Jeremiatut eqqumagit
Jeremiatut eqqumagit
“Uanga [Jehova] nakkutilleeqqissaarama oqaatsikka pillugit, naammassiumagakkit.” — JEREMIA 1:12.
1, 2. Sooq ‘Jehovap nakkutilleeqqissaarnera’ orpimmut mandeleqummut atassuserneqarpa?
LIBANONIMI Israelimilu qaqqani orpinnut sikkeqqaartunut ilaasarput orpiit mandelequtit. Taakku januaarip naanerani februaarilluunniit aallartinnerani aappaluartunik qaqortunilluunniit kusanartunik sikkerninittarput. Orpiup tamatuma hebræerisut taaguutaa nutsiinnavillugu isumaqarpoq “itertoq”-mik.
2 Jehovap Jeremia pruffiitimisut toqqarmagu orpiup mandelequtip ilisarnaqutigisaa tamanna pingaarutilipilussuarmut assersuutitut naleqqulluartumik atorneqarpoq. Pruffiiti kiffartornermi aallaqqaataani orpiup taama ittup avalequtissaata naaqqaataanik takorruuisinneqarpoq. Takorruugaa qanoq paasisariaqarpa? Jehova ima nassuiaavoq: “Uanga nakkutilleeqqissaarama oqaatsikka pillugit, naammassiumagakkit.” (Jeremia 1:11, 12) Soorlu orpik mandelequt sikkiaartartoq, taamatuttaaq Jehovap innuttani siunissami sunissani pillugu paasitiaartarpai, tassa pisussat sioqquterujussuarlugit. Aamma Jehova ‘nakkutilleeqqissaartarpoq’, imaluunniit eqqumasarpoq, oqaatsimi piviusunngornissaat qulakkeerniarlugu. Itsaq Jehovap pruffiitini aallartittarpai naalannginnerup kinguneri pillugit innuttaminik mianersoqqusiartortillugit. (Jeremia 7:25) Aamma Jehova siulittuutigisami eqquunnissaata tungaanut ‘nakkutilleeqqissaartuartarpoq’. Ukiumi 607-imi Kr.in.si., piffissaq eqqoqqissaarlugu, Judakkut Jehovap eqqartuussutaanit eqqugaapput.
3. Jehovamut tunngatillugu suna qularutiginngilluinnarsinnaavarput?
3 Ullumikkuttaaq Jehovap piumasami naammassineqarnissaat eqqumaffigisarpaa. Oqaatsini eqquutinngitsoortissinnaanngilai. Illit Jehovap eqqumaffiginninnera qanoq killinneqaatigaajuk? Isumaqarpit Jehova ukioq mannattaaq neriorsuutini eqquutitikkumallugit ‘nakkutilleeqqissaassasoq’? Jehovap neriorsuutaanut tutsuiginartunut tunngatillugu immannguaannarluunniit qularutta, maanna piffissanngorsimassaaq anersaakkut aramajunnaarniarnissatsinnut. (Romamiut 13:11) Jeremia Jehovamut pruffiitiugami eqqumavoq. Jeremiap Guutip imminut suliassiissutigisaa eqqarsaatigalugu qanoq ililluni aamma sooq eqqumasimanera misissorutsigu paasilluarsinnaanerussavarput Jehovap uagutsinnut suliareqqusaanik suliaqarnitsinni qanoq pinertusaarsinnaanerluta.
Tusarliuttariaqavissoq
4. Sooq Jeremiap tusarliussassami tusarliunnissaa ajornakusoortippaa, aamma sooq tusarliunneqartariaqavippa?
4 Jeremia 25-t missiliorlugit ukioqarsimasinnaavoq Jehovamit pigaartuusussanngortinneqarami. (Jeremia 1:1, 2) Inuusuppallaartutulli Israelikkullu utoqqaanertaannut, angutinut ukioqqortusisimasunut pingaarutilinnillu sulialinnut, oqalunnissamut piukkunnanngilluinnartutut misigivoq. (Jeremia 1:6) Sakkortuumik avoqqaarinnittussaavoq eqqartuussutillu sakkortuut oqaluussissutigisussaallugit, ingammik palasinut, pruffiitioqqusersunut kunnginullu, aamma ‘ingerlavimminnik ingerlaviginniinnartunut’ ‘unneqqaserluttuartunullu’. (Jeremia 6:13; 8:5, 6) Kunngip Salomop naalaffia alutornartoq, ukiuni 400-ngajanni pallorfiginninnermut ilumoortumut qitiusimasoq, suujunnaarsinneqartussaavoq. Jerusalemi Judalu inuerutissapput tamaanimiullu aallarunneqartussaallutik. Erseqqippoq Jeremiap tusarliussassaa pingaaruteqarlunilu tusarliunneqartariaqavissoq.
