Guutimut palligunniarit

‘Kunngeqarfiit atajuassaaq’

Samuelimik allakkat aappaat 7:1-16

OQALUTTUARISAANERUP ingerlanerani naalakkersuisut nunamiusut amerlasuut atorfitsik atorfigiunnaarsimavaat. Ilaat qinerneqaqqinngillat, ilaalli uppititaasimapput. Taavami Jiisusi Kristusi, Guutip naalagaaffiani qilammiittumi kunngiusoq? Kunngisut Guutip toqqagaatut naalakkersuinissaanut akornusiisoqarsinnaava? Tamatumunnga akissutissarsisinnaavugut Jehovap Israelimi kunngimut Daavimut oqaasiini, Samuelimik allakkat aappaanni kapitali 7-imi allaaserineqartumi.

Kapitalip aallaqqaasiutaani paasivarput Daavip, kunngip nunamiuinnaap, kanngusuutigigaa illussaarsuarmi kusanartumi najugaqarnini, Guutip angerusiata illerfia tupiinnarmi inississimatillugu. * Daavip ersersippaa kissaatigingaarlugu Jehovamut naleqquttumik illuliornissani, naalaffiliornissani. (Versi 2) Illuli taanna Daavimit sananeqartussaanngilaq. Pruffiiti Natani aqqutigalugu Jehovap Daavi paasitippaa ernerisa ilaat naalaffiliortuujumaartoq. — Versit 4, 5, 12, 13.

Jehovap Daavip qamannga pisumik kissaataa killinneqaatigaa, taamaattumik Daavip tunniusimanera pissutigalugu siulittuutillu naapertorlugit taanna angerfigeqatigaa. Daavip kinguaavini kunngikkormiuni naassaanngitsumik naalagaasussaq saqqummersikkumaarpaa. Natanip neriorsuut Guutimeersoq pingaartorsiornartoq tamanna Daavimut ima nalunaarutigaa: “Kinguaassatit kunngeqarfiillu atajuassapput kiinnama saani, issiavissaarsuillu soraajuitsumik aalajaassaaq.” (Versi 16) Angerutsimit tamatuminnga ataavartumik kingornussisussaq — naassaanngitsumik naalagaasussaq — kinaava? — Tussiaat 89:21, 30, 35-37.

Jiisusi Nazaretimioq Daavip kinguaaraa. Jiisusip inunngornissaa nalunaarutigalugu inngili ima oqarpoq: “[Guutip Jehovap] tunissavaa ataataata Daavip issiavissaarsuanik; Jaakukkunnut kunngiussaaq naassaanngitsumik, naalagaassusialu atajuaannassaaq.” (Lukasi 1:32, 33) Daavimik angeruseq Jiisusi Kristusi aqqutigalugu piviusunngorumaartoq paasivarput. Tassa Jiisusi inunnit qinerneqanngilaq, kunnginngorporli Guutip neriorsuutaa pingaartorsiornartoq pissutigalugu, neriorsuut naassaanngitsumik naalakkersuisinnaatitsisoq. Guutillu neriorsuutai tamatigut eqquuttarput! — Esaja 55:10, 11.

Samuelimik allakkat aappaat kapitali 7-imiittut pingaarutillit marluk ilinniarfigisinnaavavut. Siullermik, qularutiginngilluinnarsinnaavarput Jiisusi Kristusi naalakkersuinissamut kimilluunniit sumilluunniillu akornuserneqarsinnaanngitsoq. Taamaattumik qulakkeersinnaavarput naalagaaffimminut siunertaasoq — Guutip piumasaa qilammisut nunamissaaq pissasoq — naammassissagaa. — Matthæusi 6:9, 10.

Aappassaanik, oqaluttuaq tamanna Jehova pillugu qamuuna attortinnartumik ilinniutigisinnaavarput. Eqqaamajuk Jehovap Daavip siunertai ajunngitsut malugalugillu pingaartikkai. Tuppallersaataavoq nalunagu Jehovap imminut pallorfiginninnermut tunniusimajuarusunnerput pingaartikkaa. Ilaatigut pissutsit qanoq iliuuseqarfigisinnaanngisavut pissutigalugit, soorlu peqqiilliorneq utoqqalinerlu, Guutimut kiffartornermi iliuusererusutavut tamaasa iliuuserisinnaanngilavut. Taamaappat tuppallersaataasinnaavoq nalunagu Jehovap tamatigut imminut tunniusimanerput siunertavullu ajunngitsut malugisarai.

[Quppernerup ataani ilanngussaq]