Kristusitut naalattuullutillu sapiitsuugit

‘Nikalloqinasi [Sapiitsuugitsi, NV], silarsuarmut ajugaareerpunga.’ — JOHANNESI 16:33.

1. Jiisusi Guutimut qanoq naalatsigiva?

JIISUSI KRISTUSI tamatigut Guutimut naalattarpoq. Ataatami qilammiusup piumasaanut akerliusumik iliornissani ataasiaannarluniluunniit eqqarsaatigisimanngilaa. (Johannesi 4:34; Hebræerit 7:26) Nunarsuarmili misigisimasai pissutaallutik naalannissaq taassumunnga imaannaanngilaq. Oqaluussisartutut kiffartornini aallartimmaguli taassumunnga akeraasut, aamma Saatanip, aalajaakkunnaarsinniarlugu assigiinngitsutigut qularunnaarseriaraluarlugulu pinngitsaaleriaraluarlugulu nakuteriaraluarpaat. (Matthæusi 4:1-11; Lukasi 20:20-25) Akeqqat taakkua Jiisusi naalliutsippaat — eqqarsartaatsikkut, misigissutsikkut timikkullu. Naggataatigut toquppaat, nappakkamut anniartitaaffimmut kikiattugaatillugu. (Matthæusi 26:37, 38; Lukasi 22:44; Johannesi 19:1, 17, 18) Tamakkuninnga tamanik misigisaqaraluarluni naalliutsinneqangaaraluarlunilu Jiisusi ‘naalappoq toqumut allaat’. — Filippimiut 2:8.

2, 3. Jiisusip naalliuuteqaraluarluni naalannera sumik ilinniarfigisinnaavarput?

² Jiisusip inuttut nunarsuarmiitilluni misigisani naalannerup aamma qanoq allatut paasisariaqarneranik paasisaqarfigaa. (Hebræerit 5:8) Jiisusi Jehovamut kiffartornermut tunngatillugu ilinniagassaaruppasissinnaagaluarpoq. Tassami ukiuni  kisissaanngitsuni Jehovamut anngigisaqarnani qanittumik attaveqarpoq pinngortitsinermilu ‘suliortuusimalluni’. (Ussatit 8:30, 1900) Naalliunnerminili inuttut nammineq pinertusaarnermigut uppernarsarpaa assuarnaalluinnarluni. Jiisusi, Guutip ernera, anersaakkut ineriartorpoq. Tamanna sumik ilinniarfigisinnaavarput?

³ Jiisusi naammalluinnartuugaluarluni nammineerluni naalalluinnarniarsarinngilaq. Guuti qinnuigisarpaa ikioqqulluni. (Atuaruk Hebræerit 5:7). Uaguttaaq naalattuassagutta maniguuttariaqarpugut Guutilu qinnuigalugu ikioqqulluta. Taamaattumik apustilip Paulusip kristumiut ima oqaaqqissaarpai: “Ilasi allat pillugit isumaliortaritsi Kristusi-Jiisusimiittutut”, ‘nikanartilluni toqumut allaat naalattutut.’ (Filippimiut 2:5-8) Jiisusip inuuneranit uppernarsarneqarpoq inuit naalattuarsinnaasut, innuttaaqatigiinni ajortuullutillu guutiitsuniikkaluarunilluunniit. Soorunami Jiisusi naammalluinnartuuvoq. Uagummi inuit naammalluinnanngitsut?

Naammalluinnanngitsuugaluarluta naalassinnaavugut

4. Ileqqussatigut kiffaanngissusilittut pinngortitaanerput qanoq paasisariaqarpa?

⁴ Guutip Adami Evalu pinngortitatut sianissusilittut ileqqussatigut kiffaanngissusilittut pinngortippai. Taakkua kinguaarimmatigut uaguttaaq ileqqussatigut kiffaanngissuseqarpugut. Tamanna qanoq paasisariaqarami? Tassa nammineq aalajangersinnaasugut ajunngitsumik ajortumilluunniit iliorusunnerluta. Allatut oqaatigalugu: Guutip kiffaanngissusilersimavaatigut naalanniarlugu naalanniarnaguluunniit aalajangernissamut. Kiffaanngissuseq annertooq tamanna akisussaaffittaqarpoq. Iliuutsivut akisussaaffigaavut. Aap, ileqqussatigut aalajangikkavut inuunermik toqumilluunniit kinguneqarsinnaapput. Aamma qanigisatsinnut sunniuteqarsinnaapput.