5, 6. (a) Jehovap ullumikkut kristumiut tanitat qanoq atortarpai? (b) Maanna suut sammissavavut?
5 Nalitsinni Jehovap kristumiunik tanitanik assersuutaasumik pigaartuusutut silarsuarmut matumunnga eqqartuussutiminik mianersoqqusisussaqarnissaa asannilluni isumagaa. Ukiuni qulikkuutaani kristumiut tanitat taakku inuit kajumissaartarpaat piffissaq inuuffigisarput eqqumaffigeqqullugu. (Jeremia 6:17) Biibilimi erseqqissarneqarpoq Jehova, piffissanik aalajangersakkaminik eqqortitsisartoq, ‘paamaarussinngitsoq’. Taassuma ullussaa piffissaq eqqoqqissaarlugu, nalunaaquttap-akunnerani ilimasuffiunngitsumi, nalliutissaaq. — Sefania 3:8; Markusi 13:33; 2 Petrusi 3:9, 10.
6 Kristumiut tanitat taakkualu suleqataasa nunarsuarmi inuunissamik neriugisallit nalunngilaat Jehovap silarsuassani nutaaq naapertuilluassuseqarfiusoq atuutilersingajaleraa. Taamaattumillu aamma nalunngilaat tusarliussamik oqaluussissutiginninnissaq aatsaat taama pingaaruteqartigisoq. Illit tamanna qanoq killinneqaatigaajuk? Tamanna oqaluussinermi iliuuseqarnerunissannut kajumississutigisariaqarpat, ilaa? Jiisusi oqamisaarpoq kikkut tamarmik Jehovamut kiffartorusunnerlutik kiffartorusunnginnerlutilluunniit aalajangertariaqartut, oqaluussinikkullu illit tamatumunnga periarfississinnaavatit. Maanna pissuserineqartussat pingasut Jeremiap suliassaminut tunngatillugu eqqumanissaminut iluaqutigisimasai uagullu aamma tamatumunnga iluaqutigisassavut sammeriartigit.
Inoqatinik asanninneq
7. Nassuiaruk Jeremiap ilungersunartorsioraluarluni oqaluussinissamut asanninneq qanoq kajumississutigigaa.
7 Jeremia suna kajumississutigalugu ilungersunartorsioraluarluni oqaluussiva? Inoqatiminik asannittuuvoq. Jeremiap nalunngilaa paarsisut ilumuunngitsut inuit naalliuutaasa ilarpassuinut pisuusut. (Jeremia 23:1, 2) Tamatuminnga ilisimanninnini asannilluni misiginneqatiginnillunilu suliassaminik suliarinninnissamut iluaqutigaa. Nunaqqatimi Guutip oqaasianik tusarlernissaat inuuinnarnissaallu kissaatigaa, imalu isumakulutsigaaq inuiaat ajunaarnissaat qissatigalugu. (Atuakkit Jeremia 8:21, 23). Upputini ersersinneqarpoq Jeremiap Jehovap aqqanik innuttaanillu soqutiginningaarnera. (Upputit 4:6, 9) Uagut inuit ‘savatut paarsisoqanngitsutut paarinerlugaallutillu naakkinarsisimasut’ takugaangatsigit Guutip naalagaaffia pillugu nutaarsiassaq tuppallersaataasoq taakkununnga oqaluttuarerusungaalertarparput, ilaa? — Matthæusi 9:36.
8. Sumit erserpa Jeremiap malersugaanini narrutsaatiginngikkaa?
8 Jeremia inunnit ikiorusutaminit malersugaavoq, taamaakkaluartorli narrutsannanilu akiniaanngilaq. Naammagittartuullunilu inussiarnersuuvoq, aamma allaat kunngimut Sidkijamut peqquserluttumut! Sidkijap toqutaasussanngortereeraluaraani allaat Jeremiap taanna ilungersorluni qinnuigaa Jehovap oqaasii naalaqqullugit. (Jeremia 38:4, 5, 19, 20) Uagut inoqatitsinnik Jeremiatulli asannitsigaagut?
