‘Ilami Guutip ilisimassusiata itissusia!’
‘Ilami Guutip ilisimassusiata itissusia!’
“Ilami Guutip pisuussusiata ilisimassusiatalu siuneqassusiatalu itissusiat! Ilami eqqartuussinerisa paasiniarneq ajornassusii aqqutaasalu siunersissaanngissusii!” — ROMAMIUT 11:33.
1. Kristumiut kuisimasut immikkut pisinnaatitaaffigisaasa suna annerpaartaraat?
IMMIKKUT pisinnaatitaaffigisimasannit suna annerpaava? Immaqa ilinnut suliassiissutigineqarsimasoq ataqqineqarsimanerilluunniit eqqarsaatigaat. Kristumiunulli kuisimasunut Guutimut ilumoortutuamut, Jehovamut, qanittumik attaveqalersimanertik immikkut pisinnaatitaaffigisaasa annerpaartaraat. Tamatuma kingunerisaanik ‘taassumannga ilisimaneqarput’. — 1 Korinthimiut 8:3; Galatiamiut 4:9.
2. Sooq Jehovamik ilisarisimanninneq taassumanngalu ilisarisimaneqarneq immikkut pisinnaatitaaffiuppat taama angitigisut?
2 Sooq Jehovap ilisimalersimanera taassumanngalu ilisimaneqarneq immikkut pisinnaatitaaffiuppat taama angitigisut? Jehova qilammi nunarsuarmilu qutsinnerpaajummat, asasinilu sernissorlugillu illersortarmagit. Pruffiiti Nahumi isumassarsisinneqarluni ima allappoq: “[Jehova] ajunngitsuuvoq, ullormi annikilliorfimmi sernissuisoq; imminut qimarnguffissarsiortut isumassortarpai.” (Nahumi 1:7; Tussiaat 1:6) Aap, Guutimik ilumoortumik erneranillu Jiisusimik Kristusimik ilisarisimannilersimanerput naassaanngitsumik inuusinnaanitsinnut aalajangiisuuvoq. — Johannesi 17:3.
3. Guutimik ilisarisimanninneq qanoq paasisariaqarpa?
3 Jehovamik ilisarisimannilerneq aqqanik ilisimanninnerinnaanngilaq. Ikinngutitut ilisarisimalertariaqarparput suullu nuannarinerai suullu nuannarinnginnerai paasillugu. Aamma Guuti pillugu ilisimanninneq naapertorlugu inuuneq pingaaruteqangaarpoq, taamaalillutami ersersissavarput taanna ilisarisimallutigu. (1 Johannesi 2:4) Jehova ilisarisimallutigu oqarsinnaassagutta sulerisimanera kisiat nalunngiinnarnagu, aammattaarli sooq qanorlu taamaaliorsimanera nalunngittariaqarparput. Jehovap siunertaanik paasinninnerujartortilluta ‘Guutip ilisimassusiata itissusia’ tupigusuutiginerujartussavarput. — Romamiut 11:33.
Guuti siunertalik
4, 5. (a) Griikerit oqaasiat Efesosimiut 3:11-mi “aalajangiinera”-mik nutserneqartoq qanoq isumaqarpa? (b) Siunertap ataasiinnanngitsumik anguneqarsinnaaneranik assersuuteqarit.
4 Jehova Guutiuvoq siunertalik. Biibilimi eqqartorneqarpoq “pinngortoqanngikkallarneraniilli Guutip aalajangiinera”. (Efesosimiut 3:10, 11) Oqaaseq taanna qanoq isumaqarami? Griikerit oqaasiat uani “aalajangiinera”-mik nutserneqartoq Biibilimi versimi tamatumani atorneqarnerani isumaqarpoq ‘siunertaq’, imaluunniit siunnerfik, arlalitsigut anguneqarsinnaasoq.
5 Assersuutigalugu inuk aalajangersimasumik siunnerfeqarluni angalarusuppoq. Apuunnissaq siunertaraa, imaluunniit siunniussaraa. Ilaaffigisinnaasaanut sukkuussaneranullu tunngatillugu assigiinngitsunik periarfissaqarsinnaavoq. Aqqutigissallugu aalajangikkamigoortillugu sila, angallattorsuit aqqusinikkulluunniit assiisimanerit akornutaaleriataarsinnaapput, allakkoortariaqalersillugu. Qanorluunniit allannguisariaqarsimagaluaruni ornitaminut apuukkuni siunnerfini angusimassavaa.
