnginnerulersinniartariaqarpai Guutip najoqqutassiaanik maleruaanermigut.

6. Jiisusip oqaasii Matthæusi 19:9-miittut qanoq paasisariaqarpat?

⁶ Kristumiu avikkuni aatsaat kateqqissinnaavoq Biibili naapertorlugu katinnissamut kiffaanngissuseqaruni. Jiisusi ima oqarpoq: “Kinguaassiuutitigut inuunerlunnerunngitsumik peqquteqarluni avittoq allamillu nuliartoq allasiorpoq.” (Matthæusi 19:9) Kinguaassiuutitigut inuunerlunnernut ilaapput allasiorneq kinguaassiuutitigullu inuunerlunnerit ingasattut allat. Kristumiu Biibilimik tunngaveqanngitsumik avinniarluni eqqarsartoq Guutimut ikioqqulluni siulersoqqullunilu qinuguni ajunnginnerussaaq.

7. Aappariit kristumiut avippata inuit qanoq eqqarsarsinnaappat?

⁷ Aappariit avippata imaassinnaavoq namminneq inuttut Guutimut attaveqarluanngitsut. Apustili Paulusi pingaarutilimmik ima aperivoq: “Qanormi ililluni Guutip ilagiissai isumagisinnaassavai nammineq inoqutini aqussinnaanngikkunigit?” (1 Timotheusi 3:5) Aappariit kristumiuunerarpata avillutillu immaqa inuit eqqarsassapput taakku namminneq oqaluussissutigisartik malillugu inuunngitsut. — Romamiut 2:21-24.

8. Aappariit kristumiut averuserniarlutik avinniarlutilluunniit aalajangerpata suna pissutaasimassava?

⁸ Aappariit kristumiut Biibilimik tunngaveqanngitsumik averuserniarlutik avinniarlutilluunniit  pilersaarunik Jehovamut attaveqarluarsimassanngillat. Imaassinnaavoq aappaa imaluunniit tamarmik najoqqutassianik Biibilimiittunik maleruaanngitsut. Marluullutik Jehova uummatikkut iluunngarlutik tatigisuugunikku aappariiginnassagaluarput. — Atuakkit Ussatit 3:5, 6.

9. Kristumiut ilaat avinniapallanngitsut qanoq pilluaqquneqarsimappat?

⁹ Aappariippassuit ima ajornartorsiortigisimapput allaat eqqarsalersimallutik aappariinnertik iluatsinnavianngitsoq. Taamaakkaluartorli aappariit taakku ilaat aappariinnerminni iluatsissimapput. Kristumiut aappariittut ajornartorsiutillit qimanniapallanngitsulli pilluaqqusaangaartarput. Assersuutigalugu uiusoq nalunaajaasuunngippat qanoq pisoqarsinnaanera eqqarsaatigiuk. Apustili Petrusi ima allappoq: “Ilissi nuliaasusi uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit Guutimik mianerinnillusi inuunersi minguitsoq takulerunikku.” (1 Petrusi 3:1, 2) Nuliaasup pissuserissaarnera pissutigalugu uiusoq sallusuissummiilersinnaavoq. Kristumiut avinnatik aappariiginnartut Guuti ataqqinartittarpaat ilaqutarinniittullu tamarmik pilluaqquneqarsinnaapput.

10, 11. Allannguinerit suut aappariittut unamminiarnartuusinnaappat, kristumiulli suna qularutiginngilluinnarsinnaavaa?