Jehovamit sapiissuseqalersitaaneq
9. Qanoq ililluta nalunngilarput Jeremia Guutimit sapiissuseqalersitaasoq?
9 Jeremia Jehovamit oqaluunneqaqqaarami pinaakkaluarpoq. Tamatumannga erserpoq Jeremiap sapiissuseqartuarnini aalajangiusimannittuarninilu inunnguuserinngikkai. Jeremiap pruffiitiutilluni nalinginnaanngitsumik sapiissuseqarnera Guutimik tatiginnilluinnarneranik pissuteqarpoq. Jehovap pruffiitini “sorsuttartorsuulluni” ilagaa, ima paasillugu suliassaminik suliarinnissinnaaniassammat tapersersorlugulu nakussatsikkaa. (Jeremia 20:11) Jeremiap qunusuillunilu sapiinnini ima tusaamasaassutigitigisimavaa Jiisusip nalaani inuit ilaasa Jiisusi Jeremiaasorisimallugu toqusunit makissimasoq. — Matthæusi 16:13, 14.
10. Sooq oqartoqarsinnaava tanitat kinguleruttut ‘inuiannut naalagaaffinnullu piginnaatitaasut’?
10 Jehovap ‘inuiannut kunngiugami’ Jeremia inuiannut naalagaaffinnullu eqqartuussutiminik tusarliussitippaa. (Jeremia 10:6, 7) Tanitalli kinguleruttut ‘inuiannut naalagaaffinnullu piginnaatitaanerat’ qanoq paasisariaqarami? (Jeremia 1:10) Taamanikkut pruffiitip pisimaneratut kristumiut tanitat qilammi nunamilu Kisimi Oqartussaasumit suliassinneqarput. Guutip kiffai tanitat taamaalillutik silarsuaq tamakkerlugu inuiannut naalagaaffinnullu eqqartuussutinik nalunaaruteqartarnissamut eqqortumik piginnaatitaapput. Kristumiut tanitat Guutimit ajugaqanngitsumit taamaaliornissamut piginnaatitaagamik taassumalu oqaasii isumassarsiarititaasut paasiuminartut atortaramikkit oqaluussissutigaat inuiaat naalagaaffiillu ullumikkut piusut piffissaq Guutip aalajangigaa nalliuppat taassumalu periaasia atorlugu nusutaallutillu aserugaanissaat. (Jeremia 18:7-10; Saqqummersitat 11:18) Kristumiut tanitat Jehovamit peqquneqarnertik malillugu taassuma eqqartuussutaanik nunarsuaq tamakkerlugu pinngitsooratik nalunaarutiginninnissartik aalajangiusimavaat.
11. Pissutsit ilungersunaraluarpataluunniit oqaluussiuarnissamut suna iluaqutigissavarput?
11 Soqutiginnittoqanngikkaangat, akerlilersuisoqaraangat ilungersunartorsioraanniluunniit nikallortarneq sapiissuseeruttarnerlu nalinginnaavoq. (2 Korinthimiut 1:8) Jeremialli pisimaneratut oqaluussiuarta nikallornata. Qanortoq tamatta immikkut Guutimut qinujuarlutalu taanna annertoqqutigiuarlugulu ‘sapiillisartuarta’ taassumunnga ikiortissarsiortarluta. (1 Thessalonikamiut 2:2, NV) Guutimut kiffaagatta ilumoortut Guutip uagutsinnut akisussaaffigititai eqqumaffigiuartariaqarpavut. Jerusalemip ilumuunngitsup aserugaanera kristumiuunerartut aserugaanissaannut siumut assersuutaavoq. Kristumiuunerartut aserugaanissaannik oqaluussissutiginnittuarnissarput aalajangiusimasariaqarparput. Kristumiut tanitat ‘Jehovap ukiuanik saammaassivimmik’ oqaluussissutiginninnissamut sapiissuseqaannaratik aammali ‘ullormik Guutitta akiniaaffianik’ oqaluussissutiginninnissamut sapiissuseqarput. — Esaja 61:1, 2; 2 Korinthimiut 6:2.
Qamannga pisumik nuannaarneq
12. Sooq isummersinnaavugut Jeremia nuannaartuartoq, nuannaartuarneranullu pissutaasoq pingaarutilik suua?
12 Jeremiap suliani nuannaarutigisarpaa. Jehova ima oqarfigaa: “Oqaatsitit nanivakka iillugillu; uangali oqaatsitit nuannaarutigaakka uummatikkullu tipaatsuutigalugit illit atinnik ateqartitaagama, [Jehova].” (Jeremia 15:16) Guutimut ilumoortumut sinniisuuneq taassumalu oqaasianik oqaluussissutiginninneq Jeremiap immikkut pisinnaatitaaffittut isigai. Maluginiartariaqarporli Jeremiap mitaatigineqarnini eqqarsaatiginerugaangamiuk nuannaarunnaartartoq. Tusarliunniakkamili qanoq nuannertigalunilu pingaaruteqartiginera eqqarsaatiginerugaangamiuk nuannaaleqqittarpoq. — Jeremia 20:8, 9.
