Atoqatigiinneq pillugu apeqqutinut qulinut akissutit

1 Paratiisimi “paarnaq nereqqusaanngitsoq” pineqarmat atoqatigiinneq pineqarpa?

▪ Akissut: Inuppassuit taamatut isumaqarput. Tamannali Biibilimi ilinniartitsissutigineqanngilaq.

Manna eqqarsaatigiuk: Eva pinngortinneqanngikkallarmalli Guutip Adami oqarfigaa ‘orpiup ajunngitsumik ajortumillu ilisimalersitsisup’ paarnaanik nerissanngitsoq. (1 Mosesi 2:15-18) Adami kisimiimmat inerteqqut tamanna atoqatigiinnermut tunngasuusimasinnaanngilaq. Aammami Guutip ersarissumik peqqussuteqarluni Adami Evalu ‘kinguaassioqqullugit amerliartoqquai nunarsuaq tamakkerlugu’. (1 Mosesi 1:28) Guutip asannittup inuit taakku marluk ‘nunarsuaq tamakkerlugu amerliartoqqoqqaariarlugit’ — taamaattoqassappallu soorunami atoqatigiittariaqarput — kingornatigut oqarnermisut iliormata toqumut eqqartuutissanerpai? — 1 Johannesi 4:8.

Aamma Biibilip allassimaqqaarfii naapertorlugit Eva kisimiitsilluni “paarnaanik tigusivoq nerillunilu”. Kingusinnerusukkullu Evap ‘uini tunivaa; taannalu aamma nerivoq’. — 1 Mosesi 3:6.

Aammami Adami Evalu atoqatigiillutik kinguaassioramik avoqqaarineqanngillat. (1 Mosesi 4:1, 2) Erseqqippoq paarnaq Adamip Evallu nerisaat taakkua atoqatigiinnerannut assersuutaanngitsoq, tassaasorli paarnavik orpimmi naasartoq.

2 Atoqatigiinnermik nuannaaruteqarneq Biibilimi inerteqqutigineqarpa?

▪ Akissut: Biibilip atuagartaa siulleq naapertorlugu Guutip inuit marluk siulliit pinngortippai “tassaatillugit angut arnarlu”, nalunaarporlu piliani “ajunngingaartut”. (1 Mosesi 1:27, 31) Kingusinnerusukkut Guutip Biibilimik allattut ilaat isumassarsitillugu uiusunut ima allatsippaa: “Tipaatsuutigiuk inuusunninni nuliarilikkat . . . asanninnera angisuumik nuannaarutigiuaruk [Taassuma iviangii putussutigisaannakkit, NV].” (Ussatit 5:18, 19) Biibilimi atoqatigiinnermik nuannaaruteqarnissaq inerteqqutigineqarpasippa?

 Erseqqippoq Guutip kinguaassiuutit pinngortissimagai kinguaassiornissaq ajornarunnaarsiinnarnagu aammali aappariit asaqatigiinnerminnik tunniusimaqatigiinnerminnillu nuannaarutiginnissinnaanngortillugit. Angutip arnallu, aappariilluarlutik imminnut qanittumik attaveqartut, timikkut misigissutsikkullu pisariaqartitaat atoqatigiinnikkut matussuserneqarsinnaapput.

3 Angutip arnallu katissimanatik inooqatigiinnerat Biibili naapertorlugu ajunngila?

▪ Akissut: Biibilimi erseqqissumik oqaatigineqarpoq ‘Guutip eqqartuukkumaarai kinguaassiuutitigut inuunerluttut’. (Hebræerit 13:4) ‘Kinguaassiuutitigut inuunerlunnermut’ grækerit oqaasiat porneiʹa isumaqartorujussuuvoq. Oqaaseq taanna atorneqaraangat pineqartarput katissimanani atoqatigiinnerit qanoq ittulluunniit. * Taamaattumik angutip arnallu katissimanatik inooqatigiinnerat Guutip isaani eqqunngitsuliornerussaaq, aamma pissiariit kingusinnerusukkut katissamaaraluarpataluunniit.

