Ilissi inuusuttuaqqat — inuusuttuaraqatissi sunniiniarnerat akiorsiuk

“Oqaluttassaasi inussiarnersumik tarajulimmillu, ilisimaqqullugu kikkut tamaasa qanoq akisariaqartassagisi.” — KOLOSSEMIUT 4:6.

1, 2. Inuusuttuararpassuit allanit allaanerunertik qanoq igaat, aamma sooq?

QULARNANNGITSUMIK sunniiniartoqartarnera pillugu tusagaqaannarnak illit nammineq allanit sunnerniarneqarsimavutit. Ilaanni immaqa illit eqqunngitsuliornerusutut qulariunnaarsimasannik iliuuseqaqqullutit kajumissaarneqarsimavutit. Taamatut pisoqaraangat qanoq misigisarpit? Christopher 14-inik ukiulik ima oqarpoq: “Allanit allaanerusariaqannginniassagama ilaannikkut tammaannarusuttaraluarlungaluunniit atuaqatikka assigiinnarusuttaraluarpakka.”

² Inuusuttuaraqatitit ilinnut sunniuteqartupilussuuppat? Taamaappat, sooq? Illit taakkunannga akuerineqarusunnerit tamatumunnga pissutaasinnaava? Akuerineqarusunneq kukkunerujuaannanngilaq. Inersimasuugaluartulluunniit inersimasunit allanit akuerineqarusuttarput. Inoqanngilaq — inuusuttunik utoqqarnilluunniit — ajattorneqarnermik nuannarinnittunik. Piviusorli mannaavoq: Eqqortuliornissamik aalajangiusimannittut allanit nuannarineqartuaannarnavianngillat. Allaat Jiisusip tamanna misigaa. Taamaakkaluartorli eqqortuliortuaannarpoq. Inuit ilaasa taanna malippaat taassumunngalu ajoqersuganngorlutik, allalli nikagalugulu ‘suutinngilaat’. — Esaja 53:3.

Sunnerniarneqarneq qanoq akioruminaatsigisinnaava?

3. Inuusuttuaraqatit najoqqutarisaannik malinninnissaq sooq kukkunerussagaluarpa?

³ Immaqa inuusuttuaqqat allat najoqqutarisaannik malinniinnarnissamut ussernartorsiorsinnaavutit,  taakkunannga nikagineqarusunngiinnarlutit. Taamaaliorneq kukkunerussagaluarpoq. Kristumiut ‘meeraajunnaartussaapput sianiitsut, malinnit tamanut tamaanga nassataritittartut’. (Efesosimiut 4:14) Meeraaqqat allanit sunnertiasuupput. Illilli inuusuttuaraagavit inersimasunngoriartorputit. Taamaammat Jehovap najoqqutassiai ilinnut iluaqutaasorigukkit, taamatut isumaqarnerit naapertorlugu inuusariaqarputit. (5 Mosesi 10:12, 13) Taamaaliunngikkuit assigiinnassavaa inuuninnik illit nammineq aqutsiunnaartutit. Ilumoortoq mannaavoq: Allat sunniiniarnerannut nakkaannaruit taakkunannga aqunneqalissaatit. — Atuaruk 2 Petrusi 2:19b, 1936. *

4, 5. (a) Aroni qanoq ililluni allat sunniiniarnerannut nakkaannarpa, tamannalu qanoq ilinniutigisinnaavarput? (b) Periaatsit suut atorlugit inuusuttuaraqativit sunnerniarsarisinnaavaatsit?

⁴ Ilaanni Mosesip qatanngutaa Aroni allat sunniiniarnerannut nakkaannarpoq. Taassuma Israelikkut guutiliuuteqqullutik kimigiiserfigimmanni naalaannarpai. Aroni qunutuujunngikkaluarpoq. Siusinnerusukkut taassuma Mosesi Faraomut, angummut Egyptenimi pissaaneqarnerpaamut, sassaqatigisarpaa. Pisimasuni taakkunani Aroni nakimaalluni oqaluttarpoq Guutillu tusarliussaanik taassumunnga tusarliussisarluni. Israelikkoqatimili sunnerniarsarimmanni nakkaannarpoq. Aap, sunnerniarneqarneq akioruminaassinnaaqaaq! Aronip Egyptenip kunngiata sunniiniarnerata akiornissaa nunaqqatimi sunniiniarnerata akiornissaaninngarnit ajornannginnerutippaa. — 2 Mosesi 7:1, 2; 32:1-4.

