“Eqqaamavaa pujualaasugut”
Guutimut Palligunniarit
“Eqqaamavaa pujualaasugut”
“I SUMAQANNGIKKALUARPUNGA Jehovap isumakkeerfigilluinnarsinnaagaanga; isumaqaraluarpunga inuunerma sinnerani artorsaatigissallugu.” Arnaq kristumiu siornatigut kukkussutigisaminut tunngatillugu taama allappoq. Aap, ilerasunneq artorsaataangaartarpoq. Biibilimili tuppallersaatissaqarpoq ajortuliortut peqqissimisut oqiliallaatigisinnaasaannik. Assersuutigalugu tussiaasiortup Daavip allatai Tussiaat 103-miittut malugikkit.
Daavip nalunngilaa ‘Jehova naakkinnillunilu unnerluutiginnittanngitsoq naassaanngitsumik’. (Versit 8-10) Jehova nallittuinissaminut tunngavissarsigaangami tamakkiisumik taamaaliortarpoq. Daavip taalliortuusup oqaatsinillu atuillaqqissuusup Guutip nallittuinerata qanoq killeqanngitsiginera ersersinniarlugu pingasunik assersuusiorpoq.
“Soorlu qilak nunamit qutsinnerungaartoq, taama atsigaaq nallittuinera mianerinnitsiminut.” (Versi 11) Unnuakkut qilammut qiviaraangatta nunarsuaq ullorissanit qanoq ungasitsigisoq paasineq ajorparput. Taama oqarnermigut Daavip erseqqissarpaa Jehovap nallittuingaarnera, pissuseq asanninneranit aallaaveqartoq. Guutip ‘mianerinnitsini’ — Biibilimik misissueqqissaartartup oqarneratut “maniguuttut qamanngalu pisumik oqartussaanerminut ataqqinnittut” — nallittortarpai.
“Soorlu kangia kitaanit ungasissoq, taamatut unioqqutitsinivut ungasillisippai uatsinnit.” (Versi 12) Tamanna qanoq ungasitsigaa? Takorluuisinnaanerput atorlugu ungasinnerpaaq. Biibilimik qinerlerfissiami tamanna ima allaaserineqarpoq: “Takorluuisinnaanerup suluisa timmissussisinnaanerisut isorartutigisumik timmigit; avataarsuatigut kangimut timmiguit sulussornerit tamaasa kitaa ungasinnerulissavat.” Tamatumani Daavip oqaluttuuppaatigut Guutip ajortitsinnik isumakkeerfigigaangamitigut ajortuliavut takorloorsinnaasatsitut ungasitsigisumut uagutsinnit ungasillisittarai.
“Soorlu ataataasup qitornani nallittortarai, taamatut [Jehovap] nallittortarpai mianerinnitsini.” (Versi 13) Daavi nammineq qitornaqarami ataataasup asannittup misigissusii nalunngilai. Ataataasup taamaattup qitornani misiginneqatigisarpai, ingammik artorsaraangata. Daavip uppernarsaavigaatigut Ataatatta asannittup qilammiusup qitornani nunarsuarmiittut nallittortarai, ingammik ajortuliatik pissutigalugit ‘uummatikkut peqqissimigaangata artorsaateqangaaraangatalu’. — Tussiaat 51:19.
Taakkua pingasut assersuutigereerlugit Daavip ersersippaa Jehovap inunnik naammalluinnanngitsunik suna nallittuissutigilertaraa: “Nalunngilaami pinngortitaasugut, eqqaamavaa pujualaasugut.” (Versi 14) Jehovap nalunngilaa pujualannit pinngortitaasugut; qajannartuullutalu pisinnaasagut killeqartut. Ajortiliunitsinnik eqqarsaatiginnilluni — qamannga pisumik peqqissimigutta — ‘isumakkeerfiginnikkumasarpoq’. — Tussiaat 86:5.
Jehovap nallittuinera pillugu Daavip oqaasii atuarlugit killinneqaatigaagit? Arnap allaaserisap matuma aallaqqaataani issuarneqartup Guutip isumakkeerfiginnikkumasarnera pillugu Biibilimi allassimasut atuaqqissaartaleramigit ima oqarsimavoq: “Ilumut Guutimut palligussinnaallunga misigisalerpunga. Artorsaatigisara erloqissutigiunnaarpara.” * Guutip nallittuinera pillugu qanorlu illit nallittorneqarsinnaanerit pillugu paasisaqarnerorusuppit? Immaqa aamma illit artornartumit erloqisinneqarunnaarlutit misigissaatit.
[Quppernerup ataani ilanngussaq]
^ imm. 7 Takuuk atuakkami Kom nær til Jehova-mi kapitali 26, “En Gud som er ‘rede til at tilgive’”, Jehovap Nalunaajaasuinit saqqummersinneqartoq.
[Qupp. 31-mi Issuagaq]
“Ilumut Guutimut palligussinnaallunga misigisalerpunga. Artorsaatigisara erloqissutigiunnaarpara”