Inuit marluk qanorluunniit asaqatigiitsigigaluarpata Guutip piumasaraa kateqqaarlutik atoqatigiissasut. Guutip pinngortippaatigut asanninnermik ersersitsisinnaalersilluta. Asanninneq taassuma pissuseraa pingaarneq. Taamaattumik angutip arnallu katissimasut atoqatigiinnissaat taamaallaat akuerigamiuk pissutissaqarluarsimassaaq. Allaaserisami tulliuttumi tamanna itisilerneqassaaq.

4 Arlalinnik aappaqarnissaq akuerineqarpa?

▪ Akissut: Angutip ataasiinnaanngitsumik nuliaqarsinnaanera Guutip piffissami aalajangersimasumi akuerisimavaa. (1 Mosesi 4:19; 16:1-4; 29:18–30:24) Guutili ileqqumut tamatumunnga aallarniisuunngilaq. Guutip Adami nuliassaanik ataasiinnarmik tunivaa.

Guutip Jiisusi Kristusi aappariinnermut aallaqqaammulli najoqqutassiaminik, tassa ataasiinnarmik aappaqarsinnaanermik, atuutilersitseqqinnissaanut piginnaatippaa. (Johannesi 8:28) Aappariinneq pillugu apeqquteqartoqarmat Jiisusi akivoq: ‘Pinngortitsisup angut arnarlu pinngortippai oqarlunilu: “Tamanna pillugu angutip ataatani anaananilu qimassavai nulianilu attavigalugu, taakkulu marluk uininngussapput ataaseq.”’ — Matthæusi 19:4, 5.

Guutip kingusinnerusukkut Jiisusip ajoqersugaasa ilaat allatsippaa: “Angut kinaluunniit nuliaqassaaq arnarlu kinaluunniit  ueqarluni.” (1 Korinthimiut 7:2) Biibilimi aamma allassimavoq angut nulialik ilagiinni kristumiuni immikkut akisussaaffilerneqartoq arnamut ‘ataatsimut uiussasoq’. — 1 Timotheusi 3:2, 12.

5 Aappariit naartunaveersaatinik atuigunik eqqunngitsuliorpat?

▪ Akissut: Meeqqiortoqarnissaa Jiisusip naalakkiutiginngilaa. Aamma ajoqersugai taamatut ittumik peqqussuteqanngillat. Biibilimi naartunaveersaarnissamut inerteqqummik allassimasoqanngilaq.

Taamaattumik aappariit meeqqiorniarnerlutik meeqqiorniannginnerlutilluunniit namminneq aalajangersinnaavaat. Aamma namminneq aalajangersinnaavaat qassinik aamma qaqugu meeqqiussanerlutik. Aappariit naartunaveersaammik, naartumik katatsitsisanngitsumik, atuissagunik tamanna namminneq aalajangigassaraat. * Kimilluunniit tamanna pillugu assuarineqartariaqanngillat. — Romamiut 14:4, 10-13.

6 Naartuersinneq eqqunngitsuliornerua?

▪ Akissut: Inuuneq Guutip isaani illernartuuvoq, aamma naartu inuttut uumassuseqartutut isigaa. (Tussiaat 139:16) Guuti nalunaarpoq naartumik ajoqusiisoq akisussaatinneqassasoq. Naartumik toqutsisoqarpat tamanna taassuma isaani inuarneruvoq. — 2 Mosesi 20:13; 21:22, 23.

Taavami erninermut atatillugu ajornartoortoqarpat aappariit qinersisariaqalerlutik anaanaq meerarluunniit annaanneqassanersoq? Taamaattoqartillugu aappariit aalajangertariaqarpaat taakkua arlaat kina annaanniarneqassanersoq. *

7 Avinnissaq Biibilimi akuerineqarpa?

▪ Akissut: Aap, avinnissaq Biibilimi akuerineqarpoq. Jiisusilli oqarnera naapertorlugu ataasiinnarmik akuerineqarsinnaasumik pissuteqarluni avittoqarsinnaavoq. Oqarpoq: “Kinguaassiuutitigut inuunerlunnerunngitsumik peqquteqarluni avittoq allamillu nuliartoq allasiorpoq.” — Matthæusi 19:9.