⁵ Soorlu Aronimut tunngatillugu ersertoq, allanit sunnerniarneqartartut inuusuttuinnaasanngillat. Aamma imaanngilaq eqqunngitsuliorusuttut kisimik sunnerniarneqartartut. Allaat ilumoorlutik eqqortuliorusuttut allat sunniiniarnerannit sunnertissinnaapput — aamma illit. Inuusuttuaraqativit eqqunngitsumik iliortinniarlutit immaqa sunnerniarsarissavaatsit unammillerfigalutit, illit pillutit eqqunngitsumik oqaaseqarlutik mitaatigalutilluunniit. Inuusuttuaraqatit sunniiniutaat suugaluaraangamilluunniit akioruminaattarput. Illit allat sunniiniarnerat akiorsinnaassagukku upperisavit eqqortuunera qularutigiunnaaqqaartariaqarpat.

“Immissinnik misiligitsi!”

6, 7. (a) Sooq upperisap eqqortuunerata qularutiginnginnissaa pingaaruteqarpa, qanorlu ililluni qularutigiunnaarneqarsinnaava? (b) Uppernerit nakussatsinniarlugu imminut qanoq aperisinnaavit?

⁶ Allat sunniiniarnerat akiorsinnaassagukku upperisavit ilumoortuunera najoqqutassiallu malitavit eqqortuunerat qularutigiunnaaqqaartariaqarpat. (Atuaruk 2 Korinthimiut 13:5). Tamanna nakimaallinissannut iluaqutigissavat, aamma imminut tatiginngikkaluaruilluunniit. (2 Timotheusi 1:7, 8) Sapiikkaluarlunili arlaannik aalajangiusimanninnissaq sapernartinneqarsinnaavoq  tamanna upperilluanngikkaanni. Soormi ilikkakkatit Biibilimeersut ilumut ilumoornersut paasiniarluarukku? Tunngaviusut aallartissutigikkit. Assersuutigalugu Guuti upperivat allallu sooq taassuma piuneranik upperinninnerminnik tunngavilersuutaat tusarnikuullugit. Taamaattumik imminut ima aperigit: ‘Uanga suna Guutip piuneranik qularinnikkunnaassutigaara?’ Imminut taamatut apereqquneqarninnut siunertaanngilaq qulalersinnissat, uppernivilli nakussatsinnissaa siunertaavoq. Aamma imminut ima aperisinnaavutit: ‘Qanoq ilillunga nalunngilara Biibili Guutimit isumassarsiarititaasoq?’ (2 Timotheusi 3:16) ‘Sooq qularutiginngilara “ullussani kingullerni” inuusugut?’ (2 Timotheusi 3:1-5) ‘Sooq isumaqarpunga Jehovap najoqqutassiai uannut iluaqutaasut?’ — Esaja 48:17, 18.

⁷ Imaassinnaavoq imminut taamatut aperinaveersaartutit apeqqutit taakku akisinnaanngeqinagakkit. Tamanna assersuunneqarsinnaavoq biilimi tanki imaaruteqqajaalersimaqinammat biilip benziinamut uuttuutaanik takusinaveersaarnermut! Tanki imaaruteqqajaalersimappat, tamatuma paasinissaa pisariaqarpoq iliuuseqarfigineqarsinnaaniassammat. Tamatumunnga assingusumik pitsaanerpaassaaq sunut tunngatillugu uppernikinnerit paasigukku uppernerillu nakussatsinniarlugu iliuuseqarlutit. — Apustilit Suliaat 17:11.

8. Nassuiaruk Guutip kinguaassiuutitigut inuunerlunnermik qimarratiginninnissamik peqqussutaanik maleruaanerup silatusaarneruneranik qanoq ilillutit qularutiginninnginnerulersinnaasutit.

⁸ Assersuuteqariarta. Biibilimi ilungersortumik kajumissaarneqarputit ‘kinguaassiuutitigut inuunerlunnermik qimarratiginneqqullutit’ (NV). Imminut ima aperigit: ‘Sooq peqqussummik tamatuminnga maleruaaneq silatusaarnerua?’ Inuusuttuaraqativit katissimanatik atoqateqartarnerminnut pissutigisartagaat eqqarsaatigeriakkit. Aamma eqqarsaatigiuk sooq oqartoqarsinnaasoq kinguaassiuutitigut inuunerluttoq ‘nammineq timiminut ajortuliortartoq’. (1 Korinthimiut 6:18) Maanna pissutigisartagaat taakku eqqarsaatigeqqissaakkit imminullu ima aperalutit: ‘Iliuutsit suut pitsaanerpaamik kinguneqassappat? Kinguaassiuutitigut inuunerlunneq ilumut imminut akilersinnaava?’ Peqqussummik maleruaaneq silatusaarnerunersoq suli itinerusumik eqqarsaatigiuk imminut ima aperalutit: ‘Kinguaassiuutitigut inuunerlunnissamut ussernartorsiorlunga nakkaannaruma qanoq misigissagaluarpunga?’ Inuusuttuaraqatinnit ingerlaannaq nuannarineqalissagunaraluarputit, kingusinnerusukkulli angajoqqaatit uppeqatitilluunniit naalagaaffilersaarfimmeeqatigigukkit qanoq misigissagaluarpit? Aamma Guutimut qinuniarninni qanoq misigissagaluarpit? Atuaqatinnut iluareqqusaarniaannarlutit ilumut Guutimut minguitsumik attaveqarunnaarusuppit?