13. Sooq anersaakkut sallusuissutinik itisuunik ‘nerisarnissaq’ nuannaartuarnissamut pingaaruteqarpa?
13 Oqaluussinermik nuannaarutiginnittuarumalluta ‘nerisassanik tamuasarissanik’, sallusuissutinik itisuunik Guutip oqaasianeersunik, ‘nerisariaqarpugut’. (Hebræerit 5:14) Itisiliilluni atuaqqissaartarneq uppernermut nakussatsissutaasarpoq. (Kolossemiut 2:6, 7) Paasillualertarparput iliuutsivut Jehovamut qanoq sunniuteqartigisarnersut. Biibilimik atuarnissamut atuaqqissaarnissamullu piffissaaleqisarutta, piffissarput qanoq atornerlugu eqqarsaatigeqqittariaqassavarput. Ullut tamaasa minutsialunnguaniluunniit atuaqqissaartarnerput eqqarsaatiginneqqissaartarnerpullu Jehovamut attaveqarluarnerulissutigissavavut, aamma ‘nuannaarnerulissutigalugillu tipaatsunnerulissutigissavavut’, soorlu Jeremia taamaassimasoq.
14, 15. (a) Jeremiap aalajaalluni suliassaminik suliaqartuarnera qanoq kinguneqarpa? (b) Guutip innuttai ullumikkut oqaluussinermut qanoq isiginnittaaseqarpat?
14 Jeremia Jehovap mianersoqqussutaanik eqqartuussutaanillu oqaluussissutiginnittuarpoq; aammali “sanaqqiinissamut naasussanillu ikkussuinissamut” tunngatillugu imminut suliassiissutigineqartumik pingaartitsivoq. (Jeremia 1:10) Inuit eqqortuliorusuttut ikiorpai neriuuteqalersillugit. Tamannalu kinguneqarluarpoq. Ukiumi 607-imi Kr.in.si. Jerusalemi aserugaammat juutit Israelikkuunngitsullu ilaat aniguipput. Aniguisut ilagaat Rekabikkut, Ebed-Meleki Barukilu. (Jeremia 35:19; 39:15-18; 43:5-7) Jeremiap ikinngutai ilumoorfiginnillutillu Guutimik mianerinnittut taakku ullumikkut nunarsuarmi inuunissamik neriugisalinnut kristumiunullu tanitanut ikinngutaalersunut assersuutaalluarsinnaapput. Kristumiut tanitat ‘amerlangaartut’ taakkua uppernerannik nakussatsitsisarnertik nuannaarutigingaartarpaat. (Saqqummersitat 7:9) Tamatumunnga assingusumik kiffat ilumoorfiginnittut tanitanik suleqateqartut tamarmik inunnik eqqortuliorusuttunik sallusuissummik paasinninnissamut ikiuinertik nalerisimaarutigingaartarpaat.
15 Guutip innuttaasa paasivaat nutaarsiassamik nuannersumik oqaluussissutiginninneq tusarnaarumasunik kiffartuussinerinnaanani aammali pallorfiginninnitsinnut ilaasoq. Tusarnaarumasoqaraangat tusarnaarumasoqanngikkaluaraangalluunniit, oqaluussinitsigut Jehovamut illernartumik kiffartorneq nuannaarutigingaartarparput. — Tussiaat 71:23; atuaruk Romamiut 1:9.
Suliassat eqqarsaatigalugu eqqumagit!
16, 17. Piffissap inuuffigisatta nukinginnarnera Saqqummersitat 17:10-mi aamma Habakkuki 2:3-mi qanoq ersersinneqarpa?