Guutip avinneq namminissarsiornermik pissuteqartoq uumigaa. Taassumalu inuup aappani Biibili naapertorlugu qimannissaanut pissutissaqarani qimappagu akisussaatissavaa, ingammik allamik aappaqalerniarluni taamaaliorpat. — Malaki 2:13-16; Markusi 10:9.

8 Guutip anguteqatinik arnaqatinillu atoqateqartarneq akueraa?

▪  Akissut: Biibilimi kanngunartuliorneq assuarineqarpoq, tamatumunngalu ilaapput anguteqammik arnaqammilluunniit aappaqarnerit. (Romamiut 1:26, 27; Galatiamiut 5:19-21) Biibilimi erseqqissumik allassimavoq Guutip anguteqammik arnaqammilluunniit atoqateqartarneq akuerinngikkaa, aammali nalunngilarput: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” — Johannesi 3:16.

Kristumiut ilumoortut anguteqammik arnaqammilluunniit atoqateqartarneq akuerinngikkaluarlugu tulliminnut tamanut asannittuliortarput. (Matthæusi 7:12) Guutip kissaatigaa ‘kikkuugaluartulluunniit ataqqissagivut’. Taamaattumik kristumiut ilumoortut anguteqammik arnaqammilluunniit atoqateqartartunut akeqqersimaartuunngillat. — 1 Petrusi 2:17.

9 Oqarasuaatikkut tiinganeq, sms-ikkut sakkunnerineq aamma internettikkut tiinganeq ajorpa?

▪ Akissut: Oqarasuaatikkut tiinganermi atoqatigiinneq oqaloqatigiissutigineqartarpoq imaluunniit tiingasulersaarutit eqqartoqqissaarneqartarput. “Sms-ikkut sakkunnerisoqartarpoq” oqarasuaat angallattagaq atorlugu assinik allatanilluunniit allanut nassiussuisoqarluni. Internettikkut tiinganeq tassaavoq internetti atorlugu tiingasulersaarutinik eqqartueqatigiinneq.

Tiingasulersaareriaatsit mutit tamakku Biibilimi aalajangersimasumik eqqaaneqanngillat. Oqaatigineqarporli: “Kinguaassiuutitigut inuunerlunneq mingunnartullu suulluunniit piumatuussuserlu taaneqassanngillalluunniit akornassinni, illernartut tamakku ileqqussarinngimmatigit. Ileqqussaanngilartaaq kannguttaanneq sianiitsunillu quiasaarnipalaanilluunniit oqalunneq; ileqqussaq tassa qujaniarneq.” (Efesosimiut 5:3, 4) Oqarasuaatikkut tiinganerit, sms-ikkut sakkunnerinerit internettikkullu tiinganerit atoqatigiinnermik eqqunngitsumik isiginnittaaseqalersitsisarput inuillu ilaannik aappariinnerup avataatigut atoqatissarsiortitsilersarlutik. Tamakkuninnga sammisaqartarneq noqissinnaanngortitsineq ajorpoq, namminissarsiortumilli pilerissuseqarnerulersitsisarpoq.

10 Tissassarneq Biibilimi qanoq allassimasoqarpa?

▪ Akissut: Tissassarluni imminut inertinneq Biibilimi immikkut eqqaaneqanngilaq. Biibilimili kristumiut ima naalakkerneqarput: “Taamaattumik avatisi nunamiusut toqulersissavasi kanngunartuliorneq, mingunnartuliorneq, tiinngartuneq.” — Kolossemiut 3:5, NV.

Tissassarneq atoqatigiinnermik kukkusumik namminissarsiortumillu isiginnilersitsisarpoq. Biibilimi neriorsoqqissaarneqarpugut Guutip inuit ileqqupilummik tamatuminnga ajugaaffiginninniarlutik ilungersorlutik iliuuseqartut ‘pissaanermik asseqanngitsumik’ tuniumaarai. — 2 Korinthimiut 4:7; Filippimiut 4:13.

[Quppernerup ataani ilanngussat]