9, 10. Upperisavit eqqortuuneranik qularutiginninnginnerit inuusuttuaraqatitit ilagigaangakkit imminut tatiginerunissannut qanoq iluaqutigissaviuk?

⁹ Inuusuttuaraaguit silatusaartumik isummersinnaassutsit massakkorpiaq ineriartupiloorpoq. (Atuakkit Romamiut 12:1, 2). Inuusuttuaraanivit nalaa atoruk Jehovamut nalunaajaasuunerup ilinnut qanoq pingaaruteqartigineranik eqqarsaatiginneqqissaarnermut. Tamanna upperisavit eqqortuuneranik qularutiginninnginnerulissutigissavat. Taava inuusuttuaraqatinnit sunnerniarneqaraangavit ingerlaannaq qularnallu akisinnaasassaatit. Qatanngutip arnap inuusuttup misigisimaneratut misigisimasassaatit, taanna ima oqarami: “Sunnerniarneqaraangama allat uanga inuttut qanoq ittuuninnik paasitinniaannartarpakka. Imaanngilaq upperisarsioqatigiit arlaannut ilaaginnartunga. Upperisara eqqarsartaatsinnut, anguniakkannut, ileqqussatigut najoqqutarisannut inuuninnullu tamarmut tunngaviuvoq.”

¹⁰ Aap, eqqortuliornerusutut qularutigiunnaarsimasamik aalajangiusimanninnissaq imaannaanngilaq. (Lukasi 13:24) Aamma immaqa eqqarsaatigaat tamanna imminut akilersinnaanersoq. Mannali eqqaamajuk: Aalajangiusimasat peqqusiileqinarerpasillugulu kanngusuutigerpasikkukku allat tamanna malugissavaat immaqalu sunnerniarnerulissallutit. Qularnalli oqaluttaruit immaqa tupigusuutigissavat inuusuttuaraqativit ilinnik qanoq sunniiniarunnaapallatsiginerat. — Naleqqiutikkit Lukasi 4:12, 13.

‘Oqalulersinnak eqqarsaqqaartarit’

11. Allanit sunnerniarneqarnissamut piareersimaneq qanoq iluaqutaasarpa?

¹¹ Allat sunniiniarnerannik akiuinissamut iluaqutigisinnaasat pingaarutilik alla tassaavoq piareersartarnissat. (Atuaruk Ussatit 15:28). Piareersimaneq qanoq pisoqarsinnaaneranik siumut eqqarsaatiginnereersimanertut paasisariaqarpoq. Siumut  sillimariilaarnikkut ajornartorsiutaalersinnaasut ilaannikkut pinngitsoortittarsinnaavatit. Oqariarta pisorujoortillutit atuaqativit ilaat siuninni pujortartut takugitit. Taakkua cigarettimik ilinnut neqeroornissaat qanoq ilimanaateqartigaa? Neqerooriataarsinnaanerat ilimagigukku qanoq iliorsinnaavit? Ussatit 22:3-mi ima allassimavoq: “Silatuup perlussaq takusinnaasarpaa qimarnguffissarsiortarlunilu.” Allakkoornikkut immaqa taamatut pisoqarnissaa pinngitsoortissinnaavat. Allakkoorputit imaanngitsoq qunugavit, taamaaliornerli silatusaarnerummat.

