Anersaat silarsuaannut attaveqarneq

GUUTIP ajugaqanngitsup suliassat ilaat anersaat ilaannut isumagitittarpai. Assersuutigalugu Jiisusi Kristusi nunarsuarmut naalakkersuisuutippaa, inngilillu aalajaatsut nutaarsiassamik nuannersumik oqaluussissutiginninnermi siulersueqataasippai. (Saqqummersitat 14:6) Qinunermulli tunngatillugu allaanerulluinnarpoq. Qinnutinut tusarnaarnissaq allanut isumagisassanngortissimanngilaa. Guutimuinnaq qinusartussaavugut.

Jehova tassaavoq ‘qinnutinik tusartartoq’. (Tussiaat 65:3) Qinnutivut tusartarpai akisarlugillu. Apustili Johannesi Jehovamut qinuneq pillugu uppeqatiminut allappoq Guutip “piumasaminut naapertuuttumik qinnuigigutsinni tusarumaaraatigut. Ilisimagatsigulu sumilluunniit qinugutta tusarumaaraatigut, taava aamma nalunngilarput taassumunnga qinnutigisavut pereersimallugit”. — 1 Johannesi 5:14, 15.

Inngilit aalajaatsut kissaatiginngilaat uagut taakku attaveqarfiginiassagivut qinnuigissagivulluunniit. Qinunermut tunngatillugu Guutip aaqqissuussaa paasisimavaat tamatumunngalu tunngatillugu suleqataallutik. Ilaannikkut toqqaannartumik akuliutitinneqartarput, assersuutigalugu pruffiiti Danieli Jerusalemip  aserorneqarneranut tunngatillugu qinummat, Guutip Danielip qinnutaa akivaa inngili Gabrieli qiimmaallannartumik tusarliiartortillugu. — Danieli 9:3, 20-22.

Tusarliussat toqungasunit?

Toqungasut attaveqarfiginiassavavut? Toqungasunik oqaloqateqarsimanerartut pillugit oqaluttuarpassuaqarpoq. Assersuutigalugu arnaq Irlandimiu arnamit anersaanut attaveqartartumit attaveqarfigineqarpoq taassuma uianik, Fredimik, ippassaammat oqaloqateqarsimanerartumit. Fredili sapaatit-akunnialui tamatuma siorna toquvoq. Anersaanut attaveqartartoq aamma oqaluttuarpoq nuliata kisimi nalunngissorisaanut tunngasunik “Fred” qanoq oqarsimanersoq. Nulia isummertuuppat Fred anersaat silarsuaanni inuusoq takornartarlu aqqutigalugu attaveqarfiginiarsarigaani paasinassagaluarpoq. Taamatulli isummerneq toqusut pillugit Biibilimi allassimasunut naapertuutinngilaq. — Takuuk ungalusaq.

Oqaluttuat taamaattut qanoq nassuiarneqarsinnaappat? Anersaapiluit inunnik tammarsaareriaasiisa ilagaat toqusimasuusaartarneq, soorlu Fredimut tunngatillugu taamaaliortut. Sooq taamaaliortarpat? Inuit Biibilimi ajoqersuutigineqartunik ilisimasaqalinnginniassammata Jehovamullu uppernikilliniassammata tatiginnippiarunnaarniassammatalu. Ilumut Saatani anersaapiluillu inunnik tammartitsisarput, taamaaliorpullu ‘pissaanersuaqarlutik salluliuutaasunik nalunaaqutiliaqarlutik tupinnartuliaqarlutillu’ tammartunillu peqquserluffiginnittarlutik. — 2 Thessalonikamiut 2:9, 10.

Ilumoorpoq anersaanut attaveqartartut tamakkununngalu akuliuttartut ilaasa upperilluinnarmassuk  toqusimasunut attaveqarsinnaanertik. Ilumut attaveqarfigisaqartarpata, attaveqarfigisaat tassaapput anersaat Jehovamik akerlilersuisut. Aamma inoqarpoq Guutimik pallorfiginnissorisunik, kukkuppulli. Apustili Paulusi isumassarsisitaalluni sakkortuumik ima mianersoqqusivoq: ‘Guutimik nalusut pilliutitik anersaapilunnut pilliutigisarpaat Guutimut pinnatik.’ — 1 Korinthimiut 10:20, 21, 1936.