¹⁰ Kristumiut aappaqanngitsut amerlanerit katinniaraangamik Jehovamit iluarisaajumallutik kristumiumut kuisimasumut katittarput. Taakkuali atugarisaannik allanngortitsisunik ilimaginngisamik pisoqariataarsinnaasarpoq. Assersuutigalugu uiusoq nuliaasorluunniit misigissutsikkut ajornartorsiungaalersinnaavoq. Imaluunniit uiusoq nuliaasorluunniit oqaluussisartutut unittoorsinnaavoq. Tamatumunnga assingusumik Linda, oqaluussisartoq aallussilluartoq anaanaasorlu asannittoq, misigisaqarsimavoq. * Soriarsinnanngitsutut misigivoq uini eqqunngitsumik iliortalermat, uialu iliuuserisaminik peqqissimissutiginninnginnami ilagiinnut ilaajunnaarsitaavoq. Kristumiut Lindatut atugaqartut aappariiginnarnissaminnut neriunartoqasorinngikkunikku qanoq iliussappat?

¹¹ Immaqa ima eqqarsarsinnaavutit: ‘Qanorluunniit pisoqassagaluarpat aappara aappariinnassavara?’ Allap aalajangiissussinnaanallu aalajangiissuttussaanngilaatit. Aappariittulli ajornartorsiuteqaraluarluni aappariikkunnaannginnissamut pissutissaqarluarpoq. Kristumiut aappariinnerminni ajornartorsiortut nalunngeqatiginnissusertillu pissutigalugu aapparminnik qimatserusunngitsut Guutimut assut erlinnartuupput. (Atuakkit 1 Petrusi 2:19, 20). Jehovap oqaatsini anersaanilu atorlugit kristumiut aappariinnerminnik nakussatsitsiniarlutik sapinngisartik tamaat iliuuseqarpata ikiussavai.

ILINNIK IKIUINISSAMUT PIAREERSIMAPPUT

12. Utoqqaanertanut ikioqqugutta qanoq isigineqassasorissanngilagut?

¹² Aappariittut ajornartorsiorussi kristumiut misilittagaqarluartut ikiortiserisinnaavasi. Utoqqaanertat ilagiinni paarsisuupput, Guutillu najoqqutassiaanik Biibilimiittunik misissueqatiginissat nuannaarutigissavaat. (Apustilit Suliaat 20:28; Jaaku 5:14, 15) Aappariittut aappariinnissinni ajornartorsiuteqarlusi utoqqaanertanut ikioqqullusi saaffiginnikkussi utoqqaanertanit ataqqineqarunnaassasorissanngilasi. Guutimit ilumut iluarisaajumallusi taamaaliorassi asanerulissallusilu ataqqinerulissavaasi.

13. 1 Korinthimiut 7:10-16-imi qanoq siunnersorneqarpugut?

 ¹³ Utoqqaanertat kristumiunik ilaqutariinni assigiinngitsumik upperisaqarfiusuniittunik ikiuissagaangamik Paulusip siunnersuutaa una innersuussutigisarsinnaavaat: “Aappaqartut peqqusiffigaakka, uannit pisuunngitsumik Naalakkamilli pisumik, nuliap uini qimassanngikkaa — qimassimaguniullu aappaqanngitsuujuassaaq uiniluunniit isumaqatigalugu uterfigissallugu — uiusuttaarlu nuliani avissanngilaa. . . . Illimmi, arnaq, qanoq ilillutit ilisimasinnaaviuk uiit annaassinnaanerit? Illilluunniit, angut, qanoq ilillutit ilisimasinnaaviuk nuliat annaassinnaanerit?” (1 Korinthimiut 7:10-16) Aappaasoq Jehovamut kiffanngoraangat pilluaqqussutaangaartarpoq!

14, 15. Suna pissutigalugu nuliaasup kristumiup uini qimanniarlugu aalajangersinnaava aamma sooq tamanna qinunikkut eqqarsaatigeqqissaartariaqarpaa?

¹⁴ Nuliaasup kristumiup uini sumik pissuteqarluni ‘qimassinnaavaa’? Ilaat pissutissaqavillutik aapparminnik qimatsisimapput. Assersuutigalugu uku pissutigalugit: Ilaquttami timikkut pisariaqartitaannik matussuseerusunnginnera allaat ilaquttaminik aningaasaqarniarnikkut imaluunniit nerisassaqarniarnikkut pilersuerusunnginnera imaluunniit nakuusertarnera allaat aappaasup inuuneranik navianartorsiortitsineranik imaluunniit aappaasup Guutimut kiffartorniarneranik akornusiineranik pissuteqartumik.