16 Piffissap inuuffigisatta nukinginnarnera siulittuummi isumassarsiarititaasumi Saqqummersitat 17:10-miittumi erseqqissarneqarpoq. Kunngit arfineq-aappaat, tuluit Amerikamiullu naalagaaffissuat, saqqummereerpoq. Naalagaaffissuaq taanna pillugu ima allassimasoqarpoq: ‘Tikiukkuni sivikitsuinnarmik tassaniissaaq.’ Maanna piffissaq ‘sivikitsuinnaq’ taanna qaangiutingajalersimassaaq. Pruffiitip Habakkukip pissutsit aaqqissuussaanerata ajortup matuma naggatissaa pillugu ima neriorsoqqissaarpaatigut: “Takorluugaq piffissarititami aatsaat eqquutissaaq, . . . . Utaqqiinnarina, eqquutinngitsoorani piviusunngorumaarmat.” — Habakkuki 2:3.
17 Imminut ima aperigit: ‘Inooriaatsinnit ilumut erserpa piffissap qanoq nukinginnartigineranik paasinnittunga? Inooriaatsinnit erserpa naggatissap nalliutingajalernera ilimagigiga? Imaluunniit aalajangikkannit pingaarnerutitannillu erserpa naggatissap qanittuararsuakkut nalliunnissaa ilimaginngikkiga imaluunniit allaat nalliunnissaa qularigiga?’
18, 19. Sooq iliuuseqannginnerulernissamut maanna piffissaanngila?
18 Pigaartoqatigiit suliassaat suli naammassineqanngilaq. (Atuakkit Jeremia 1:17-19). Tanitat kinguleruttut ‘sukatut saviminiusutut’ ‘illoqarfittullu pallittaalisatut’ aalajaalluinnarnerat nuanningaarami! Tanitat ‘sallusuissut qiterutsiussimavaat’, ima paasillugu suliassaminnik naammassinninnissamik tungaanut Guutip oqaasia nakussatsissutigisaraat. (Efesosimiut 6:14) Amerlangaartunut ilaasut tamatumunnga assingusumik aalajangersimalluinnarlutik kristumiut tanitat ikiorpaat taakkua suliassaminnik Guutimeersumik naammassinninniarneranni.
19 Maanna piffissaanngilaq Guutip naalagaaffianut kiffartornermi iliuuseqannginnerulernissamut, piffissaavorli Jeremia 12:5-imi allassimasunik eqqarsaatiginninnissamut. (Atuaruk). Tamatta annikilliuuteqartarpugut naammagalugit atortariaqartakkatsinnik. Taamatut uppernikkut misilinneqartarneq ‘pisuinnarnik’ arpaliuteqateqarnermut assersuunneqarsinnaavoq. ‘Naalliunnartoqangaarnissaali’ qanilliartortillugu ajornartorsiutit ingasatsikkiartornissaat naatsorsuutigisinnaavarput. (Matthæusi 24:21) Ajornartorsiutigilerumaakkatsinnik anginerusunik akiugaqarnissarput arpalluni ‘hestersunik unamminermut’ assersuunneqarsinnaavoq. Hestinut pangalittunut angummanniarsariniaraanni nukippassuit atortariaqarput assullu pinertusaartariaqarluni. Taamaattumik maanna ajornartorsiutitsinnik naammagittarluta atuinerput iluaqutigissavarput, ajornartorsiutigilerumaakkatsinnut piareersaatigisinnaagatsigu.
20. Illit sunissat aalajangiusimaviuk?
20 Tamatta Jeremia ilaarsinnaavarput uagutsinnullu suliassiissutigineqartoq, oqaluussineq, naammassisinnaallugu. Pissuserineqartussat soorlu asanninneq, sapiissuseq nuannaarnerlu Jeremiap ukiuni 67-ini kiffartornerminik aalajaalluni naammassinninnissamut kajumississutigai. Orpiup mandelequtip sikkerneri kusanartut Jehovap oqaatsini eqquuteqqullugit ‘nakkutilleeqqissaarneranik’ uagutsinnut eqqaasitsissutaapput. Taamaattumik uagut eqqumanissamut Guutillu tusarliussaanik oqaluussissutiginninnissamut pissutissaqarluarpugut. Jeremia eqqumavoq, uaguttaaq eqqumasinnaavugut. (w11 03/15-E)
Eqqaamavigit?
• Jeremiap asanninneq suliassaminut tunngatillugu eqqumanissamut qanoq iluaqutigaa?
• Sooq Jehovamit sapiissuseqalersitaanissarput pisariaqartipparput?
• Jeremiap nuannaartuarnissaminut suna iluaqutigaa?
• Sooq illit eqqumarusuppit?
[Atuaqqissaarnermi apeqqutit]
[Qupp. 28-mi assiliartat]
Akerlilersorneqaraluarlutit oqaluussiuassavit?