5. Tamatta suna ilungersuutigaarput, ilungersornitsinnilu qanoq iluatsilluarsinnaavugut?

⁵ Naammalluinnanngissuserput kingornussarput pissutigalugu naalannissaq uagutsinnut pissusissamisuunngilaq. Guutip inatsisaanut naalannissaq ajornaatsuujuaannanngilaq. Ilungersunarsinnaavoq. Paulusip tamanna misigisimavaa. Ima allappoq: “Paasisarpara inatsisinik allanik avatinniittoqartoq, taakkulu inatsisinut eqqarsaatinniittunut akerartortuusut ajortillu inatsisaanit avatinniittunit tiguagaatillunga.” (Romamiut 7:23) Naalanneq pilliuteqarnermik, naalliunnermik erloqissutinilluunniit kinguneqanngikkaangat soorunami ajornannginnerusarpoq. Kisianni naalakkumallutalu ‘uinngullu pilerigisaanik isillu pilerigisaannik’ malinnikkumaleraangatta qanoq periartarpugut? Ajortunik kissaateqartarnerput ilaatigut naammalluinnanngissutsitsinnik ilaatigullu ‘silarsuup anersaavata’ sunniineranik pissuteqartarpoq, taakkulu sunniisinnaassusilipilussuupput. (1 Johannesi 2:16; 1 Korinthimiut 2:12) Taakku akiorsinnaajumallugit misilinneqannginnitsinni usserneqannginnitsinnilu ‘uummaterput piareersartariaqarparput’ (NV), aamma qanorluunniit pisoqassagaluarpat Jehovamut naalannissarput aalajangiutereersimasariaqarparput. (Tussiaat 78:8) Oqaluttuarpassuarnit Biibilimiittunit erserpoq ilaat naalassinnaasimasut aalajangiussereersimanertik pissutigalugu. — Ezra 7:10; Danieli 1:8.

6, 7. Nammineq atuaqqissaarneq silatusaartumik aalajangernissamut qanoq iluaqutigisinnaagipput assersuuteqarlutit oqaluttuariuk.

⁶ ‘Uummaterput piareersarsinnaavarput’ ilaatigut eqiasuilluta Biibilimik Biibililersaarutinillu atuaqqissaartarnitsigut. Manna takorlooriaruk: Unnuuvoq illit nammineq atuaqqissaarnissannut immikkoortissimasat. Jehova qinnuigeqqammerpat anersaaminik ikioqqullutit taassuma oqaasianit ilikkakkannik atuisinnaaqqullutit. Aqaguani filmi aalajangersimasoq fjernsynikkut isiginnaarniarlugu pilersaarputit. Filmip eqqartorneqarluarsimanera tusarsimavat, aammali nalunngilat kinguaassiuutitigut inuunerluttortaqartoq nakuusertortaqartorlu.

⁷ Paulusip siunnersuutaa Efesosimiut 5:3-mi allassimasoq una eqqaavat: “Kinguaassiuutitigut inuunerlunneq mingunnartullu suulluunniit piumatuussuserlu taaneqassanngillalluunniit akornassinni, illernartut tamakku ileqqussarinngimmatigit.” Aamma Filippimiut 4:8-mi allassimasut eqqaalerpatit. (Atuagassaq). Siunnersuut isumassarsiarititaasoq tamanna eqqarsaatigitillugu imminut ima aperivutit: ‘Uummatima isumamalu filminit tamakkunannga sunnerneqarnissaat  piaaralunga akuerigukku, taava Jiisusip Guutimut sutigut tamatigut naalattuarnermut tunngatillugu maligassiaanik malinnissaanga?’ Qanoq pissavit? Aqaguani filmi taanna suli takorusussaviuk?

8. Sooq ileqqussatigut anersaakkullu ittutigut qutsissunik najoqqutaqartariaqarpugut?

⁸ Kukkussaagut ileqqussatigut anersaakkullu ittutigut najoqqutarisavut qasukkartikkutsigit, isumaqarluta ima nukissaqartigaluta ikinngutipalaanit — aamma aliikkutassianit nakuusertortalinnit kinguaassiuutitigullu inuunerluttortalinnit — sunnertissinnaanata. Imminulli illersortariaqarpugut aamma meeqqavut illersortariaqarpavut Saatanip anersaavanit sunnertikkumanata. Qarasaasiallit qarasaasiatik virusimit navianartumit paasissutissanik aserorterisinnaasumit, atortunik akornusiisinnaasumit, immaqalu allaat qarasaasiamik — taanna qarasaasianik allanik saassussinissamut atorlugu — tiguaasinnaasumit saassunneqaqqunagit mianersoqqissaartarput. Uagut Saatanip ‘qoqassiiniutaanut’ imminut illersornissamut tunngatillugu mianersunnginnerussanngilagut, ilaa? — Efesosimiut 6:11.