¹⁵ Aapparput aappariinnassanerlugu qimassanerluguluunniit nammineq aalajangissavarput. Kristumiup tamatumunnga tunngatillugu pissutsit atukkani qinunikkut ilumoorluni eqqarsaatigeqqissaartariaqarpai. Assersuutigalugu aappaasoq nalunaajaasuunngitsoq nuliami Jehovamut kiffartorneranik kisimi akornusersuiva? Imaluunniit kristumiu nammineq anersaakkut ittunik sammisaqanngitsoortarpa soorlu Biibilimik atuaqqissaanngitsoortarpa, ataatsimiigianngitsoortarpa oqaluussinermilu peqataanngitsoortarpa?

16. Sooq kristumiu aapparminit averuserniarluni avinniarluniluunniit aalajangerniapallassanngila?

¹⁶ Avinniarluta aalajangerniapallassanngilagut. Guutimut attaveqarnerput erlinnartutut isigaarput aamma aappariinneq Guutimit tunissutisiaasoq qujamasuutigalugulu ataqqivarput. Jehovamut kiffaagatta aqqa illernartoq illernarsisikkusupparput aalajangerniapallakkumanngilagullu taassuma tusaamanerlunneqaatigiligassaanik. Tamanna pissutigalugu aapparput ilumuunngitsuliorfiginavianngilarput imaluunniit qimannissaa pilersaarutiginavianngilarput allamut katissinnaaniassagatta. — Jeremia 17:9; Malaki 2:13-16.

17. Qaqugukkut oqartoqarsinnaava kristumiu ‘Guutip eqqisseqqullugu qaaqqugaa’?

¹⁷ Kristumiu nalunaajaasuunngitsumik aappaqaruni aappariiginnaqqullutik ilumoorluni sapinngisani tamaat iliuuseqartariaqarpoq. Kristumiuli aappani aappariinnarniarlugu sapinngisani tamaat iliuuseqaraluarluni aapparminit nalunaajaasuunngitsumit avinniarneqaruni pisuusutut misigisimasariaqanngilaq.  Paulusi ima allappoq: “[Uppertuunngitsoq] avikkumaguni taamaaliorli, taamaattutigut qatanngut angut qatanngulluunniit arnaq pinngitsaalisaanngillat, Guutip qaaqqummasi eqqisseqqullusi.” — 1 Korinthimiut 7:15. *

JEHOVA TATIGIUK

18. Appariiginnarnissaq anguniarlugu iliuuserisat iluatsinngikkaluartut qanoq pisoqarsinnaava?

¹⁸ Aappariittut ajornartorsiuteqaraangatta sapiissuseqaqqulluta Jehova qinnuigisariaqarlugulu tamatigut tatigisariaqarparput. (Atuaruk Tussiaat 27:14). Linda siusinnerusukkut eqqaaneqartoq qanoq ingerlava? Taanna ukiorpassuarni aappanilu aappariiginnarnissartik anguniarlugu sapinngisani tamaat iliuuseqartarsimagaluartoq naggataatigut avipput. Linda asulersuaq iliuuseqartarsimava? Ima oqarpoq: “Naamerluinnaq, iliuutsikka kikkunnut tamanut nalunaajaataalluarput. Ilerasuuteqanngilanga. Tamanilli pingaarnerpaavoq ukiut taakku ingerlaneranni panitta sallusuissummik pigiliussinera. Jehovamut nalunaajaasunngorpoq aallussilluartoq.”