12. Apeqqutit atorlugit sunnerniarneqaraangavit qanoq iliortarsinnaavit?

¹² Taavami pinngitsoortissinnaanngilluinnakkannik pisoqarpat? Immaqa inuusuttuaraqativit ilaata paasinninngilluinnarpasilluni ima aperaatit: “Suli ilaqarnikuunngilatit?” Pitsaanerpaassaaq kajumissaarummik Kolossemiut 4:6-imiittumik matuminnga malinninnissaq: “Tamatigut oqaluttassaasi inussiarnersumik tarajulimmillu, ilisimaqqullugu kikkut tamaasa qanoq akisariaqartassagisi.” Soorlu allassimaffimmit ersertoq, pissutsit qanoq innerat apeqqutinik taama ittunik qanoq akisinissannut aalajangiisuussaaq. Biibili tunngavigalugu nassuiaarsuataarnissat pisariaqassagunanngilaq. Immaqa naatsunnguamik paasiuminartumillu akinissaq naammassaaq. Assersuutigalugu suli ilaqarnikuunnginnerit pillugu aperineqaruit ima akiinnarsinnaavutit: “Aap, suli ilaqarnikuunngilanga”, imaluunniit: “Illit susassarinngilat.”

13. Mitaatiginnittoqartillugu pissutsinik naliliisinnaaneq qanoq iluaqutigisinnaaviuk?

¹³ Jiisusi naatsunnguamik akisarpoq oqaaseqarnerunissaq iluaqutaangaarnavianngikkaangat. Herodesimit apersorneqarami akinngilluinnarpoq. (Lukasi 23:8, 9) Sorraatsumik aperisoqaraangat nipangersimaannarnissaq pitsaanerpaasarpoq. (Ussatit 26:4; Oqaluussisartup oqaasii 3:1, 7) Aammali imaassinnaavoq malugisaqartutit illit isiginnittaatsinnik — assersuutigalugu atoqatigiinnermut isiginnittaatsinnik — tupigusuutiginnilluni, immaqa aallaqqaammut ilinnik mitaatiginnissimagaluarluniluunniit, ilumoorluni paasinnikkusuttumik. (1 Petrusi 4:4) Taamaattoqartillugu aalajangiussimasannik Biibilimik tunngavilinnik nassuiaanerulaarnissat naleqqutissaaq. Nangaanak sapiillisaarit. Imminut illersornissamut ‘piareersimajuarit’. — 1 Petrusi 3:15.

14. Ilaannikkut sunniiniaraluartumik eqqarsariaallatsitsillutit periaaserissumik qanoq ilillutit sunniiniarunnaarsitsisarsinnaavit?

¹⁴ Ilaannikkut immaqa sunniiniaraluartumik eqqarsariaallatsitsillutit sunniiniarunnaarsitsisarsinnaavutit. Periaaserisumilli taamaaliorniartariaqarputit. Assersuutigalugu atuaqativit ilaata cigarettimik neqeroorfigalutit pujortartinniarpatit ima oqarsinnaavutit: “Qujaannarpunga,” imalu nangillutit: “Isumaqarlunga illit pujortarnissamut silatuallaartutit!” Takusinnaaviuk qanoq sunniuteqartoq? Illit sooq pujortartannginnerlutit nassuiaasariaarupputit, atuaqativillu sooq pujortartarnerluni eqqarsaatigisariaqalerpaa. *

15. Inuusuttuaraqatinit sunnerniarneqartilluni qaqugukkut qimagutiinnarnissaq pitsaanerussava, aamma sooq?

¹⁵ Taavami iliuuseqarniarlutit ilungersoraluartutit inuusuttuaraqativit sunnerniartuarpatsit?  Taamaappat qimagutiinnarnissaq pitsaanerpaassaaq. Uninnganiinnaruit arlaatigut nakkaannariaannaanerussaatit. Qimaannakkit. Qimaannarukkit imaanngilaq artorsartutit. Nammineruna aalajangersinnaatitaanittut iliuinnartutit. Inuusuttuaraqatinnit aqunneqartinngilatit, aamma Jehovap uummataa nuannaartippat. — Ussatit 27:11.

‘Ajunngitsumik kinguneqartussanik’ pilersaarusiortarit

16. Imminut kristumiutut isigisunit qanoq sunnerniarneqarsinnaavit?

¹⁶ Imaassinnaavoq ilaannikkut inuusuttuaraqartartoq Jehovamut kiffartornerartunik, ajoqutaasunilli sammisaqarnissamut ilinnik peqataatitsiniartartunik. Taavami katerisimaarnernut inuusuttunit taakkunannga piareersarneqarsimasunut aggeruit, paasilerluguli inersimasoqanngitsoq susoqarneranik nakkutilliisussanik? Imaluunniit taavami kristumiutut imminut isigisoq fiistertunut imigassalisarpat, kisiannili illit allallu imigassartornissamut ukiukippallaarlusi? Ataasiaannarnani pisoqartarsinnaavoq nalunngeqatiginnissutit Biibili tunngavigalugu ilinniartinneqarsimasoq malillugu iliuuseqartariaqalerfiusunik. Inuusuttuaraq Jehovamut nalunaajaasuusoq ima oqaluttuarpoq: “Uanga qatanngutigalu filmertarfimmit aniinnarpugut filmi takutinneqartoq oqaasipiluttortaqartupilussuummat. Filmeriaqativut allat aniniarnatik aalajangerput. Angajoqqaatta aniinnarsimagatta nersualaarpaatigut. Filmeriaqativulli kamapput uagut aniinnarnitsigut taakku isiginerlunneqalersikkatsigit.”