6. Jehova siunertani naammassiumallugu qanoq allannguisinnaassuseqarsimava?
6 Taamatuttaaq Jehova naassaanngitsumik siunertani naammassiumallugu allannguerujussuarpoq. Pinngortitami silassorissusillit piumasamittut iliorsinnaanerat innimigiitigalugu piumasaminik naammassinneriaatsini eqaatsumik naleqqussarpaa. Assersuutigalugu sammeriartigu Jehova kinguaassamut neriorsuutigisamut tunngatillugu siunertaminik qanoq naammassinnittoq. Jehovap inuit siulliit aallaqqaammut ima oqarfigai: “Kinguaassiorlusi amerliartoritsi nunarsuaq tamakkerlugu ilissinnullu naalatsigitillugu.” (1 Mosesi 1:28) Naatsiivimmi Edenimi pikitsitsisoqarmat siunertaq nalunaarutigisaq taanna maangaannartinneqarpa? Naamerluinnaq! Pissutsit allanngormata Jehova siunertani naammassiumallugu ingerlaannaq allakkut ‘aqqutissarsivoq’. Siulittuivoq ‘kinguaassamik’ saqqummersoqarumaartoq pikitsitsisut ajoqusigaannik aaqqiisussamik. — 1 Mosesi 3:15; Hebræerit 2:14-17; 1 Johannesi 3:8.
7. Jehovap qanoq ittuunerminik oqaatiginninnera Mosesimik allakkat aappaanni 3:14-imiittoq qanoq ilinniarfigaarput?
7 Jehovap siunertani naammassiumallugu pissutsinut allanngortunut naleqqussaasinnaanera nammineq qanoq ittuunerminik oqaatiginninneranut naapertuuppoq. Mosesip imminut suliassiissutigineqartup naammassinissaanut akornutaasinnaasut Jehovamut saqqummiummagit, Jehovap ima kaammattorpaa: “‘Tassaavunga uangaasoq!’ Oqarporlu: ‘Israelikkut ima oqarfigissavatit: Ilissinnut aallartippaanga Uangaasup.’” (2 Mosesi 3:14) Uani ‘Tassaavunga uangaasoq’-mik nutserneqartoq Biibilip allassimaqqaarfiini isumaqarpoq Jehova siunertani naammassiniarlugu pisariaqarnera naapertorlugu sunngorsinnaasorluunniit. Tamanna apustilimit Paulusimit Romamiunut allakkani kapitali 11-mi alutornartumik assersuusiorneqarpoq. Tassani orpik olivenequt assersuutaasoq eqqartorpaa. Assersuummik tamatuminnga misissuineq, qilaliarnissamik nunarsuarmiluunniit naassaanngitsumik inuunissamik neriuuteqaraluarutta, Jehovap ilisimassusiata itissusianik paasinninnerulissutigissavarput.
Jehovap kinguaassamut siulittuutigisamut tunngatillugu siunertaa
8, 9. (a) Oliveneqummik assersuusiamik paasinninnissatsinnut tunngaviusut sisamat suut iluaqutigissavavut? (b) Apeqqut suna maanna sammissavarput, tamatumalu akissutaa Jehova pillugu sumik ersersitsiva?
8 Oliveneqummik assersuusiaq paasissagutsigu Jehovap kinguaassamut siulittuutigisamut tunngatillugu siunertaminik naammassinnikkiartuaarnera pillugu paaseqqaartariaqakkavut sisamaapput. Siullermik: Jehovap Aaperaat neriorsorpaa Aaperaap kinguaassaagut ‘nunarsuarmi inuiaat tamarmik pilluaqqunarsissasut’. (1 Mosesi 22:17, 18) Aappassaanik: Israelikkut, Aaperaamik siuaasaqartut, neriorsorneqarput tassaalersinnaasut “kunngeqarfik palaseqatigiinnik innuttalik”. (2 Mosesi 19:5, 6) Pingajussaanik: Uinikkut Israelikkut, tassa juutit, Missiarsi ajattormassuk Jehova ‘kunngeqarfimmik palaseqatigiinnik innuttalimmik’ pilersitsiniarluni allatut iliuuseqarpoq. (Matthæusi 21:43; Romamiut 9:27-29) Kiisalu: Jiisusi tassaavoq Aaperaap ‘kinguaava’ pingaarnerusortaq, allalli ‘kinguaamut’ tamatumunnga ilaasinnaaneq immikkut pisinnaatitaaffigilersimavaat. — Galatiamiut 3:16, 29.