Qutsinnerussaartumut, uagutsinnik asannillunilu isumassuisumut, qinusinnaalluta nalunnginnatsigu allamut qinorusunnavianngilagut, ilaa? Biibilimi ima neriorsoqqissaarneqarpugut: “[Jehovap] nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit.” — 2 Nalunaarsuutit 16:9.

[Qupp. 9-mi assiliartaq]

Qutsinnerussaartumut, uagutsinnik asannillunilu isumassuisumut, qinusinnaalluta nalunnginnatsigu allamut qinorusunnavianngilagut, ilaa?

[Qupp. 8, 9-mi ungalusaq/​assiliartaq]

Ilumoortoq eqqunngitsorlu

ILUMOORTOQ: SAATANI KINAASSUSILIVIUVOQ

“Saatani nammineq qaamasumut inngiliunerarpoq.” — 2 Korinthimiut 11:14.

“Eqiingagitsi silatusaarlusilu! Akerartortersi Diaavulu løvitut uiannisaartutut angalasarpoq iisassarsiorluni.” — 1 Petrusi 5:8.

“Ajortuliortoq Diaavulumit pisuuvoq, pileqqaarnerannit Diaavulu ajortuliortuummat.” — 1 Johannesi 3:8.

“Guutimut naalatsigitinniaritsi; Diaavululu akerartorsiuk, taava ilissinnit qimaassaaq.” — Jaaku 4:7.

“Diaavulu . . . pileqqaarneranniit toqutsisuuvoq, sallusuissummiinngilaq, taassuminnga ilumiugisaqannginnami. Sallugaangami imminerminit oqaluttarpoq, sallutuujugami sallumullu ataataagami.” — Johannesi 8:44.

EQQUNNGITSOQ: TOQUSUT TAMARMIK ANERSAAT SILARSUAANNI INUUGINNARTARPUT

“Kiakkiullugu nerisassarsiussaatit issumut uterserlutit, tassannga pigavit. Issumimmi pivutit, issunngussaatillu.” — 1 Mosesi 3:19.

“Uumassuseqartummi nalunngilaat toqusussaagamik, toqungasulli sunnguamilluunniit ilisimasaqanngillat!” — Oqaluussisartup oqaasii 9:5.

“Assavit suliassarsiaat suliarissavatit piginnaanerit tamaat atorlugu, toqusut inaanni ornitanni suliassaqanngimmat ataqatigiinneqaraniluunniit ilisimasassanik ilisimassusermilluunniit peqarnani.” — Oqaluussisartup oqaasii 9:10.

“Anerningerunik kingumut issunngussapput, pilersaarutaallu ulloq taanna maangaannassapput.” — Tussiaat 146:4.

ILUMOORTOQ: INNGILIT AALAJAATSUT UAGUTSINNIK SOQUTIGINNIPPUT

“[Jehovap] inngilia taassuminnga mianerinnittut eqqaanni inississaaq, aniguisissavaalu.” — Tussiaat 34:8; 91:11.

“[Inngilit] tamarmik tassaaginnarput anersaat kiffartortut, aallartitaasartut annassummik kingornussisussat ikioqqullugit.” — Hebræerit 1:14.

“Takuara inngili alla pavani qilaap ataani timmisoq. Nalunaarutigiartorpaa iivangkiiliu atajuartussaq nunarsuarmi najugaqartunut, inuiaqatigiinnut naggueqatigiinnullu, immikkut oqaasilinnut inuiannullu tamanut, inngililu nipitoqisumik oqarpoq: Guuti mianerisiuk naalannartillugulu.” — Saqqummersitat 14:6, 7.

EQQUNNGITSOQ: JIISUSIP GUUTI NALIGAA

“[Ilisimaqquara] angutip kialuunniit Kristusi niaqorimmagu, arnap angut niaqorimmagu, Kristusillu niaqua Guutiummat.” — 1 Korinthimiut 11:3.

“[Suut] tamarmik taassumunnga naalatsigititaareerpata taava Erneq nammineq naalatsigitikkumaarpoq tamanik imminut naalatsigititsisumut, Guuti tamani tamarsooqqullugu.” — 1 Korinthimiut 15:28.

“Ilumut, ilumut oqarfigaassi: Erneq nammineerluni qanoq iliorsinnaanngivippoq, Ataatap iliuuserisai takusani kisiisa iliuuserisinnaavai.” — Johannesi 5:19.