17. Guutip najoqqutassiaanik malinnikkumallutit katerisimaartunukartinnak qanoq piareersimasarsinnaavit?

¹⁷ Soorlu misigisamit eqqaaneqareersumit ersertoq, nalunngeqatiginnissutinnik Biibili tunngavigalugu ilinniartinneqarsimasumik malinninnikkut nuanniilliornartunik misigisaqartarsinnaavutit. Eqqortuliornerusutulli qularutigiunnaarsimasatit iliuuserisakkit. Piareersimasarit. Katerisimaartunukaleraangavit katerisimaartuni naatsorsuutiginngisannik pisoqariataarnissaa eqqarsaatigalugu angerlaannariataarnissannut pilersaaruteqareertarit. Inuusuttut ilaasa angajoqqaatik isumaqatigereertarpaat fiistertuniitillutik aatiaarusulerunik sianiinnartassallutik. (Tussiaat 26:4, 5) Taamatut pilersaarusiortarneq ‘iluanaarutissarsisitsisarpoq [ajunngitsumik kinguneqartarpoq, NV]’. — Ussatit 21:5.

‘Qiimasaarniarit inuusutsillutit’

18, 19. (a) Sooq qularutiginngilluinnarsinnaaviuk Jehovap illit pilluartuunissat kissaatigigaa? (b) Guutip allat sunniiniarnerannik akiuisut qanoq isigisarpai?

¹⁸ Jehovap illit inuunermik nuannaarutiginnittussatut pinngortippaatit, aamma pilluartuunissat kissaatigaa. (Atuaruk Oqaluussisartup oqaasii 11:9). Eqqaamajuk inuusuttuaraqativit ilarpassuisa misigisartagaat ‘sivikitsuinnarmik ajortimi inuulluataarnerinnaasut’. (Hebræerit 11:25) Guutip ilumoortup kissaatigaa illit taakkunannga angusaqarnerungaarnissat. Kissaatigaa naassaanngitsumik pilluartuunissat. Guutip isaani eqqunngitsuliornerusumik iliuuseqarnissannut ussernartorsiortinneqaraangavit eqqaamasaruk Jehovap ilinnut piumasaqaatai siunissaq ungasinnerusoq eqqarsaatigalugu ilinnut iluaqutaajuaannartut.

¹⁹ Paasisariaqarpat inuusutsillutit inuusuttuaraqatinnit akuerineqaraluaruilluunniit, taakkua ilarpassuisa ukiualuit qaangiuppata qanoq ateqarnerit eqqaamassagunanngimmassulluunniit. Jehovalli malugisarpaa sunnerniarneqarnerit akiorit, aamma illit puiunngisaannassavaatit, aamma aalajaannerit puiunngisaannassavaa. Illit ‘qilaap igalaavinik ammaaffigissavaatit pilluaatissanillu killeqanngitsunik kueraaffigissallutit’. (Malaki 3:10) Aamma sanngiitsutut misigigaangavit nakussatsinniarlutit anersaaminik illernartumik tukkorluni tunisassavaatit. Aap, Jehovap inuusuttuaraqativit sunniiniarnerannik akiuinissannut ikiorsinnaavaatit!

[Quppernerup ataani ilanngussat]

Eqqaamavigit?

• Sunnerniarneqarneq qanoq akioruminaatsigisinnaava?

• Allat sunniiniarnerannik akiuissagaanni qulanngilluinnarnissaq qanoq pingaaruteqartigaa?

• Allat sunniiniarnerannik akiuinissamut qanoq piareersarsinnaavit?

• Qanoq ilillutit nalunngiliuk Jehovap aalajaannerit pingaartikkaa?

[Atuaqqissaarnermi apeqqutit]

[Qupp. 15-mi assiliartaq]

Sooq Aroni nersuteeraasaliornissaminut akuersiva?

[Qupp. 17-mi assiliartaq]

Piareersimasarit — aalajangereersimasarit qanoq oqassanerlutit