9 Tunngaviusut sisamat taakkua saniatigut Saqqummersitani ersersinneqarpoq katillutik 144.000-iusut kunngitut palasitullu qilammi Jiisusi naalakkersueqatigissagaat. (Saqqummersitat 14:1-4) Taakku aamma ‘Israelip ernerinik’ taaneqarput. (Saqqummersitat 7:4-8) Taakkuli tamarmik uinikkut Israelikkuuppat? Tamatuma akissutaanit erserpoq Jehovap piumasaminik naammassinninnermini naleqqussaasarnera. Maanna misissoriartigu tamatuma akissutissarsiornerani apustilip Paulusip Romamiunut allagai qanoq iluaqutiginerivut.
“Kunngeqarfik palaseqatigiinnik innuttalik”
10. Uinikkut Israelikkut kisimik sumik neriuuteqaraluarpat?
10 Siusinnerusukkut eqqaaneqartutulli uinikkut Israelikkut kisimik tassaalernissamut “kunngeqarfik palaseqatigiinnik innuttalik inuiaqatigiillu illernartut” neriuutigaat. (Atuakkit Romamiut 9:4, 5) Kinguaassarli neriorsuutigisaq saqqummerpat susoqartussaasimava? Uinikkut Israelikkut anersaakkut Israelikkunnik 144.000-iusunik tamarmiusunik, Aaperaap kinguaavata pingaannginnerusortaalersussanik, pilersitsisinnaappat?
11, 12. (a) Qilammi kunngeqarfiup innuttassai qanga toqqarneqartalerpat, juutillu taamanikkut inuusut amerlanersaat qanoq periaaseqarpat? (b) Jehovap Aaperaamut kinguaassaasussat ‘tamarmiusut’ qanoq pilersippai?
11 Atuakkit Romamiut 11:7-10. Ukiuni hundredelinni siullerni juutit inuiattut Jiisusi ajattorpaat. Tamatuma kingorna Aaperaamut kinguaanngorsinnaaneq juutit kisimik pisinnaatitaaffigiunnaarpaat. Qilammi ‘kunngeqarfiup palaseqatigiinnik innuttallip’ innuttassai ukiumi 33-mi piinsip ulluani toqqarneqartalermata juutit eqqortumik iliorusuttut tusindilippannguinnaat qaaqqusissummik ilassinnipput. Taakku inuiannut juutiusunut tamarmiusunut sanilliullugit ikittuinnaapput, soorlu tassa ‘amiakkuusut’. — Romamiut 11:5.
12 Taavami Jehovap Aaperaamut kinguaassaasussat ‘tamarmiusut’ qanoq pilersissavai? (Romamiut 11:12) Apustilip Paulusip akissutaa una malugiuk: “Imaanngilaq Guutip oqaasia eqquutinngitsoorsimasoq. Israelimimmi pisut tamakkernatik [anersaakkut] Israelikkuupput, taamatullu aamma Aaperaap kinguaavi tamakkernatik taassumunnga [anersaakkut] qitornaapput . . . Imaanngilaq uinikkut taassumannga naggueqartut Guutip qitornarigai, neriorsuummili pineqartut taassumunnga kinguaarititaapput.” (Romamiut 9:6-8) Tassa Jehovap piumasaa naapertorlugu kinguaassamut ilaassagaanni uinikkut Aaperaamut kinguaajusariaqanngilaq.
Orpik olivenequt assersuutaasoq
13. Uku sumut assersuutaappat? (a) olivenequt, (b) sorlaa, (c) kanaartaa, aamma (d) avalequtai.
13 Apustili Paulusi nangilluni Aaperaap kinguaavinut ilaalerumaartut olivenequtip assersuutaasup avalequtaanut assersuuppai. * (Romamiut 11:21) Olivenequt kusanaqqissaartoq Guutip Aaperaamik angerfigeqatiginninneranut tunngatillugu siunertaminik naammassinninnissaanut assersuutaavoq. Orpiup sorlaa illernartuuvoq assersuutaallunilu Jehovamut anersaakkut Israelikkunnik pilersitsisumut. (Esaja 10:20; Romamiut 11:16) Kanaartaa Jiisusimut Aaperaap kinguaassaata pingaarnerusortaanut assersuutaavoq. Avalequtai ataatsimut isigalugit tassaapput Aaperaap kinguaassaata pingaannginnerusortaanut ilaasut ‘tamarmiusut’.
14, 15. Kikkut oliveneqummit kusanaqqissaartumit ‘napillugit peerneqarsimappat’, kikkullu ikkunneqarpat?