19. Aappariiginnarnissaq anguniarlugu iliuuseqarneq sumik kinguneqarsinnaava?

¹⁹ Qatanngutip arnap Marilynimik atillip Guutimik tatiginnillunilu aappariiginnarnissartik anguniarlugu immikkut iliuuseqarsimanini nuannaarutigaa. Ima oqarpoq: “Uiga pilersorniarluta iliuuseqanngimmat Jehovamullu attaveqarnera navianartorsiormat averusernissannut ussernartorsiortarpunga. Uiga utoqqaanertatut kiffartortuusimagaluartoq silatusaarnani niuernermut tunngasunik sammisaqalerpoq. Ataatsimiigianngitsoortalerpoq oqaloqatigiissaavippugullu. Peqqarniisaarniat illoqarfitsinnik saassussinerat pissutigalugu ima annilaangatigaanga matoqqasunngorlunga. Tamatumali nalaani paasilerpara ajornartorsiuteqarnitsinnut uanga nammineq aamma pisooqataallunga. Oqaloqatigeeqqittalerpugut ilaqutariittullu atuaqqissaaqatigeeqqittalerluta ataatsimiigiaqqittalerlutalu. Utoqqaanertat assut inussiarnerlutillu ikiuukkumatupput. Aappariinnerput nuannerseqqippoq. Piffissap ingerlanerani uiga ilagiinni kiffartornermut immikkut pisinnaatitaaffeqaqqilerpoq. Piffissaq tamanna erloqinartorsiorfiuvoq ajunngitsumilli kinguneqarpoq.”

20, 21. Aappariinnitsinnut tunngatillugu suna aalajangiusimasariaqarparput?

²⁰ Aappaqaraluarutta aappaqanngikkaluaruttaluunniit sapiissuseqartuartariaqarlutalu Jehovamik tatiginnittuartariaqarpugut. Aappariittut ajornartorsiuteqaraangatta ajornartorsiutit aaqqinniarlugit sapinngisarput tamaat iliuuseqartariaqarlutalu eqqaamasariaqarparput aappariit ‘marluujunnaarlutik uiniusut ataaseq.’ (Matthæusi 19:6) Aamma aappat allamik upperisalik ajornartorsiuteqaraluarlusi najuinnarukku immaqa aappat Jehovamut kiffanngorsinnaavoq. Tamanna nuannissagaluaqaaq, ilaa?

²¹ Atukkavut qanorluunniit ikkaluarpata ilagiit avataanniittunut nalunaajaataalluartumik pissuseqartuartariaqarpugut. Aappariittut ima ajornartorsiuteqartigigutta misigalutalu allaat aapparput qimattariaqarlugu pissutiginiakkavut qinunikkut ilumoorluta eqqarsaatigeqqissaartariaqarpavut, aamma tamatumunnga tunngasunik Biibilimi misissueqqissaartariaqarlutalu utoqqaanertanut ikiortissarsiortariaqarpugut. Pingaarnerpaamilli iliuutsitsigut tamatigut Jehovap Guutip nuannaartinnissaa aalajangiusimasariaqarlugulu aappariinnermik tunissutisiaasumik nuanningaartumik ilumoorluta pingaartitsinerput ersersittariaqarparput.

[Quppernerup ataani ilanngussat]

[Atuaqqissaarnermi apeqqutit]

[Qupp. 20-mi issuagaq]

Kristumiut aappariittut ajornartorsiutillit qimanniapallanngitsulli pilluaqqusaangaartarput

[Qupp. 22-mi issuagaq]

Jehova qinnuigisariaqarlugulu tamatigut tatigisariaqarparput

[Qupp. 19-mi assiliartaq]

Jehovap kristumiut aappariinnerminnik nakussatsitsiniarlutik sapinngisartik tamaat iliuuseqartut pilluaqqusarpai

[Qupp. 21-mi assiliartaq]

Ilagiit kristumiut aqqutigalugit tuppallersarneqartoqarsinnaallunilu anersaakkut ikiortittoqarsinnaavoq