9. Sooq Jehovamut naalannissarput ullut tamaasa aalajangiusimasariaqarparput?

⁹ Ullut tamarluinnangajaasa arlaatigut aalajangertariaqartarpugut Jehovap peqqusineratut iliorniarnerluta iliorniannginnerlutaluunniit. Annaanneqarumalluta Guuti naalattariaqarparput taassumalu najoqqutassiai naapertuilluartut malillugit inuusariaqarluta. Kristusitut ‘toqumut allaat naalannitsigut’ ersersissavarput uppernerput piviusuusoq, Jehovallu aalajaannerput pillugu akissarsisissavaatigut. Jiisusi ima oqarpoq: “[Naggatissamut] nikallujuitsuusoq annaanneqassaaq.” (Matthæusi 24:13) Jiisusitut sapiitsuusariaqarpugut.

Jiisusi — sapiitsuunikkut maligassaalluarnerpaaq

10. Qanoq tatineqartarpugut, qanorlu iliortariaqarpugut?

¹⁰ Ullut tamaasa silarsuarmi matumani isiginnittaaserineqartunit pissuserineqartunillu sunnerneqariaannaasaratta taakkunannga mingutsinneqarumanata sapiitsuusariaqarpugut. Ileqqussatigut, innuttaaqatigiinnikkut, aningaasatigut upperisarsiornikkullu tatineqartarpugut Jehovap aqqutigeqqusaanit naapertuilluartunit nigussutigisinnaasatsinnik. Ilarpassuavut ilaquttaminnit akerlilersorneqarput. Atuarfinni ilinniarfinnilu pinngoriartuaarsimaneraaneq tapersersorneqaleraluttuinnarpoq, aamma guuteqannginneraasuunerarneq nalinginnaanerulersimavoq. Tatisinerit tamakku iliuuseqarnata sumiginnaannarsinnaanngilavut. Tatisinerit tamakku akiorniarlugit iliuuseqartariaqarpugut taamaalillutalu imminut illersorluta. Jiisusi tamatumunnga tunngatillugu maligassaavoq.

11. Jiisusip maligassiaanik eqqarsaatiginninneq qanoq sapiissuseqarnerulissutigisinnaavarput?

¹¹ Jiisusip ajoqersukkani ima oqarfigai: “Silarsuarmi naalliuuteqarpusi; nikalloqinasili [sapiitsuugitsili, NV], silarsuarmut ajugaareerpunga.” (Johannesi 16:33) Taanna silarsuup sunniineranut nakkaannanngisaannarpoq. Silarsuaq oqaluussinerminik naammassinninnissamut akornutiginngisaannarpaa pallorfiginninnermilu ilumoortumi najoqqutassianik ileqqussanilluunniit qasukkartitsissutiginngisaannarlugu. Uagut aamma taamaattariaqarpugut. Jiisusi Ataataminut qilammiusumut qinnummini ajoqersukkani pillugit  ima oqarpoq: “Silarsuarmut ilaanngillat, soorlu uanga silarsuarmut ilaanngitsunga.” (Johannesi 17:16, NV) Jiisusip maligassiaanik qimerluuinikkut qanorlu sapiillisaarsimaneranik eqqarsaatiginninnikkut silarsuarmit avissaaqqanissamut pisariaqartumik sapiissuseqalersinnaavugut.

Jiisusip sapiissusia ilinniarfigiuk

12-14. Jiisusi qanoq sapiillisaarsimanersoq oqaluttuariuk.

¹² Jiisusi nunarsuarmi kiffartornermini sapiissuseqangaarpoq. Guutip erneratut oqartussaassuseqarluni sapiilluni “naalaffiup silarlianut iserpoq, tassanilu tuniniaasut pisiniartullu tamaasa anisippai, aningaasanillu nioqquteqartut nerrivii tuinillu nioqquteqartut issiavii uppitippai”. (Matthæusi 21:12) Nunarsuarmi inuunermini unnummi kingullermi sakkutuut tigusariartormanni ajoqersukkani sernissorniarlugit sapiilluni sassarpoq imalu oqarluni: “[Uanga] ujagarigassinga taava ilakka uku qimagutitiinnarsigit.” (Johannesi 18:8) Tamatuma kingunitsianngua Petrusi oqarfigaa pannani puuanut mannguteqqullugu, taamaalillunilu ersersippaa sakkut nunamiittut tutsuiginagit Jehova tatigalugu. — Johannesi 18:11.