14 Oliveneqummik assersuusiami uinikkut juutit Jiisusimik ajattuisut olivenequtip avalequtaanut ‘napillugit peerneqarsimasunut’ assersuunneqarput. (Romamiut 11:17) Aaperaamut kinguaassaasussamut ilaasinnaagaluarnertik annaavaat. Kikkunnilli taarserneqassappat? Tamatuma akissutaa uinikkut juutiusunut, Aaperaamik siuaasaqarnerminnik usorsisimaarutiginnittunut, uppernanngilluinnarpoq. Johannesilli Kuisisup mianersoqqoreerpai Jehovap, piumaguni, ujaqqanik uummartitsilluni Aaperaat qitornassarsisinnaagaa. — Lukasi 3:8.
15 Taavami Jehova siunertani naammassiniarlugu qanoq iliorpa? Paulusip nassuiarpaa oliveneqummut kusanaqqissaartumut olivenequtip maaniinnaq naasup avalequtaanik ikkussisoqartoq avalequtit ‘napillugit peerneqartut’ taarserlugit. (Atuakkit Romamiut 11:17, 18). Tassa kristumiut tanitat inuianneersut, soorlu Romami ilagiinneersut ilaat, oliveneqummut kusanaqqissaartumut assersuutaasumut ikkunneqarpullusooq. Taamaalillutik Aaperaap kinguaassaanut ilaalerput. Aallaqqaammut angerutsimut immikkut ittumut tamatumunnga ilaanissaq olivenequtip maaniinnaq naasup avalequtaanut periarfissaanngikkaluarpoq. Jehovalli taakku anersaakkut juutiulernissamut periarfissippai. — Romamiut 2:28, 29.
16. Apustilip Petrusip anersaakkut inuiaat nutaat pilersinneqarnerat qanoq nassuiarpaa?
16 Apustilip Petrusip tamanna ima nassuiarpaa: “Ujarak taanna [Jiisusi Kristusi] ilissinnut uppertunut [anersaakkut Israelikkuusunut, aamma kristumiunut juutiunngitsunut] erlinnartuuvoq; uppinngitsunulli ujarak taanna illuliortut narrugisaat ujaraalerpoq teqeqquulluni tunngaviusoq, tassaalerporlu ujarak naakkiuffissaq, qaarsoq orluffissaq. . . . Ilissili tassaavusi eqqarleriit qinikkat, palaseqatigiit kunngikkormiuusut, inuit illernartut, innuttassarsiat, Guutip ilissinnik taartumit qaamasuminut tupinnaqisumut nooqqullusi qaaqqusisup pissaaneranik nalunaajaasussat, ilissi siornagut innuttarineqanngitsusi, maannali Guutimut innuttaasusi, ilissi nallittorneqanngikkaluartusi, maannali nallittorneqalersusi.” — 1 Petrusi 2:7-10.
17. Sooq Jehovap iliuuserisaa “pinngortitat pissuserisaannut paarlattumik” iliuusiua?
17 Jehova inuppassuit ilimaginngilluinnagaattut iliorpoq. Paulusi allappoq iliuusia tamanna “pinngortitat pissuserisaannut paarlattumik” iliornerusoq. (Romamiut 11:24) Tassa qanoq? Qaqutigoortuummat, aap pissusissamisuunngimmat, olivenequtip maaniinnaq naasup avalequtaanik oliveneqummut nammineq naatitamut ikkussisarneq, taamaattoq ukiuni hundredelinni siullerni olivenequtinik naatsitsisartut ilaat taamaaliortarput. * Tamatumunnga assingusumik Jehova qaqutigoorluinnartumik iliuuseqarpoq. Juutit isiginnittaasiat malillugu juutiunngitsut akuerineqarsinnaasumik inerititaqarsinnaanngillat. Jehovalli juutiunngitsut taakkorpiaat “inuiannut” Guutip naalagaaffiata inerititaanik inerititalinnut ilaalersippai. (Matthæusi 21:43) Corneliusip — Guutimik nalusunit kipineqanngitsunit Guutimut saattunit siullersaasup — taninneqarnera aallarniutigalugu ukiumi 36-mi juutiunngitsut kipineqanngitsut oliveneqummut assersuutaasumut ikkunneqarsinnaalerput. — Apustilit Suliaat 10:44-48. *
18. Uinikkut juutiusut ukiup 36-p kingorna sumik periarfissaqarpat?
18 Imaappa ukiup 36-p kingorna uinikkut juutiusut Aaperaap kinguaassaanut ilaasinnaajunnaartut? Naagga. Paulusi ima nassuiaavoq: “Allattaarli [uinikkut juutiusut] ikkunneqassapput uppinngissusertik aalajangiusimaniaannanngikkunikku, Guutimi pissaaneqarpoq ikkussoqqinnissaannut. Illimmi oliveneqummit maaniinnaq naasumit pinngortitat pissuserisaat malillugu attavigisannit kipineqarlutit pinngortitat pissuserisaannut paarlattumik oliveneqummut kusanaqqissaartumut ikkunneqaravit taava ajornannginnerungaassaaq avalequtiviit orpimmut nagguigisimasaminnut ikkunneqarnissaat.” — Romamiut 11:23, 24.