¹³ Jiisusip taamanikkut ilinniartitsisut asannissuseqanngitsut taakkualu ajoqersuutaat eqqunngitsut sapiilluni qulaarpai. Ima oqarfigai: “Eqqanaq ilissi allakkanik ilisimasut farisiiarillu, ilumoortuusaartusi! Qilaammi Naalagaaffia inunnut matoqqatipparsi. . . . Myntit dildillu kumaasallu pissarsiassi qulingi tunniuttarpasi, sumiginnartarpasili inatsisini pingaarnerutitat: naapertuilluarneq nallittuinerlu ilumoorsuserlu. . . . Ermusermi igarlu qaaginnaasigut salittarpasi, ilumikkulli piumatussutsimik ajussutsimillu ulikkaarput.” (Matthæusi 23:13, 23, 25) Jiisusip ajoqersugai tamatumunnga assingusumik sapiissuseqartariaqarput, upperisarsiornikkummi siuttut taakkuninngattaaq malersuillutillu toqutsiniarsariumaarmata. — Matthæusi 23:34; 24:9.

¹⁴ Jiisusi aamma anersaapilunnut sapiillisaarpoq. Ilaanni naapippaa angut anersaapilulik ima nukittutigisoq kalunnernilluunniit qilersorneqarsinnaanani. Ersiginagu Jiisusip anersaapiluppassuit angummik taassuminnga aqutsisut anisippai. (Markusi 5:1-13) Guutip ullumikkut kristumiut taamatut tupinnartuliorsinnaatinngilai. Oqaluussinitsinnili ilinniartitsinitsinnilu Saatanimut, ‘uppinngitsut eqqarsaataannik tappiillisitsisimasumut’, akiuuttussaavugut. (2 Korinthimiut 4:4) Soorlu Jiisusimut tunngatillugu taamaattoq, sakkuvut “tassaanngillat silarsuup pii, tassaappulli Guutimit pissatsitaasut pallittaalisaliat” — uppersiarsiornikkut paasinnittaatsit eqqunngitsut aalajangiutivissimasat —  “aserortersinnaallugit”. (2 Korinthimiut 10:4) Sakkunik anersaakkut ittunik taakkuninnga atuinermut tunngatillugu Jiisusi ilinniarfigingaarsinnaavarput.

15. Jiisusip sapiissusia sumit aallaaveqarpa?

¹⁵ Jiisusip sapiissusia takoqqusaarusussusermit aallaaveqarnani uppernermit aallaaveqarpoq. Aamma uagut sapiissuserput taamaattariaqarpoq. (Markusi 4:40) Qanoq ililluta piviusumik uppissuseqalersinnaavugut? Matumanissaaq Jiisusip maligassiaanit siulersortittariaqarpugut. Jiisusip ersersippaa Allakkat pillugit ilisimasaqarluarluni aamma taakku tutsuigilluinnarlugit. Pana ilumoortoq atornagu anersaap panaa, Guutip oqaasia, atorpaa. Ajoqersuutigisani Allakkani allassimasunik tunngavilersortuartarpai. Ima aallarniigajuppoq: “Ima allassimavoq,” tassa Guutip oqaasiani. *

16. Qanoq ililluta uppissuseqarnerulersinnaavugut?

¹⁶ Upperneq misilinneqarnernik Kristusimut ajoqersugaalluni atunngitsuugassaanngitsunik akiuisinnaasoq ineriartortissinnaajumallugu uaguttaaq Allakkat pillugit ilisimasaqarluartariaqarpugut. Ullut tamaasa Biibili  atuartariaqarlugulu atuaqqissaartariaqarparput kristumiullu ataatsimiinnerinut najuuttariaqarluta, sallusuissutit uppernermut tunngaviusut pigiliullugit. (Romamiut 10:17) Aamma atuakkavut eqqarsaatigeqqissaartariaqarpavut uummammiuliuttariaqarlugillu. Aatsaat uummaarissumik uppissuseqaraanni sapiillisaartoqarsinnaavoq. (Jaaku 2:17) Aammattaaq Guutip anersaava illernartoq qinnutigisariaqarparput, anersaammi tamatuma upperneq inerititaraa. — Galatiamiut 5:22, NV.

17, 18. Qatanngut arnaq inuusuttoq atuarfimmi qanoq sapiillisaarpa?

¹⁷ Qatanngutip arnap inuusuttup Kittymik atillip uppernerup piviusup sapiissuseqalersitsisarnera misigisimavaa. Meeraagallaramili nalunngilaa atuarfimmi ‘iivangkiiliu kanngusuutigisussaanagu’, aamma atuaqatiminut nalunaajaarusuttupilussuuvoq. (Romamiut 1:16) Ukiut tamaasa taakku oqaluussiffiginiartaraluarpai, iluatsinngilarli sapiissuseqarpiannginnami. Ukiualuit tamatuma kingorna atuarfimmut allamut nuuppoq. Maanna ima eqqarsarpoq: “Maanna periarfissat tamaasa atorluarniarpakka. Maanna oqaluussiniarsarerusuppunga.” Guuti qinnuigaa sapiissuseqalerseqqulluni naliliisinnaassuseqalerseqqullunilu, tulluartumillu periarfissaqalerseqqulluni.

¹⁸ Ullormi atuarfimmi siullermi atuartut qinnuigineqarput ataasiakkaarlutik imminut ilisariteqqullugit. Arlallit upperisarsiornikkut tunuliaquttatik eqqaavaat ilanngullugulu eqqaallugu upperisartik imatorsuaq aallunnagu. Kittyp ingerlaannaq paasivaa tamanna tassaasoq periarfissaq qinnutigisimasani. Imminut ilisaritittussanngorami sapiilluni ima oqarpoq: “Uanga Jehovap Nalunaajaasuisa ilagaannga, aamma ileqqussanut upperisarsiornermullu tunngasutigut Biibili maleruartarpara.” Suli oqalutsillugu atuartut ilaat kiinarsorput. Allalli tusarnaarput kingusinnerusukkullu apeqquteqarlutik. Allaat ilinniartitsisup Kitty maligassaalluarnerarpaa upperisani miserratiginngimmagu. Kittylu nuannaaqaaq Jiisusip maligassiaa malillugu sapiillisaarami.

Kristusitut upperlutillu sapiitsuugit

19. (a) Piviusumik uppissuseqarnermut suna ilaava? (b) Jehova qanoq ililluta nuannaartissinnaavarput?

¹⁹ Aamma apustilit paasivaat sapiissuseqarumallutik uppissuseqartariaqarlutik. Taamaattumik Jiisusi ima oqarfigaat: “Uppernermik annerusumik tunisigut.” (Atuakkit Lukasi 17:5, 6). Upperneq piviusoq tassaaginnanngilaq Guutip piuneranik upperinninneq. Piviusumik uppissuseqarnermut ilaavoq Jehovamut anngigisaqarnani qanittumik attaveqarnermik, meerannguup ataatamut asannillunilu pitsaasumut attaveqartarneratut ittumik, ineriartortitsineq. Salomo isumassarsisitaalluni ima allappoq: “Ernera, ilisimassuseq uummatinni pigigukku uangattaaq uummatima nuannaarutigissavaa. Qamuuna qiimmattassaanga qarlutit peqqusersuitsumik oqaluppata.” (Ussatit 23:15, 16) Taamatuttaaq Jehova nuannaassaaq najoqqutassiat naapertuilluartut sapiilluta aalajangiusimagutsigit. Aamma Jehovamik nuannaartitsinitsinnik ilisimaarinninnerput suli sapiissuseqarnerulissutigissavarput. Taamaattumik Jiisusip maligassiaa malittuartigu sapiilluta eqqortunillu aalajangiusimannilluta.

[Quppernerup ataani ilanngussaq]

Uku nassuiarsinnaavigit?

• Naammalluinnanngitsuugaluarluta suna naalattuarsinnaannguutigissavarput?

• Upperneq piviusoq sumit aallaaveqarpa, sapiitsuunissamullu qanoq iluaqutigisinnaavarput?

• Kristusitut naalattuullutalu sapiitsuunerput qanoq kinguneqassava?

[Atuaqqissaarnermi apeqqutit]

[Qupp. 16-mi assiliartaq]

‘Uummatit’ ussernartunik akiuinissamut ‘piareersartarpiuk’?

[Qupp. 18-mi assiliartaq]

Jiisusitut uppernermit aallaaveqartumik sapiillisaarsinnaavugut