“Israelikkut tamarmik annaanneqassapput”
19, 20. Oliveneqummit assersuutaasumit ersersinneqartutut Jehovap suna naammassivaa?
19 Aap, Jehovap ‘Israeli Guutip pigisaanut’ tunngatillugu siunertaa tupinnangaartumik naammassineqarpoq. (Galatiamiut 6:16) Paulusip oqarneratut “Israelikkut tamarmik annaanneqassapput”. (Romamiut 11:26) Piffissaq Jehovap aalajangigaa nalliuppat anersaakkut “Israelikkut tamarmik” qilammi kunngiullutillu palasiussapput. Jehovap siunertaa maangaannartinneqarsinnaanngilaq.
20 Siulittuutigineqartutut Aaperaap kinguaassaanit — Jiisusimit Kristusimit 144.000-inillu — “nunarsuarmi inuiaat tamarmik” pilluaqquneqassapput. (1 Mosesi 22:18; Romamiut 11:12) Taamaalilluni Guutip innuttaasa aaqqissuussineq tamanna iluaqutigissavaat. Jehovap siunertaminik naassaanngitsumik qanoq naammassinnikkiartuaarneranik eqqarsaatiginneqqissaartilluta tupigusunngitsoorsinnaanngilagut imalu oqanngitsoorsinnaanata: “Ilami Guutip pisuussusiata ilisimassusiatalu siuneqassusiatalu itissusiat!” — Romamiut 11:33.
[Quppernerup ataani ilanngussat]
^ imm. 13 Uinikkut Israelikkut kunngeqaraluarlutillu palaseqaraluarlutik tassaalinngillat kunngeqarfik palaseqatigiinnik innuttalik. Israelimi kunngit inatsisit malillugit palasiusinnaanngillat. Taamaattumik uinikkut Israelikkut tassaasinnaanngillat orpik olivenequt siumut assersuutaasoq. Paulusip assersuuteqarluni ersersippaa “kunngeqarfik palaseqatigiinnik innuttalik” pillugu Guutip siunertaa anersaakkut Israeli aqqutigalugu qanoq naammassineqartoq. Tamanna Vagttårnet 15. novembari 1983-imoortumi qupp. 10-14-mi allassimasut allannguutigaat.
^ imm. 17 Takuuk ungalusaq “Sooq olivenequtip avalequtai ikkunneqartartut?”
^ imm. 17 Tamanna pivoq ukiut pingasut affarlu, uinikkut juutit anersaakkut inuiannut nutaanut ilaalernissamut kisimik periarfissarisaat, qaangiummata. Tamanna sapaatit-akunnerisa ulluisa ukiunngortitaasut pillugit siulittuummi siulittuutigineqarpoq. — Danieli 9:27.
Eqqaamavigit?
• Jehovap siunertaminik naammassinneriaasianit suna ilinniarparput?
• Romamiunut allakkani kapitali 11-miittut uku sumut assersuutaappat?
Orpik olivenequt
sorlaa
kanaartaa
avalequtai
• Sooq avaleqummik orpimmut allamut ikkussineq ‘pinngortitat pissuserisaannut paarlattuua’?
[Atuaqqissaarnermi apeqqutit]
[Qupp. 26-mi ungalusaq/assiliartaq]
Sooq olivenequtip avalequtai ikkunneqartartut?
▪ Lucius Columella romamiut sakkutuuat olivenequtinik naatitsisartuuvoq ukiuni hundredelinni siullerni inuusoq. Naasorissaasutut inuuneq naggorissaanerlu pillugit atuakkiani aqqaneq-marluusut tusaamaneqaatiginerpaavai.
Atuakkiami tallimaanni ussatitoqaq una issuarpaa: “Olivenequteqarfimmini assallatserisoq inerititaqarusuttarpoq; orpinnik naggorissaasoq inerititaqarusungaartarpoq; killuisup pinngitsaalillugu inerititaqartinniartarpaa.”
Orpiit naggorissuusut, inerititaqanngitsulli, allaatigereerlugit ima innersuussivoq: “Pitsaassaaq orpiit qillerummik putullugit olivenequtip maaniinnaq naasup avalequtaanik uummaarissumik ikkussivigigaanni. Taava orpik inerititaqarnerulissaaq.”
[Qupp. 25-mi assiliartaq]
Oliveneqummik assersuut paasiviuk?
